བོད་ཀྱི་ཐུན་མོང་མ་ཡིན་པའི་རིག་གཞུང་བདག་ཉར་བྱ་རྒྱུ་ནི་ང་ཚོའི་འོས་འགན་ཆགས་ཡོད་པས་ཚོགས་བཅར་བ་རྣམས་ཀྱིས་ཟབ་ཁྲིད་ལ་གསན་པ་དང་དོན་ཤེས་པ་ཙམ་མིན་པར་ལག་ལེན་བསྟར་དགོས་པ་གལ་ཆེན་པོ་ཡིན་སྐོར་གསུངས།
དེ་རིང་སྔ་དྲོའི་ཆུ་ཚོད་ ༨ པའི་སྟེང་ས་རཱ་མཐོ་སློབ་ཏུ་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སྐབས་བཅུ་དགུའི་གཞོན་ནུའི་རུ་ཁག་གི་གོ་སྒྲིག་འོག ཉིན་དྲུག་རིང་གི་བོད་རིག་པའི་ཟབ་ཁྲིད་མགོ་འཛུགས་གནང་ཡོད་པ་དང་། སྐུ་མགྲོན་གཙོ་བོ་ཁྲི་ཟུར་ཟམ་གདོང་རིན་པོ་ཆེ་མཆོག་དང་དམིགས་བསལ་སྐུ་མགྲོན་ཆོས་རིག་དྲུང་ཆེ་འཆེ་མེད་ཚེ་དབྱངས་ལགས། དེ་བཞིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་བཀྲ་ཤིས་དར་རྒྱས་ལགས་དང་། ས་རཱ་མཐོ་སློབ་ཀྱི་དབུ་འཛིན་དགེ་བཤེས་བསམ་གཏན་རྒྱ་མཚོ་ལགས་ཀྱི་དབུས་དགེ་ལས་སློབ་ཕྲུག་རྣམས་བཅས་འཛོམས་འདུག
མཛད་སྒོའི་ཐོག་མར་ས་རཱ་བོད་རིག་པའི་ཟབ་ཁྲིད་ཀྱི་སྐོར་ལ་ས་རཱ་མཐོ་སློབ་ཀྱི་གཞོན་ནུ་རུ་ཁག་གི་ཚོགས་གཙོ་ཕུན་རབ་བསྟན་འཛིན་འོད་ཟེར་ལགས་ཀྱིས། ས་རཱ་བོད་རིག་པའི་བགྲོ་གླེང་དེ་ཐོག་མར་འཚོགས་པའི་དམིགས་ཡུལ་གཙོ་བོ་ནི། རྒྱ་ནག་གི་གནོན་ཤུགས་དང་མི་རིགས་རྩ་མེད་བཟོ་རྒྱུའི་སྲིད་ཇུས་འོག་ནས། བོད་ནང་གི་བོད་མི་དང་གཞོན་སྐྱེས་རྣམས་ལ་རང་གི་སྐད་དང་རིག་གཞུང་སྦྱོང་རྒྱུའི་རང་དབང་མེད་པས། བོད་ཀྱི་སྐད་དང་རིག་གཞུང་སོགས་ཉམས་རྒུད་འགྲོ་བཞིན་ཡོད་པ་དང། དམིགས་བསལ་གྱིས་བཙན་བྱོལ་དུ་རང་གི་སྐད་དང་རིག་གཞུང་སོགས་སྦྱོང་བར་རང་དབང་ཡོད་ཀྱང་། བོད་རིགས་གཞོན་སྐྱེས་རྣམས་ཀྱིས་དེའི་ཐོག་ལ་དོ་སྣང་མི་བྱེད་ཅིང་། ད་ལྟའི་ཆར་བོད་ཀྱི་རིག་གཞུང་དང་སྐད་ཡིག་གི་གནས་སྟངས་ཛ་དྲག་པོ་ཆགས་ཀྱི་ཡོད་པར་བརྟེན། ས་རཱ་མཐོ་སློབ་གཞོན་ནུ་རུ་ཁག་གིས་བོད་མི་རིགས་ཀྱི་འཐབ་རྩོད་དང་བོད་པའི་ངོ་བོ་མི་བརླག་པའི་དོན་དུ་བོད་ཀྱི་རིག་གཞུང་སོགས་མི་ཉམས་རྒྱུན་འཛིན་དང་དར་སྤེལ་ཡོང་སླད། ས་རཱ་བོད་རིག་པའི་བགྲོ་གླེང་མགོ་བཙུགས་པ་རེད། བོད་ཀྱི་རིག་གནས་སྤྱི་དང་བྱེ་བྲག་རྒྱལ་རབས་ལ་སོགས་པའི་བརྗོད་གཞིའི་ཐོག་བོད་རིག་པའི་བགྲོ་གླེང་གོ་སྒྲིག་བྱས་དང་བྱེད་མུས་ཡིན་སྐོར་སོགས་བརྗོད་སོང་།
ས་རཱ་མཐོ་སློབ་ཀྱི་དབུ་འཛིན་དགེ་བཤེས་བསམ་གཏན་རྒྱ་མཚོ་ལགས་ཀྱིས། ས་རཱ་བོད་རིག་པའི་བགྲོ་གླེང་གི་ཐོག་མའི་གྲུབ་ཆ་ནི་ས་རཱ་མཐོ་སློབ་ཏུ་སློབ་གཉེར་གནང་བཞིན་པའི་སློབ་མ་དེ་དག་གཙོ་བོར་དམིགས་ཏེ། ད་བར་ས་རཱ་མཐོ་སློབ་གཞོན་ནུ་རུ་ཁག་གིས་བོད་ཀྱི་ཐུན་མོང་མ་ཡིན་པའི་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོའི་སླད་མ་སྐུལ་དང་བླངས་དང་ལྷག་བསམ་རྣམ་དག་གིས་བོད་རིག་པའི་བགྲོ་གླེང་གནང་དང་གནང་བཞིན་ཡོད་པ་དང་། མ་འོངས་པར་མུ་མཐུད་དུ་འཚོག་ཐུབ་རྒྱུ་དང་། འབྲེལ་ཡོད་ལམ་སྟོན་གནང་མཁན་གྱི་དགེ་རྒན་དང་སློབ་མ་རྣམས་ལ་བཀའ་དྲིན་ཆེ་ཞུ་རྒྱུ་ཡིན། དེ་རིང་༧སྐྱབས་རྗེ་ཟམ་གདོང་རིན་པོ་ཆེ་མཆོག་གི་དབུས་པའི་བོད་ཀྱི་རིག་གནས་སྤྱི་ལ་མཁྱེན་རྒྱ་ཡངས་ཤིང་མྱོང་བ་གསལ་བའི་ཆེད་མཁས་པ་གང་ལ་གང་ཙམ་ཕེབས་ཡོད་པ་དང་། བོད་ཀྱི་ཐུན་མོང་མ་ཡིན་པའི་རིག་གཞུང་བདག་ཉར་བྱ་རྒྱུ་ནི་ང་ཚོའི་འོས་འགན་ཞིག་ཆགས་ཀྱི་ཡོད་པས། ཚོགས་བཅར་བ་རྣམས་ཀྱིས་དེ་རིང་གི་ཟབ་ཁྲིད་ཀྱི་བརྗོད་གཞིའི་ཐོག་ལ་གསན་པ་དང་དོན་ཤེས་པ་ཙམ་མིན་པར་ལག་ལེན་བསྟར་དགོས་པ་གལ་ཆེན་པོ་ཡིན་སྐོར་གསུངས་སོང་།
དམིགས་བསལ་སྐུ་མགྲོན་ཆོས་རིག་དྲུང་ཆེ་འཆེ་མེད་ཚེ་དབྱངས་ལགས་ཀྱིས། རྣམ་པ་ཚོས་མ་སྐུལ་དང་བླངས་ཀྱི་ཐོག་ནས་བགྲོ་གླེང་འདི་འདྲ་གོ་སྒྲིག་ཞུས་པར་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། རྒྱུ་མཚན་ནི་ད་ལྟའི་ང་ཚོ་སྤྱི་ཚོགས་ཀྱི་གནས་སྟངས་འདི་ཕྱོགས་ཡོངས་ནས་གནས་སྟངས་ཛ་དྲག་པོ་ཆགས་ཡོད་པས། རྣམ་པ་ཚོས་མཉམ་རུབ་ཀྱིས་འགན་འཁུར་རྒྱུ་གལ་ཆེན་པོ་ཡིན་པ་དང་། མཉམ་རུབ་ཀྱིས་འགན་འཁུར་ན་ང་ཚོ་ཚང་མའི་དམིགས་ཡུལ་དང་ནུས་པ། གྲུབ་འབྲས་སོགས་གང་ཅིའི་ཐད་ནས་ཐུགས་ཕན་གསོ་ཡི་རེད་བསམ་གྱི་ཡོད། ང་ཚོའི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་། བོད་ཀྱི་ཆོས་དང་རིག་གཞུང་ཕྱུག་པོ་ཡོད་པས། ད་ལྟའི་ཆར་བོད་ཀྱི་རིག་གཞུང་སོགས་ངོམས་ཆོག་པ་དང་རྒྱལ་སྤྱིའི་ནང་དགའ་ཞེན་དང་རྒྱབ་སྐྱོར་གནང་བ་རེད་བསམ་གྱི་ཡོད། དེར་བརྟེན་ང་ཚོས་དུས་རྟག་ཏུ་དྲན་གསོ་དགོས་གལ་ཆེ་བ་དང་། ༧གོང་ས་མཆོག་གི་ཐུགས་ཀྱི་བྱིན་རླབས་ལ་བརྟེན་ནས་བཙན་བྱོལ་དུ་བོད་ཀྱི་རིག་གཞུང་རྒྱུན་གནས་ཐུབ་པ་རེད། དེ་བཞིན་མི་རབས་རྒན་པའི་ལྷག་བསམ་དང་སྙིང་སྟོབས། སོ་སོའི་འཚོ་བའི་དཀའ་ངལ་ལ་མ་འཛེམས་པར་བོད་ཀྱི་རིག་གཞུང་མི་ཉམས་རྒྱུན་འཛིན་གྱི་ཐོག་ལ་ནུས་པ་མཉམ་སྤུངས་ཀྱིས་རྒྱུན་གནས་ཐུབ་པ་བྱུང་བ་རེད། ང་ཚོའི་རིག་གཞུང་མུ་མཐུད་དུ་གནས་དགོས་གལ་ཆེ་བ་དང་དོ་སྣང་བྱེད་དགོས་ལ། མི་རབས་ནས་མི་རབས་རྩིས་སྤྲོད་དགོས་ཀྱི་ཡོད་པས་བོད་མི་ཡོངས་ཀྱི་ལས་འགན་གཙོ་བོ་ཆགས་ཀྱི་ཡོད་ཅིང་། དམིགས་བསལ་གྱིས་བོད་རིགས་གཞོན་སྐྱེས་རྣམས་ཀྱིས་དེའི་ཐོག་ལ་འགན་འཁུར་དགོས་པ་དང་། བཙན་བྱོལ་དུ་ཡོད་པའི་བོད་མི་རྣམས་རང་དབང་ལུང་པར་ཡོད་པས། རང་གི་འདོད་མོས་ལྟར་སློབ་སྦྱོང་སྦྱང་རྒྱུ་དང་ལས་ཀ་བྱ་རྒྱུའི་རང་དབང་ཡོད་པ་རེད། དེར་བརྟེན་བཙན་བྱོལ་དུ་ཡོད་པའི་བོད་མི་རྣམས་ཀྱིས་ལས་ཀ་ཇི་འདྲ་ཞིག་བྱེད་ཀྱི་ཡོད་རུང་སྤྱི་ཚོགས་ཁྲོད་དུ་ཕུགས་རྒྱང་རིང་པོའི་དགེ་སྐྱོན་སོགས་སེམས་ནང་དུ་བཞག་རྒྱུ་གལ་ཆེན་ཡིན་པ་དང་། མ་འོངས་པར་བོད་ཀྱི་རིག་གཞུང་གི་གནས་བབ་ཇི་འདྲ་ཆགས་ཀྱི་ཡོད་མེད་དེ་ང་ཚོར་རག་ལས་ཡོད་པས་ཚང་མས་ཧུར་ཐག་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཉིན་དྲུག་རིང་གི་ཟབ་ཁྲིད་བརྒྱུད་ཚོགས་བཅར་བ་ཡོངས་ཀྱི་ཤེས་བྱ་ཡོན་ཏན་ལ་ཐུགས་ཕན་གསོ་བའི་རེ་བ་ཡོད། ཞེས་གསུངས་སོང་།
བོད་རིག་པའི་བགྲོ་གླེང་དང་འབྲེལ་ནས་ཁྲི་ཟུར་ཟམ་གདོང་རིན་པོ་ཆེ་མཆོག་གིས། ཐོག་མར་ས་རཱ་གཞོན་ནུ་རུ་ཁག་གི་གོ་སྒྲིག་འོག་སྐབས་བཅོ་ལྔ་པའི་བོད་རིག་པའི་བགྲོ་གླེང་འཚོགས་ཐུབ་པར་འཚམས་འདྲི་བཀྲ་ཤིས་བདེ་ལེགས་དང་། བགྲོ་གླེང་ཕུན་སུམ་ཚོགས་པ་དང་དོན་དང་ལྡན་པ་ཡོང་བའི་སྨོན་འདུན་ཞུ་རྒྱུ་ཡིན། བགྲོ་གླེང་དང་ཟབ་སྦྱོང་གི་ཆ་རྐྱེན་བསྐྲུན་ནས་ལས་རིམ་དེ་འདྲ་གོ་སྒྲིག་གནང་ཐུབ་པ་དེ་ཡག་པོ་ཞེ་དྲགས་རེད། སྤྱིར་བཏང་གཞོན་ནུ་རུ་ཁག་ཐོག་མར་བཙུགས་པའི་སྐབས་སུ་རུ་ཁག་གི་དམིགས་ཡུལ་མང་པོ་ཡོད་རེད་དེ། མང་ཆེ་བ་ནི་སྤྱི་ཚོགས་དང་ཆབ་སྲིད་ཀྱི་གནས་སྟངས་ཐོག་གཙོ་བོ་བཏོན་ཡོད་པ་རེད། འོན་ཀྱང་ཆབ་སྲིད་རྐྱང་པའི་ལས་ཀ་བྱེད་མཁན་ཞིག་ཡིན་རུང་ཤེས་ཡོན་གྱི་གནས་བབ་དེ་ངེས་པར་དུ་དགོས་མཁོ་ཆེ་བ་ཆགས་ཀྱི་ཡོད་རེད། དེ་ཡང་རྒྱལ་ཁབ་དང་མི་རིགས་ཀྱི་ལས་དོན་ཞིག་བསྒྲུབ་དགོས་ཚེ། མི་རིགས་མཐུན་སྒྲིལ་དགོས་པ་དང་ཤེས་བྱ་ཡོན་ཏན་ལ་སྦྱངས་དགོས་པ། དེ་བཞིན་ལས་དོན་ཇི་འདྲ་བྱེད་རུང་རྒྱུན་གནས་ཐུབ་པ་ཞིག་དགོས་ཀྱི་ཡོད་རེད། གཞན་ཡང་། ལས་དོན་དང་ལས་འགུལ་ཇི་འདྲ་ཞིག་སྤེལ་རུང། ལས་དོན་རྒྱུན་གནས་ཐུབ་པ་དང་ཡར་རྒྱས་འཛུགས་སྐྲུན་གྱི་ལས་ཀ་ངེས་པར་དུ་བྱ་དགོས་རྒྱུ་ནི་གཞི་རྩ་ལྟ་བུ་ཞིག་རེད། དེ་མིན་ཆབ་སྲིད་དང་ཁྲིམས་མཐུན་གྱི་ལས་ཀ་ཁ་ཤས་དུས་ཚོད་ལ་བྱེད་དགོས་པ་ལས། དུས་རྒྱུན་དུ་ནས་བྱེད་དགོས་པའི་གནས་སྟངས་ཆགས་ཀྱི་ཡོད་མ་རེད། དེར་བརྟེན་དེ་འདྲའི་ཟབ་སྦྱོང་དང་བགྲོ་གླེང་། དེ་དང་མཚུངས་པའི་ཤེས་ཡོན་དང་རིག་གནས་སོགས་ལ་འབྲེལ་བའི་བྱ་བ་བྱ་རྒྱུ་གལ་ཆེན་ཡིན་པ་དང་། ཁྱེད་རང་ཚོའི་ལས་འགུལ་དེ་ལ་ང་རང་སྒེར་གྱི་ངོས་ནས་མོས་མཐུན་ཡོད་ལ་ངེས་པར་དུ་གནང་དགོས་པ་ཞིག་རེད། ང་ཚོ་བོད་པའི་ལས་དོན་མང་པོ་ཞིག་རྒྱུན་གནས་ཐུབ་པར་དཀའ་ངལ་འཕྲད་ཀྱི་ཡོད་པ་རེད། དེ་ཡང་དཀའ་ངལ་འཕྲད་དགོས་དོན་ནི་ལས་བྱེད་ཡང་ནས་ཡང་དུ་བརྗེས་པ་དང་འགྲོ་སོང་གིས་མི་འདང་བས་རྒྱུན་གནས་ཐུབ་ཀྱི་མེད་པ་རེད། གྷན་དྷི་ལྟ་བུར་མཚོན་ན། ཁོང་གིས་ལས་དོན་ཇི་འདྲ་ཞིག་མགོ་བཙུགས་པའི་སྐབས་སུ་ཕུགས་རྒྱང་རིང་པོའི་བསམ་བློ་བཏང་བའི་ཐོག་ནས། ལས་དོན་དེ་དག་རྒྱུན་གནས་ཐུབ་པར་འབད་པ་དང་། དཔལ་འབྱོར་འདང་ངེས་ཡོད་པའི་སྐབས་སུ་འགྲོ་སོང་ལ་བསྲི་ཚགས་བྱས་ཡོད་པ་རེད། དེར་བརྟེན་བོད་པ་ཚོས་གྷན་དྷི་ལ་མིག་དཔེར་བཟུང་སྟེ། མ་འོངས་པར་ལས་དོན་ཇི་འདྲ་ཞིག་སྤེལ་རུང་། དཔལ་འབྱོར་གྱི་དཀའ་ངལ་མི་འཕྲད་པའི་སླད་འགྲོ་སོང་ལ་བསྲི་ཚགས་དང་མུ་མཐུད་དུ་རྒྱུན་གནས་ཐུབ་པར་འབད་དགོས་ཀྱི་ཡོད་སྐོར་སོགས་གསུངས་སོང་།
དེ་རིང་ཞོགས་པར་ཆུ་ཚོད་གཉིས་རིང་མཁས་དབང་ཟམ་གདོང་རིན་པོ་ཆེ་མཆོག་ནས་སློབ་དཔོན་དབྱིག་གཉེན་གྱི་རྣམ་པར་བཤད་པའི་རིགས་པའི་སྐོར་ལ་འགྲེལ་བརྗོད་དང་། རྣམ་གྲྭའི་སློབ་སྤྱི་ཐུབ་བསྟན་ཡར་འཕེལ་ལགས་ནས་པཎ་གྲུབ་བཅུ་བདུན་གྱི་རྣམ་ཐར་དང་གསུང་རྩོམ་ངོ་སྤྲོད་གནང་། སང་ཉིན་ནས་མུ་མཐུད་ཁོང་རྣམ པ་གཉིས་ནས་གོང་གི་བརྗོད་གཞིའི་ཐོག་གསུང་བཤད་གནང་རྒྱུ་དང་། རྒན་བསོད་ནམས་རྒྱལ་མཚན་ལགས་ཀྱིས་སྔགས་ཀྱི་བཀླག་ཐབས་དང་། རྒན་བློ་བཟང་སྙན་གྲགས་ལགས་ཀྱིས་ཕོ་ཉ་གཞོན་ནུ་དོན་གྲུབ་ཀྱི་སྐོར། དེ་བཞིན་རྒན་གཙང་ཕྲུག་སྟོབས་ལགས་ནས་བོད་ཀྱི་ལོ་རྒྱུས་རིག་པའི་སྐོར་དང་སྐུ་ངོ་བློ་བཟང་སྦྱིན་པ་ལགས་ནས་༧གོང་ས་བཅུ་བཞི་པ་ཆེན་པོའི་མཛད་འཕྲིན་ངོ་སྤྲོད་དང་འབྲེལ་ནས་ཟབ་ཁྲིད་གནང་འཆར་ཡོད་འདུག
གསར་འགོད་པ། བསྟན་འཛིན་ཕུར་བུ།
