རྒྱ་གར་རིག་གཞུང་ལྷན་ཁང་གིས་རོགས་སྐྱོར་འོག ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་བོད་ཀྱི་གསོ་བ་རིག་པའི་གཞུང་ལུགས་བཞིན་སྨན་བཅོས་དང་ཉམས་ཞིབ་བྱ་སའི་སྨན་ཁང་ཞིག་འཛུགས་ཀྱིན་འདུག 
ཁ་སང་རྒྱ་གར་གྱི་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་རིག་གཞུང་ལྷན་ཁང་གིས་རོགས་སྐྱོར་འོག་ཧིན་སྒོར་བྱེ་བ་ ༤༧། ༧ གནང་སྟེ། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་གསོ་བ་རིག་པའི་སྨན་ཁང་གསར་འཛུགས་བྱེད་བཞིན་ཡོད་པ་དང་། སྨན་ཁང་དེར་གསོ་བ་རིག་པའི་གཞུང་ལུགས་དང་མཐུན་པའི་སྨན་བཅོས་བྱ་རྒྱུ་ཡིན་པ་མ་ཟད། འདི་ལོའི་ཕྱི་ཟླ་ ༡༢ ནང་ཚུད་དུ་གསར་རྒྱག་བྱ་ཐུབ་པའི་ཚོད་དཔག་བྱེད་ཀྱི་ཡོད་འདུག
འདི་གའི་གསར་འགོད་པས་ཁ་པར་བརྒྱུད་གསོ་བ་རིག་པའི་སྡེ་ཚན་གྱི་འགན་འཛིན་སྨན་རམས་པ་བཀྲ་ཤིས་ཟླ་བ་ལགས་སུ་གསོ་བ་རིག་པའི་སྨན་ཁང་གསར་འཛུགས་གནང་དགོས་པའི་རྒྱུ་མཚན་དྲིས་པར། ཁོང་གིས། སྤྱིར་བཏང་སྨན་ཁང་ལ་སྒོ་བསྟེན་(OPD) སྨན་ཁང་དང་ཞག་སྡོད་སྨན་ཁང་ཡོད་པ་རེད། སྨན་ཁང་དེར་གཙོ་བོ་གཞི་རིམ་དཀའ་བཅུ་པའི་སློབ་མ་ཚོའི་སློབ་སྦྱོང་བྱ་རྒྱུ་དང་། སྨན་རམས་པ་དང་འབུམ་རམས་པའི་སློབ་ཕྲུག་ཚོས་ཉམས་མྱོང་གསོག་རྒྱུ། ནད་པ་ལ་ཕན་ཐོགས་ཡོང་བའི་ཆེད་དུ་རེད། སྨན་ཁང་དེ་གློ་བུར་དུ་བཙུགས་པ་ཞིག་མ་རེད། ཕྱི་ལོ་ ༡༩༩༩ ནས་སློབ་དཔོན་ཟམ་གདོང་རིན་པོ་ཆེ་མཆོག་དང་དེའི་རྗེས་དགེ་བཤེས་ངག་དབང་བསམ་གཏན་ལགས། དེ་ནས་རིག་སྡེ་འགན་འཛིན་རྒན་བློ་བཟང་བསྟན་འཛིན་ལགས་དང་ད་ལྟའི་རིག་སྡེ་འགན་འཛིན་རྒན་རྡོ་རྗེ་དགྲ་འདུལ་ལགས་སོགས་ཀྱིས་སྔ་ས་ནས་སྨན་ཁང་གསར་འཛུགས་བྱ་རྒྱུའི་འཆར་གཞི་སྒྲིག་སྟེ་ཕྱིས་སུ་རྒྱ་གར་གཞུང་གིས་ངོས་ལེན་བྱུང་ནས་གསར་འཛུགས་བྱེད་བཞིན་པ་རེད། ཅེས་བརྗོད་བྱུང་།
སྨན་ཁང་གསར་འཛུགས་བྱེད་བཞིན་ཡོད་པ་དེ་རྒྱ་གར་གཞུང་གིས་ངོས་ལེན་གང་འདྲ་ཡོད་མེད་སྐོར་དྲིས་པར་ཁོང་གིས། སྨན་ཁང་དེ་སྨན་ཁང་དུ་ངོས་ལེན་བྱུང་ཡོད་མ་རེད། རྒྱ་གར་རིག་གཞུང་ལྷན་ཁང་ནས་འགྲོ་གྲོན་གསོལ་རས་གནང་བ་རེད། སྨན་ཁང་གི་ངོ་བོ་ཡིན་མིན་གྱི་ཚད་གཞི་དེ་མངའ་སྡེ་གཞུང་ནས་གནང་དགོས་ཀྱི་ཡོད་རེད། མངའ་སྡེ་གཞུང་ནས་གནང་བར་ཆ་རྐྱེན་གྱི་རིམ་པ་མང་པོ་བརྒྱུད་ནས་སྨན་ཁང་ལ་རྩིས་ན་འགྲིག་གི་འདུག་ཟེར་བའི་ཆ་རྐྱེན་སྤྲད་ན། གཞི་ནས་སྨན་ཁང་ལ་ངོས་ལེན་འབྱུང་གི་ཡོད་རེད། དེར་བརྟེན་ད་ལྟ་སྨན་ཁང་གི་དེབ་སྐྱེལ་གྱི་ལས་གཞི་འགྲོ་བཞིན་ཡོད་རེད། མཐོ་སློབ་དེ་རྒྱ་གར་གཞུང་དང་སྔོན་མ་ནས་འབྲེལ་བ་ཡོད་རེད། ༧གོང་ས་མཆོག་གིས་ནེ་རུ་དང་བཀའ་མོལ་གནང་བ་ནས་བཟུང་སློབ་གྲྭ་སོགས་བཙུགས་ཏེ་འབྲེལ་བ་ཡོད་པ་རེད། ཕྱི་ལོ་ ༢༠༡༠ ལོར་རྒྱ་གར་རྒྱལ་ཡོངས་སུ་གསོ་བ་རིག་པ་ངོས་ལེན་བྱུང་སྟེ། གཞུང་གིས་གསལ་བསྒྲགས་བཏང་བའི་ནང་གལ་སྲིད་སློབ་ཕྲུག་ ༡༥ ཚུད་པ་ཡིན་ན་ཉུང་མཐར་སྒོ་བསྟེན་སྨན་ཁང་ ༤ དགོས་པ་དང་ཞག་སྡོད་སྨན་ཁང་ནང་ཉུང་མཐར་ཉལ་ཁྲི་ ༡༠ དགོས་ཀྱི་རེད་ཟེར་ནས་ཆ་རྐྱེན་བཞག་ཡོད་པར་བརྟེན། ད་ལྟ་གསར་འཛུགས་བྱེད་བཞིན་པའི་སྨན་ཁང་དེར་ཉལ་ཁྲི་ ༡༠༠ གཟུག་འཆར་ཡོད། དེ་ཡང་རིམ་པ་དང་པོར་ཉལ་ཁྲི་ ༤༠ ནས་ ༦༠ བར་གཟུག་རྒྱུ་དང་རིམ་པ་གཉིས་པའི་སྐབས་ཉལ་ཁྲི་ ༡༠༠ གཟུག་འཆར་ཡོད་རེད། ཕྱི་ལོ་ ༢༠༡༩ ལོ་ནས་རྒྱ་གར་གཞུང་གིས་ངོས་ལེན་མེད་པར་གསོ་བ་རིག་པའི་སྨན་ཁང་གསར་པ་བཙུགས་ཆོག་གི་མེད་པ་དང་། ངོས་ལེན་རག་མ་རག་ནི་ཁོ་ཚོས་རྟོག་ཞིབ་ཏུ་བསླེབས་ནས་ཉུང་ཚད་ཆ་རྐྱེན་གྱི་ཚད་གཞི་ལོངས་ན་ལོ་གཅིག་གི་རིང་གནས་སྐབས་ཀྱི་བཀའ་འཁྲོལ་གནང་གི་ཡོད་རེད། གནས་སྐབས་བཀའ་འཁྲོལ་དེ་ཕར་འགྱངས་བྱེད་ཀྱིན་འགྲོ་ཡི་ཡོད། ཕྱི་ལོ་ ༢༠༡༩ ནས་གསོ་བ་རིག་པའི་སྨན་ཁང་གི་རིམ་པ་དང་པོ་གསར་འཛུགས་བྱེད་མགོ་བཙུགས་ཏེ། འདི་ལོའི་ཕྱི་ཟླ་ ༡༢ ཟླ་མཇུག་ཏུ་བཙུགས་ཟིན་གྱི་ཡོད་རེད། རིམ་པ་དང་པོའི་ཕྱག་ལས་གནང་སྟངས་དང་དགོས་མཁོར་བསམ་བློ་གཏོང་གིན་རིམ་པ་གཉིས་པ་གཟུག་རྒྱུ་རེད། སྨན་ཁང་དེ་རྒྱ་གར་གཞུང་གིས་གསོལ་རས་གནང་བའི་བོད་ཀྱི་གསོ་བ་རིག་པའི་སྨན་ཁང་དང་པོ་དེ་རེད། སྤྱིར་སྨན་རྩིས་ཁང་ལ་ཉལ་ཁྲི་ ༡༠ ཅན་གྱི་སྨན་ཁང་ཡོད་རེད་དེ། རྒྱ་གར་གཞུང་གིས་འགྲོ་སོང་བཏང་ནས་ཉལ་ཁྲི་ ༡༠༠ ཡོད་པའི་གསོ་བ་རིག་པའི་སྨན་ཁང་ཐེངས་དང་པོ་རེད། ད་ལྟའི་ཆར་གཞི་རིམ་དཀའ་བཅུ་པའི་སྨན་གྱི་སློབ་ཁྲིད་ཆེད་དུ་དམིགས་རེད་དེ། མ་འོངས་པར་སྨན་རམས་པ་དང་། ནུབ་ཕྱོགས་སྨན་གྱི་ལུགས་སློབ་སྦྱོང་བྱེད་དུ་ཕན་ཐོགས་ཡོང་གི་རེད། ལས་གཞི་དེ་རྒྱ་སྐྱེད་རྒྱུ་ཡོད་རེད། རྒྱ་གར་དང་རྒྱལ་སྤྱིའི་ནང་ཡོད་པའི་གཙུག་ལག་སློབ་ཁང་ནང་སྨན་དང་འབྲེལ་བ་ཡོད་ན་མཉམ་འབྲེལ་བྱ་རྒྱུའི་ལས་གཞི་ཡོང་གི་རེད། ཅེས་བརྗོད་བྱུང་།
མ་འོངས་པར་སྨན་ཁང་དེ་གཞི་རྒྱ་ཆེ་ཆུང་དང་སྨན་པ་ག་ཚོད་ཡོད་སྐོར་དྲིས་པར་ཁོང་གིས། སྐོར་སྐྱོད་སྨན་པ། སྨན་པ། གསོ་བ་རིག་པ་དང་འབྲེལ་བ་ཡོད་པའི་སྨན་ཞབས་པ་མང་དུ་འགྲོ་ཡི་རེད། དེ་བཞིན་སྨན་བཟོ་སྐྲུན་བྱ་དགོས་ཀྱི་ཡོད་སྟབས། རྒྱུན་ལྡན་གྱི་སྨན་བཟོ་སྐྲུན་བྱེད་པ་ཙམ་མིན་པར་སྨན་སྦྱོར་ཚན་པའི་དམིགས་བསལ་གྱི་ཆེད་ལས་བ་གསར་པ་དགོས་ཤིང་། སྨན་སྦྱོར་རྒྱ་སྐྱེད་དེ་ཡར་རྒྱས་གཏང་བ་དང་འདེབས་ལས་ཀྱང་ཡག་པོ་དགོས་ཀྱི་རེད། དེར་བརྟེན་ཕྱོགས་གང་སར་ནས་བལྟས་ཀྱང་ལས་གཞི་རྒྱ་ཆེན་པོ་ཞིག་ཡིན། སྤྱིར་བཏང་སློབ་ཕྲུག་ ༡༥ ཡོད་ན་ཉུང་མཐར་སློབ་ཁྲིད་བྱེད་མཁན་དགེ་རྒན་ ༡༡ དགོས་པའི་ཁྲོད། མི་གྲངས་ ༡ རིག་གནས་དགེ་རྒན་དང་ ༡༠ སྨན་པ་ཡིན་དགོས་། སྨན་པ་ ༡༠ པོས་སྒོ་བསྟེན་སྨན་ཁང་ལའང་སྐོར་སྐྱོད་བྱེད་དེ་སློབ་ཁྲིད་བྱ་དགོས། སྨན་ཁང་གི་སྡེ་ཚན་ནང་སྨན་པ་ ༡༢ ཡས་མས་དང་སྨན་ཞབས་པ་ ༦༠ དགོས་པའི་ཁར། འབྱུང་འགྱུར་ལོ་ ༣༠ དང་ ༤༠ བར་དགོས་མཁོར་དམིགས་ནས་ཕལ་ཆེར་སྨན་པ་ ༡༠༠༠ དགོས་སྲིད་པ་རེད། སྨན་པ་དང་སྨན་ཞབས་པ་དེ་དག་ལ་ལས་ཤག་ཡོད་པ་འདང་ངེས་བྱུང་ན་འདིའི་ནང་བསྡད་ཆོག་པ་དང་། ཕྱི་ལོགས་སུ་ཁང་པ་གླ་ནས་བསྡད་ན་ཁང་གླ་སོགས་སྟེར་གྱི་རེད། ཅེས་བརྗོད་བྱུང་།
སྨན་ཁང་གི་འཛིན་སྐྱོང་དང་སྨན་པ་དེ་དག་བོད་པ་ཡིན་མིན་ཐད་ཁོང་གིས། སྨན་པ་དེ་དག་རྒྱ་གར་གྱི་མི་སེར་ཡིན་ན་ས་མིག་དམིགས་བསལ་ཡོད་པ་དང་། རྒྱ་གར་གཞུང་གི་ངོས་འཛིན་ཡོད་པའི་སྨན་པའི་ལག་ཁྱེར་དང་སྨན་ཞབས་པའི་ལག་ཁྱེར་དགོས་ཤིང་ཉུང་མཐར་དཀའ་བཅུ་པ་ཐོན་པ་ཞིག་དགོས་ཀྱི་ཡོད་རེད། འབྲུག་དང་བལ་ཡུལ་སོགས་ཕྱིའི་རྒྱལ་ཁབ་ཁག་ནས་སྨན་པ་དང་སྨན་ཞབས་ཐོན་པ་དེ་དག་རྒྱ་གར་གྱིས་ལམ་སེང་ངོས་ལེན་བྱེད་ཀྱི་མེད་ཀྱང་། རྒྱ་གར་གྱི་མི་སེར་ཡིན་ན་འཛིན་སྐྱོང་གི་ལས་ཀ་བྱེད་ན་འགྲིག་གི་ཡོད་རེད། ང་རང་ཚོའི་མཐོ་སློབ་ནས་ཐོན་པ་དེ་ཚོས་ཚུད་རྒྱུགས་ཀྱི་ལམ་ནས་མཉམ་ཞུགས་བྱ་ཆོག་གི་ཡོད་པ་རེད། ཅེས་བརྗོད་བྱུང་།
ཕྱི་ལོ་ ༢༠༡༩ ཟླ་ ༣ པ་ནས་གསོ་བ་རིག་པའི་སྨན་ཁང་གི་རིམ་པ་དང་པོ་འཛུགས་སྐྲུན་བྱ་མགོ་བཙུགས་ཏེ། འདི་ལོའི་ཕྱི་ཟླ་ ༡༢ ནང་ལེགས་གྲུབ་འབྱུང་རྒྱུ་ཚོད་དཔག་བྱེད་ཀྱི་འདུག་ལ། སྨན་ཁང་དེར་ཉལ་ཁྲི་ ༤༠ ནས་ ༦༠ བར་གཟུག་འཆར་འདུག རིམ་པ་གཉིས་པར་ཉལ་ཁྲི་ ༡༠༠ ཅན་གྱི་སྨན་ཁང་གཟུག་རྒྱུ་ཡིན་པ་མ་ཟད། རྒྱ་གར་རིག་གཞུང་ལྷན་ཁང་གིས་གསོ་བ་རིག་པའི་སྨན་ཁང་ལ་ཧིན་སྒོར་བྱེ་བ་ ༩༣ ཙམ་གྱི་འགྲོ་གྲོན་གཏང་རྒྱུ་ཡིན་པའི་ཁྲོད། ད་ལྟའི་ཆར་རིམ་པ་དང་པོའི་ཆེད་དུ་ཧིན་སྒོར་བྱེ་བ་ ༤༧།༥ ཙམ་བཏང་ཟིན་འདུག སྨན་ཁང་དེའི་ནང་སྨན་བཅོས་བྱེད་པ་ཙམ་མིན་པར་སློབ་ཁྲིད་དང་ཉམས་ཞིབ་སོགས་བྱ་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ།
