ཟླ་འདིའི་ཕྱི་ཚེས་ ༥ ཉིན་བོད་དར་མདོ་རྫོང་ཁོངས་ནས་ཡིན་པའི་བོད་རིགས་བུ་མོ་ ༤ ཁྲིན་ཏུའུ་ཡི་ཏོག་དབྱིབས་བཀག་སྡོམ་གྱི་ཞི་རྒོལ་ནང་ཞུགས་པའི་དོགས་གཞིའི་འོག་འཛིན་བཟུང་བྱས་ཡོད་པ་དང་ཁོང་ཚོའི་ནང་མི་ཚོར་འདྲི་རྩད་བྱས་ཏེ་ཁ་པར་ནང་དུའང་སྔོག་བཤེར་བྱས་ཡོད་འདུག
ཉེ་སྔོན་སི་ཁྲོན་ཁྲིན་ཏུའུ་རུ་མི་མང་འདུ་འཛོམས་བྱས་ཏེ་རྒྱ་ནག་གཞུང་གི་བཙན་གནོན་ལ་ངོ་རྒོལ་བྱས་ཡོད་པ་དང་། ཟླ་འདིའི་ཕྱི་ཚེས་ ༢ ཉིན་ཁྲིན་ཏུའུ་ཅིན་ནེའུ་ས་ཁུལ་དུ མི་མང་དང་སློབ་ཕྲུག་མང་པོ་འདུ་འཛོམས་བྱས་ཏེ་ངོ་རྒོལ་བྱེད་སྐབས་ལས་འགུལ་ནང་མཉམ་ཞུགས་བྱས་པའི་ཉེས་མིང་འོག ཟླ་འདིའི་ཕྱི་ཚེས་ ༥ ཉིན་ཁྲིན་ཏུའུ་གྲོང་ཁྱེར་ནས་དཀར་མཛེས་ཁུལ་དར་མདོ། འཁོར་ཡུལ་གསེར་ལུང་གྲོང་ཚོ་ནས་ཡིན་པའི་བུ་མོ་ ༤ འཛིན་བཟུང་བྱས་ཡོད་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་བོད་མི་ཞིག་གིས། ཁོང་ཚོའི་ནང་མི་རྣམས་དར་མདོ་རྫོང་ཉེན་རྟོག་ཁང་དུ་ཕྱིན་ནས་ཁོང་ཚོ་གང་དུ་ཡོད་མེད་དང་། ནག་ཉེས་ཅི་ཡོད་སྐད་ཆ་འདྲི་སྐབས། ད་ཚོས་གནས་ཚུལ་དེ་འདྲ་ཞིག་གང་ནས་གོ་སོང་། ཡར་མར་བརྒྱུད་བསྒྲགས་བྱས་ཡོད་མེད་སོགས་འདྲི་རྩད་བྱས་ཏེ། ནང་མི་ཚོའི་ཁ་པར་ནང་སྔོག་བཤེར་བྱས་ཡོད་པ་མ་ཟད། དར་མདོ་ཁུལ་དུའང་དམ་དྲག་ཆེ་རུ་བཏང་སྟེ་མི་མང་གི་ཁ་པར་ནང་གང་བྱུང་སྔོག་བཤེར་བྱེད་བཞིན་ཡོད་སྐོར་བརྗོད་བྱུང་།
ཡང་འདི་གའི་གནས་ཚུལ་མཁོ་སྤྲོད་པས། སྤྱི་ཚོགས་དྲ་ལམ་དུ་བསམ་ཚུལ་ཤོད་མཁན་བོད་པ་གཅིག་པུ་མིན་པ་དེ་ཚང་མས་ཤེས་གསལ་རེད་དེ། དེ་རིང་ཁ་སང་ཁྲིན་ཏུའུ་དང་དཀར་མཛེས་ཁུལ་སོགས་ཀྱི་ནང་དུ། བོད་པ་ལ་དམིགས་གསལ་གྱིས་དམ་དྲག་དང་དོགས་ཟོན་བྱས་ཏེ། གང་བྱུང་འདྲི་རྩད་བྱེད་པ་མ་ཟད་ཁ་པར་སོགས་ཀྱི་ནང་སྔོག་བཤེར་བྱེད་ཀྱི་ཡོད་སྟབས་ཚང་མས་ཞེད་སྣང་དང་ཡིད་གཟབ་བྱེད་བཞིན་ཡོད་སྐོར་དང་། ཁ་གཡར་ས་གང་རག་བྱས་ཏེ་ཆུང་ས་ནས་རྒྱ་སྒོར་ ༥༠༠ ཉེས་ཆད་ཕོག་ས་མང་པོ་ཡོད་པ་དང་། སང་ཉིན་ནས་བཟུང་ཉིན་ལྟར་ཏོག་དབྱིབས་བརྟག་དཔྱད་བྱེད་པལའང་རྒྱ་སྒོར་ ༥ རེ་སྤྲོད་དགོས་ཀྱི་ཡོད་པ་དེ་དཀའ་ངལ་ཡིན་སྐོར་བརྗོད་བྱུང་།
འཛིན་བཟུང་བྱས་པའི་ན་གཞོན་དེ་དག་ནི། གསེར་ལུང་གྲོང་ཚོའི་བུ་མོ་རང་ལོ་ ༢༦ ཡིན་པའི་འཛམ་དཀར་དང་། རང་ལོ་ ༢༨ ཡིན་པའི་སྐལ་བཟང་སྒྲོལ་མ། བདེ་ཆེན་དང་བདེ་ལྷ་ཞེས་པ་བཅས་ཡིན་འདུག་ལ། ཁོང་ཚོ་དར་མདོ་རྫོང་ཁོངས་ནས་དམའ་འབྲིང་བར་དུ་སློབ་གྲྭར་ཕྱིན་རྗེས། ཁྲིན་ཏུའུ་གྲོང་ཁྱེར་ཅིན་ནེའུ་ས་ཁུལ་གྱི་མགྲོན་ཁང་ཞིག་གི་ནང་ལས་ཀ་བྱེད་བཞིན་ཡོད་འདུག ཏོག་དབྱིབས་བཀག་སྡོམ་གྱི་རྐྱེན་གྱིས་བར་ལམ་ཟླ་ཤས་རིང་ལས་མེད་དུ་གྱུར་ཏེ་དཀའ་ངལ་མང་པོ་འཕྲད་ཡོད་པ་དང་། ཉེ་སྔོན་ས་གནས་སུ་མི་མང་གིས་ངོ་རྒོལ་ལས་འགུལ་སྤེལ་སྐབས་ཁོང་ཚོ་རོགས་པ་ཁ་ཤས་ཤིག་མཉམ་ཞུགས་བྱས་ཡོད་ལུགས་ཀྱི་ནག་ཉེས་གཡོགས་ཡོད་འདུག
འབྲེལ་ཡོད་གནས་ཚུལ། ནན་ཅིན་གྱི་ཞི་རྒོལ་ཁྲོད་བོད་རིགས་བུ་མོ་ཞིག་འཛིན་བཟུང་བྱས་འདུག
