བོང་ལི་སྐྱབས། ༢༠༢༢་ལོའི་ཕྱི་ཟླ་ ༡༢ ཚེས་ ༦།
དེ་སྔོན་བདག་བལ་ཡུལ་དུ། དགའ་ལྡན་ཡིད་དགའ་ཆོས་འཛིན་སྒོམ་སྒྲུབ་ཁང་གི་རྡོ་གཡའ་མའི་རྩིག་གྱང་ཅན་གྱི་ཁང་མིག་ཅིག་ནང་། ཁོག་སྟོད་གཅེར་བུར་ཕྱུང་དེ་རྐྱལ་དུ་རོ་སྟོད་སྔས་མགོ་ལ་འཁེན་དེ་དཔེ་ཆ་ཀློག་པའི་བར་མཚམས་ནས། མིག་གིས་ལྟ་ཕྱོགས་ཤིག་གིས་རང་གི་སྐམ་རིད་ཀྱི་རྩིབས་རུས་དང་ཁོག་ལ་རྡིབ་པའི་གསུས་ལོང་མཐོང་བ་ན་སེམས་ལ་ཡང་བསྐྱར་སྡུག་བསྔལ་ཞིག་སྐྱེས་ནས། “ང་འདི་ལ་ཤ་ཐོགས་རྒྱུ་མེད་པ་ཆི་ཟིག་ཡིན་ནམ”་ཞེས་ཨམ་སྐད་གདངས་མས་རང་གིས་རང་ལ་འཁང་ར་བྱས་པ་ད་ལྟ་ཕྱིར་དྲན་བྱས་ཚེ་དགོད་བྲོ་བ་ཞིག་ཀྱང་རེད།
ཨ་རིར་སླེབས་ནས་ལོ་ཤས་ཀྱི་རྗེས་ལ་གློ་བུར་ཐོལ་རྒྱག་ལ་ལུས་ཤ་རྒྱས། གྲོད་པ་ཚིལ་ལུས་བརྒྱངས། མར་སྒུར་ནས་ལྷམ་སྒྲོག་རྒྱག་ཀྱང་མདུད་དཀྲོལ་དཀའ་བའི་ཚད་ལ་སླེབས། ནེའུ་ཡོར་བོད་མི་འདུ་འཛོམས་ཆེ་བའི་འཇའ་ཀི་སོན་ཧའེ་ཁྲིའི་རྒྱ་གར་ཇ་ཁང་ཞིག་ཏུ། “ ཁོ་རེ། དེ་རིང་ངའི་སྐད་སྒྱུར་བ་ནི་ཨ་མདོ་བ་གཟུགས་པོ་ཆུང་ཆུང་གྲོད་ཁོག་ཆེན་པོ་ཁོ་རེད་འདུག”་ཟེར་གྱི་ཡོད་པ་ཕ་ཡུལ་གཅིག་པ་ཁ་ཤས་ཀྱིས་དངོས་སུ་གོ་ཐོས་བྱུང་བ་མ་ཟད། ཁོང་ཚོས་ད་དུང་སྐད་ངན་དེ་ངའི་རྣ་ལམ་དུའང་བསྐྱལ།
ད་དུང་། ཉིན་ཞིག་ལས་ཁུངས་གྲོལ་ནས་སྒོ་ཕྱི་ལ་ཐོན་པ་ན་ལག་ཐོགས་ཁ་པར་ལས་ཁུངས་ཀྱི་སྒྲོག་ཙེ་ཐོག་བརྗེད་ཟིན་པ་དྲན་ནས་ཕྱིར་རྟབ་རྟབ་པོར་ཁ་པར་ལེན་དུ་ཕྱིན་པ་ན། ང་ཚོའི་སྡེ་ཚན་གྱི་འགན་འཛིན་ཇོན་དང་ལས་གྲོགས་བུད་མེད་ཇན་ནི་ཧྥར་གཉིས་ཀྱིས་ལས་ཁུངས་ཀྱི་སྒོ་རྒྱག་བཞིན་འདུག ང་ཕྱིར་ཡོང་བ་མཐོང་བ་ན། འཇན་ནི་ཧྥར་ལུས་པོ་ཟུར་དུ་གཡོལ་ཙམ་བྱས་ཏེ་ལག་པ་གཅིག་གིས་སྒོའི་ཨ་ལོང་ལ་འཇུས་ཏེ་སྒོ་ཕྱེད་ཙམ་ཕྱེས་དེ་ང་ནང་དུ་གཏོང་བར་བརྩམས། ང་ཚ་ག་ཚིག་གེ་ངང་ནང་དུ་འཛུལ་དུས། ཚིལ་ལུས་འགྲེངས་པའི་གྲོད་པ་སྒོ་གླེགས་ལ་ཐོགས་ཏེ་ང་ནང་དུ་མ་ཐར། ཁོ་མོ་འཚུབ་ཆ་ཞིག་ལངས་ནས། ‘’འོ་དགོངས་དག” ཟེར་བཞིན་སྒོའི་ཨ་ལོང་ལག་པས་གློད། ངས་ཅི་ཟེར་དགོས་མ་ཤེས་པར། གློ་གླེགས་ལ་ཕུད་རྒྱག་ཞིག་བཏང་ཏེ་ནང་དུ་ཕྱིན། དུས་དེ་ནས་བཟུང་། དབུགས་སྒང་ལྟར་འབུར་བའི་རང་གི་གྲོད་ཁོག་ལ་འཚིག་པ་ཟ་བར་མ་ཟད། དེ་འདྲ་མིག་ལ་མི་མཛེས་ཤིང། འཁུར་ཙ་ལྗི་ལ། ལུས་སེམས་ཀྱི་བདེ་ཐང་དང་འཕྲོད་བསྟེན་ལ་གནོད་པའི་ཚིལ་ལུའི་གྲོད་ཁོག་ཅན་གང་དུ་མཐོང་ན་དེ་མུར་སེམས་མི་དགའ་བའི་ཚོར་སྣང་ཞིག་ངང་གིས་སྐྱེས། འདས་བའི་མི་ལོ་བཅུ་ཕྲག་གཅིག་ཙམ་རིང་། གྲོད་པའི་ཚིལ་ལུ་ནི་ངའི་ལུས་སེམས་ཀྱི་དཀའ་ངལ་ཆེ་ཤོས་ཤིག་ཏུ་གྱུར། དེ་ལ་གདོང་ལེན་བྱེད་དུས། སྐབས་རེར་རྒྱལ་ཁ་ཉི་ཚེ་བ་རེ་ཐོབ་མྱོང་ནའང་། ཟས་སྤྱོད་བསྟེན་ཉེས་ནམ་ཤོར་ལ་ཉིན་ཤས་ཀྱི་ནང་དུའང་ཚིལ་ལུའི་མགོ་བོ་གྲོག་གྲོག་བྱས་ནས་ཡོང་།
དྲ་རྒྱའི་དུས་རབས་འདིར། ཉེ་བའི་ལོ་ཤས་གོང་ནས་Podcast་ལ་ལྟ་ཉན་བྱེད་རྒྱུ་ནི་ངའི་གོམས་གཤིས་ཤིག་ཏུ་གྱུར།། ཁ་ཤགས་སྒྱུ་རྩལ་བ་Bobby Lee་དང་ཁོའི་བཟའ་ཟླ་ཟུར་བ་ཟུང་གིས་ཡུག་ཊོ་སྦུབས་ནང་སྤེལ་བའི་༼སྟག་གི་གསུས་པ༽་ དང་འཇོ་ རོ་རྒན་གྱིས་ ༼འཇོ་རོ་རྒན་རོལ་མྱོང༽་སོགས་ནི་བདག་གི་མིག་དང་རྣ་བའི་ལོངས་སྤྱོད་དུ་གྱུར་ཞིང་། ཟླ་ཤས་སྔོན་ནས་སི་ཊན་ཧྥོར་སྒྲི་གཙུག་ལག་སློབ་གྲྭའི་ཀླད་པ་དང་དབང་རྩའི་སྐོར་ཆེད་མཁས་སློབ་དཔོན་ཨན་སྒྲི་རོ ཧོ་སྦིར་མན་ལགས་ཀྱིས་དྲ་ཐོག་ཏུ་རིན་མེད་དུ་སྤེལ་གནང་བགྱི་བའི་༼ཧོ་སྦིར་མན་ཚོད་ལྟ་ཁང༽་གཏམ་གླེང་སྟེགས་བུ་ནི་བདག་གི་དགའ་མོས་ཆེ་ཤོས་ཤིག་ཏུ་གྱུར།
སློབ་དཔོན་ཧོ་སྦིར་མན་ལགས་ནི་རང་གི་ཆེད་ལས་ལ་ངེས་པ་དོན་གྱིས་རྒྱུས་མྱོང་ལྡན་པ་ཞིག་དང་ནུབ་ཕྱོགས་མཁས་པའི་ཁྲོད་མཁས་པའི་གདན་ཐོབ་ཡོད་མཁན་ཞིག་ཡིན། ཁོང་གི་ལས་ཞོར་དུས་མྱུར་ཚད་ཆེ་ལ་རྙོག་འཛིང་ལྕི་བའི་དེང་གི་སྤྱི་ཚོགས་ཁྲོད་རྒྱུན་པར་འཕྲད་བཞིན་པའི་སེམས་སྡུག་དང་གཉིད་མ་ཁུག་པ་བཅོས་པ། དྲན་པ་གསོ་ཐབས། ལུས་སེམས་བདེ་ཐང་གི་གཤེད་མ་སྟེ་འབྱུང་ལུས་ཀྱི་ཞག་ཚིལ་ཕུང་གསོག་བཞུ་སྟངས་ཐེ་བའི་བརྗོད་གཞི་སྣ་མང་ཐོག་ཚད་ལྡན་དཔྱད་གླེང་བདུན་རེའི་གཟའ་ཟླ་བའི་ཉིན་དྲ་ཐོག་ལ་སྤེལ་གྱིན་ཡོད། ཁོང་གིས་དེ་རིང་བར་དུ་གསེར་ནག་ལས་ཀྱང་རིན་ཐང་ཆེ་བའི་དཔྱད་གླེང་བརྙན་ཕབ་ལེའུ་༡༠༡ ཙམ་ཡུག་ཊོ་སྦུབས དང་Spotify་ཐོག་སྤེལ་ཡོད་པ་མི་མང་པོས་ལས་ཞོར་དུ་བལྟ་ཉན་དང་དགའ་བསུ་ཆེན་པོ་ཐོབ་ཡོད།
ལྷག་པར་དུ་ལེའུ་༤༡་ ནང་སྙུང་གནས་སྐོར་དེང་རབས་ཚན་རིག་ཆེད་མཁས་པའི་ཉམས་ཞིབ་གྲུབ་དོན་གང་ཡོད། དུས་བཀག་སྙུང་གནས་ཇི་ལྟར་སྲུང་བརྩི་བྱེད་སྟངས་དང་དེའི་དགེ་ཕན་སྐོར་ལ་དཔྱད་གླེང་ཞིབ་ཚགས་བྱས་ཡོད་ལ། ལེའུ་་༥༢་ནང་ཧར་ཝུར་གཙུག་ལག་སློབ་ཆེན་གྱི་མཁས་དབང་སྒྲེ་ཝི་སྒྲི་སན་ཁི་ལར་ལགས་དང་ལྷན་དུ་སྙུང་གནས་ཀྱིས་ཚེ་ཚད་བསྲིངས་བ་དང་རྒ་བ་ལྡོག་པ། རྒ་བ་ནར་འགྱང་ཐུབ་པའི་སྐོར་དབང་རྩ་རིག་པ་དང་སྐྱེས་ཁམས་ཚན་རིག་གི་སྒྲོམ་གཞི་ནང་བཙུད་དེ་བགྲོ་གླེང་ལྷུག་པོར་བགྱིས་གནང་ཡོད་པ་ནི་ཡིད་ཀྱི་དྭངས་བ་འདྲེན་པ་ཞིག་གོ།
ང་ཚོ་ལ་རིང་ནས་འཆར་རྒྱུས་ཡོད་པའི་སྙུང་གནས་ཀྱི་ཆོས་ཕྱོགས་ཀྱི་ཡོན་ཏན་དང་དགེ་མཚན་ནི་གྱི་ན་བ་སྐྱེས་བུ་ཆུང་བའི་རིགས་སུ་གཏོགས་པ་བདག་ལྟ་བུའི་བསམ་བརྗོད་ཀྱི་ཡུལ་ལས་འདས་ནའང་། འདས་བའི་བདུན་ཕྲག་ཁ་ཤས་རིང་སྦྱོར་དངོས་རྗེས་གསུམ་གང་དུའང་ཆོས་ཕྱོགས་ཀྱི་ལྟ་སྒོམ་སྤྱོད་གསུམ་གང་ཡང་མ་བསྲེས་པར་ཉིན་རེའི་ཉིན་གུང་ཆུ་ཚོད་བཅུ་གཉིས་ཐོག དུས་ཡུན་ཆུ་ཚོད་ཕྱེད་ནང་ཚུད་དུ་ཟས་དང་བཏུང་བ་ཐུན་རེ་བཏང་ཚར་བ་བྱས་ཏེ། ཕྱི་ཉིན་གྱི་གུང་ཚིགས་བར་བཟའ་བཏུང་གང་ཡང་མ་བསྟེན་པ་བྱས་པ་ལ་དེ་རིང་བར་ལུས་ཀྱི་ལྗིད་ཚད་ཕོན་ཊི་བཅུ་བརྒལ་བ་ཉུང་དུ་ཕྱིན་ཐོག ལྟོ་བ་དང་མཚང་རའི་གཡས་གཡོན་གྱི་ཚིལ་ལུ་ཞུ་ནས་འབྱུང་ལུས་ཡང་ཟོར་ལྡན་ལ། རྣམ་རིག་གསལ་ཞིང་དྭངས་པ། སེམས་ཁམས་ལྷོད་ཤིག་སེ་གྱུར་བ་ནི་དངོས་གནས་ཧ་ལས་པ་ཞིག་རེད།
གཤམ་དུ་། Autophagy་ཟེར་བ་སྙུང་གནས་ཀྱི་གནས་སྐབས་སུ་ཕུང་བོའི་ཕྲ་ཕུང་ཤི་རོའམ་གད་སྙིགས་སུ་གྱུར་བ་ཕྲ་ཕུང་གསོན་པོར་གནས་པའི་ཁ་ཟས་ལ་བསྟེན་ནས་ཕུང་པོས་རང་ཁ་རང་གསོ་དང་རང་ཉིད་གཙང་བཟོའི་བརྒྱུད་རིམ་ལ། ཉི་ཧོང་གི་མཁས་པ་Yoshinori Ohsumi་ལགས་ཀྱིས་གྲོ་ཕྱེ་སྐྱུར་རྫས་ཀྱི་རིགས་འདྲ་བྱེད་ལས་སྟེང་ནས་ར་སྤྲོད་བདེན་དཔང་ལ་ཕྱི་ལོ་ ༢༠༡༦ ་ལོའི་ནོ་ཝེལ་གསོ་རིག་གཟེངས་རྟགས་ཕུལ་བ་དེས་ཤར་ཕྱོགས་པའི་རིག་གཞུང་ཁྲོད་གདོད་ནས་ཕྱག་ལེན་ཡོད་པའི་སྙུང་གནས་ཀྱི་དགེ་ཕན་ལ་ནུབ་ཕྱོགས་པས་དོ་སྣང་དང་གདེང་འཇོག་སླེབས་ཡོད་པ་དང་སྦྱར་ཏེ། རྒྱ་གར་ཕོ་གསར་ཞིག་གིས་དྲི་བ་བཏང་བ་ལ། ཧིན་རྡུའི་བླ་ཆེན་ས་ཏྭི་གུ་རུ་ལགས་ཀྱིས་བཀའ་ལན་གང་འདྲ་ཞིག་གནང་ཡོད་པ་བཀོད་དེ་རྩོམ་ཐུང་འདི་མཇུག་བསྒྲིལ་བར་བྱ།
རྒྱ་གར་ཕོ་གསར་དེས།
“ས་ཏྭི་གུ་རུ་ལགས་སྐུ་ཁམས་བཟང་། དུས་ཆེན་ཁྱད་པར་ཅན་ལ་སྙུང་གནས་སྲུང་བ་ནི་གནའ་སྔ་མོ་ནས་རྒྱ་གར་ནང་ཉམས་ལེན་ཡོད་པ་ཞིག་ཡིན། ཡིན་ནའང་། སྙུང་གནས་སྐབས་ཀྱི་Autophagy་སྐོར་ལ་ནོར་ཝེལ་བྱ་དགའ་མ་བསྩལ་བར། རྒྱ་གར་བ་མང་པོ་ཞིག་ནས་སྙུང་གནས་སྲུང་བ་ནི་ཚན་རིག་ལ་མི་མཐུན་ཞིང་གཏན་ཚིགས་དང་མ་འཐུས་པ་ཞིག་ཡིན་པར་འདོད་ཀྱི་ཡོད་མོད།། ད་ལོ་བདག་གིས་ཀྱང་དུས་བཀག་སྙུང་གནས་བསྲུངས་བ་ཡིན།། (སྐབས་འདིར་ས་ཏྭི་གུ་རུ་དང་ཚོགས་དབུས་ཀྱི་མི་རྣམས་གད་མོ་བགད)” ། ཁོས་མུ་མཐུད་དེ་ “བྱེད་ལུགས་རྙིང་བར་བརྩིས་བའི་གནའ་བོའི་ཕྱག་ལེན་ཕན་ཐོགས་ལྡན་པ་ཞིག་ནུབ་ཕྱོགས་པས་ཞལ་བཞེས་ཐོབ་རྗེས་གཞི་ནས་ག་གོར་མེད་པར་མི་ཚོས་ཉམས་ལེན་བྱེད་པ་གང་ཡིན་ནམ།”
ས་ཏྭི་གུ་རུས་ལན་དུ། “དེ་ནི་ཁྱོད་ལ་འགྲིག་བསྡད་པའི་ཤ་མདོག་གང་དེ་མི་ལྡན་པའི་རྐྱེན་གྱིས་རེད།
”ཅེས་སྨྲས་བ་དང་ཁྲོམ་གྱི་མི་ཚོགས་ཧབ་ཆ་དི་རེ་སོང་།
གོང་དུ་བཀོད་པའི་དྲ་གནས་འབྲེལ་ཐག་ཁག་ཅིག
༡ སྟག་གི་གསུས་པ་གླེང་སྟེགས།
https://www.youtube.com/@TigerBelly/featured
༢ ཇོ་ རོ་རྒན་གླེང་སྟེགས།
https://www.youtube.com/@joerogan
༣ ཧོ་སྦིར་མན་གླེང་སྟེགས།
https://www.youtube.com/@hubermanlab
༤ ཧིན་རྡུའི་བླ་ཆེན་ས་ཏྭི་གུ་རུ་ལ་དྲི་བ་དང་ཁོང་གི་བཀའ་ལན།
