བོད་མིའི་རང་དབང་ཚོགས་པས་ཨ་རིར་རྟེན་གཞི་བྱས་པའི་འཕྲུལ་རིགས་བཟོ་ཚོང་ཁང་གིས་རྒྱ་ནག་གཞུང་ལ་རིགས་རྫས་བརྟག་དཔྱད་ཀྱི་འཕྲུལ་ཆས་རིགས་མི་བཙོང་རྒྱུའི་རེ་སྐུལ་གྱི་ལས་གཞི་ཞིག་སྤེལ་མུས་ཡིན་འདུག
ཉེ་ལམ་རྒྱ་ནག་གཞུང་གིས་ཁྲིམས་མཐུན་མིན་པའི་ཐོག་ནས་བོད་རང་སྐྱོང་ལྗོངས་ཟེར་བའི་གྲོང་སྡེ་མང་པོ་ཞིག་གི་བོད་པའི་བྱིས་པ་ཚུད་པའི་བོད་མི་མང་པོའི་རིགས་རྫས་བསྡུ་རུབ་བྱེད་མུས་ཡིན་པ་ལྟར། དེ་རིང་བོད་མིའི་རང་དབང་ཚོགས་པས་ཨ་རིར་རྟེན་གཞི་བྱས་པའི་འཕྲུལ་རིགས་ (Thermo Fisher Scientific) ཚན་རྩལ་བཟོ་ཚོང་ཁང་གིས་རྒྱ་གཞུང་ལ་འཕྲུལ་རིགས་ཉོ་ཚང་བྱས་ཏེ་བོད་ནང་གི་བྱིས་པ་ཚུད་པའི་བོད་མི་རྣམས་ཀྱི་རིགས་རྫས་བཙན་གྱིས་བསྡུ་རུབ་བྱེད་བཞིན་ཡོད་པར་བརྟེན། ཨ་རིའི་འཕྲུལ་རིགས་བཟོ་ཚོང་ཁང་དེས་རྒྱ་ནག་གཞུང་ལ་འཕྲུལ་རིགས་དེ་དག་མི་བཙོང་བ་དང་རྒྱ་དམག་གིས་དྲག་གནོན་གྱི་ཐོག་ནས་བོད་མིའི་རིགས་རྫས་བསྡུ་རུབ་བྱེད་པའི་ལས་གཞིར་རྒྱབ་སྐྱོར་བྱ་རྒྱུ་མཚམས་འཇོག་གནང་བའི་རེ་སྐུལ་ཞུས་འདུག་
བོད་མིའི་རང་དབང་ཚོགས་པས་སྤེལ་བའི་རེ་སྐུལ་ཞུ་ཡིག་དེའི་ནང་། རྒྱ་ནག་གཞུང་གི་ཉེན་རྟོག་པས་ཨ་རིའི་འཕྲུལ་རིགས་ཚན་རྩལ་ཁང་གིས་བཟོ་སྐྲུན་བྱས་པའི་རིགས་རྫས་བསྡུ་བྱེད་ཀྱི་ཅ་དངོས་བཀོལ་ཏེ། ད་བར་བོད་ཀྱི་བྱིས་པ་ལོ་ལྔ་ནས་ཚུད་པའི་བོད་མི་ས་ཡ་ ༡། ༢ ལྷག་གི་རིགས་རྫས་བསྡུ་རུབ་བྱས་ཡོད་ཅིང་། འདི་ལོའི་ཕྱི་ཟླ་ ༩ ནང་ཨ་རིའི་ཚན་རྩལ་ཁང་དེས་བོད་ནང་ཡོད་པའི་རྒྱ་གཞུང་ཉེན་རྟོག་པར་བོད་ནང་གི་བྱིས་པ་ཚུད་པའི་བོད་མིའི་རིགས་རྫས་བསྡུ་རུབ་སླད་མཁོ་དངོས་མཐུན་སྦྱོར་བྱ་རྒྱུར་མིང་རྟགས་བཀོད་ཡོད་པ་དང་། རྒྱ་ནག་གཞུང་དང་ལྷན་འགྲིག་མཐུན་བྱུང་བའི་ཚོང་འབྲེལ་དེ་གཅིག་པུས་ཨ་སྒོར་༡༦༠༠༠༠ ལྷག་གི་ཡོང་བབ་བྱུང་ཡོད་འདུག ཅེས་འཁོད་འདུག
རྒྱ་ནག་གི་མགོ་ཁྲིད་ཞི་ཅིན་ཕིན་གྱི་དབང་ཆ་ལོག་སྤྱོད་ཀྱི་འོག་ནས། རྒྱ་ནག་གཞུང་གིས་བོད་ནང་གི་བོད་མི་རྣམས་ཀྱི་རིགས་རྫས་བསྡུ་རུབ་བྱས་པ་ནི། རྒྱ་ནག་གཞུང་གིས་བོད་མིར་གྲངས་ཉུང་མི་རིགས་ཀྱི་ངོ་བོའི་ཐོག་ནས་དྲག་གནོན་དང་དབྱེ་འབྱེད་འཕར་མ་བྱེད་བཞིན་ཡོད་པ་མ་ཟད། དེས་བོད་མི་རྣམས་ཀྱི་ངོ་བོ་རྩ་བརླག་གཏོང་བའི་དམིགས་ཡུལ་བཟུང་ཡོད་པའི་ཁར། རྒྱ་ནག་གཞུང་གིས་བོད་ནང་གི་བོད་མི་ཚོར་བརྙན་མིག་སོགས་ནས་སོ་ཞིབ་དང་བྱ་ར་བྱེད་ཀྱི་ཡོད་ཅིང་། མི་སྒེར་གྱི་ཁེ་ཕན་ལའང་འགོག་སྲུང་བྱེད་པའི་གནས་སྟངས་ཧ་ཅང་ཞན་པོ་ཡིན་སྐོར་སོགས་བཀོད་ཡོད་འདུག
རྒྱ་ནག་གཞུང་གིས་ཁྲིམས་མཐུན་མིན་པའི་ཐོག་ནས་བོད་ནང་གི་བྱིས་པ་ཚུད་པའི་བོད་མི་རྣམས་ཀྱི་རིགས་རྫས་བཙན་གྱིས་བསྡུ་རུབ་བྱས་ཏེ། བོད་མིའི་ངོ་བོ་སོགས་རྩ་མེད་བཟོ་བའི་སྲིད་ཇུས་ཞིག་གདིང་མུས་ཡིན་པ་ལྟར། ད་ལན་བོད་མིའི་རང་དབང་གིས་ཨ་རིའི་ (Thermo Fisher Scientific) ཁང་གིས་རྒྱ་ནག་གཞུང་ལ་རིགས་རྫས་བརྟག་དཔྱད་བྱེད་ཆེད་ཀྱི་ཅ་དངོས་མི་བཙོང་རྒྱུར་རེ་སྐུལ་བྱས་པ་དེར། འདས་པའི་བདུན་ཕྲག་གཅིག་ཙམ་གྱི་ནང་མི་གྲངས་གཅིག་སྟོང་ལྷག་གིས་མིང་རྟགས་བཀོད་ནས་རྒྱབ་སྐྱོར་ཐོབ་ཡོད་ཅིང་། གཞན་ཡང་དབུས་བོད་མིའི་སྒྲིག་འཛུགས་གཙོས། བཙན་བྱོལ་བོད་མིའི་གཞུང་སྒེར་མང་པོས་རྒྱ་ནག་གཞུང་གིས་བོད་མིའི་རིགས་རྫས་བསྡུ་ལེན་བྱེད་མཚམས་འཇོག་དགོས་ཤིང་། རྒྱལ་སྤྱིའི་ཁྱོན་ཡོངས་ཀྱིས་བོད་མིའི་རིགས་རྫས་བསྡུ་མཚམས་བཞག་བཅུག་དགོས་པའི་རེ་སྐུལ་ཡང་བྱས་ཡོད་པ་རེད།
དེ་བཞིན་ཉེ་སྔོན་རྒྱ་ནག་གཞུང་གིས་བོད་ཆབ་མདོ་གྲོང་ཁྱེར་དུ་རིགས་རྫས་བརྟག་དཔྱད་ཀྱི་ལས་གཞི་ལག་བསྟར་བྱས་ཏེ། ས་གནས་བོད་མིའི་མཛུབ་རྗེས་དང་། ཁྲག་རིགས་བསྡུ་ལེན་བྱས་ཡོད་པ་མ་ཟད། དེ་སྔོན་འགྲོ་བ་མིའི་རིགས་རྫས་བརྟག་དཔྱད་དང་འབྲེལ་བའི་ཉམས་ཞིབ་ཀྱི་སྙན་ཐོར། རྒྱ་ནག་གཞུང་གིས་བོད་མི་དང་ཡུ་གུར་གཙོས་རྒྱ་ནག་གིས་བཙན་བཟུང་བྱས་པའི་གྲངས་ཉུང་མི་རིགས་རྣམས་ཀྱི་རིགས་རྫས་རྣམས་ཆོག་མཆན་མེད་པར་སྤྱད་ཡོད་སྐོར་གསལ་ཡོད་པ་རེད།
གསར་འགོད་པ། དཔལ་ལྡན།
