༧གོང་ས་རྒྱལ་བ་རིན་པོ་ཆེ་མཆོག་ནས་ཕྱི་ལོ་ ༡༩༩༠ ལོར་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ཨུ་རུ་སུའི་སྲིད་ཟུར་སྐུ་ཞབས་མེ་ཁེལ་གྷོར་བྷ་ཆོབ་མཆོག་སྐུ་གྲོངས་བར་ཐུགས་གསོའི་གསུང་འཕྲིན་སྩལ་འདུག
ཕྱི་ཟླ་ ༨ ཚེས་ ༣༠ ཉིན་ནོ་སྦེལ་ཞི་བདེའི་གཟེངས་རྟགས་ཐོབ་མྱོང་མཁན་དང་ཨུ་རུ་སུའི་སྲིད་འཛིན་ཟུར་པ་སྐུ་ཞབས་མེ་ཁེལ་གྷོར་བྷ་ཆོབ་ (Mikhail Gorbachev) མཆོག་ཨུ་རུ་སུའི་རྒྱལ་ས་མོ་སི་ཁོའི་དབུས་སྨན་ཁང་དུ་ཡུན་རིང་ནད་མནར་རྐྱེན་གྱིས་སྐུ་གྲོངས་ཡོད་སྟབས། ཁ་སང་༧གོང་ས་མཆོག་ནས་སྲིད་ཟུར་མཆོག་གི་བུ་མོ་ཨི་རི་ནཱ་ (Irina Virganskaya) ལགས་ཀྱི་མཚན་ཐོག་ཏུ་ཁོང་གི་ཤུལ་ལུས་ནང་མི་གཉེན་ཉེ་སོགས་ལ་ཐུགས་གསོའི་གསུང་འཕྲིན་སྩལ་ཡོད་འདུག
དེ་ཡང་ཐུགས་གསོའི་གསུང་འཕྲིན་ནང་། ངོས་རང་དམ་པ་ཁོང་དང་ཁོང་གི་གུ་ཡངས་ཀྱི་བསམ་བློ་དང་བསྒྱུར་བཅོས་བཏང་བ། དེ་བཞིན་གོ་མཚོན་གྱི་དམག་འཁྲུག་ལ་དགག་པ་བརྒྱབ་པར་གུས་བཀུར་ཞུ་ཡི་ཡོད། ཁོང་གིས་འཛམ་གླིང་ནང་དུ་རྡུལ་ཕྲན་མཚོན་ཆ་ཉུང་དུ་གཏོང་བར་ཕྱག་ལས་གནང་ཡོད་པ་རེད། ཅེས་དང་། འདས་པའི་ལོ་ངོ་མང་པོའི་རིང་འཛམ་གླིང་ས་ཕྱོགས་གང་སར་ཁོང་དང་ལྷན་དུ་ཞི་བདེའི་གླེང་སྟེགས་སྣ་མང་ནང་ལྷན་ཞུགས་ཀྱིས་ཐུག་འཕྲད་གནང་རྒྱུའི་གོ་སྐབས་བྱུང་བ་དང་། ངོས་རང་གཉིས་ཀྱི་བར་ལ་འབྲེལ་བ་བཟང་པོ་ཡོད། ཅེས་གསུངས་འདུག
ཡང་༧གོང་ས་མཆོག་ནས་མེ་ཁེལ་གྷོར་བྷ་ཆོབ་མཆོག་ནི་འཆར་སྣང་དང་ལྡན་ཞིང་མིག་དཔེར་འོས་པའི་དབུ་ཁྲིད་ཅིག་ཡིན་ཞིང་། ཁོང་བགྲེས་ཡོལ་དུ་ཕེབས་ཟིན་པའི་རྗེས་སུའང་འཛམ་གླིང་ནང་ཞི་བདེ་དར་སྤེལ་དང་འགྲིག་འཇགས་མུ་མཐུད་དུ་གནང་ཡོད་པ་རེད། ཁོང་གིས་འཛམ་གླིང་ཞི་བདེའི་གཟེངས་རྟགས་བཞེས་མཁན་ཚོའི་ཚོགས་ཆེན་དབུ་འཛུགས་གནང་བར་བརྟེན། ནོ་སྦེལ་ཞི་བདེའི་གཟེངས་རྟགས་བཞེས་མཁན་དང་། འབྲེལ་ཡོད་ཚོགས་པ་རྣམས་མཉམ་འཛོམས་ཀྱིས་སྔར་ལས་ལྷག་པའི་བྱམས་སྐྱོང་དང་ཞི་བདེ་དང་ལྡན་པའི་འཛམ་གླིང་བསྐྲུན་ཐབས་སུ་ཐུན་མོང་གི་བསམ་ཚུལ་ཡོང་གི་ཡོད་པ་རེད། ཅེས་གསུངས་འདུག
མཇུག་ཏུ་༧གོང་ས་མཆོག་གིས། དམ་པ་ཁོང་ནས་མི་ཚེ་དོན་དང་ལྡན་པ་བསྐྱལ་ཡོད་པ་དང་། སེམས་སྐུལ་གནང་བ་ལྟར། ང་ཚོས་རང་དབང་ལྡན་པ་དང་དྲག་དམག་མེད་པའི་འཛམ་གླིང་ཞིག་བསྐྲུན་པའི་ཐོག ཁོང་གི་སྙིང་སྟོབས་གསོན་པོར་འཇོག་དགོས་ཀྱི་ཡོད་པ་རེད། ཅེས་གསུངས་འདུག
མེ་ཁེལ་གྷོར་བྷ་ཆོབ་ (Mikhail Gorbachev) མཆོག་ནི། ཕྱི་ལོ་ ༡༩༣༡ ཟླ་ ༣ ཚེས་ ༢ ཉིན་འཁྲུངས་ཤིང་། ཕྱི་ལོ་ ༡༩༩༥ ལོར་མོ་སི་ཁོའི་གཙུག་ལག་སློབ་གཉེར་ཁང་དུ་ཁྲིམས་ཀྱི་ཐོག་ལ་སློབ་མཐར་ཕྱིན་ནས། (Stavropol) ས་གནས་ཀྱི་ཁྲིམས་རྩོད་པའི་ཕྱག་ལས་གནང་ཡོད་ཀྱང་། ལས་ཀ་དེ་ལ་དོ་དབྱིངས་མེད་པར་བརྟེན་ (Komsomol) དུ་གནས་སྤོས་ཀྱིས་ས་གནས་དེའི་སྤྱི་ཁྱབ་འགན་འཛིན་གནང་སྟེ། གྲོང་སྡེ་ཁག་ལ་ཕྱིན་ནས་ཁོང་ཚོའི་འཚོ་བའི་གནས་སྟངས་ཡར་རྒྱས་གཏོང་ཐབས་གནང་ཡོད་པ་རེད། དེ་ནས་ཕྱི་ལོ་ ༡༩༦༡ ལོར་ས་གནས་དེའི་དྲུང་ཆེ་ཆགས་ཏེ། ཁོང་གིས་མངའ་སྡེ་ཁག་གི་མགོ་ཁྲིད་ཀྱི་ལས་གནས་སུ་བུད་མེད་བསྐོ་གཞག་གནང་ཡོད་འདུག ཁོང་ནི་ཨུ་རུ་སུའི་སྤྱི་མཐུན་རྒྱལ་ཁབ་ཀྱི་མགོ་ཁྲིད་མཐའ་མ་དེ་ཡིན་ཞིང་། ཁོང་གིས་ཕྱི་ལོ་ ༡༩༨༥ ནས་ ༡༩༩༡ བར་དུ་མགོ་ཁྲིད་ཀྱི་ཕྱག་ལས་གནང་བ་དང་། དབྱིན་ཡུལ་དང་ཧྥ་རན་སི། འཇར་མ་ནི་བཅས་དང་འབྲེལ་ལམ་ཡར་རྒྱས་གཏོང་ཐབས་གནང་ཡོད་ལ། རྒྱ་ནག་དང་འབྲེལ་ལམ་མུ་མཐུད་དུ་གོང་འཕེལ་བཏང་ཡོད་པ་རེད། ཕྱི་ལོ་ ༡༩༩༠ ནས་ ༡༩༩༡ བར་ལོ་ངོ་གཅིག་གི་རིང་ལ་སྲིད་འཛིན་གྱི་ཕྱག་ལས་གནང་། ཕྱི་ལོ་ ༡༩༩༠ ལོར་ཁོང་ལ་ནོ་སྦེལ་ཞི་བདེའི་གཟེངས་རྟགས་ཐོབ་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
