བནྡེ་སྐྱབས།
མྱི་ཡི་ཚེ་རིང་ན་ལྷ་ཡི་རོ་ཡང་མཐོང་ཟེར་བ་ཅི་མ་བདེན། སྔོན་མ་ཡིན་ན་བཙན་བྱོལ་དུ་དོལ་རྒྱལ་ཁ་ལ་ཁྱེར་པའི་རྒྱ་ནག་གི་རྒྱུག་ཁྱི་ཁག་ཅིག་དང་མི་དམངས་ཤོག་སྒོར་གྱི་བསླུ་བྲིད་དུ་ཚུད་པའི་བོད་པ་ནང་རུལ་བ་རེ་ཟུང་ཞིག་འབྲེལ་ཡོད་རྒྱལ་ཁོངས་སུ་ཡོད་པའི་རྒྱ་ནག་གཞུང་ཚབ་ཀྱི་ལོ་གསར་སོགས་དུས་སྟོན་རིགས་ལ་མཉམ་ཞུགས་བྱེད་ཀྱི་ཡོད་པའི་གནས་ཚུལ་གོ་ཐོས་སུ་གྱུར་ཡང་། དེ་ཚོ་ནི་རང་དོན་འགྲུབ་ན་ཆ་ལུགས་ངན་ན་ངན་ཟེར་པའི་དཔེ་ལྟར། ཁེ་ཕན་ཉི་ཚེ་བ་ཙམ་གྱི་སླད་དུ་ཡབ་མེས་ཀྱི་བླ་བཙོང་ཞིང་ལག་དམར་ལ་དཔའ་དར་འཐེན་མཁན་ཏེ། མི་ངན་ཤི་ཡང་གཏམ་ངན་ས་སྟེང་དུ་འཇོག་མཁན་རིགས་ཡིན་པར་སེམས་མོད། འདི་ལོར་བལ་ཡུལ་རྒྱ་ནག་གཞུང་ཚབ་ཁང་དུ་བོད་ཀྱི་ལོ་གསར་སྐོང་འཚོགས་བྱེད་པར་བལ་ཡུལ་དུ་གནས་སྡོད་བྱེད་མཁན་བོད་མི་གཙོ་བོར་བྱས་པའི་བཙན་བྱོལ་བོད་མི་སྐྱ་སེར་མང་པོ་ཞིག་མཉམ་ཞུགས་བྱས་འདུག་པ་འདི་མཐོང་ཡོང་དུས། ང་ཚོའི་ལས་དབང་དང་འབྲེལ་བའི་དྲི་རྟགས་གྲངས་མེད་ཅིག་ཤ་གསེང་རུང་གསེང་ནས་བཙུར་མ་དགོས་པར་ཐོན་ཡོང་གི་འདུག
འདི་ལོའི་ཕྱི་ཟླ་གཉིས་པའི་ཚེས་ ༢༥ ཉིན་བལ་ཡུལ་གཞུང་ཚབ་ཏུ་བོད་ཀྱི་ལོ་གསར་སྐོང་འཚོགས་བྱས་པའི་གནས་ཚུལ་འདི་རྒྱ་ནག་གི་གཞུང་འབྲེལ་དྲ་རྒྱ་སོགས་སུ་ཤུགས་ཀྱིས་སྒྲག་གིན་པ་མ་ཟད། ད་དུང་གཞུང་ཚབ་ཀྱིས་བལ་ཡུལ་དུ་ཡོད་པའི་བོད་རིགས་སྤུན་ཟླ་ཚོས་མེས་རྒྱལ་གཅིག་གྱུར་དང་ཀྲུང་ཧྭ་མི་རིགས་ཀྱི་མཐུན་སྒྲིལ་ལ་ཞབས་འདེགས་རྒྱབ་སྐྱོར་གྱི་ལེགས་སྐྱེས་འབུལ་རྒྱུའི་སྐུལ་འདེད་བྱས་ཡོད་ཚུལ་སོགས་བཀོད་འདུག་ལ། དེ་བས་ཀྱང་ངོ་ཚ་ཞིང་ཁ་སྐྱངས་པ་ཞིག་ལ་བོད་ནང་གི་སྐད་འཕྲིན་ཚོགས་པ་སོགས་སུ་བཙན་བྱོལ་བོད་མི་ཚོ་རྒྱ་ནག་གཞུང་ཚབ་ཀྱིས་གོ་སྒྲིག་བྱས་པའི་ལོ་གསར་དུས་སྟོན་དུ་མཉམ་ཞུགས་བྱེད་ཀྱིན་པའི་སྣང་ཚུལ་འགྲེམ་སྒྲག་བྱེད་ཀྱིན་པ་འདི་རེད།
ཨ་ཤུ་རེ་གོ ད་ང་ཚོ་ཚད་གང་འདྲ་ཞིག་ཏུ་སླེབས་པ་རེད། རྒྱ་ནག་དམར་པོའི་དམག་དཔུང་གིས་བོད་བཙན་བཟུང་དང་། མི་གསོད་ཁྲག་སྦྱོར། མི་ལོ་བདུན་བཅུའི་རིང་གི་དྲག་གནོན་གདུག་རྩུབ་བྱེད་སྟངས་སྐོར་མ་བཤད། ང་དགུ་ལོར་༧གོང་ས་རྒྱལ་བ་རིན་པོ་ཆེ་གཙོས་བོད་མི་ཁྲི་ཚོ་མང་པོ་ཞིག་བཙན་བྱོལ་དུ་གནས་བབ་གང་འདྲ་ཞིག་གི་འོག་ཡོང་པ་དང་། དེ་བཞིན་ཕྱིས་སུ་ཉི་མ་དེ་རིང་གི་བར་དུ་རང་ཉིད་ཚུད་པའི་བོད་མི་ཁྲི་སྟོང་མང་པོ་ཞིག་གིས་སྤྲིད་དཀར་པོ་ཐོད་ལ་བཅིངས། ས་ནག་པོ་འདོམས་ལ་འཇལ་ཏེ་རྒྱའི་མཐའ་སྲུང་དམག་གི་མེ་མདའ་གདོང་གིས་གཏད་དེ་རི་བོ་ཧི་ལ་ཡ་བརྒལ་པའི་ཉེན་ཚབས་དང་དཀའ་སྡུག་གི་ལམ་འཕྲང་རེ་རེ་བཞིན་བརྒྱུད་ནས་ཡོང་པ་དེ་རྒྱ་ནག་གི་གཞུང་འབྲེལ་དུས་སྟོན་ལ་མཉམ་ཞུགས་དང་གླུ་གཞས་ཞབས་བྲོ་འཁྲབ་ཀི་ཡོང་པ་རེད་དམ།
བོད་ནང་དུ་ཡིན་ན་མི་རིགས་འཆམ་མཐུན་དང་། སྤྱི་ཚོགས་འཕེལ་རྒྱས། རྣམ་པ་གསར་པའི་བོད་ལྗོང་སོགས་ཀྱི་མིང་བྱང་འོག བཙན་ཤེད་དང་དབང་ཤུགས་འོག གུང་ཁྲན་ཏང་ལ་སྟོད་གླུ་ལེན་དུ་འཇུག་པ། ཁང་ཐོག་ཏུ་དར་དམར་སྒྲེང་བ། མཆོད་ཁང་སྡོད་ཁང་དུ་ཏང་གི་དཔོན་རིགས་ཚོའི་པར་སྒྲོམ་སྒྲིག་པ། འཚོ་བར་གནམ་ས་བླ་འོག་བསྒྱུར་པ་ལྟ་བའི་འཕེལ་རྒྱས་ཡོད་ལུགས། ཏང་གི་བཀའ་དྲིན་འོག་སྤྲོ་སྣང་དང་བདེ་སྐྱིད་ཀྱིས་ཁེངས་ནས་ཡོད་རབས་སོགས་ཀྱི་དྲིལ་བསྒྲགས་བྱེད་ཀྱིན་པར་གཞིས་བཞུགས་བོད་མི་ཚོས་ཨམ་ཚུགས་སྡམ་བཞིན་ཉིན་འཁྱོལ་ན་མཚན་མ་འཁྱོལ་པའི་གནས་སུ་གྱར་ཡོད་ཀྱང་། ཤ་ཟད་རྐང་ལ་ཐུག་རུང་མགོ་མ་སྒུར་གཉའ་མ་ཞུམ་པར་དཔའ་སྤབས་ཀྱིས་འགྱེང་ནས་ཡོད། ད་དུང་དགྲ་འདུལ་གཉེན་སྐྱོང་གེ་སར་དམག་གི་རྒྱལ་བོའི་རུས་རྐང་ཅན་གྱི་གདོང་དམར་བ་མང་པོ་ཞིག་གིས་བཙན་འོག་ནས་རྒྱ་ལ་རྒོལ་ཅིང་། རྒྱའི་དར་དམར་ས་ལ་བརྡབ་ཅིང་ཆུ་ལ་གཡུག་བཞིན་ཡོད།
འོན་ཀྱང་། དེ་རིང་གི་བཙན་བྱོལ་བ་ཚོས་རང་དབང་ལུང་པ་ནས་རང་འགུལ་གྱིས་རྒྱའི་དར་དམར་སྒོ་སྟེང་ན་དམར་ལྷབ་ལྷུབ་གཡོ་པའི་རྒྱ་ནག་གཞུང་ཚབ་ཏུ་འཛུམ་གྱི་ལེར་འཚིང་ཞིང་། རྒྱའི་གསོ་སྟོན་སྟེང་དགོད་སྒྲ་དང་ཞབས་བྲོ་ལྡིང་གིན་པ་འདི། བྱུང་ན་ཁོ་རང་ཚོ་རང་ངོས་ནས་རྟ་ཁ་གཡང་ཁ་ནས་འཐེན་རན་རེད་ལ། ལྷག་པར་དུ་བཙན་བྱོལ་བོད་མིའི་གཞུང་མང་ཚོགས་སྡེ་དང་བཅས་པས་གནད་དོན་འདི་རིགས་ཀྱི་ཐད་ངེས་པར་དུ་དངོས་ཤུགས་བརྒྱུད་གསུམ་ནས་གདོང་ལེན་བྱེད་དགོས་པའི་ཛ་དྲག་གི་གནད་དོན་ཞིག་ཏུ་གཟིགས་དགོས། མེ་ཆུང་ཆུང་སྐབས་ནས་མ་གསད་ན་རི་རབ་མེ་ཡིས་འཚིག་ཉེན་ཡོད་པའི་ངེས་ཤེས་བཙན་བྱོལ་བོད་མི་ཀུན་གྱི་རྒྱུད་ལ་ངེས་པར་དུ་འདྲོང་དགོས།
མ་མཐར་ཡང་། བཙན་བྱོལ་དུ་གྱར་པའི་ཉིན་མོ་དེ་ནས། རང་གི་རྒྱལ་ཁབ་དང་མི་རིགས་འདི་ལ་ཞེན་པ་དཀར་པོས་ལུས་སྲོག་ལོངས་སྤྱོད་འབུལ་མ་ནུས་ཀྱང་། ཁྲག་དྲི་ཡལ་མེད་པའི་གངས་རིའི་རི་ལུང་ཐང་གསུམ་དུར་སར་གྱུར་པའི་ངེད་ཚང་གི་རྒྱལ་གཅེས་དཔའ་བོ་དཔའ་མོ་ཚོའི་རྣམ་ཤེས་ལ་ཁྲེལ་མེད་བྱ་མི་རུང་ལ། བོད་མི་རིགས་ཀྱི་གདོང་འདེགས་ཀྱི་ཀ་བ་རུ་གྱུར་པའི་དེ་རིང་གི་གཞིས་བཞུགས་བོད་མི་ཚོའི་བླ་བཙོང་གང་ནས་ཉན། དེ་བས་སང་ཉིན་གྱི་མི་རབས་ཚོའི་ཡངས་པའི་མདུན་ལྗོངས་ལ་གེགས་སུ་འགྱུར་བའི་བྱ་གཞག་ཕྲ་མོ་ཙམ་ཡང་ང་ཚོའི་མི་རབས་འདིས་ལྷག་ཏུ་འཇུག་མི་རུང་ངོ་།།
འདྲ་པར་གཉིས་པའི་ནང་གི་བླར་རྒན་དེ་གཉིས་ནང་ནས་ཞྭ་མོ་གྱོན་པ་དེའི་ངོ་གདོང་གི་རྣམ་གྱུར་ལ་ཞིབ་པར་ལྟ་དུས། ཁོ་ལ་རྒྱ་སྒོར་ཆག་པ་གཅིག་རག་རྒྱུའི་རེ་བ་ཆེན་པོ་བཅངས་ཡོད་གསལ་པོ་རེད་འདུག ་ཧ་ཧ་ཧ་
སངས་རྒྱས་ཀྱི་ན་ཟ་གྱོན་ནས་བསྟན་དགྲ་ལ་ལག་བཏང་བྱས་ནས་དེའི་རྒྱུགས་ཁྱི་བྱེད་པ་ནི་སྙེགས་དུས་རང་རེད།
བསྟན་དགྲ་རྒྱ་དམར་ལ་ལག་འབྲེལ་བྱས་ན་མཐའ་མ་རང་ཉིད་ཕུང་རྒྱུ་རེད། རྒྱ་དམར་ཚོས་གང་ཞིག་ལ་ཡིད་གཏན་བྱེད་སའི་མི་ཞིག་ཡིན་མིན་ཁོ་ཚོས་ཤེས་ཀྱི་ཡོད་རེད། མཐའ་མར་ཁོ་རང་ཚོའི་དགོས་དོན་གྲུབ་ཚར་ན་ད་ལྟའི་ལག་འབྲེལ་བྱེད་མཁན་ཚོ་མྱང་རྒྱུ་ཡིན་པ་བརྒྱ་ཆ་རྒྱ་ཐམ་པ་རེད། དེ་ནི་ང་ཚོའི་མི་རབས་ཚོའི་ལོ་རྒྱུས་ནང་ལ་ག་འདྲ་བྱུང་མིན་ལ་གཟིགས་ན་མངོན་གསལ་རེད།
བདེན་པ་བདེན་རྐྱང་རེད། ཟ་འདྲེ་དེ་ཚོས་ཤེས་བཞིན་དུ་གཡང་དུ་མཆོངས་ཀྱི་ཡོད་ས་རེད། ཤ་ཚ་་་་སྙིང་མ་བྱེད་་་་་
ངས་ཆོལ་ཁ་དང་ལུང་ཚན་གྱི་སྐད་ཆ་ཤོད་འདོད་མེད། འོན་ཀྱང་དྲང་པོ་བཤད་ན་རྒྱ་མི་དང་དོལ་རྒྱལ་ཚོགས་པར་འབྲེལ་བ་བྱེད་མཁན་ཕལ་ཆེ་བ་ཁམས་པ་རེད་འདུག
སྤྱི་ཚོགས་ནང་ཞིབ་ཚགས་ཀྱིས་བལྟས་ན་ཧ་གོ་དོན་གསལ་རེད།