དྷ་རམ་ས་ལར་དམངས་གཙོའི་དུས་ཆེན་ཐེངས་ ༦༢ པ་གཞུང་འབྲེལ་སྲུང་གཙི་གནང་།

དམངས་གཙོའི་དུས་ཆེན་ཐེངས་ ༦༢ པའི་མཛད་སྒོའི་ཐོག་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་དངོས་ཡོད་གནས་སྟངས་དང་མང་གཙོའི་ལྟ་གྲུབ་དང་མཐུན་པའི་དུས་བསྟུན་བསྒྱུར་བཅོས་དགོས་གལ་གྱི་གནད་དོན་མངོན་གསལ་དེ་དག་ད་རེས་གྲོས་ཚོགས་ནས་བཅའ་ཁྲིམས་བསྐྱར་བཅོས་ཚོགས་ཆུང་ཞིག་འཛུགས་ཐུབ་པའི་རེ་བ་འཛིན་གྱི་ཡོད་སྐོར་གསུངས་སོང་།

དེ་རིང་སྔ་དྲོ་ཆུ་ཚོད་ ༡༠།༣༠ སྟེང་བཞུགས་སྒར་དྷ་ས་ཐེག་ཆེན་ཆོས་གླིང་གཙུག་ལག་ཁང་གི་ཆོས་རའི་ནང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་དམངས་གཙོའི་གསོལ་རས་སྩལ་ཏེ་ལོ་ངོ་ ༦༢ འཁོར་བའི་གཞུང་འབྲེལ་མཛད་སྒོ་འཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཝི་ཤཱལ་ནེ་རི་ཡ་ (Shri Vishal Nehria) ལགས་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། སྲི་ཞུའི་ལས་བྱེད། དེ་བཞིན་དྷ་ས་ཁུལ་གྱི་སེར་སྐྱ་མི་མང་དང་། སློབ་ཕྲུག་བཅས་འཛོམས་འདུག མཛད་སྒོའི་ཐོག་སྐུ་མགྲོན་གཙོ་བོ་སྐུ་ཞབས་ཝི་ཤཱལ་ལགས་ནས་འདི་ལོའི་སྲིད་སྐྱོང་གཟེངས་རྟགས་ཐོབ་མཁན་རིགས་གཅིག་རྐང་འཛིན་གྱི་སློབ་མ་རྣམས་ལ་ཕྱག་འཁྱེར་དང་ལེགས་གསོལ་གནང་བ་དང་། སྲིད་ཚབ་མཆོག་ནས་འདི་ལོའི་སྲིད་སྐྱོང་སློབ་ཡོན་ཐོབ་མཁན་གྱི་སློབ་མ་གཉིས་དང་། དགའ་ལྡན་ཕོ་བྲང་གི་སློབ་ཡོན་བྱ་དགའ་ཐོབ་མཁན་གྱི་སློབ་མ་བཅུ་ལ་ཕྱག་འཁྱེར་དང་བྱ་དགའ་གནང་སོང་། དེ་བཞིན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་ནས་ཉི་ཧོང་སྐུ་ཚབ་དོན་གཅོད་ཨཅཱརྱ་ཚེ་དབང་རྒྱལ་པོ་ལགས་ཀྱིས་བརྩམས་པའི་དཔེ་དེབ་ (Harnessing the Dragon’s fume) ཞེས་པ་ཕྱི་དྲིལ་རྩོམ་སྒྱུར་དང་ཡིག་སྒྱུར་ཚན་པས་བོད་སྒྱུར་ཞུས་པ་འབྲུག་གི་དུག་རླངས་ལ་ཁ་གཏད་ཅེས་པ་དབུ་འབྱེད་གནང་སོང་།

ཐོག་མར་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༢ འཁོར་བའི་བཀའ་ཤག་གི་གསུང་བཤད་སྒྲོག་སྦྱངས་གནང་སྐབས། བཀའ་ཤག་ནི། ༸རྒྱལ་དབང་སྐུ་ཕྲེང་བདུན་པ་བསྐལ་བཟང་རྒྱ་མཚོ་མཆོག་གིས་ལྕགས་ལུག་ཕྱི་ལོ་ ༡༧༥༡ ལོར་བོད་ལྗོངས་ལུགས་གཉིས་ཆབ་སྲིད་ཀྱི་ཐུགས་འགན་བཞེས་སྐབས་གསར་འཛུགས་མཛད་ཅིང་། བཀའ་ཤག་གི་ཐོག་མའི་གྲུབ་ཆར་སྐྱ་བོ་གསུམ་དང་སེར་མོ་བ་གཅིག་ཡིན་པ་དེ་ཉིད་ད་ལྟའི་བར་འགྱུར་བ་རིམ་ཅན་དུ་སོང་ཡོད་ནའང་། བོད་རྗེ་ཐོག་མ་གཉའ་ཁྲི་བཙན་པོ་ནས་གཞུང་ས་དགའ་ལྡན་ཕོ་བྲང་པ་ཆེན་པོའི་བར་ཁྲིམས་མཐུན་གྱི་གནས་བབས་རྒྱུན་མ་ཆད་པའི་མཚོན་རྟགས་ཏེ། ༸རྒྱལ་དབང་སྐུ་ཕྲེང་བདུན་པ་ཆེན་པོས་སྐབས་དེར་བཀའ་ཤག་ལ་བསྩལ་བའི་བཀའ་དམ་སྲིད་ཞི་བདེ་སྐྱིད་མ་དེ་ཉིད་ད་ལྟའི་བར་བཀའ་ཤག་སྐབས་གསར་རྙིང་བརྗེ་སྐབས་རྩིས་སྤྲོད་རྩིས་ལེན་ཞུ་སྲོལ་ཆགས་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་འཕགས་པའི་ཡུལ་དུ་བཙན་བྱོལ་དུ་༸ཞབས་སོར་འཁོད་དེ། ཕྱི་ལོ་ ༡༩༥༩ ཟླ་ ༤ ཚེས་ ༡༨ ཉིན་ཏེ་ཛི་པཱུར་དུ་གྲོས་མཐུན་དོན་ཚན་བཅུ་བདུན་ནུས་མེད་དུ་ཕྱིན་པའི་གསལ་བསྒྲགས་བསྐྱར་ནན་དུ་བསྐྱངས་པ་དང་། ཕྱི་ལོ་ ༡༩༥༩ ལོའི་ཟླ་ ༤ ཚེས་ ༢༥ ཉིན། མ་སུ་རིར་ཕེབས་ཞབས་སུ་བཅར་འབྱོར་གྱི་བཀའ་བློན་རྣམ་པ་དང་། གཞུང་ཞབས་ལས་བྱེད་བཅས་པར་བོད་གཞུང་གི་སྒྲིག་འཛུགས་དེང་དུས་དང་མཐུན་པའི་བསྐྱར་བཟོ་དང་། ལས་བགོས་རྒྱག་ཕྱོགས་གོ་བསྡུར་དགོས་པའི་བཀའ་སློབ་ཕེབས་དོན་ལྟར། ཕྱི་ཟླ་ ༤ ཚེས་ ༢༩ ཉིན་གོ་བསྡུར་ཞུས་པའི་ཚིག་ཐོ་སྙན་གསན་ཞུས་པར། བར་བརྒལ་གྱི་ཚུལ་དུ་སྐབས་དང་པོའི་བཀའ་ཤག་ཏུ་སྲིད་བློན་ལས་ཚབ་གཅིག་དང་། བཀའ་བློན་ལས་ཁུངས་བཞི་ལ་བཀའ་བློན་དང་ཕྱག་སྦྲེལ་ལས་བྱེད་བཅས་བསྐོ་གཞག་དང་། ལས་བགོས་མཛད་ཅིང་། ལོ་དེའི་ཕྱི་ཟླ་ ༦ ཚེས་ ༢༠ ཉིན་མ་སུ་རིར་ཐེངས་དང་པོར་གསར་འགྱུར་བརྒྱུད་ལམ་གྱི་བཅར་འདྲིར་བཀའ་ལན་གནང་སྐབས། ང་དང་ངའི་བཀའ་ཤག་གང་དུ་ཡོད་པ་དེར་བོད་མི་ཚོས་བོད་གཞུང་ལ་ངོས་འཛིན་བྱེད་ཀྱི་ཡོད་ཅེས་བཀའ་བསྩལ་ཡོད།

ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན། བཀའ་བློན་དང་འགན་འཛིན། དྲུང་ཆེ་སོགས་མི་འགྲོ་བོད་མི་མང་སྤྱི་འཐུས་རྣམས་ནས་མང་མོས་འོས་བསྡུ་འཆར་ཕུལ་ལྟར་གོང་ས་མཆོག་གིས་བསྐོ་གཞག་གནང་ལམ་བཟོས་རྗེས། དེ་སྔ་ཕྱི་ནང་ཞི་དྲག་ལས་དོན་ཆེ་ཕྲ་ཡོད་ཚད་བཀའ་བློན་ཚང་མ་མཉམ་ཚོགས་གྲོས་བསྡུར་ཐོག་ནས་ཐག་གཅོད་གནང་སྲོལ་དེ་ཉིད་འགྱུར་བ་བཏང་སྟེ། ལས་དོན་གལ་ཆེ་ཐག་གཅོད་བྱེད་པོར་བཀའ་ཤག་ལྷན་ཚོགས་དང་། ཆོས་དོན་དང་། ནང་སྲིད། ཕྱི་འབྲེལ། འདུ་འགོད། (དཔལ་འབྱོར་) ཤེས་རིག་བཅས་བཀའ་བློན་སོ་སོར་ལས་ཁུངས་ལས་འགན་ཆ་བགོས་ཀྱི་འགྲོ་ལུགས་བཟོས་ཡོད། ཅེས་གསུངས་སོང་།

དེ་རིང་དུས་ཆེན་འདི་ནི་ང་ཚོས་དགའ་སྤོབས་བྱེད་འོས་པ་ཞིག་ཡིན་ནའང་། བར་ལམ་ནས་བོད་ཀྱི་ས་ཁུལ་མི་ཉུང་བ་ཞིག་ཏུ་ཆུ་ལོག་དང་ས་རུད་སོགས་འབྱུང་བའི་གནད་སྐྱོན་དང་། ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འཕྲད་དང་འཕྲད་བཞིན་པའི་ཐོག །རྒྱ་གཞུང་གི་རིམས་འགོག་སྲིད་ཇུས་ཐལ་ཆེར་ལག་བསྟར་བྱས་པའི་དབང་གིས་མི་མང་གི་རྒྱུན་ལྡན་འཚོ་བར་དོ་ཕོག་འགྲོ་བཞིན་འདུག་པར། གཞིས་བཞུགས་སྤུན་ཟླ་ཚོས་སྤྱི་ཚོགས་རྒྱང་བཀྱེད་དང་། གཙང་་སྦྲ་འཕྲོད་བསྟེན་གྱི་སྔོན་འགོག་ཐབས་ཤེས་བསྟེན་རྒྱུ་དང་ཆབས་ཅིག ལུང་བརྟག་ཕེབས་སྒོ་བཞིན་སྒྲོལ་མའི་གཟུངས་སྔགས་གང་མང་གྲངས་གསོག་གནང་གལ་གཞེན་སྐུལ་ཞུ་རྒྱུ་དང་། བཙན་བྱོལ་བོད་མི་རྣམས་ཀྱིས་ཀྱང་བཀའ་ཤག་གིས་རྐྱེན་སེལ་རིམ་གྲོའི་གསལ་བསྒྲགས་སྔོན་སོང་ལྟར་སྒྲོལ་གཟུངས་གྲངས་གསོག་དགོས་པའི་འབོད་སྐུལ་བསྐྱར་ནན་དུ་ཞུ་རྒྱུ་དང་། འདི་ལོ་ཕྱི་ཟླ་ ༦ ཚེས་ ༢༣ ཉིན། ཨ་རིའི་གྲོས་ཚོགས་སུ་བོད་ཀྱི་ལོ་རྒྱུས་གནས་བབས་སྐོར་ལ་ཐེངས་དང་པོར་མཁས་པའི་ཉན་ཞིབ་ཅིག་སྐོང་ཚོགས་གནང་སྟེ། མཁས་པ་རྣམ་པས་རྒྱ་ནག་གི་ཡིག་ཚགས་དང་། རྒྱལ་སྤྱིའི་ཁྲིམས་ལུགས་ཀྱི་ཐོག་ནས་རྒྱ་གཞུང་གིས་བོད་འདི་གནའ་སྔ་མོ་ནས་རྒྱ་ནག་གི་ཆ་ཤས་ཡིན་པའི་འཁྱོག་བཤད་བྱེད་པ་དེ་བདེན་པ་མིན་པའི་ཐེར་འདོན་གནང་ཡོད་པ་དང་། ཕྱི་ལོ་ ༢༠༢༢ ཟླ་ ༧ ཚེས་ ༡༣ ཉིན། ཨ་རིའི་གྲོས་ཚོགས་འོག་མའི་འཐུས་མི་ཇིམ་མེཀ་གྷོ་ཝེརན་ (Jim McGovern) ལགས་དང་། སྤྱི་མཐུན་ཚོགས་པའི་ཕྱི་སྲིད་ཀྱི་འགོ་འཁྲིད་མའི་ཁེལ་མེཀ་ཁོལ་ (Michael McCaul) ལགས་རྣམ་གཉིས་ནས་བོད་རྒྱའི་རྩོད་རྙོག་སེལ་རྒྱུར་སྐུལ་འདེད་ཀྱི་ཁྲིམས་འཆར་ (Promoting a Resolution to the Tibet-China Conflict Act) འདོན་གནང་ཐུབ་པར་དགའ་བསུ་དང་བསྔགས་བརྗོད་ཞུ་རྒྱུ། དེ་ནི་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་དང་མཐུན་པ་མ་ཟད། བོད་རྒྱ་དབར་གྲོས་མོལ་བརྒྱུད་དཀའ་རྙོག་སེལ་རྒྱུའི་འབད་བརྩོན་ལ་གདེང་འཇོག་ཡོང་བར་ཕན་ཐོགས་རྒྱ་ཆེར་འབྱུང་ངེས་ཡིན་པས། ང་ཚོས་ཡུ་རོབ་གཙོས་བསམ་ཕྱོགས་མཐུན་པའི་རྒྱལ་ཁབ་གང་མང་གིས་དེ་ལྟར་གནང་ཐབས་འབད་བརྩོན་མུ་མཐུད་བྱ་རྒྱུ་ཡིན། ཞེས་དང་། བཙན་བྱོལ་བོད་མིའི་བཅའ་ཁྲིམས་ལག་བསྟར་འགོ་འཛུགས་བྱས་ཏེ་ལོ་ངོ་ ༣༠ ལྷག་ཕྱིན་པའི་རིང་། བསྐྱར་བཅོས་རིམ་པར་གནང་ཡོད་ནའང་། ད་དུང་དངོས་ཡོད་གནས་སྟངས་དང་མང་གཙོའི་ལྟ་གྲུབ་དང་མཐུན་པའི་དུས་བསྟུན་བསྒྱུར་བཅོས་དགོས་གལ་གྱི་གནད་དོན་མངོན་གསལ་དེ་དག་ད་རེས་གྲོས་ཚོགས་ནས་བཅའ་ཁྲིམས་བསྐྱར་བཅོས་ཚོགས་ཆུང་ཞིག་འཛུགས་ཐུབ་པའི་རེ་བ་འཛིན་གྱི་ཡོད་ཅེས་གསུངས་སོང་།

དེ་ནས་བོད་མི་མང་སྤྱི་འཐུས་ཚོགས་གཙོ་མཁན་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོག་སྦྱངས་གནང་སྐབས། ཕྱི་ལོ་ ༢༠༢༢ ཟླ་ ༩ ཚེས་ ༢ ཀྱི་ཉིན་མོ་འདི་ནི། བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་གཞི་སྔོན་ཡོད་ལྟར། བཙན་བྱོལ་དུ་ཕེབས་འབྱོར་བྱུང་མ་ཐག་ཕྱི་ལོ་ ༡༩༦༠ ཟླ་ ༢ པའི་ནང་གནས་མཆོག་རྡོ་རྗེ་གདན་དུ་ཆོལ་གསུམ་ཆོས་བརྒྱུད་ཀྱི་སྐུ་ཚབ་རྣམས་ལྷན་འཛོམས་ཀྱིས་༧གོང་ས་མཆོག་གི་བཀའ་དགོངས་འོག་ཤར་བསྐྱོད་ཀྱི་མནའ་གན་མཐུ་མོ་ཆེ་ཕུལ་བས་སྐབས་དེར་༧གོང་ས་མཆོག་གིས་སྔ་འཕྲོས་རིང་ཆོལ་གསུམ་ཆོས་བརྒྱུད་སོ་སོའི་འཐུས་མི་བསྐོ་གཏོང་དགོས་པའི་བཀའ་ཕེབས་དགོངས་དོན་བཞིན་སྐབས་དང་པོའི་བོད་མི་མང་སྤྱི་འཐུས་རྣམས་༸གོང་ས་མཆོག་ནས་ཕྱག་རྟགས་བསྐོ་གཞག་སྩལ་ཏེ་ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་ལས་ཁུར་དམ་འབུལ་ཞུས་པ་ནས་བཟུང་ད་བར་ལོ་ངོ་ ༦༢ ཧྲིལ་པོ་འཁོར་བའི་མང་གཙོའི་དུས་དྲན་སྲུང་བརྩི་ཞུ་བའི་ཉིན་མོ་གལ་ཆེན་ཞིག་ཆགས་ཡོད།

འཛམ་གླིང་ནང་སྐྱབས་བཅོལ་བའི་སྤྱི་ཚོགས་མང་པོ་ཡོད་པའི་ནང་ནས་བཙན་བྱོལ་བོད་མིའི་སྤྱི་ཚོགས་ནི་མང་གཙོ་ལོངས་སུ་སྤྱོད་ཅིང་རྒྱལ་ཁབ་ཀྱི་བདེན་དོན་འཐབ་རྩོད་དང་། རང་མི་རིགས་ཀྱི་ཆོས་དང་། རིག་གཞུང་། སྐད་ཡིག་རྣམས་གཅེས་སྐྱོང་བྱེད་ཐུབ་པའི་སྤྱི་ཚོགས་དམིགས་བསལ་ཅན་དུ་གྱུར་ཡོད། དེ་ཡང་བོད་མིའི་མང་གཙོའི་སྒྲིག་འཛུགས་འདི་ཉིད་མང་གཙོའི་ཆ་ལག་ཡོངས་སུ་ཚང་ཞིང་། དེང་གི་མང་གཙོའི་སྒྲིག་འཛུགས་གཞན་དང་དོ་ཟླ་ཐུབ་པའི་ཁྱད་ཆོས་ཡོད་པ་ཞིག་ཏུ་གྱུར་བ་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕུགས་རྒྱང་རིང་པོའི་དགོངས་གཞི་དང་། དུས་ནས་དུས་སུ་བཀའ་སློབ་ལམ་སྟོན་སྩལ་བའི་བཀའ་དྲིན་ལས་བྱུང་བ་ཞིག་ཡིན་པས་བོད་མི་ཚོས་དགའ་སྤོབས་བྱེད་འོས་པ་ཞིག་ཏུ་གྱུར་སྟབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཞལ་ཐབས་བྲལ་བའི་བཀའ་དྲིན་རྣམས་རྗེས་སུ་དྲན་པའི་སྒོ་ནས་མགོན་པོ་གང་ཉིད་མཆོག་ལ་བོད་མི་ཡོངས་ཀྱི་ཚབ་ཞུས་ཏེ་བཀའ་དྲིན་བླ་ལྷག་ཏུ་ཆེ་ཞེས་གསོལ་འདེབས་ཞུ་རྒྱུ་ཡིན་ཞེས་གསུངས་སོང་།

འདས་ལོ་བཅུ་ཕྲག་དྲུག་ལྷག་གི་རིང་བཙན་བྱོལ་བོད་མིའི་མང་གཙོའི་སྒྲོམ་གཞིར་དུས་བསྟུན་འཕེལ་རིམ་གྱིས་འགྱུར་བ་ཧ་ཅང་ཕྱིན་པའི་རྣམ་པ་མངོན་གསལ་དུ་གྱུར་ཡོད། ཐོག་མར་ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་སྐབས་དང་པོའི་བོད་མི་མང་སྤྱི་འཐུས་རྣམས་ཀྱིས་ལས་ཁུར་དམ་འབུལ་ཞུས་ཏེ་བཙན་བྱོལ་བོད་མིའི་མང་གཙོ་ཐོག་མར་དབུ་བརྙེས་པ་དང་། དེ་ཡང་༸གོང་ས་མཆོག་གིས་བོད་མིའི་འཕྲལ་ཕུགས་ཀྱི་བདེ་རྩར་དགོངས་པ་ཆེ་བཞེས་ཀྱིས་བཀའ་དྲིན་གཞལ་ཐབས་བྲལ་བའི་རླབས་ཆེན་གྱི་ལམ་སྟོན་ཟབ་མོའི་འོག་བཙན་བྱོལ་བོད་གཞུང་གི་ཆབ་སྲིད་ཀྱི་རང་བཞིན་འཚེ་མེད་ཞི་བའི་ལྟ་བར་གཞི་བཅོལ་བའི་ཐོག་རང་དབང་དང་། དྲང་བདེན། འདྲ་མཉམ་བཅས་ཀྱི་གཞི་རྩ་ལྡན་པའི་མང་གཙོའི་ལམ་བཟང་འདི་བྱུང་བ་རེད། ཕྱི་ལོ་ ༡༩༦༡ ལོར་མ་འོངས་བོད་ཀྱི་རྩ་ཁྲིམས་སྙིང་དོན་དང་། ༡༩༦༣ ལོར་བོད་ཀྱི་རྩ་ཁྲིམས་ཡོངས་ཁྱབ་གསལ་བསྒྲགས་གནང་། ཕྱི་ལོ་ ༡༩༧༤ ཟླ་ ༡༡ ཚེས་ ༢༡ ཉིན་སྤྱི་འཐུས་གདམ་བྱ་འདེམས་བྱེད་ཀྱི་སྒྲིག་གཞི་གཏན་འབེབས་གསལ་བསྒྲགས་གནང་། ཕྱི་ལོ་ ༡༩༩༡ ལོར་བོད་མི་མང་སྤྱི་འཐུས་ལྷན་ཚོགས་དེ་ཉིད་མིང་དོན་མཚུངས་པའི་ཁྲིམས་བཟོ་ལྷན་ཚོགས་སུ་བསྒྱུར་གནང་མཛད་པ་ལྟར། སྤྱི་འཐུས་སྐབས་བཅུ་གཅིག་པས་གཏན་ལ་ཕབ་པའི་བཙན་བྱོལ་བོད་མིའི་བཅའ་ཁྲིམས་ལ་ཕྱི་ལོ་ ༡༩༩༡ ཟླ་ ༦ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོག་མཆན་བསྩལ་ནས། བཙན་བྱོལ་བོད་གཞུང་དེ་གཞི་རྩའི་ཁྲིམས་ཡིག་ཡོད་པའི་དེང་རབས་ཀྱི་མང་གཙོའི་འགྲོ་ལུགས་དང་མཐུན་པ་ཞིག་ཏུ་བསྒྱུར་གནང་མཛད། དེ་ནས་ཕྱི་ལོ་ ༢༠༠༡ ལོར་བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་བྱ་འགོ་བཙུགས། ཕྱི་ལོ་ ༢༠༡༡ ལོར་བཅའ་ཁྲིམས་བསྐྱར་བཅོས་ཐེངས་ ༢༥ པ་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་གི་ཆབ་སྲིད་དང་འཛིན་སྐྱོང་གི་འགན་དབང་ཡོངས་རྫོགས་འོས་འདེམས་བྱས་པའི་འགོ་འཁྲིད་ཚོར་གསོལ་སྩལ་གནང་བ་ནས་བཟུང་། མི་མང་གིས་འོས་འདེམས་བྱས་པའི་འགོ་འཁྲིད་ཚོས་འགན་འཁུར་གྱིས་བོད་མིའི་སྒྲིག་འཛུགས་ཀྱི་བྱེད་སྒོ་མཐའ་དག་མང་གཙོའི་འགྲོ་ལུགས་ཐོག་མདུན་བསྐྱོད་བྱེད་བཞིན་ཡོད།

སྤྱིར་འཛམ་གླིང་ནང་གྲངས་ཐོ་ལྟར་ན་རྒྱལ་ཁབ་གྲངས་ ༡༩༥ ཙམ་ནས་ ༡༦༧ ཙམ་མང་གཙོའི་རྒྱལ་ཁབ་ཀྱི་ངོ་བོར་ཡོད་ཀྱང་མང་གཙོའི་ངོ་བོ་ཡོངས་སུ་རྫོགས་པ་དང་མ་རྫོགས་པ་ཅི་རིགས་ཤིག་ཚུད་ཡོད། དེ་ཡང་མང་ཚོགས་ཀྱི་མང་གཙོའི་ལྟ་གྲུབ་ཇི་བཞིན་སྐྱོང་ཐུབ་མིན་དང་འགོ་འཁྲིད་ཀྱིས་འགན་ཁུར་བྱེད་ཕྱོགས་བཅས་ལ་རག་ལས་ཡོད། དེ་བཞིན་མང་གཙོའི་སྤྱི་ཚོགས་ནང་ལྟ་གྲུབ་འདྲ་མིན་ཡོང་ཆོག་གི་ཡོད་ནའང་རང་རེའི་རྩ་དོན་འཐབ་རྩོད་ཀྱི་སྒྲིག་འཛུགས་འདི་ཉིད་ནུས་ལྡན་ཚགས་ཚུད་ཡོང་ཆེད་དང་། བོད་མིའི་ཆིག་སྒྲིལ་གྱི་ནུས་པ་ཉམས་དམས་སུ་མི་འགྲོ་བ་དགོས་པ་ནི་བཙན་བྱོལ་བོད་མིའི་མང་གཙོའི་ཚེ་སྲོག་ལྟ་བུ་གལ་ཆེ་ཤོས་ཤིག་ཏུ་གྱུར་ཡོད་ཅེས་གསུངས་སོང་།

མཇུག་ཏུ་སྐུ་མགྲོན་གཙོ་བོ་སྐུ་ཞབས་ཝི་ཤཱལ་ནེ་རི་ཡ་ (Shri Vishal Nehria) ལགས་ཀྱིས། བོད་མི་ཚོར་མཚོན་ན། དེ་རིང་བོད་མིའི་དམངས་གཙོའི་དུས་ཆེན་དེ་ཤིན་ཏུ་གལ་ཆེན་ཞིག་ཡིན་པ་དང་། དམངས་གཙོའི་དུས་ཆེན་གྱི་ཉིན་མོ་ལ་ང་རང་མགྲོན་འབོད་ཞུས་པར་བཀའ་དྲིན་ཆེ་ཞུ་རྒྱུ་དང་། བོད་མི་ཚང་མར་འཚམས་འདྲི་ཞུ་རྒྱུ་ཡིན། ༧གོང་ས་མཆོག་གི་བཀའ་དྲིན་ལ་བརྟེན་ནས་རྒྱ་གར་དང་རྒྱལ་སྤྱིའི་ནང་དྷ་རམ་ས་ལར་ཆེ་མཐོང་ཡོད་པ་དང་། དྷ་སར་རྒྱ་གར་མི་མང་དང་བོད་མིའི་བར་མཛའ་མཐུན་ངང་གནས་བཞིན་ཡོད་ཅིང་། འབྱུང་འགྱུར་མུ་མཐུད་དུ་གནས་རྒྱུ་ཡིན་སྐོར་དང་། བོད་མི་ཚོས་རང་མི་རིགས་ཀྱི་རིག་གཞུང་སོགས་ཉར་ཚགས་ལེགས་པོ་གནང་གི་ཡོད་སྐོར། དེ་བཞིན་རྒྱལ་ཁབ་ཅིག་གི་རིག་གཞུང་དེ་གལ་ཆེ་ཤོས་ཡིན་སྐོར་སོགས་གསུངས་སོང་།

གསར་འགོད་པ། བསྟན་འཛིན་ཕུར་བུ།