རྒྱ་ནག་གི་ཤོག་དཀར་གསར་བརྗེའི་ལས་འགུལ་ལ་གདུང་སེམས་མཉམ་སྐྱེད་བྱས།

བཙན་བྱོལ་གཞུང་མང་གཉིས་ནས་རྒྱ་ནག་གི་ཤོག་དཀར་གསར་བརྗེའི་ལས་འགུལ་ལ་གདུང་སེམས་མཉམ་སྐྱེད་བྱས།

ད་ལྟའི་ཆར་རྒྱ་ནག་ནང་ཏོག་དབྱིབས་གཉན་རིམས་གཙང་སེལ་ཟེར་བའི་སྲིད་ཇུས་ལ་རྒྱ་རིགས་ས་ཡ་མང་པོས་གཞུང་ལ་ངོ་རྒོལ་བྱེད་བཞིན་ཡོད་སྟབས། ཁ་སང་ཕྱི་ཚེས་ ༢ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་བཀའ་ཤག་སྐབས་བཅུ་དྲུག་པས་བོད་དང་ཡུ་གུར། རྒྱ་ནག་མི་མང་བཅས་ལ་ཏོག་ནད་གཙང་སེལ་ཟེར་བའི་སྲིད་ཇུས་འོག་དཀའ་ངལ་འཕྲད་བཞིན་ཡོད་པ་དང་། རྒྱ་ནག་མི་མང་སྟོང་ཕྲག་མང་པོས་རིམས་ནད་བཀག་འགོག་གི་སྲིད་ཇུས་ལ་ངོ་རྒོལ་བྱེད་བཞིན་པ་སོགས་ལ་གདུང་སེམས་མཉམ་སྐྱེད་ཡོད་པའི་བསྒྲགས་གཏམ་སྤེལ་གནང་འདུག

དེ་ཡང་བཀའ་ཤག་གི་བསྒྲགས་གཏམ་གསུང་འཕྲིན་དེའི་ནང་།  འདི་ལོ་ཕྱི་ཟླ་ ༨ ཟླ་མཇུག་ནས་བཟུང་རྒྱ་ནག་ཏུ་མི་འབོར་དུང་ཕྱུར་གསུམ་ལྷག་ཐེམ་སྤང་བཀའ་རྒྱའི་བཀག་སྡོམ་འོག་ཏུ་ཟླ་གྲངས་དུ་མར་ཚུད་ཅིང་། ལྷ་ས་དང་། ཨུ་རུམ་ཆི་ལྟ་བུར་ཟུར་བཀག་གི་དུས་ཚོད་ཉིན་གྲངས་བརྒྱ་ལྷག་བརྒལ་བ་བྱུང་སྟེ། མི་མང་གི་འགྲོ་འདུག་དཉལ་འཆག་དང་། བཟའང་བཏུང་། སྨན་བཅོས། འཚོ་གནས། སེམས་ཁམས་སོགས་ལ་ཚད་ལས་བརྒལ་བའི་དཀའ་ངལ་འཕྲད་པར་བརྟེན། རྒྱ་ནག་གི་གྲོང་ཁྱེར་དང་མཐོ་སློབ་ཁག་མང་པོར་རིམས་འགོག་སྲིད་ཇུས་ལ་ངོ་རྒོལ་དང་། རང་དབང་མང་གཙོའི་འདོད་འདུན་བསྒྲགས་འདུག་པར་གདུང་སེམས་མཉམ་བསྐྱེད་ཡོད།

བོད་ནང་དུ་རྒྱ་ནག་གོ་ནོར་འཁྲུལ་ཅན་གྱི་ཏོག་དབྱིབས་སྲིད་ཇུས་ལ་བརྟེན་ནས་བོད་མིའི་ཚེ་སྲོག་ལ་ཉེན་ཁ་འཕྲད་པའི་སྐོར་ཕྱི་ཟླ་ ༩ ཚེས་ ༢༦ ཉིན་གསར་འགོད་གསལ་བསྒྲགས་སྤེལ་ཟིན་པ་ལྟར། ནོར་འཁྲུལ་དེ་རིགས་བསྐྱར་ལྡབ་མི་ཡོང་བའི་རེ་བ་འཛིན་གྱི་ཡོད། རིམས་ནད་ཀྱིས་འཛམ་གླིང་ཁྱོན་དུ་མིའི་ཚེ་སྲོག་དང་འཚོ་གནས་ལ་སྔར་མ་གྲགས་པའི་དཀའ་ངལ་འཕྲད་ཡོད་ནའང་། སྲིད་གཞུང་ཁག་གིས་ཚན་རིག་དང་མཐུན་ཞིང་ནུས་ལྡན་གྱི་བྱེད་ཐབས་སྤྱད་དེ། ད་ཆ་ཡུལ་ལུང་ཕལ་ཆེ་བ་རྒྱུན་ལྡན་གྱི་འཚོ་བར་རོལ་ཐུབ་ཀྱི་ཡོད་པ་དང་། ཁ་རས་གྱོན་མ་དགོས་པའི་མི་འབོར་ས་ཡ་བརྒལ་བའི་རྒྱལ་སྤྱིའི་རྐང་སྤོལ་འགྲན་བསྡུར་ཡང་དབུས་ཤར་ཨེ་ཤ་ཡར་ཚ་ཚ་འུར་འུར་ངང་འགྲོ་བཞིན་ཡོད།

རྒྱ་ནག་གི་གོ་ལའི་གྲོང་ཚོའི་ཆ་ཤས་ཤིག་ཡིན་དང་འགྲོ་བ་མིའི་ཁྱིན་ཚང་གྲུབ་ཆ་ཞིག་ཡིན་པས། རྒྱལ་མཚམས་ཀྱིས་གཅོད་ཐབས་མེད་ཅིང་རྒྱལ་ཁབ་ལམ་ལུགས་ཀྱི་དབྱེ་བ་མེད་པའི་རིམས་ནད་འདིར་གདོང་ལེན་གཅིག་མཚུངས་སུ་བྱེད་དགོས་པ་ཡིན་པས། མི་མང་གིས་ནད་འགོག་སྲིད་ཇུས་ལ་འདོད་ཁེངས་མེད་པའི་རྣམ་འགྱུར་བསྟན་པ་དང་རང་དབང་དང་མང་གཙོའི་དགོས་འདུན་བཏོན་པར་དྲང་ཕྱོགས་ནས་ངོས་འཛིན་གྱིས་དྲོག་གནོན་དང་མནར་གཅོད་མི་གཏོང་བར། རྒྱལ་སྤྱིའི་གཞུང་མང་མཉམ་འབྲེལ་གྱི་བྱེད་སྟངས་ནང་བཞིན་རིམས་འགོག་གི་སྲིད་ཇུས་བཅོས་སྒྲིག་ཡོང་བའི་རེ་སྐུལ་ཞུ་རྒྱུ་དང་། རིམས་ནད་ཀྱི་འཇིགས་པ་གང་མྱུང་ཞི་སྟེ་རྒྱུན་ལྡན་གྱི་འཚོ་བ་རོལ་ཐུབ་པར་མཆོག་གསུམ་རྒྱལ་བ་རྒྱ་མཚོར་གསོལ་འདེབས་ཞུ་རྒྱུ་བཅས་ཞེས་བརྗོད་འདུག

ཡང་ཁ་སང་རྒྱ་གར་གྱི་རྒྱལ་ས་ལྡི་ལིའི་རྒྱ་ནག་གཞུང་ཚབ་མདུན་དུ་དབུས་ཀྱི་གཞོན་ནུ་ལྷན་ཚོགས་ཀྱི་སྣེ་འཁྲིད་འོག བོད་ཀྱི་གཞུང་འབྲེལ་མིན་པའི་ཚོགས་སྡེ་ཁག་དང་རྒྱ་གར་བོད་དོན་རྒྱབ་སྐྱོར་བ་སོགས་ནས། རྒྱ་ནག་མི་མང་གི་ཤོག་དཀར་གསར་བརྗེའི་ལས་འགུལ་ལ་གདུང་སེམས་མཉམ་སྐྱེད་དང་ཞི་ཅིན་ཕིན་གྱི་སྣེ་འཁྲིད་པའི་རྒྱ་ནག་དམར་ཤོག་ཚོགས་པ་དང་དེའི་མགོ་འཁྲིད་རྣམས་ལ་ངོ་རྒོལ་ཡོད་པའི་སྐད་འབོད་ལས་འགུལ་སྤེལ་ཡོད་པ་དང་། ངོ་རྒོལ་ལས་འགུལ་དེའི་སྐབས་བོད་རིགས་རྒན་གཞོན་བརྒྱ་ལ་ཉེ་བ་ཞིག་གིས། ཞི་ཅིན་ཕིན་གྱིས་སྲིད་དབང་ནས་དགོངས་པ་ཞུ་དགོས། ང་ཚོ་བོད་ལ་རང་དབང་དགོས། བོད་ནང་མནར་གཅོད་གཏོང་མཚམས་འཇོག་དགོས། རྒྱ་ནག་གཞུང་ངོ་ཚ། ༧གོང་ས་མཆོག་སྐུ་ཚེ་ཡུན་རིང་བརྟན་པར་ཤོག ཅེས་སོགས་ཀྱི་འབོད་ཚིག་སྒྲོག་བཞིན་རྒྱ་ནག་གཞུང་ལ་ངོ་རྒོལ་གནང་ཡོད་ཅིང་། སྐབས་དེར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་བཀྲ་ཤིས་དར་རྒྱས་ལགས་ཀྱིས། རྒྱ་ནག་དམར་ཤོག་ཚོགས་པའི་མགོ་འཁྲིད་མའོ་ཙེ་ཏུང་གཙོ་བྱས་པའི་ཏུན་ཞོ་ཕིན། ཅང་ཙི་མེན་དང་ཧུའུ་ཅི་ཐོ། ཞི་ཅིན་ཕིན་སོགས་ཀྱིས་འདས་པའི་ལོ་ངོ་ ༧༠ རིང་རྒྱ་ནག་མི་མང་དང་བོད་པ་གཙོ་བྱས་པའི་ཡུ་གུར་སོགས་གྲངས་ཉུང་མི་རིགས་ཁག་གི་རང་དབང་དང་འདྲ་མཉམ། ཐོབ་ཐང་སོགས་གཉའ་གནོན་དང་རྡོག་རོལ་གཏོང་གི་ཡོད་པར་བརྟེན་རྒྱ་ནག་གཞུང་ལ་ངོ་རྒོལ་བྱེད་བཞིན་ཡོད་པའི་གཏམ་བཤད་གནང་སོང་བ་དང་། དེ་རྗེས་བོད་མི་རིགས་ཀྱི་སླད་དུ་ལུས་སྲོག་ལོངས་སྤྱོད་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་དང་ཏོག་དབྱིབས་གཉན་རིམས་གཙང་སེལ་གྱི་སྲིད་ཇུས་བཀག་རྒྱའི་གྲོང་ཁྱེར་ (Urumqi) ནང་མེ་སྐྱོན་ཤོར་ནས་འདས་གྲོངས་སུ་གྱུར་བའི་མི་ ༡༠ དང་རྒྱ་ནག་མི་མང་བཅས་ཀྱི་ཆེད་དུ་མྱ་ངན་གུས་འདུད་ངག་བཅད་སྐར་མ་གཅིག་རིང་བཅས་གནང་ཡོད་པ་དང་། དེ་བཞིན་བོད་དོན་ལས་འགུལ་བ་དང་རང་དབང་འཐབ་རྩོད་པ་བསྟན་འཛིན་བརྩོན་འགྲུས་དང་ལས་འགུལ་བ་གཞན་ཁག་ཅིག་གིས་གཏམ་བཤད་སྤེལ་ཡོད་པ་རེད།

ཕྱི་དྲོ་ཆུ་ཚོད་ ༥ ནས་ ༦ བར་བཞུགས་སྒར་མེ་གྷན་སུམ་མདོ་རུ་དབུས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག ད་ལྟའི་བོད་དང་རྒྱ་ནག་ནང་གི་གནས་སྟངས་ལ་གདུང་སེམས་མཉམ་སྐྱེད་མཚོན་པའི་མར་མེ་ཁྲོམ་སྐོར་གྱི་ལས་འགུལ་ཞིག་ཀྱང་སྤེལ་ཡོད་པ་དང་། མར་མེ་ཁྲོམ་སྐོར་གྱི་ལས་འགུལ་དེའི་ནང་བོད་ཀྱི་གཞུང་འབྲེལ་མིན་པའི་ཚོགས་སྡེ་ཁག་དང་བཞུགས་སྒར་ཁུལ་གྱི་སེར་སྐྱ་མི་མང་དང་བོད་དོན་རྒྱབ་སྐྱོར་བ་སོགས་ཀྱིས་མཉམ་ཞུགས་གནང་ཡོད་པ་རེད།

དེ་ཡང་ཉེ་བའི་བདུན་ཕྲག་གཅིག་ལྷག་རིང་རྒྱ་ནག་གི་རྒྱལ་ས་པེ་ཅིན་ཚུད་པའི་ཡུ་གུར་རང་སྐྱོང་ཁུལ་ཟེར་བ་དང་ཧྲང་ཧེ། ནཱན་ཅིན་དང་ཀཱང་ཀྲོའུ་སོགས་གཙོ་བྱས་པའི་ཏོག་དབྱིབས་གཙང་སེལ་གྱི་སྲིད་ཇུས་འོག་སྒོ་རྒྱ་བསྡམས་པའི་གྲོང་ཁྱེར་དང་ས་ཁུལ་མི་འདྲ་བ་ ༢༠ ལྷག་གི་མི་མང་དང་སློབ་མ་སོགས་རྒྱ་རིགས་སྟོང་ཕྲག་མང་པོས། གཙོ་བོ་ཏོག་དབྱིབས་གཙང་སེལ་ཟེར་བའི་སྲིད་ཇུས་མཚམས་འཇོག་དགོས་པའི་འབོད་ཚིག་སྒྲོག་བཞིན་སྲང་ལམ་དུ་ཐོན་ནས་རྒྱ་ནག་དམར་ཤོག་གཞུང་ལ་ངོ་རྒོལ་བྱས་དང་བྱེད་མུས་ཡིན་ཡང་། ད་ལྟའི་ཆར་རྒྱ་ནག་མི་མང་གི་ངོ་རྒོལ་ལས་འགུལ་དེ་སྲིད་གཞུང་གི་དྲག་གནོན་འོག་ནས་རིམ་བཞིན་བཀག་སྡོམ་བྱེད་མུས་ཡིན་པ་རྒྱལ་སྤྱིའི་དབྱེ་ཞིབ་པ་དག་གིས་རྗོད་ཀྱིན་འདུག་ལ། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། རྒྱ་ནག་གཞུང་གིས་རྒྱ་ནག་མི་མང་གི་རྒྱལ་ཡོངས་རང་བཞིན་གྱི་ཞི་རྒོལ་ལས་འགུལ་དེར་གུས་བརྩི་དང་རང་དབང་དང་འགྲོ་བ་མིའི་ཐོབ་ཐང་བརྩི་སྲུང་བྱེད་དགོས་པའི་སྐུལ་མ་བྱས་འདུག

ཐེངས་འདིའི་རྒྱ་ནག་མི་མང་གི་རྒྱལ་ཡོངས་རང་བཞིན་གྱི་ངོ་རྒོལ་ལས་འགུལ་སྐབས་རྒྱ་ནག་དམར་ཤོག་ཚོགས་པར་གདོང་ལེན་གྱི་འབོད་ཚིག་སྣ་ཚོགས་བསྒྲགས་ཡོད་པ་ལས། ས་ཁུལ་ཁག་ཅིག་ཏུ་ཞི་ཅིན་ཕིན་སྲིད་སྟེགས་ལས་མར་འབབ་དགོས། རྒྱ་ནག་དམར་ཤོག་ཚོགས་པའི་དབང་སྒྱུར་མཚམས་འཇོག་དགོས། ང་ཚོར་མི་གཅིག་དབང་སྒྱུར་དང་རྒྱལ་པོ་ཞིག་མི་དགོས། རང་དབང་དགོས། གསར་འགོད་རང་དབང་དགོས། ཤིན་ཅང་སྒོ་འབྱེད་བྱེད་དགོས། རྒྱ་ནག་སྒོ་འབྱེད་བྱེད་དགོས་ཞེས་པ་སོགས་ཡིན་ཞིང་། ས་ཁུལ་ཁག་ཅིག་ཏུ་ཏོག་དབྱིབས་གཙང་སེལ་གྱི་སྲིད་ཇུས་མཚམས་འཇོག་དགོས་ཞེས་ལག་ཏུ་ཤོག་བུ་དཀར་པོ་འཛིན་བཞིན་ནཱན་ཅིན་དང་པེ་ཅིན་སོགས་ཀྱི་མི་མང་དང་སློབ་མ་སྟོང་ཕྲག་མང་པོས་ངོ་རྒོལ་ལས་འགུལ་སྤེལ་ཡོད།

གསར་འགོད་པ། སྐལ་བཟང་སྦྱིན་པ།