ཁ་སང་ཕྱི་ཚེས་ ༡༢ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབྱིན་ཇིའི་རྒྱལ་པོ་གསར་པ་ཆའར་ལེ་སི་གསུམ་པ་མཆོག་གི་ཁྲི་འདོན་ལ་རྟེན་འབྲེལ་ཞུས་ནས་མ་འོངས་པའི་བྱ་གཞག་ལམ་ལྷོང་ཡོང་བའི་སྨོན་འདུན་ཞུས་ཡོད་འདུག
སྲིད་སྐྱོང་སྤེན་པ་ཚེ་རིང་མཆོག་གིས་དབྱིན་ཇིའི་རྒྱལ་པོ་ཆའར་ལེ་སི་གསུམ་པ་ (Prince Charles III) མཆོག་ལ་ཕུལ་བའི་འཚམས་འཕྲིན་ནང་། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་མཆོག་དབྱིན་ཡུལ་གྱི་རྒྱལ་པོར་ཁྲི་འདོན་བྱུང་བར་འཚམས་འདྲི་ཞུ་རྒྱུ་ཡིན། སྐུ་ཉིད་མཆོག་ནི་༧གོང་ས་མཆོག་ལ་ཐུགས་ཉེ་ཞིང་བཀུར་འོས་པའི་ཆོས་གྲོགས་ཤིག་ཡིན་པར་བརྟེན། སྐུ་ཉིད་ལ་བོད་མི་རྣམས་ནས་དམིགས་བསལ་གྱིས་བརྩི་བཀུར་ཞུ་ཡི་ཡོད། དེར་བརྟེན། ང་ཚོས་ཁྱེད་རང་དབྱིན་ཡུལ་གྱི་རྒྱལ་པོར་ཁྲི་འདོན་བྱུང་བར་དགའ་བསུའི་འཚམས་འདྲི་ཞུ་རྒྱུ་ཡིན། ཞེས་གསུངས་ཡོད་འདུག
ཡང་སྲིད་སྐྱོང་མཆོག་གིས། སྐུ་ཉིད་ཀྱིས་རྒྱལ་ཡུམ་གྱི་མཛད་རྗེས་རྒྱུན་སྐྱོང་གནང་བའི་བརྒྱུད་རིམ་ནང་། དབྱིན་ཡུལ་མི་མང་གི་རེ་བ་དང་མངོན་འདོད་སྒྲུབ་པར་བྱ་བ་ལམ་ལྷོང་དང་། སྐུ་ཉིད་གཙོས་དབྱིན་ཡུལ་གྱི་མི་མང་ལ་ཡར་རྒྱས་གོང་འཕེལ་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུངས་ཡོད་འདུག
ད་ལྟ་དགུང་ལོ་ ༧༣ ཡིན་པའི་ཆའར་ལེ་སི་གསུམ་པ་ (Charles III) མཆོག་ནི་ཕྱི་ལོ་ ༡༩༤༨ ལོར་རྒྱལ་མོ་ཨེ་ལི་ཛེ་བྷེ་ཐི་ (Elizabeth) མཆོག་དང་རྒྱལ་པོ་ཧྥི་ལིབ་ (Philip) གཉིས་ཀྱི་སྲས་སུ་སྐྱེས། ཁོང་གིས་རྒྱ་ནག་གི་གནོན་ཤུགས་ལ་མ་ལྟོས་པར། ཕྱི་ལོ་ ༢༠༠༨ ལོར་༧གོང་ས་མཆོག་དབྱིན་ཡུལ་དུ་ཆིབས་བསྒྱུར་ཕེབས་སྐབས། ཁོང་གིས་་༧གོང་ས་རྒྱལ་བ་རིན་པོ་ཆེ་མཆོག་ཁོང་གི་བཞུགས་གནས་སུ་གདན་འདྲེན་ཞུས་ཏེ། ཆོས་ལུགས་མཐུན་འབྲེལ་གྱི་ཚོགས་འདུར་མཉམ་ཞུགས་གནང་། ཡང་ཕྱི་ལོ་ ༢༠༡༢ ལོར་ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཡོད་པ་རེད། ཟླ་འདིའི་ཕྱི་ཚེས་ ༨ ཉིན་དབྱིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་གཉིས་པ་མཆོག་དགུང་གྲངས་ ༩༦ ཐོག་སྐུ་གྲོངས་པར་བརྟེན། རྒྱལ་སྲས་ཆའར་ལེ་སི་གསུམ་པ་མཆོག་དབྱིན་ཡུལ་གྱི་རྒྱལ་པོར་ཁྲི་འདོན་གནང་སྟེ། རྒྱལ་སྲིད་སྐྱོང་མགོ་འཛུགས། དབྱིན་ཡུལ་གྱི་རྒྱལ་པོའི་ཐུགས་འགན་དངོས་སུ་བཞེས་སྐབས། དབྱིན་ཇིའི་རྒྱལ་རྒྱུད་ཀྱི་ཁྱབ་ཁོངས་ས་གནས་ཁག་ཏུ་ཡོད་པའི་རྒྱལ་རྒྱུད་ཀྱི་ལས་དོན་ཁག་འཐུས་ཤོར་མེད་པ་གནང་རྒྱུའི་ཆོད་སེམས་བརྟན་པོ་ཡོད་སྐོར་གསུངས་ཡོད་འདུག
གསར་འགོད་པ། བསྟན་འཛིན་ཕུར་བུ།
