བོད་གནས་ལྟ་ཞིབ་ཁང་གིས་བྲག་མགོར་རྒྱ་ནག་གིས་དྲག་གནོན་བྱས་པའི་ཞིབ་འཇུག་སྙན་ཐོ་ཞིག་བཏོན་པའི་ཐོག་བགྲོ་གླེང་བྱས་སོང་།
དེ་རིང་སྔ་དྲོའི་ཆུ་ཚོད་ ༡༠།༣༠ ཙམ་གྱི་སྟེང་དྷ་སའི་ནོར་བུ་གསོལ་མགྲོན་ཁང་དུ་བཞུགས་སྒར་དུ་རྟེན་གཞི་བྱས་པའི་བོད་གནས་ལྟ་ཞིབ་ཁང་གིས། ཉེ་ཆར་རྒྱ་ནག་གཞུང་གིས་ཁམས་བྲག་མགོར་དྲག་གནོན་སྐོར་གྱི་སྙན་ཐོ་(Desecration in Drago County: Destruction of Tibetan religious heritage , arbitrary detentions and torture) ཞེས་པ་དབྱིན་ཇིའི་གྲོས་ཚོགས་སུ་དབུ་འབྱེད་གནང་ཡོད་པ་དང་འབྲེལ། སྙན་ཐོ་དེའི་ཐོག་བགྲོ་གླེང་འཚོགས་སོང་།
བགྲོ་གླེང་གི་ཐོག་མར་བོད་གནས་ལྟ་ཞིབ་ཁང་གི་འགན་འཛིན་དབང་ལྡན་སྐྱབས་ལགས་ཀྱིས་རྒྱ་ནག་གིས་ཁམས་བྲག་མགོར་དྲག་གནོན་སྐོར་གྱི་སྙན་ཐོ་དེ་ཐོག་མར་དབྱིན་ཇིའི་གྲོས་ཚོགས་སུ་དབུ་འབྱེད་གནང་ཡོད་པའི་བརྒྱུད་རིམ་དང་གཏམ་བཤད་པ་རྣམས་ངོ་སྤྲོད་གྲུབ་མཚམས། བོད་གནས་ལྟ་ཞིབ་ཁང་གི་སྤྱི་གཉེར་འགན་འཛིན་སམ་ཝལ་ཊོན་ (Sam Walton) ལགས་ཀྱིས། རྒྱ་ནག་གཞུང་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་རྡོག་རོལ་དང་དྲག་གནོན་གྱི་སྲིད་ཇུས་ལག་བསྟར་བྱེད་བཞིན་ཡོད་སྟབས། སྙན་ཐོ་དེ་གལ་ཆེན་ཡིན་པ་དང་། སྙན་ཐོ་དེའི་ནང་ཁམས་བྲག་མགོའི་ནང་སློབ་གསོ་བསྒྱུར་བཀོད་ཁང་ཚུད་པའི་སྟོན་པའི་སྐུ་བརྙན་སོགས་གཏོར་བཤིག་བཏང་ཡོད་པའི་དཔང་རྟགས་དངོས་ར་སྤྲོད་ཀྱི་ཡོད་པས། སྙན་ཐོ་དེས་བོད་པ་ཙམ་མིན་པར་རྒྱལ་སྤྱིའི་སྟེང་བོད་ནང་གི་དངོས་ཡོད་གནས་སྟངས་དྲིལ་བསྒྲགས་དང་གླེང་སློང་། ཤེས་རྟོགས་ཐུབ་པར་ཕན་ཐོགས་འབྱུང་གི་ཡོད་སྐོར་དང་། ཉེ་ལམ་སྙན་ཐོ་དབུ་འབྱེད་བྱས་པ་དང་སྙན་ཐོ་དེ་དབྱིན་ཇིའི་སྲིད་བློན་གྱི་དམིགས་བསལ་ཆོས་དད་རང་དབང་གི་སྐུ་ཚབ་མ་ (Fiona Bruce) ལགས་སུ་འབུལ་རྒྱུ་བྱུང་ཡོད་སྐོར་སོགས་བརྗོད་སོང་།
དེ་རྗེས་བོད་གནས་ལྟ་ཞིབ་ཁང་གི་ཉམས་ཞིབ་པ་རྒན་པ་ཆོས་སྐྱིད་ལགས་ཀྱིས། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་སྐབས་ནས་བཟུང་། ཕྱི་ལོ་ ༢༠༠༩ དང་ ༢༠༡༢ སོགས་སུ་ཁམས་བྲག་མགོའི་སེར་སྐྱ་མི་མང་བརྒྱ་ཕྲག་ལྷག་གིས་བོད་ལ་རང་དབང་དགོས་པ་དང་༧རྒྱལ་བ་རིན་པོ་ཆེ་བོད་ནང་གདན་འདྲེན་དགོས་པའི་འབོད་ཚིག་སོགས་བསྒྲགས་ཏེ། རྒྱ་གཞུང་ལ་ངོ་རྒོལ་བྱས་པའི་བརྒྱུད་རིམ་དང་འབྲེལ་ནས། ད་སྔ་བར་རྒྱ་ནག་གཞུང་གིས་ཁམས་བྲག་མགོའི་སེར་སྐྱ་མི་མང་ལ་དྲག་གནོན་བྱེད་བཞིན་པའི་རྒྱབ་ལྗོངས་ཀྱི་གནས་ཚུལ་རྒྱས་བསྡུས་ཤིག་ངོ་སྤྲོད་གནང་གྲུབ་མཚམས། ཕ་ཡུལ་བྲག་མགོ་ནས་ཡིན་བྷི་ཊི་འོད་སྣང་ལགས་ཀྱིས། ད་ལྟ་ཁམས་བྲག་མགོའི་ནང་འབྱུང་བཞིན་པའི་གནས་སྟངས་དེ་བྲག་མགོ་ཁོ་ན་ཙམ་མིན་པར་བོད་ས་ཡོངས་ལ་གནས་སྟངས་གཅིག་མཚུངས་ཀྱི་དཀའ་ངལ་འཕྲད་བཞིན་པར་ངོས་འཛིན་བྱེད་ཀྱི་ཡོད་པ་དང་། བྲག་མགོར་ཆ་མཚོན་ན། ཕྱི་ལོ་ ༡༩༧༤ ལོ་ནས་རྒྱ་ནག་གཞུང་གིས་བྲག་མགོའི་ནགས་རི་གཅོད་གཏུབ་དང་ས་ཆུ་འབག་བཙོག་ཏུ་བཟོས་པ་དང་། ཆོས་དང་རིག་གཞུང་། སྐད་ཡིག སློབ་གསོ་སོགས་ཀྱི་ཐོག་དྲག་གནོན་ཤུགས་ཆེན་བྱས་ཡོད་པ་ཁོང་རང་ཉིད་ནས་རྒྱུས་པའི་ཉམས་མྱོང་ལས་མིག་ལག་ཟིན་བྱུང་སྐོར་སོགས་བརྗོད་སོང་།
དེ་བཞིན། ཤོག་ངོས་ ༤༢ ལྡན་པའི་བོད་གནས་ལྟ་ཞིབ་ཁང་གི་མདོ་ཁམས་བྲག་མགོའི་སྙན་ཐོ་དེ་ནི། ཕྱི་ལོ་ ༢༠༡༢ ནས་ད་བར་ལོ་ངོ་བཅུའི་རིང་བྱུང་བའི་གནས་ཚུལ་ཁག་ལ་ཞིབ་འཇུག་བྱས་པའི་སྙན་ཐོ་ཞིག་ཡིན་པ་དང་། དེ་ཡང་གཙོ་བོ་ཕྱི་ལོ་ ༢༠༡༢ ལོར་བྲག་མགོའི་སེར་སྐྱ་སུམ་བརྒྱ་ལྷག་གིས་རྒྱ་གཞུང་ལ་ངོ་རྒོལ་བྱས་པ་ནས། ཕྱི་ལོ་ ༢༠༢༡ གི་ལོ་མཇུག་ཏུ་བྲག་དགེ་ལྡན་ནང་བསྟན་སློབ་གྲྭ་བཙན་གྱིས་སྒོ་བརྒྱབ་པ་དང་སྟོན་པའི་སྐུ་བརྙན་རྩ་གཏོར། ཕྱི་ལོ་ ༢༠༢༢ ཟླ་ ༢ ནང་གུ་རུའི་སྐུ་བརྙན་རྩ་གཏོར་བཏང་བའི་གནས་ཚུལ་སོགས་ཡིག་པར་གཉིས་ཀྱི་ལམ་ནས་བདེན་དཔང་ར་སྤྲོད་བྱས་འདུག་པ་མ་ཟད། རྒྱ་ནག་གི་དྲག་གནོན་ལ་ངོ་རྒོལ་དང་མི་འདོད་པའི་རྣམ་འགྱུར་བསྟན་ནས་འཛིན་བཟུང་བཙོན་འཇུག་བྱས་པའི་བྲག་མགོའི་སེར་སྐྱ་རེ་རེའི་རྒྱབ་ལྗོངས་ཀྱི་གནས་ཚུལ་སོགས་ལ་ཞིབ་འཇུག་བྱས་ཏེ་བཀོད་འདུག
གསར་འགོད་པ། སྐལ་བཟང་སྦྱིན་པ།
