བོད་རེབ་གོང་ཁུལ་དང་སི་ཁྲོན་རྔ་བ་ཁུལ་སོགས་སུ་ཆམ་རིམས་ལྟ་བུ་ཕོག་སྟེ་ཚ་བ་རྒྱས་པ་དང་མགོ་ན་བ་སོགས་ཀྱི་ནད་མནར་འགོ་མཁན་ཧ་ཅང་ཇེ་མང་དུ་འགྲོ་བཞིན་ཡོད་ཀྱང་སྨན་མ་རག་པའི་དཀའ་ངལ་ཆེན་པོ་འཕྲད་བཞིན་ཡོད་འདུག
ཉེ་སྔོན་རྒྱ་ནག་གཞུང་གིས་ཏོག་དབྱིབས་བཀག་སྡོམ་གློ་བུར་དུ་ཀློད་དེ་མི་མང་གིས་སོ་སོར་བདག་པོ་རྒྱག་དགོས་པ་དང་། གལ་སྲིད་ནད་མནར་ཚབས་ཆེན་བྱུང་ཚེ་སྨན་ཁང་དུ་སྟོན་དགོས་ལུགས་བསྒྲགས་ཡོད་པ་དང་། ད་ལྟའི་ཆར་བོད་མཚོ་སྔོན་ཞིང་ཆེན་དང་སི་ཁྲོན་ཕྱོགས་སུ་ཆམ་རིམས་ལྟ་བུ་ཞིག་ཕོག་སྟེ། ལུས་ཡོངས་སུ་ཚ་བ་རྒྱས་པ་དང་མགོ་ན་བ། ཟུངས་ཤུགས་ཉམས་པ་སོགས་རིམས་ནད་ན་མཁན་ཧ་ཅང་ཇེ་མང་དུ་འགྲོ་བཞིན་ཡོད་ཀྱང་། བོད་རེབ་གོང་ས་ཁུལ་དང་སི་ཁྲོན་རྔ་བ་ཁུལ་སོགས་ནས་སྨན་མ་རག་པར་དཀའ་ངལ་ཆེན་པོ་འཕྲད་བཞིན་འདུག
ཉིན་ཤས་གོང་དུ་རེབ་གོང་རོང་བོ་དགོན་ཆེན་གྱིས་མི་མང་ལ་མི་འགྱངས་བར་རི་ཁྲོད་ལོ་མ་གྱོན་མའི་སྨན་སྦྱིན་གནང་རྒྱུ་ཡིན་སྐོར་ཡོངས་ཁྱབ་གསལ་བསྒྲགས་གནང་འདུག་ལ། བོད་སྨན་འཕྲུལ་ཐང་དང་རིན་ཆེན་མང་སྦྱོར་ཆེན་མོ་སོགས་ཀྱིས་ཕན་ཐོགས་ཡོང་གི་ཡོད་ཀྱང་རག་ཁག་པོ་ཆགས་ཡོད་འདུག དེའི་ཐད་བོད་མི་ཞིག་གིས་འདི་གའི་གསར་འགོད་པར་སྲིད་གཞུང་གིས་མི་མང་ལ་སོ་སོས་སོ་སོར་བདག་པོ་བརྒྱག་དགོས་སྐོར་བརྗོད་པ་ཙམ་ལས་བཀོད་སྒྲིག་དང་གཟིགས་སྐྱོང་རོགས་རམ་གང་ཡང་བྱེད་ཀྱི་མེད་སྐོར་བརྗོད་བྱུང་།
ཡང་བོད་ནང་གི་བོད་མི་ཞིག་གིས། བོད་མཛོད་དགེ་ཁུལ་དུ་རིམས་ནད་ཀྱི་བཀག་རྒྱ་ཀློད་རྗེས་རིམས་ནད་མཆེད་མགོ་བརྩམས་ཤིང་། མཛོད་དགེ་རྫོང་དང་། རྔ་བ་རྫོང་། ཁྱུང་ཆུ་རྫོང་སོགས་ཀྱི་མི་ཧ་ཅང་མང་པོ་ཞིག་ལ་གཟུགས་པོའི་རུས་ཚིགས་དང་མགོ མིད་པ་སོགས་ན་ནས་ཉལ་སར་ལྷུང་ནས་ཉུང་མཐར་ཉིན་གྲངས་གསུམ་ཙམ་ལ་ཉལ་སར་ལྷུང་གི་ཡོད་པ་དང་། རིང་ན་བདུན་ཕྲག་གཅིག་ནས་གཉིས་རིང་ཉལ་སར་ལྷུང་གི་ཡོད་ཀྱང་། ཟུར་འཇོག་ཁང་དུ་འགྲོ་འདོད་མེད་པར་རང་ཁྱིམ་དུ་བསྡད་ནས་དྲག་སྐྱེད་ཡོང་ཐབས་བྱེད་བཞིན་ཡོད་སྐོར་དང་། སྤྱིར་བཏང་བཀག་སྡོམ་ནན་པོ་བྱེད་ཀྱི་མེད་ཀྱང་ཡར་མར་གང་འདོད་འགྲོ་འོང་བྱེད་མི་ཆོག་སྐོར་བརྗོད་བྱུང་།
ཡང་བོད་མི་ཞིག་གིས་འདི་གའི་གསར་འགོད་པར། ཕྱི་ཟླ་ ༡༢ ཟླ་ ༡༠ ཡས་མས་ནས་བོད་ཁུལ་གྱི་སློབ་གྲྭ་ཁག་གནས་སྐབས་སྒོ་བརྒྱབ་སྟེ་དྲ་ཐོག་ནས་སློབ་འཁྲིད་བྱེད་བཞིན་ཡོད་ཀྱང་། དེ་རིང་ཞོགས་པར་བོད་མཚོ་སྔོན་ཞིང་ཆེན་གྱི་ཁོངས་སུ་ཡོད་པའི་བོད་པའི་སློབ་ཆུང་(གནས་ཚུལ་མཁོ་སྤྲོད་པའི་རེ་བ་བཞིན་ས་མིང་བྲིས་མེད)ཞིག་གི་ནང་། འཛིན་གྲྭ་གཅིག་ནང་ཁྱོན་སློབ་ཕྲུག་ ༤༢ ལྷག་ཡོད་པ་ནས་སློབ་ཕྲུག་ ༣༦ ན་ནས་དགོངས་པ་ཞུས་ཡོད་སྐོར་དང་། ཁྱིམ་ཚང་མང་པོ་ཞིག་གི་བཟའ་མི་ཚང་མ་ན་བ་དང་། ཡང་ན་བཟའ་མི་རེ་ཟུང་ན་བསྡད་པ་མང་པོ་ཡོང་གི་ཡོད་ཀྱང་། ཏོག་དབྱིབས་བརྟག་དཔྱད་བྱེད་པར་འགྲོ་འདོད་མེད་ལ། ཕྱིན་པ་ཡིན་ནའང་ཟུར་བཀག་ཁང་དེ་འདྲ་དམིགས་བསལ་མེད་སྐོར་བརྗོད་བྱུང་།
གསར་འགོད་པ། དཔལ་ལྡན།
