ཨ་རིའི་གཞུང་གིས་བོད་རང་སྐྱོང་ལྗོངས་ཀྱི་དཔོན་ངན་མཐོ་ཤོས་གཉིས་ལ་ཉེས་ཆད་བཅད་འདུག

ཨ་རིའི་ནོར་སྲིད་ལྷན་ཁང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་འཛམ་གླིང་རྒྱལ་ཁབ་ ༩ ཡི་དཔོན་ངན་ ༤༠ ཐེར་འདོན་ཉེས་ཆད་བཅད་པའི་ཁྲོད་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཟུར་པ་ཝུ་ཡེན་ཅེ་དང་ཉེན་རྟོག་སྤྱི་ཁྱབ་ཟུར་པ་ཀྲང་ཧོང་པའོ་ཟེར་བ་དེ་གཉིས་ཀྱང་འདུག

ཁ་སང་ཕྱི་ཚེས ༩ ཉིན་ཨ་རིའི་ནོར་སྲིད་ལྷན་ཁང་གིས་རྒྱལ་སྤྱིའི་འགྲོ་བ་མིའི་རིགས་ཀྱི་གཞི་རྩའི་ཐོབ་ཐང་རྡོག་རོལ་གཏོང་མཁན་གྱི་དཔོན་ངན་གྲངས་ ༤༠ ཐེར་འདོན་བྱས་ཏེ། ཨ་རིའི་ནང་ཡོད་པའི་ཁོ་ཚོའི་རྒྱུ་དངོས་གཞུང་བཞེས་གཏོང་བའི་དཔལ་འབྱོར་ཉེས་ཆད་བཅད་པ་གསལ་བསྒྲགས་བྱས་ཡོད་པ་དང་། དེའི་ཁྲོད་དུ་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ཟུར་པ་ཝུ་ཡེན་ཅེ་དང་། བོད་རང་སྐྱོང་ལྗོངས་ཟེར་བའི་ཉེན་རྟོག་ཁང་གི་སྤྱི་ཁྱབ་ཟུར་པ་དང་ད་ལྟའི་ལྗོངས་སྲིད་གཞུང་གི་མགོ་འཁྲིད་གཞོན་པ་ཀྲང་ཧོང་པའོ་ཟེར་བ་གཉིས་ཀྱིས། བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་བའི་ནག་ཉེས་འོག ཁོ་གཉིས་ཀྱི་ཨ་རིར་ཡོད་པའི་རྒྱུ་དངོས་ཡོངས་རྫོགས་བཀག་སྡོམ་བྱས་ཡོད་འདུག

ཨ་རིའི་ནོར་སྲིད་ལྷན་ཁང་གིས་སྤེལ་བའི་བསྒྲགས་གཏམ་ནང་།  ཝུ་ཡེན་ཅེ་ (Wu Yingjie) ནི་ཕྱི་ལོ ་༢༠༡༦ ནས་ ༢༠༢༡ བར་གྱི་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ཡིན་ཞིང་། ཁོས་དབང་ཆ་བཟུང་བའི་ལོ་དུས་ནང་དཔལ་འབྱོར་དང་འཛུགས་སྐྲུན་སོགས་ཀྱི་ཐད་ལ་ནུས་ཤུགས་བཏོན་ཡོད་ཅིང་། དཔལ་འབྱོར་གོང་མཐོར་གཏོང་བའི་གོ་རིམ་ཁྲོད། ཁོས་ཁྲིམས་ལུགས་གང་ལའང་བརྩི་འཇོག་མི་བྱེད་པར་ཉེས་མེད་བོད་མི་བསད་པ་དང་། མནར་གཅོད་གཏོང་བ། བཙན་འཁྲིད་བྱས་པ་ཚུད་པའི་འགྲོ་བ་མིའི་རིགས་ཀྱི་ཐོབ་ཐང་ལ་རྡོག་རོལ་ཚབས་ཆེན་བཏང་ཡོད། དེ་བཞིན་ཁོས་བོད་ནང་དབང་ཆ་འཛིན་སྐབས་བོད་ནང་གི་བུད་མེད་མང་པོ་ཞིག་གི་སྐྱེ་སྒོ་བཙན་གྱིས་བཀག་པ། བཙན་གྱིས་བུད་མེད་ཚོའི་མངལ་ཤོར་དུ་བཅུག་ཡོད་ལ། བོད་མིའི་ཆོས་སྲིད་གཉིས་ཀྱི་ཐོབ་ཐང་ལ་དམ་དྲག་བྱས་ཡོད་པ་མ་ཟད། བོད་ནང་གི་ཉེས་མེད་ཆབ་སྲིད་བཙོན་པ་རྣམས་ལ་མནར་གཅོད་ཚད་མེད་བཏང་ཡོད་པ་སོགས་བཀོད་འདུག

དེ་བཞིན་ཉེན་རྟོག་སྤྱི་ཁྱབ་ཀྲང་ཧོང་པའོ་ (Zhang Hongbo)ཟེར་བ་དེས་ཀྱང་ཉུང་མཐར་ཕྱི་ལོ ༢༠༡༨ ནས་འདི་ལོའི་ཕྱི་ཟླ་ ༡༡ བར་བོད་རང་སྐྱོང་ལྗོངས་ཟེར་བའི་ཉེན་རྟོག་སྤྱི་ཁྱབ་ཀྱི་ལས་གནས་ཁུར་ཏེ། བོད་མི་རྣམས་ལ་མནར་གཅོད་ཚད་མེད་བཏང་ཡོད་ཅིང་། ལྷག་པར་ཁོས་ཆོས་སྲིད་ཀྱི་ཁྲིམས་དང་འགལ་བར་བཤད་དེ་བོད་མི་མང་པོ་གང་བྱུང་འཛིན་བཟུང་བཙན་ཁྲིད་བྱས་ཡོད་སྐོར་སོགས་བཀོད་འདུག

འགྲོ་བ་མིའི་ཐོབ་ཐང་གི་ཉིན་མོར་ཨ་རིའི་ནོར་སྲིད་ལས་ཁུངས་ཀྱིས་སྤེལ་བའི་བསྒྲགས་གཏམ་ནང་། འདི་ལོར་འགྲོ་བ་མིའི་རིགས་ཀྱི་ཐོབ་ཐང་རྡོག་རོལ་དུ་བཏང་བའི་རྒྱལ་ཁབ་དགུ་ཐེར་འདོན་བྱས་པའི་ཁྲོད། བྱང་ཀོ་རི་ཡ་དང་། ཨེལ་སལ་ཝ་ཌོར་ (EL SALVADOR) གྷུ་ཊ་མ་ལ་ (GUATEMALA)  གྷི་ནི་ཡ་ ( GUINEA) ཨི་རན། མ་ལི་ (Mali) ཨུ་རུ་སུ། རྒྱ་ནག་དང་ཧྥི་ལི་བྷིན་སི་ (PHILIPPINES ) བཅས་ནས་ཁྱོན་དཔོན་ངན་ ༤༠ ཐེར་འདོན་གྱིས་དཔལ་འབྱོར་ཉེས་ཆད་བཅད་ཡོད་འདུག

གསར་འགོད་པ། དཔལ་ལྡན།