ཆབ་སྲིད་བཙོན་ཟུར་དགེ་བཤེས་ཕན་བདེ་རྒྱལ་མཚན་ལགས་ལི་ཐང་རྫོང་བཙོན་ཁང་འདས་གྲོངས་སུ་ཕྱིན་ཡོད་འདུག

བོད་ཀྱི་ཆབ་སྲིད་བཙོན་པ་དགེ་བཤེས་ཕན་བདེ་རྒྱལ་མཚན་ལགས་ལི་ཐང་རྫོང་བཙོན་ཁང་འདས་གྲོངས་སུ་ཕྱིན་ཡོད་འདུག

འདི་གའི་གསར་འགོད་པས་འབྲེལ་ཡོད་བོད་མི་ཞིག་ལ་སྐད་ཆ་དྲིས་སྐབས་ཁོང་གིས། དགེ་བཤེས་ཕན་བདེ་རྒྱལ་མཚན་ལགས་འདས་གྲོངས་སུ་ཕྱིན་ཏེ་ཉིན་གྲངས་བཞི་ལྔ་ཡས་མས་འགྲོ་ཡི་ཡོད། ཁོང་ལི་ཐང་རྫོང་གི་བཙོན་ཁང་དུ་འདས་གྲོངས་སུ་ཕྱིན་འདུག ཅེས་དང་། ཁོང་འཛིན་བཟུང་བྱས་པའི་གནས་ཚུལ་དེ་ཟླ་གཉིས་ཙམ་གྱི་གོང་ཡིན་སྐོར་སོགས་བརྗོད་བྱུང་།

གནས་ཚུལ་མཁོ་སྤྲོད་པས་བརྗོད་གསལ་ལྟར་ན། དགེ་བཤེས་ཕན་བདེ་རྒྱལ་མཚན་ལགས་བཙོན་འཇུག་བྱེད་དགོས་དོན་གང་ཡང་ཁ་གསལ་མེད་ཀྱང་། ཁོང་ཕྱི་ལོ་ ༢༠༡༧ ཡས་མས་ཙམ་ལ་ཕྱིར་བོད་ནང་ཕེབས་རྗེས། ཁོང་གི་ཕ་ཡུལ་ཇོང་པ་གྲོང་བརྡལ་གྱི་ཉེ་འཁྲིས་རི་སྒང་ཞིག་ནས་མཚམས་ལ་བཞུགས་ཡོད་པ་དང་། ན་ནིང་གཞིས་ནིང་དགེ་བཤེས་ཁོང་གི་མཛད་འཕྲིན་ཧ་ཅང་རྒྱས་ཏེ་ཕ་ཡུལ་གྱི་ཡུལ་མི་མང་པོར་འདུམ་འགྲིག་དང་ཆོས་འཆད་འཁྲིད་སོགས་ཀྱི་ཐོག་ནས་ཕན་ཐོགས་བྱུང་བར་བརྟེན། རྒྱ་ནག་གཞུང་གིས་འཛིན་བཟུང་བྱས་པར་ངོས་འཛིན་བྱེད་བཞིན་ཡོད་པ་ལས། ཁོང་འཛིན་བཟུང་བྱས་པའི་རྒྱུ་རྐྱེན་དངོས་གང་ཡིན་གྱི་གནས་ཚུལ་ཤོད་པར་ཞེ་སྣང་བྱེད་ཀྱི་ཡོད་འདུག

དགེ་བཤེས་ཕན་བདེ་རྒྱལ་མཚན་ལགས་ལིང་ཐང་རྫོང་ཇོང་པ་ཞེས་པའི་ས་ཆར་འཁྲུངས་ཤིང་། ད་ལྟ་རང་ལོ་ ༥༦ ཡིན་འདུག དགེ་བཤེས་ཕན་བདེ་རྒྱལ་མཚན་ལགས་བོད་ནས་རྒྱ་གར་དུ་ཕེབས་རྗེས། ལྷོ་ཕྱོགས་སེ་ར་སྨད་སྤོམ་ར་ཁང་ཚན་དུ་སློབ་གཉེར་གནང་སྟེ་དགེ་བཤེས་ཀྱི་མཚན་གནས་བཞེས་ཡོད་པ་དང་། ལྷོ་ཕྱོགས་སུ་བཞུགས་སྐབས་སློབ་གཉེར་ཧ་ཅང་ལེགས་པས་མཚན་ལ་སེར་འབྲས་དགའ་གསུམ་ཞེས་བོས་མྱོང་ཞིང་། ཕྱི་ལོ་ ༡༩༨༨ ཡས་མས་ཙམ་ལ་དོ་རྒྱལ་དང་འབྲེལ་བའི་གནས་སྟངས་ཤིག་གི་རྐྱེན་བྱས་ཏེ། ཆེད་དུ་དྷ་སར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་བར་ཕེབས། དེ་ནས་བལ་ཡུལ་དང་འབྲུག་སོགས་སུ་ཡུན་རིང་བྱ་བྲལ་དུ་བཞུགས་ཡོད་འདུག

གསར་འགོད་པ། སྐལ་བཟང་སྦྱིན་པ།