ཊུ་ཝི་ཊར་སྤྱི་ཚོགས་དྲ་གནས་ཕྱུག་བདག་ཆེན་མོ་ཞིག་གིས་ཉོས་ཟིན།

ཨ་རིའི་འཕྲུལ་རིག་བཟོ་སྐྲུན་དང་མཁའ་སྐྱོད་ཚོང་གཉེར་ཁང་(SpaceX)སོགས་ཀྱི་བདག་པོ་འཛམ་གླིང་གི་ཕྱུག་བདག་ཆེན་མོ་ཨེ་ལོན་མ་སེཀ་ལགས་ཀྱིས་ཨ་སྒོར་དུང་ཕྱུར་ ༤༤༠ སྤྲད་དེ་ཊུ་ཝི་ཊར་སྤྱི་ཚོགས་དྲ་གནས་ཉོས་ཡོད་འདུག

འདི་ལོར་ཕྱུག་བདག་ཆེན་མོ་སྐུ་ཞབས་ཨེ་ལོན་མ་སེཀ་(Elon Musk)ལགས་ཀྱིས་སྤྱི་ཚོགས་དྲ་གནས་ཊུ་ཝི་ཊར་ཉོ་ཡི་ཡོད་པ་དང་འབྲེལ་ཏེ་གནས་ཚུལ་མང་པོ་ཞིག་ཐོན་ཡོད་པ་ལྟར། དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཊུ་ཝི་ཊར་སྤྱི་ཁྱབ་ལས་ཁུངས་ནས་དེ་འབྲེལ་གྱི་གནས་ཚུལ་གསར་པ་ཡོངས་བསྒྲགས་བྱས་མེད་ཀྱང་། ཊུ་ཝི་ཊར་གྱི་མ་རྐང་འཛུགས་མཁན་ཁག་ཅིག་ནས་སྤྱི་ཚོགས་དྲ་གནས་འདི་ཉོས་ཟིན་ཡོད་སྐོར་བརྗོད་ཡོད་འདུག་ལ། ཁ་སང་སྐུ་ཞབས་ཨེ་ལོན་མ་སེཀ་ལགས་ཀྱིས་སྒེར་གྱི་ཊུ་ཝི་ཊར་སྟེང་དུ། ངས་ཊུ་ཝི་ཊར་དྲ་གནས་དངུལ་གསོག་སྒྲུབ་ཀྱི་ཆེད་དུ་ཉོས་པ་མིན་པར། མི་ཀུན་ལ་འདྲ་མཉམ་གྱི་སྨྲ་བརྗོད་རང་དབང་གི་ཁོར་ཡུག་བསྐྲུན་རྒྱུ་དང་འགྲོ་བ་མིའི་རིགས་ལ་ཕན་ཐོགས་ཡོང་སླད་ཉོས་པ་ཡིན། ཞེས་བརྗོད་འདུག་ལ། ཁོང་སྒེར་གྱི་ཊུ་ཝི་ཊར་སྟེང་ཊུ་ཝི་ཊར་སྦྱིན་བདག་ (Chief Twit) ཅེས་བཀོད་འདུག

ཁ་སང་ཨ་རིའི་གྲོང་ཁྱེར་སན་ཧྥན་སི་ཁོ་ (San Francisco) རུ་ཡོད་པའི་ཊུ་ཝི་ཊར་དབུས་སྤྱི་ཁྱབ་ལས་ཁུངས་ཀྱི་སྤྱི་གཉེར་བ་པཱ་རག་ཨེག་ར་ཝལ་(Parag Agrawal) དང་། དཔལ་འབྱོར་གྱི་འགན་འཛིན་ (Ned Segal)། དེ་བཞིན་སྲིད་ཁྲིམས་འགན་འཛིན་ (Vijaya Gadde) སོགས་ལས་གནས་ནས་ཐོན་ཡོད་འདུག་ལ། དེ་སྔོན་ཨེ་ལོན་མ་སེཀ་ལགས་ཀྱིས་ཊུ་ཝི་ཊར་དྲ་གནས་ཀྱིས་འཛད་སྤྱོད་པའི་སྨྲ་བརྗོད་རང་དབང་ལ་དོ་ཕོག་གཏོང་གི་ཡོད་པའི་སྐྱོན་བརྗོད་ཤུགས་ཆེན་བྱས་ཡོད་པ་མ་ཟད། ཨ་རིའི་སྲིད་འཛིན་ཟུར་པ་ཊོམ་ཕུ་ཚུད་པའི་མི་སྒེར་གྱི་རང་དབང་སྨྲ་བརྗོད་ལ་བཀག་སྡོམ་བྱས་ཡོད་པ་རྣམས་སླར་གསོ་བྱ་རྒྱུ་ཡིན་ཚུལ་སོགས་བརྗོད་ཡོད་པ་རེད།

འདི་ལོའི་ཕྱི་ཟླ་ ༤ པའི་ནང་ཟླ་མཇུག་ཏུ་ཨེ་ལོན་མ་སེཀ་ལགས་ནས་ཊུ་ཝི་ཊར་ལ་ཨ་སྒོར་དུང་ཕྱུར་ ༤༤༠ སྤྲད་དེ་ཉོ་རྒྱུ་ཡིན་ཚུལ་བསྒྲགས་ཡོད་པ་དང་། དང་ཐོག་ཊུ་ཝི་ཊར་ཚོང་གཉེར་ཁང་ནས་ཨེ་ལོན་མ་སེཀ་ལགས་ཀྱི་རེ་འདོད་དེར་ཁས་ལེན་བྱས་མེད་ཀྱང་། ཕྱིས་སུ་འདི་ལོའི་ཕྱི་ཟླ་ ༡ ཙམ་ལ་ཨེ་ལོན་མ་སེཀ་ལགས་ཀྱིས་ཊུ་ཝི་ཊར་མ་རྐང་ཉོ་མགོ་བཙུགས་ཏེ། ཕྱི་ཟླ་ ༤ པའི་ཟླ་མགོར་མ་རྐང་བརྒྱ་ཆ་ ༩།༢ ཉོས་ནས་ཁོང་ཊུ་ཝི་ཊར་གྱི་མ་རྐང་བདག་པོ་ཆེ་ཤོས་སུ་གྱུར་ཡོད་འདུག  ཕྱི་ཟླ་ ༥ པའི་ནང་ཁོང་གིས་ཊུ་ཝི་ཊར་བེད་སྤྱོད་གཏོང་མཁན་རྫུན་མ་མང་བར་སེམས་འཚབ་ཡོད་སྐོར་བརྗོད་དེ། ཕྱི་ཟླ་ ༦ པའི་ནང་ཊུ་ཝི་ཊར་ཉོ་འདོད་མེད་སྐོར་བརྗོད་ཡོད་ཀྱང་། ཐོག་མའི་ཁས་ལེན་བཞིན་ཉོ་སྒྲུབ་དགོས་པའི་རྩོད་གླེང་ཤུགས་ཆེན་བྱུང་མཐར། ཟླ་འདིའི་ཕྱི་ཚེས་ ༤ ཉིན་ཁོང་གིས་བསྐྱར་དུ་ཉོ་རྒྱུ་ཡིན་པའི་ཁས་ལེན་བྱས་ཏེ། ཟླ་འདིའི་ཕྱི་ཚེས་ ༢༨ ནང་ཚུད་དུ་ཉོས་ཟིན་པ་དགོས་པའི་ཐག་གཅོད་ལྟར་ཉོས་ཟིན་ཡོད་འདུག

ཊུ་ཝི་ཊར་ནི་ཕྱི་ལོ་ ༢༠༠༦ ལོར་ཨ་རིའི་དྲ་རྒྱའི་ཁེ་ལས་པ་ཇག་ཌོར་སི་(Jack Dorsey) དང་ཨ་རིའི་འཕྲུལ་ལས་རིག་པའི་ཁེ་ལས་པ་ནོ་གྷི་ལཱ་སི་(Noah Glass)། ཁེ་ལས་པ་བྷི་ཛི་སི་ཊོན་(Biz Stone)། འཕྲུལ་རིག་ཁེ་ལས་པ་ཕྱུག་བདག་ཆེན་མོ་ཨེ་ཝན་ཝེ་ལེམ་སི་ (Evan Williams) བཅས་མཉམ་སྦྲེལ་གྱིས་འཛུགས་སྐྲུན་བྱས་ཡོད་པ་དང་། ལོ་དེའི་ཕྱི་ཟླ་ ༧ པའི་ནང་ཊུ་ཝི་ཊར་སྤྱི་ཚོགས་དྲ་ཚིགས་མགོ་འཛུགས་བྱས་ཏེ་ད་ལྟའི་ཆར་གོ་ལ་ཡོངས་སུ་ཊུ་ཝི་ཊར་བེད་སྤྱོད་བྱེད་མཁན་མི་གྲངས་ས་ཡ་ ༣༩༦།༥ ཡོད་འདུག 

གསར་འགོད་པ། བསྟན་འཛིན་ཕུར་བུ།