རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་གཞོན་སྐྱེས་བསམ་བློ་བའི་ཚོགས་འདུ་སྐབས་གསུམ་པ་ཉིན་གྲངས་གཉིས་རིང་དྷ་སྟེང་བོད་ཁྱིམ་དུ་འཚོག་བཞིན་འདུག
ཟླ་འདིའི་ཕྱི་ཚེས་ ༡༨ དབུ་མའི་ལམ་གྱི་ཉིན་མོ་དང་བསྟུན། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག ཕྱི་ཚེས་ ༡༨ ནས་ ༡༩ བར་ཉིན་གྲངས་གཉིས་རིང་དྷ་སྟེང་བོད་ཁྱིམ་ཞི་བདེ་གྲོས་མོལ་ཁང་དུ་དབུ་མའི་ལམ་གྱི་ཐོག་བོད་རིགས་གཞོན་སྐྱེས་བསམ་བློ་བའི་ཚོགས་འདུ་ཐེངས་གསུམ་པ་འཚོག་བཞིན་ཡོད་པ་དང་། དྷ་རམ་ས་ལར་ཡོད་པའི་སློབ་གྲྭ་ཁག་གི་སློབ་ཕྲུག་ ༣༠ དང་། ཚོགས་སྡེ་ཁག་གི་ཚོགས་གཙོ་དང་ཚོགས་གཞོན་བཅས་ཀྱིས་ཚོགས་ཞུགས་གནང་སྟེ། བོད་མི་ཁྱོན་ ༥༤ ཙམ་གྱིས་ཚོགས་བཅར་ཞུས་ཡོད་འདུག
ཐེངས་འདིའི་ཚོགས་འདུ་ཐེངས་གསུམ་པའི་ཉིན་དང་པོའི་སྟེང་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་བོད་ཁྱིམ་སྤྱི་ཁྱབ་འགན་འཛིན་རྒན་བསོད་ནམས་སྲི་གཅོད་ལགས་རྣམ་གཉིས་སྐུ་མགྲོན་དུ་ཕེབས་ཡོད་འདུག ཁ་སང་ཕྱི་ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་དྲིལ་ལས་ཁུངས་ཀྱི་དྲུང་འཕར་བསྟན་འཛིན་ལེགས་བཤད་ལགས་ཀྱིས་དབུ་མའི་ལམ་དང་བོད་ཀྱི་ལོ་རྒྱུས་ཀྱི་གནས་བབ སྐོར་དང་། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་བློ་བཟང་བསྟན་པའི་རྒྱལ་མཚན་མཆོག་གིས་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་སྐོར་གསུང་བཤད་དང་དྲི་བ་དྲིས་ལན་སོགས་བགྲོ་གླེང་གི་རྣམ་པའི་ཐོག་ནས་ཚོགས་འདུ་འཚོགས་སོང་།
དེ་རིང་ཚོགས་འདུ་ཐེངས་གསུམ་པའི་ཉིན་གཉིས་པའི་སྟེང་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་མཆོག་གིས་དབུ་མའི་ལམ་དང་བོད་རྒྱ་འབྲེལ་མོལ་གྱི་སྐོར་དང་། ཉམས་ཞིབ་པ་ཤེས་རབ་དར་རྒྱས་ལགས་ཀྱིས་དབུ་མའི་ལམ་དང་བོད་མི་རིགས་ཀྱི་ཕུགས་འདུན་ཞེས་པའི་སྐོར་ལ་གསུང་བཤད་དང་དྲི་བ་དྲིས་ལན་བྱེད་ཀྱི་ཡོད་འདུག
འདི་གའི་གསར་འགོད་པས་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་གཙོ་སྐབས་དྲུག་པ་དགེ་བཤེས་བློ་བཟང་ཆོས་འཕེལ་ལགས་སུ་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་དམིགས་ཡུལ་གཙོ་བོ་ག་རེ་ཡིན་སྐོར་དྲིས་པར། ཐོག་མའི་ཡིག་ཐོག་ཏུ་བཀོད་པ་ཇི་བཞིན་༧རྒྱལ་བ་རིན་པོ་ཆེའི་དགོངས་གཞི་ལམ་སྟོན་དང་དམངས་གཙོའི་བརྒྱུད་རིམ་གྱི་ཐོག་ནས་ཐག་གཅོད་གནང་བ་ཞིག་ཡིན་ཡང་། མི་མང་རང་འགུལ་གྱི་ཐོག་ནས་ལས་འགུལ་ཤུགས་ཆེན་སྤེལ་ཏེ། དམངས་གཙོའི་བརྒྱུད་རིམ་ཐོག་ནུས་པ་ཆེ་ཤོས་ཀྱི་གྲུབ་འབྲས་འཐོན་པར་དམིགས་ཡོད་སྐོར་བརྗོད་བྱུང་།
བོད་རིགས་གཞོན་སྐྱེས་བསམ་བློ་བའི་ཚོགས་འདུ་དང་འབྲེལ་ནས་དགེ་བཤེས་བློ་བཟང་ཆོས་འཕེལ་ལགས་ཀྱིས། བོད་མི་ཡོངས་ལ་དབུ་མའི་ལམ་གྱི་གོ་རྟོགས་སྤེལ་སླད། མི་མང་དང་དམིགས་བསལ་གྱིས་བོད་རིགས་གཞོན་སྐྱེས་རྣམས་ལ་དམིགས་ཏེ། ཚོགས་འདུ་དང་བགྲོ་གླེང་གི་རྣམ་པའི་ཐོག་ནས་ལས་གཞི་སྤེལ་བ་ཞིག་ཡིན་པ་དང་། ད་ལྟའི་ཆར་དབུ་མའི་ལམ་གྱི་གོ་རྟོགས་སྤེལ་བར་བརྒྱུད་རིམ་མི་འདྲ་བ་མང་པོ་ཡོད། དེ་ཡང་མི་མང་ལ་བགྲོ་གླེང་གི་རྣམ་པའི་ཐོག་ནས་དབུ་མའི་ལམ་གྱི་གོ་རྟོགས་སྤེལ་རྒྱུ་དང་། མི་མང་དང་སློབ་གྲྭ་ཁག་ལ་གཏམ་བཤད་ཀྱི་ལམ་ནས་གོ་རྟོགས་སྤེལ་རྒྱུ། དེ་བཞིན་ཕྱོགས་སོ་སོ་ནས་གནད་ཡོད་མི་སྣ། སློབ་གྲྭ་ཁག་དང་མི་མང་གཅིག་པོ་མིན་པར། ཨ་རི་མཚོན་པའི་དཔོན་པོ་དང་རྒྱ་རིགས་ལྟ་བུ་རྒྱལ་ཁབ་གཞན་གྱི་མི་མང་ལའང་དེ་འབྲེལ་སྐོར་གོ་རྟོགས་དང་སྙན་ཞུ་འབུལ་རྒྱུ་སོགས་ཀྱི་ལས་གཞི་འགྲོ་མུས་ཡིན་སྐོར་བརྗོད་བྱུང་།
ཕྱི་ལོ་ ༢༠༢༠ ནས་ ༢༠༢༡ བར་ལོ་གཉིས་རིང་ཏོག་དབྱིབས་གཉན་རིམས་རྐྱེན་གྱིས་རྒྱལ་སྤྱིའི་དབུ་མའི་ལམ་མི་མང་གི་ལས་འགུལ་ཁང་གཞོན་སྐྱེས་བསམ་བློ་བའི་ཚོགས་འདུ་འཚོགས་ཐུབ་མེད་ཀྱང་། ཕྱི་ལོ་ ༢༠༠༨ ལོར་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གིས་དབུ་མའི་ལམ་གྱི་ཉིན་མོ་སྲུང་གཙི་དང་འབྲེལ། བོད་མི་ཡོངས་དང་དམིགས་བསལ་གྱིས་བོད་རིགས་གཞོན་སྐྱེས་ཁག་ལ་དབུ་མའི་ལམ་གྱི་གོ་རྟོགས་སྤེལ་སླད། ཕྱི་ལོ་ ༢༠༡༨ ནས་ན་གཞོན་བསམ་བློ་བའི་ཚོགས་འདུ་ཞེས་པའི་ཚོགས་འདུ་དང་བགྲོ་གླེང་གི་རྣམ་པའི་ཐོག་ནས་ལས་འགུལ་འདྲ་མིན་གོ་སྒྲིག་འོག ཕྱི་ལོ་ ༢༠༡༨ ཟླ་ ༡༠ ཚེས་ ༢༢ ཉིན་ནས་ཉིན་གྲངས་གཉིས་རིང་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ཚོགས་ཁང་དུ་བོད་རིགས་གཞོན་སྐྱེས་བསམ་བློ་བའི་ཚོགས་འདུ་ཐེངས་དང་པོ་ཚོགས་ཡོད་པ་དང་། ཕྱི་ལོ་ ༢༠༡༩ ཟླ་ ༡༠ ཚེས་ ༧ ཉིན་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཚོགས་འདུ་ཐེངས་གཉིས་པ་འཚོགས་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
