བོད་རྒྱལ་ཐང་རྫོང་ཚེ་ཐར་སྡེ་བ་ནས་ཡིན་པའི་བཀྲ་ཚེ་དང་དོན་ཁོ་གཉིས་རྫོང་ཐོག་ཏུ་ཉོ་བཅའ་རྒྱག་ཏུ་ཕྱིན་ནས་དགོང་མོར་མགྲོན་ཁང་དུ་བསྡད་ཡོད་སྐབས་ཉེན་རྟོག་པ་བཞིས་གློ་བུར་དུ་བཙན་འཁྲིད་བྱས་ཏེ་ཟླ་གསུམ་འགྲོ་བཞིན་འདུག
ཟླ་འདིའི་ཕྱི་ཚེས་ ༢༩ ཉིན་འདི་ག་བོད་ཀྱི་དུས་བབ་གསར་ཁང་ལ་བོད་ནས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་དང་པོའི་ཚེས་ ༡ ཡས་མས་ཤིག་ལ་བོད་ཡུན་ནན་ཞིང་ཆེན་རྒྱལ་ཐང་རྫོང་ཐོག་ཏུ་ཡོད་པའི་སྒྲོལ་མའི་ཁྱིམ་ཞེས་པའི་མགྲོན་ཁང་ཞིག་ཏུ། གློ་བུར་དུ་ཉེན་རྟོག་པ་བཞི་ཡོང་སྟེ་དེར་སྡོད་བོད་མི་ཚེ་བཀྲ་དང་དོན་ཁོ་ཞེས་པ་གཉིས་བཙན་འཁྲིད་བྱས་ཏེ་ཟླ་གསུམ་འགྲོ་བཞིན་ཡོད་ཀྱང་། ད་ལྟའང་ཁྱིམ་མི་ཚོར་རྒྱུ་མཚན་ཅི་ཡིན་སོགས་འགྲེལ་བཤད་གང་ཡང་མ་བྱས་པར་བཀག་ཉར་འོག་བཞག་འདུག
ཁོང་གཉིས་འཛིན་བཟུང་བྱས་ཏེ་ཉིན་གསུམ་ཙམ་གྱི་རྗེས་སུ། རྫོང་ཉེན་རྟོག་པས་ཁོང་གཉིས་ཀྱི་ཁྱིམ་མིར་ཁ་པར་ཡོང་ནས་ཉེན་རྟོག་ཁང་དུ་འབོད་འགུག་བྱས་ཏེ། ཁྱིམ་མི་ཚོའི་ལག་འཁྱེར་ཁ་པར་ནང་སྔོག་བཤེར་བྱས་ཡོད་པ་མ་ཟད། ། ཁྱིམ་ཚང་གི་དཔལ་འབྱོར་ཡོང་ཁུངས་སོགས་འདྲི་རྩད་ནན་པོ་བྱས་རྗེས་ཁྱིམ་དུ་ལོག་བཏང་ཡོད་འདུག ཚེ་བཀྲ་དང་དོན་ཁོ་གཉིས་རྒྱལ་ཐང་རྫོང་ཐོག་ཏུ་བཟའ་བཅའ་རེ་ཉོ་རུ་ཕྱིན་ཏེ་དགོང་མོར་སྒྲོལ་མའི་ཁྱིམ་དུ་ཞག་སྡོད་བྱེད་སྐབས་གློ་བུར་དུ་འཛིན་བཟུང་བྱས་ཡོད་པ་དང་། དོན་ཁོ་ནི་ཚེ་བཀྲ་ཚང་གི་མག་པ་ཡིན་འདུག
ཡང་གནས་ཚུལ་མཁོ་སྤྲོད་པས། ཉེ་ལམ་ཞིག་ནས་བཟུང་ས་གནས་དེར་ཤིང་ནགས་གཅོད་འབྲེག་དང་ནག་འཚོང་བྱེད་ཀྱི་ཡོད་སྐོར་བརྗོད་དེ་མི་མང་པོ་ཞིག་འཛིན་བཟུང་བཙན་ཁྲིད་བྱས་དང་བྱེད་བཞིན་ཡོད་སྟབས། གོང་གི་བོད་མི་དེ་གཉིས་ལའང་ནག་ཉེས་དེ་འདྲ་བཙུགས་ཡོད་སྲིད་ཀྱང་། དོན་དངོས་ཐོག་ཁ་གཡར་ས་བཙལ་བ་ཙམ་ལས་ཤིང་ནགས་གཅོད་འབྲེག་སོགས་ལ་འབྲེལ་བ་མེད་སྐོར་བརྗོད་བྱུང་། སྤྱིར་བཏང་རྒྱལ་ཐང་ཕྱོགས་ཀྱི་ཡུལ་མིའི་སྡོད་ཁང་མང་ཆེ་ཤོས་ཤིང་ཁང་ཡིན་ལ། དེ་ཡང་བོད་ཀྱི་ཁང་པའི་མཛེས་ཉམས་འབུར་དུ་ཐོན་ཞིང་། ཁང་རྙིང་མང་པོ་རང་སོར་བཞག་སྟེ་ཡུལ་སྐོར་སྤྲོ་འཆམ་པའི་ས་ཆ་ཞིག་ཏུ་གྱུར་ཡོད་པ་རེད།
རང་ལོ་ ༤༦ ཡིན་པའི་ཚེ་བཀྲ་དང་རང་ལོ་ ༢༦ ཡིན་པའི་དོན་ཁོ་གཉིས་རྒྱལ་ཐང་རྫོང་ཚེ་ཐར་སྡེ་བ་ནས་ཡིན་ཞིང་། ཁོང་གཉིས་ནམ་རྒྱུན་ཁང་བཟོ་དང་ལམ་ལས་སོགས་ཞོར་ལས་ལ་ཕྱིན་ནས་དཔལ་འབྱོར་ཡོང་སྒོ་འཚོལ་གྱི་ཡོད་འདུག
