དབྱིན་ཇིའི་རྒྱལ་མོ་ཨེ་ལི་ཛེ་བྷེ་ཐི་གཉིས་པ་མཆོག་སྐུ་གྲོངས་པར་༧གོང་ས་མཆོག་དང་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན་སྲིད་སྐྱོང་སྤེན་པ་ཚེ་རིང་མཆོག་བཅས་ཀྱིས་ཐུགས་གསོ་སྩལ་འདུག
ཁ་སང་ཕྱི་ཚེས་ ༨ ཉིན་དབྱིན་ཡུལ་གྱི་རྒྱལ་སྲིད་ཡུན་རིང་ཤོས་སྐྱོང་མཁན་རྒྱལ་མོ་ཨེ་ལི་ཛེ་བྷེ་ཐི་གཉིས་པ་ (Queen Elizabeth II) མཆོག་དགུང་གྲངས་ ༩༦ ཐོག་སྐུ་གྲོངས་བའི་གནས་ཚུལ་ཐོན་ཡོད་པ་ལྟར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱལ་མོ་དམ་པ་དེའི་སྲས་དང་ད་ལྟའི་དབྱིན་ཇིའི་རྒྱལ་པོ་ཆའར་ལེ་སི་ (Charles III) ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་སྩལ་ཏེ། ༧གོང་ས་མཆོག་གིས་རྒྱལ་མོ་དམ་པ་དེ་ཉིད་ཀྱི་སླད་དུ་ཐུགས་སྨོན་སྐྱབས་འཇུག་གནང་གི་ཡོད་པ་གསུངས་འདུག
དེ་རིང་ཞོགས་པ་དབྱིན་ཡུལ་གྱི་རྒྱལ་མོ་ཨེ་ལི་བྷེ་ཐི་གཉིས་པ་མཆོག་སྐུ་གྲོངས་པ་མཁྱེན་རྟོགས་བྱུང་བར་བརྟེན། ༧གོང་ས་མཆོག་ནས་རྒྱལ་མོ་མཆོག་གི་རྒྱལ་སྲས་ཆའར་ལེ་སི་གསུམ་པ་ (Prince Charles III) ལགས་གཙོས་པའི་རྒྱལ་བཙུན་སྟོན་འཁོར་དང་དབྱིན་ཡུལ་མི་མང་ཡོངས་ལ་ཐུགས་གསོའི་གསུང་འཕྲིན་སྩལ་བའི་ནང་། ངོས་རང་ཆུང་དུས་བོད་ནང་དུ་ཡོད་པའི་སྐབས། རྒྱལ་མོ་མཆོག་གསེར་ཁྲིར་མངའ་གསོལ་གྱི་མཛད་སྒོའི་སྐུ་པར་མཇལ་མྱོང་། ཁོང་དབྱིན་ཡུལ་གྱི་རྒྱལ་མོའི་དུས་ཡུན་རིང་ཤོས་གནང་བ་དེས་མི་མང་པོའི་སེམས་ནང་རྟག་བརྟན་གྱི་རྟེན་འབྲེལ་དང་སེམས་འགུལ་ཐེབས་པ། དེ་བཞིན་རྒྱུན་གནས་འདུ་ཤེས་ཀྱི་བློ་སྤོབས་སྦྱིན་ཡོད་པ་རེད། སྐུ་ཉིད་ཀྱི་ཡུམ་ཆེན་མཆོག་གིས་གཟི་བརྗིད་ཆེ་མཐོང་ལྡན་ཞིང་། ང་ཚོ་ཚང་མས་གཅེས་པར་འོས་པའི་གཞན་ཕན་ལྷག་བསམ་གྱི་ཞབས་ཞུ་དང་ཐུགས་རྒྱུད་གཤིས་བཟང་གི་མི་ཚེ་དོན་དང་ལྡན་པ་ཞིག་བསྐྱལ་ཡོད། ཅེས་དང་། མཐར་༧གོང་ས་མཆོག་གིས་ཞིང་གཤེགས་རྒྱལ་མོ་མཆོག་ལ་ཐུགས་སྨོན་བསྔོ་བ་མཛད་ཡོད་ཅེས་གསུངས་འདུག
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཐུགས་གསོའི་གསུང་འཕྲིན་སྩལ་བའི་ནང་། དབྱིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་གཉིས་པ་མཆོག་སྐུ་གྲོངས་པར་བློ་ཕམ་ཆེན་པོ་ཡོད་པ་དང་། འཛམ་གླིང་ས་ཕྱོགས་གང་སར་བཞུགས་པའི་བོད་མི་ཡོངས་ཀྱི་ཚབ་ཞུས་ཏེ། ངས་ཁོང་མོའི་ནང་མི་གཉེན་ཉེ་ཡོངས་ལ་ཐུགས་གསོ་ཞུ་རྒྱུ་ཡིན། ཁོང་མོ་སྐུ་གྲོངས་པར་འཛམ་གླིང་ས་ཕྱོགས་གང་སར་བཞུགས་པའི་བོད་མི་རྣམས་ཀྱིས་དབྱིན་ཡུལ་གྱི་མི་མང་དང་དབྱིན་ཇིའི་རྒྱལ་པོའི་མངའ་ཐང་འོག་གི་མི་མང་ཡོངས་དང་ལྷན་དུ་གདུང་སེམས་མཉམ་སྐྱེད་དང་བསྔོ་སྨོན་གནང་གི་ཡོད། དེང་རབས་ལོ་རྒྱུས་ཁྲོད་ཁོང་མོ་ནི་སྟོབས་ཤུགས་ཆེ་ཤོས་དང་དུས་ཡུན་རིང་ཤོས་ཀྱི་རྒྱལ་སྲིད་སྐྱོང་མཁན་ཞིག་ཡིན་པ་ནམ་ཡང་དྲན་གྱི་རེད་ལ། ཁོང་མོའི་མཛད་རྗེས་ལོ་རྒྱུས་ནང་མུ་མཐུད་དུ་གནས་ཀྱི་རེད། ཁོང་མོ་འདས་གྲོངས་སུ་ཕྱིན་པར་འཛམ་གླིང་མི་མང་གིས་སེམས་སྡུག་བྱེད་ཀྱི་ཡོད། ཁོང་མོའི་བཀའ་དྲིན་དང་གཟི་བརྗིད། གཞན་ཕན་གྱི་བསམ་བློ་དེ་དག་མི་རབས་ནས་མི་རབས་བར་རྗེས་སུ་དྲན་གྱི་རེད། ད་ལྟ་ཡིད་གདུང་ཆེ་བའི་དུས་སྐབས་འདིའི་རིང་དཀོན་མཆོག་གིས་ཁོང་མོའི་ནང་མི་གཉེན་ཉེ་རྣམས་ལ་ནུས་སྟོབས་སྤྲོད་པའི་སྨོན་འདུན་དང་། ཁོང་མོའི་རྣམ་ཤེས་བདེ་བ་ཅན་དུ་སྐྱེ་བར་ཤོག ཅེས་གསུངས་ཡོད་འདུག
སྲིད་སྲིད་སྐྱོང་སྤེན་པ་ཚེ་རིང་མཆོག་སྒེར་གྱི་ཊུ་ཝི་ཊར་སྟེང་རྒྱལ་མོ་ཨེ་ལི་ཛེ་བྷེ་ཐི་གཉིས་པ་མཆོག་སྐུ་གྲོངས་པར་ཐུགས་གསོའི་གསུང་འཕྲིན་སྩལ་བའི་ནང་། རྒྱལ་མོ་ཨེ་ལེ་ཛི་བྷེ་ཐི་གཉིས་པ་མཆོག་ནི་སྙིང་སྟོབས་ལྡན་ཞིང་། འགན་འཁྲི་དང་མང་ཚོགས་ལ་ཞབས་ཞུ་གཡོ་བ་མེད་པར་གནང་མཁན་གྱི་མགོ་ཁྲིད་ཁྱད་དུ་འཕགས་པ་རེད། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ། ང་ཚོས་ཁོང་གིས་ནང་མི་གཉེན་ཉེ་ཡོངས་དང་དབྱིན་ཇིའི་མི་མང་ལ་ཐུགས་གསོ་ཞུ་རྒྱུ་ཡིན། ཞེས་གསུངས་འདུག
རྒྱལ་མོ་ཨི་ལི་ཛ་བེཏ་གཉིས་པ་མཆོག་ནི་ཕྱི་ལོ་ ༡༩༢༦ ལོར་སྐུ་འཁྲུངས་ཤིང་། ཕྱི་ལོ་ ༡༩༥༢ ནས་ ༢༠༢༢ ལོའི་བར་དུ་དབྱིན་ཡུལ་གྱི་རྒྱལ་སྲིད་བཟུང་། ཕྱི་ལོ་ ༡༩༤༧ ལོར་ཨི་དིན་བྷག་ (Edinburgh) རྒྱལ་སྲས་ཧྥི་ལིབ་ (Philip) དང་གཉེན་སྒྲིག་གནང་སྟེ། སྲས་དང་སྲས་མོ་བཞི་ཡོད་པ་རེད། ཁོང་མོས་རྒྱལ་སྲིད་བཟུང་སྐབས་འཛམ་གླིང་གི་ནང་རྩོད་རྙོག་དང་འཛིང་འཁྲུག་ཆེ་ཤོས་ཏེ། འཛམ་གླིང་ནང་སླར་ཡང་དམག་ཆེན་འབྱུང་རྒྱུའི་ཉེན་ཁ་དང་འཇིགས་པ་ཆེས་ཆེར་གྱི་གནས་སྟངས་དང་། གྲང་དམག་ (Cold War) མགོ་བཙུགས་པའི་སྐབས་ཡིན། ཁོང་མོས་དབྱིན་ཡུལ་གྱི་རྒྱལ་སྲིད་ལོ་ངོ་ ༧༣ རིང་བསྐྱངས་ཤིང་། རང་ལོ་ ༩༦ སྟེང་སྐུ་གྲོངས་ཡོད་ཅིང་། ཁོང་མོ་ནི་དབྱིན་ཡུལ་ཙམ་མིན་པར་ཨོ་སི་ཊོ་ལི་ཡ་(Australia) དང་ཁེ་ཎ་ཌ་ (Canada)། ཇ་མ་ཡེ་ཀ་ (Jamaica) སོགས་རྒྱལ་ཁབ་བཅུ་བཞིའི་དབུ་འཁྲིད་ཀྱང་ཡིན་འདུག
གསར་འགོད་པ། བསྟན་འཛིན་ཕུར་བུ།
