གོ་པལ་པུར་བོད་ཁྱིམ་སློབ་གྲྭའི་མི་ལོ་ ༢༥ འཁོར་བའི་མཛད་སྒོའི་ཐོག་དེ་གའི་སློབ་ཟུར་ཚོགས་པས་སློབ་ཕྲུག་ཁོ་ནར་ཕན་ཐོགས་སླད་ཧིན་སྒོར་འབུམ་ ༡༥ ནས་ ༢༠ བར་དུ་འགྲོ་ཡི་ཡོད་སྐོར་གསུངས་པ་ལྟར་གང་ཐུབ་རོགས་རམ་བྱ་རྒྱུ་ཡིན་སྐོར་བརྗོད་སོང་།
དེ་རིང་གོ་པལ་པུར་བོད་ཁྱིམ་སློབ་གྲྭ་དབུ་བརྙེས་ནས་མི་ལོ་ ༢༥ འཁོར་བའི་མཛད་སྒོར་བོད་མིའི་སྒྲིག་འཛུགས་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་ལགས། དྷ་ས་ས་གནས་མགོ་འཛིན་ལགས། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ། སློབ་གྲྭ་ཁག་ཅིག་གི་སྐུ་ཚབ། དེ་བཞིན་གོ་པལ་པུར་བོད་ཁྱིམ་གྱི་ད་ཡོད་དབུ་ལས་སློབ་ཕྲུག་རྣམས་དང་། སློབ་ཟུར་ ༡༠༠ ལྷག་མཉམ་ཞུགས་བྱས་ཡོད་འདུག་ལ། མཛད་སྒོའི་ཐོག་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། ད་ལྟའི་དུས་སུ་བོད་ནང་གི་བོད་མི་དག་སྙིང་ལ་བཅངས་ནས་གོ་པལ་པུར་བཙུགས་ནས་མི་ལོ་ ༢༥ འཁོར་བའི་དུས་ཚོད་བཟང་པོ་འདིའི་ཐོག་ལ་རྣམ་པ་ཚང་མ་ལ་བཀའ་ཤག་གིས་ཚབ་ཞུས་ཏེ། བཀྲིས་བདེ་ལེགས་ཞུ་རྒྱུ་ཡིན། ད་ལྟའི་མཛད་སྒོ་དང་གནས་སྟངས་ཐོག་ངས་སྐད་ཆ་བཤད་ན་ཚང་མ་ཉོབ་རོགས་མ་གཏོགས། ངས་བཤད་པ་དེས་ཕན་ཐོགས་ཡོད་ན་མེད་ན། གང་ལྟར་གཙོ་བོ་ང་རང་ཚོ་རྒྱལ་ཁབ་ཅིག་དང་མི་རིགས་ཤིག་ལ་གཟིགས་པ་ཡིན་ན། གཉན་འཕྲང་ཅན་གྱི་དུས་ཤིག་དང་། བཟང་ཕྱོགས་ནས་ཕར་བལྟས་པ་ཡིན་ན། བོད་ཀྱི་བདེན་མཐའ་གསལ་རྒྱུའི་གོ་སྐབས་ཆེན་པོ་ཞིག་ཡོད་པའི་དུས་ཚོད་བཟང་པོ་ཞིག་རེད། ལྷག་པར་དུ་༧སྤྱི་ནོར་༧ གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གི་དབུ་འཁྲིད་བཟང་པོ་འདི་ང་ཚོར་ཡོད་པས། སོ་སོར་ནོར་བུ་ཡོད་པ་དེ་ངོ་འཕྲོད་ནས་ཁོང་གིས་ད་ལྟ་བར་དུ་བོད་སྤྱིའི་རྩ་དོན་དང་བསྟན་སྲིད་མི་རིགས་ཆེད་དུ་ལམ་སྟོན་གནང་བཞག་པ་དེའི་ཐོག་ལ་ང་ཚོས་ཤར་སྐྱོད་བྱེད་ཀྱི་ཡོད་ན། ང་རང་ཚོ་བོད་མི་ཞིག་ཡིན་པའི་ལས་འགན་བསྒྲུབ་ཐུབ་པ་ཞིག་ལ་བརྒྱ་ཆ་བརྒྱ་ངོས་འཛིན་བྱེད་ཆོག་གི་རེད། ཆོས་ཀྱི་ཕྱོགས་ནས་དེ་ག་རང་རེད་ལ། སྲིད་ཀྱི་ཕྱོགས་ནས་ཀྱང་དེ་ལྟར་ཡིན་པ་རེད། དེ་རིང་ཁྱེད་རང་ཚོས་རུ་སྒྲིག་སྐབས་བོད་རྒྱལ་ཁབ་ཆེན་མོའི་རྒྱལ་དར་གནམ་ལ་འཕྱར་ནས་ཕེབས་ཡོང་དུས་སེམས་ནང་ལ་སྤྲོ་སྣང་ཞིག་དང་། སྤོབས་པ་བྱུང་། བོད་ཀྱི་རྩ་དོན་དང་བསྟན་སྲིད་ཀྱི་ཆེད་དུ་ང་ཚོའི་སློབ་གྲྭ་ཁག་ནི་ཤེས་ཡོན་གྱི་རྨང་གཞི་འཇོག་ས་གཙོ་བོ་ཆགས་ཀྱི་ཡོད་པའི་ར་སྤྲོད་བྱུང་། དེ་ང་རང་ཚོའི་རྩ་དོན་ལ་བཀྲིན་ཆེན་པོ་ཡིན་པར་ངོས་འཛིན་བྱས་ཏེ། ད་ལྟ་བར་བཙན་བྱོལ་ནང་ལ་བཀྲིན་རྗེས་དྲན་ཞུས་པ་རེད་ལ། ང་རང་བཙན་བྱོལ་དུ་སྐྱེས་ནས་བོད་གཞུང་སློབ་གྲྭར་སློབ་སྦྱོང་བྱས་ཏེ། འབྲས་དང་དྷ་ལི་བཟས་ནས་ཐོན་པ་ཞིག་ཡིན་པས། ཨ་མ་རྗེ་བཙུན་པདྨ་ལགས་ང་རང་སྒེར་དང་ཚང་མར་བཀྲིན་ཆེན་མོ་ཡིན་པས། དེ་རིང་བཀྲིན་རྗེས་དྲན་ཞུ་ཡི་ཡོད། ཅེས་གསུངས་སོང་།
ཡང་བཀའ་བློན་མཆོག་གིས། བོད་ཁྱིམ་སློབ་གྲྭ་སྤྱི་ཡོངས་དེ་བཙན་བྱོལ་བོད་ཀྱི་སྤྱི་ཚོགས་སུ་ཤེས་ཡོན་གཅིག་པུ་མ་ཡིན་པར། བོད་ཁྱིམ་སློབ་གྲྭ་ཁག་ནས་ཐོན་པའི་སློབ་མ་མང་པོ་ཞིག་གིས་སྤྱི་ཚོགས་སུ་འགན་བླངས་ནས་སྲི་ཞུ་སྒྲུབ་མུས་ཡིན་པ་མ་ཟད། རྒྱ་གར་གཞུང་མང་གཉིས་སུ་འབྲེལ་ལམ་གོང་མཐོར་གཏོང་བར་ཞབས་འདེགས་སྒྲུབ་མུས་ཡིན་པ་དང་། དེ་བཞིན་རྒྱ་གར་གཞུང་གིས་ཐོག་མར་བཙུགས་པའི་བོད་གཞུང་སློབ་གྲྭ་ཁག་དེ་དག་བོད་མིའི་སྒྲིག་འཛུགས་ལ་རྩིས་སྤྲོད་ཐག་གཅོད་བྱེད་པའི་སྐབས་སུའང་། རྒྱ་གར་གཞུང་གིས་ཀྱང་བོད་མི་ཚོས་སློབ་གྲྭ་ཁག་འཛིན་སྐྱོང་བྱེད་པར་ནུས་པ་ཚད་ལྡན་ཡོད་སྐོར་གསུངས་ཡོད་ཅིང་། དེ་ནི་བོད་ཁྱིམ་སློབ་གྲྭ་ཁག་གི་སློབ་མ་མང་པོ་ཞིག་གིས་བོད་པའི་སྤྱི་ཚོགས་སུ་ཞབས་འདེགས་ཞུ་མུས་ཡིན་པས་ཡིན་པ་མ་ཟད། བོད་ཁྱིམ་སློབ་གྲྭ་ཁག་གི་འཛིན་སྐྱོང་གི་ལས་དོན་ཚགས་ཚུད་བྱུང་ཡོད་པས་རེད། དེ་བཞིན་གོ་པལ་པུར་བོད་ཁྱིམ་སློབ་གྲྭ་ནི་སློབ་གྲྭ་མི་འདྲ་བ་ཞིག་ཏུ་ངོས་འཛིན་བྱེད་ཀྱི་ཡོད་དེ། སྐབས་ཤིག་ལ་སློབ་གྲྭ་འདིའི་སློབ་མ་མང་དག་གི་ཕ་མ་བོད་ལ་ཡོད་པས། འདིར་བཞུགས་དགེ་རྒན་ལས་བྱེད་སོགས་ཀྱིས་གཞན་ལས་ལྷག་པའི་བྱམས་སྐྱོང་དང་གསོ་སྐྱོང་གནང་ཡོད་པས། ཕ་མ་དང་སྤུན་ཉེ་བོད་དུ་བཞུགས་པའི་སློབ་ཟུར་མང་པོ་ཞིག་ཕེབས་འདུག་པས། ཚང་མར་འཚམས་འདྲི་དང་བསྔགས་བརྗོད་ཡོད་སྐོར་སོགས་གསུངས་སོང་།
གོ་པལ་པུར་སློབ་ཟུར་ཚོགས་པའི་ཚོགས་གཙོ་འཆི་མེད་གཡུང་དྲུང་ལགས་ཀྱིས། ཕྱི་ལོ་ ༢༠༡༧ ལོར་གོ་པལ་པུར་སློབ་གྲྭ་བཙུགས་ནས་ལོ་ངོ་ ༢༠ འཁོར་བའི་སྐབས། སློབ་གྲྭའི་ངོས་ནས་སློབ་ཟུར་རྣམས་ལ་འབྲེལ་བ་བྱས་ཏེ། གོ་པལ་པུར་སློབ་ཟུར་ཚོགས་པ་མགོ་བཙུགས་ཡོད་པ་དང་། ད་བར་སློབ་གྲྭ་ནས་སློབ་མ་ ༦༣༣༨ ལྷག་ཐོན་ཡོད་པ་རེད། སློབ་ཟུར་ཚོགས་པའི་ངོས་ནས་ཐེངས་འདིའི་མཛད་སྒོའི་སྟེང་སློབ་ཟུར་གང་མང་བསླེབས་ཐབས་བྱས་ཡོད་ཀྱང་། སློབ་ཟུར་ ༡༠༠ ལྷག་ཙམ་དངོས་སུ་བསླེབས་ཏེ་མཉམ་ཞུགས་བྱས་ཡོད་ཀྱང་། སློབ་ཟུར་མང་པོ་ཞིག་ཕྱིའི་རྒྱལ་ཁབ་ཏུ་ཡོད་པ་སོགས་ཀྱིས་མཛད་སྒོར་བསླེབས་འདོད་ཡོད་ཀྱང་བསླེབས་ཐུབ་མི་འདུག སློབ་ཟུར་ཚང་མ་སློབ་གྲྭ་འདི་ནས་ཐོན་པར་བརྟེན། སློབ་གྲྭ་ལ་གང་ཐུབ་ཅི་ཐུབ་བྱེད་ཀྱི་ཡིན་བསམ་པའི་ཚོར་བ་འདུག ད་བར་སློབ་ཟུར་ཚོགས་པའི་ངོས་ནས་ཏོག་དབྱིབས་རིམས་ནད་ཁྱབ་གདལ་ཕྱིན་སྐབས། སློབ་གྲྭར་ཁ་རས་དང་ (oximeter) ལ་སོགས་པ་ཉོས་ཏེ་རིམས་ནད་ཁྱབ་གདལ་མི་ཡོང་སླད་མཐུན་རྐྱེན་གང་ཐུབ་སྦྱར་ཡོད་ལ། འཛིན་སྐྱོང་ཡར་རྒྱས་གཏོང་སླད། ཚོགས་ཁང་དང་ལས་ཤག་ཡར་རྒྱས་སླད་ཞལ་འདེབས་སྤྲད་ཡོད་སྐོར་སོགས་བརྗོད་སོང་།
དེ་བཞིན་སློབ་ཟུར་ཚོགས་པའི་དམིགས་ཡུལ་གཙོ་བོ་ནི། སློབ་ཟུར་རྣམས་ཀྱིས་སློབ་གྲྭའི་འཛིན་སྐྱོང་དང་དམིགས་བསལ་གྱིས་སློབ་མའི་ཤེས་ཡོན་ཐད་མཐུན་རྐྱེན་སྦྱོར་རྒྱུར་དམིགས་ཏེ། དངུལ་བསྡུ་རུབ་བྱས་ནས་སློབ་མར་ཕན་ཐོགས་བྱ་རྒྱུ་དེ་རེད། དེ་ཡང་སློབ་གྲྭའི་ངོས་ནས་ལས་འཆར་(proposal) སྤྲད་པའི་ནང་སློབ་ཕྲུག་ཁོ་ནར་ཕན་ཐོགས་སླད་ཧིན་སྒོར་འབུམ་ ༡༥ ནས་ ༢༠ བར་དུ་འགྲོ་ཡི་ཡོད་སྐོར་གསུངས་ཡོད་པ་ལྟར། སློབ་ཟུར་ཚོགས་པའི་ངོས་ནས་གང་ཐུབ་རོགས་རམ་བྱ་འཆར་ཡོད་ལ། མ་འོངས་པར་སློབ་གྲྭ་དང་སློབ་ཟུར་གཉིས་ཀྱི་འབྲེལ་ལམ་ལེགས་པོ་བཟོ་རྒྱུ་དང་། སློབ་གྲྭར་དཔལ་འབྱོར་གྱི་རོགས་རམ་མུ་མཐུད་དུ་བྱ་འཆར་ཡོད་སྐོར་བརྗོད་བྱུང་།
གསར་འགོད་པ། དཔལ་ལྡན། བསྟན་འཛིན་ཕུར་བུ།
