རྒྱ་གར་དང་ཉི་ཧོང་གིས་རྒྱ་ནག་ལ་ཁ་གཏད་གཅོག་ཐབས་ཆེད་མཉམ་འབྲེལ་མཁའ་ལམ་དམག་སྦྱོང་ཐོག་མ་དེ་སྤེལ་གྱིན་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་སྤེལ་བའི་གནས་ཚུལ་ལྟར་ན། ཨེ་ཤ་ཡའི་ཁུལ་དུ་རྒྱ་ནག་གི་དཔལ་འབྱོར་རྒྱ་སྐྱེད་དང་དམག་གི་ཤུགས་རྐྱེན་སོགས་ཡར་རྒྱས་འགྲོ་བཞིན་ཡོད་པར་བརྟེན། ཉི་ཧོང་དང་རྒྱ་གར་གཉིས་ཀྱིས་རྒྱ་ནག་ལ་ཁ་གཏད་གཅོག་སླད། ཁ་སང་ཕྱི་ཚེས་ ༡༦ ནས་ ༢༦ བར་ཉིན་གྲངས་བཅུ་གཅིག་རིང་ཉི་ཧོང་གི་རྒྱལ་ས་ཊོག་ཡོའི་བྱང་ཤར་ཁུལ་དུ་ཡོད་པའི་ (Ibaraki) ས་ཁུལ་གྱི་མཁའ་དམག་ལྟེ་གནས་སུ་ (Hyakuri Air Base) རྒྱལ་ཁབ་གཉིས་མཉམ་འབྲེལ་ཐོག་ནས་མཁའ་ལམ་དམག་སྦྱོང་བྱེད་བཞིན་ཡོད་པ་རེད།
ཉི་ཧོང་རྒྱལ་སྲུང་བློན་ཆེན་ལས་ཁུངས་ཀྱིས། རྒྱལ་ཁབ་གཉིས་མཉམ་འབྲེལ་གྱིས་ཉིན་གྲངས་ ༡༡ རིང་མཁའ་ལམ་དམག་སྦྱོང་བྱ་རྒྱུ་ཡིན་པ་དང་། རྒྱ་གར་རང་བཙན་ཉིན་མོ་། ཟླ་འདིའི་ཕྱི་ཚེས་ ༢༦ ཉིན་མཁའ་ལམ་དམག་སྦྱོང་མཇུག་བསྒྲིལ་རྒྱུ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་རྒྱ་ནག་གི་དམག་གི་སྟོབས་ཤུགས་ཡར་རྒྱས་འགྲོ་མུས་ཡིན་པས། ཉི་ཧོང་དང་རྒྱ་གར་བར་རྒྱལ་སྲུང་གཙོས་འབྲེལ་ལམ་གོང་འཕེལ་གཏོང་བར་འབད་བརྩོན་བྱ་རྒྱུ་ཡིན། ཞེས་དང་། ཉིན་གྲངས་ ༡༡ རིང་གི་མཁའ་ལམ་དམག་སྦྱོང་སྐབས། ཉི་ཧོང་རྒྱལ་སྲུང་མཁའ་དམག་གིས་ (F-2) རྟགས་ཅན་དང་ (F-15) རྟགས་ཅན་གྱི་མཁའ་དམག་གནམ་གྲུ་བཞི་རེ་གཏོང་གི་ཡོད་པ་དང་། རྒྱ་གར་མཁའ་དམག་གིས་ (Su-30MKl) རྟགས་ཅན་གྱི་མཁའ་དམག་གནམ་གྲུ་བཞི་དང་(C-17) རྟགས་ཅན་གྱི་སྐྱེལ་འདྲེན་གནམ་གྲུ་ ༢ ། དེ་བཞིན་ (lL-78) རྟགས་ཅན་གྱི་ (refuelling tanker) སྣུམ་འདྲེན་གནམ་གྲུ་ ༡ བཅས་དང་རྒྱ་གར་གྱི་མཁའ་དམག་གི་ཆེད་ལས་མི་སྣ་ ༡༥༠ ཙམ་ཐེངས་འདིའི་མཁའ་ལམ་དམག་སྦྱོང་ནང་མཉམ་ཞུགས་བྱེད་ཀྱི་ཡོད་སྐོར་སོགས་བརྗོད་ཡོད་འདུག
རྒྱལ་ཁབ་གཉིས་ཐུན་མོང་གིས་མཁའ་དམག་གི་གོ་རྟོགས་གོང་སྤེལ་དང་། རྒྱལ་སྲུང་གི་འབྲེལ་ལམ་སྲ་བརྟན་བཟོ་རྒྱུ། དེ་བཞིན་མཁའ་དམག་གི་རྩལ་དང་ཐབས་ཇུས་སོགས་ཡར་རྒྱས་གཏོང་སླད་མཁའ་ལམ་དམག་སྦྱོང་བྱེད་ཀྱི་ཡོད་པ་དང་། དེ་འབྲེལ་ཐད་རྒྱ་གར་གྱི་རྒྱལ་སྲུང་བློན་ཆེན་ལས་ཁུངས་ཀྱིས། ཉིན་གྲངས་ ༡༡ རིང་དམག་སྦྱོང་བྱེད་སྐབས་ཁོར་ཡུག་མི་འདྲ་བའི་ནང་མཁའ་ལམ་དམག་སྦྱོང་སྣ་མང་བྱེད་པ་དང་། རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་གཏང་རྒྱུ་ཡིན་སྐོར་སོགས་བརྗོད་ཡོད་འདུག
ཉི་ཧོང་རྒྱལ་ཁབ་ཀྱིས་ཨ་རི་དང་ཨོ་གླིང་། དབྱིན་ཡུལ། འཇར་མན་ནི་བཅས་དང་ལྷན་དུ་ཕྱོགས་གཉིས་ཐུན་མོང་གིས་མཁའ་ལམ་དམག་སྦྱོང་བྱས་ཡོད་པ་དང་། རྒྱ་གར་ནི་ཉི་ཧོང་དང་མཉམ་དུ་མཁའ་ལམ་དམག་སྦྱོང་བྱེད་མཁན་ཐེངས་ལྔ་པ་དེ་ཆགས་ཀྱི་ཡོད་འདུག་ལ། དེ་སྔ་ཉི་ཧོང་གིས་རྒྱ་གར་དང་མཉམ་དུ་ས་མཚོ་གཉིས་ཀྱི་དམག་སྦྱོང་བྱས་ཡོད་པ་རེད། ཉི་ཧོང་དང་རྒྱ་གར། ཨོ་གླིང་། ཨ་རི་བཅས་ནི་མཐུན་ཕྱོགས་རྒྱལ་འབྲེལ་བཞི་ཡིན་པ་དང་། རྒྱལ་ཁབ་དེ་དག་གིས་རྒྱ་ནག་གི་དམག་གི་སྟོབས་ཤུགས་དང་དཔལ་འབྱོར་གྱི་གནས་སྟངས་སོགས་ཡར་རྒྱས་ཕྱིན་པར་སེམས་འཚབ་ཆེན་པོ་བྱེད་ཀྱི་ཡོད་པར་བརྟེན། རྒྱ་ནག་ལ་ཁ་གཏད་གཅོག་སླད་དམག་སྦྱོང་བྱས་དང་བྱེད་མུས་ཡིན་པ་མ་ཟད། འདས་པའི་བདུན་ཕྲག་ནང་ཉི་ཧོང་གིས་དབྱིན་ཡུལ་དང་མཉམ་དུ་རྒྱལ་སྲུང་གི་འབྲེལ་ལམ་གསར་པ་བཙུགས་ཡོད་འདུག
སྤྱིར་བཏང་ཕྱི་ལོ་ ༢༠༡༩ ཟླ་ ༡༡ ནང་རྒྱ་གར་གྱི་རྒྱལ་ས་ལྡི་ལིར་རྒྱ་གར་གྱི་ཕྱི་སྲིད་བློན་ཆེན་དང་ཉི་ཧོང་གི་རྒྱལ་སྲིད་བློན་ཆེན་གཉིས་ཐུག་འཕྲད་ཀྱིས་རྒྱལ་སྲུང་སྐོར་ལ་ཚོགས་འདུ་འཚོགས་ཡོད་པ་དང་། སྐབས་དེར་ཉི་ཧོང་དང་རྒྱ་གར་གཉིས་ཟུང་འབྲེལ་གྱིས་དམག་སྦྱོང་བྱ་འཆར་ཡོད་ཀྱང་། ཏོག་དབྱིབས་གཉན་རིམས་རྐྱེན་གྱིས་འགྲོ་འོང་བཀག་སྡོམ་དང་ཁྱིམ་སྡོད་སྒོ་རྒྱ་བསྡམས་པར་བརྟེན། དམག་སྦྱོང་བྱེད་མི་ཐུབ་པར་ཕྱིར་འགྱང་བཏང་ཡོད་འདུག
གསར་འགོད་པ། བསྟན་འཛིན་ཕུར་བུ།
