ཧྥིན་ལེན་ཌི་རྒྱལ་ཁབ་རྒྱལ་སྤྱིའི་ནུབ་ཆིངས་སྒྲིག་འཛུགས་སུ་ཞུགས།

ཧྥིན་ལེན་ཌི་ལོ་གཅིག་ཙམ་གྱི་རྗེས་གཞི་ནས་རྒྱལ་སྤྱིའི་ནུབ་ཆིངས་སྒྲིག་འཛུགས་སུ་ཞུགས་ཐུབ་ཡོད་པར་བརྟེན་ཨུ་རུ་སུས་དྲག་རྒོལ་བྱ་རྒྱུ་ཡིན་པའི་འཇིགས་སྐུལ་བྱས་ཡོད་འདུག

Finnish Foreign Affairs Minister Pekka Haavisto shakes hands with Secretary of State Antony Blinken in Brussels on Tuesday. NATO Secretary-General Jens Stoltenberg is between them. AFP – Getty Images

འདས་པའི་ལོ་གཅིག་ཙམ་རིང་ཨུ་རུ་སུས་རྒྱལ་སྤྱིའི་སྒྲིག་འཛུགས་ཁག་གི་གནོན་ཤུགས་ལ་མ་ལྟོས་པར་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པས། ཨུ་རུ་སུའི་ཁྱིམ་མཚེས་རྒྱལ་ཁབ་ཁག་གིས་ཀྱང་སེམས་འཚབ་ཤུགས་ཆེན་བྱས་ཏེ། འདས་ལོའི་ཕྱི་ཟླ ༥ ནང་ཨུ་རུ་སུའི་ནུབ་ཕྱོགས་ཁྱིམ་མཚེས་རྒྱལ་ཁབ་ཧྥིན་ལེན་ཌི་ (Finland) དང་སུ་ཝེ་ཌན་ (Sweden) རྒྱལ་ཁབ་གཉིས་ནུབ་ཆིངས་སྒྲིག་འཛུགས་ (Nato) ནང་ཞུགས་རྒྱུའི་ཡོངས་ཁྱབ་གསལ་བསྒྲགས་བྱས་ཡོད་པ་ལྟར། ཟླ་འདིའི་ཕྱི་ཚེས ༤ ཉིན་བྷིར་སར་རྒྱལ་སྤྱིའི་ནུབ་ཆིངས་སྒྲིག་འཛུགས་ཀྱི་མདུན་ཐང་དུ་ཧྥིན་ལེན་ཌི་ཡི་རྒྱལ་གླུ་དབྱངས་སུ་གྱེར་ནས་རྒྱལ་དར་སྒྲེང་འཛུགས་བྱས་ཏེ། རྒྱལ་ཁབ་དེ་ཚོགས་ཁོངས་རྒྱལ་ཁབ་ ༣༡ པར་གྱུར་བའི་ཡོངས་ཁྱབ་གསལ་བསྒྲགས་བྱས་ཡོད་འདུག

མཛད་སྒོའི་ཐོག་ཨ་རིའི་རྒྱལ་སྲིད་དྲུང་ཆེ་ཨེན་ཐོ་ནི་བྷེལ་ཀེན་( Antony Blinken) མཆོག་གིས། ནུབ་ཆིངས་སྒྲིག་འཛུགས་ཀྱིས་ཨུ་རུ་སུའི་མགོ་ཁྲིད་པུ་ཊིན་ལ་ཐུགས་རྗེ་ཆེ་ཞུ་རྒྱུ་ཡིན། ཨུ་རུ་སུས་རྒྱལ་ཁབ་དག་ནུབ་ཆིངས་སྒྲིག་འཛུགས་སུ་ཞུགས་པར་དྲག་པོའི་བཀག་འགོག་བྱ་རྒྱུ་ཡིན་སྐོར་བརྗོད་པ་དེས། རྒྱལ་ཁབ་མང་པོ་ཞིག་གིས་རང་རང་གི་རྒྱལ་སྲུང་ཐད་ལ་ལྟ་རྟོག་བྱ་དགོས་པའི་སེམས་འཚབ་ཅིག་བཟོས་ཡོད་ཅིང་། ཧྥིན་ལེན་ཌི་ཡང་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱས་རྗེས། ནུབ་ཆིངས་སུ་ཞུགས་པ་ཡིན་སྐོར་སོགས་གསུངས་འདུག

དེ་བཞིན་རྒྱལ་སྤྱིའི་ནུབ་ཆིངས་སྒྲིག་འཛུགས་( North Atlantic Treaty Organization) ཀྱི་སྤྱི་ཁྱབ་དྲུང་ཆེ་སྐུ་ཞབས་ཇེན་སི་ (Jens Stoltenberg) ལགས་ཀྱིས། ནུབ་ཆིངས་སྒྲིག་འཛུགས་ཀྱིས་ཧྥིན་ལེན་ཌི་རྒྱལ་ཁབ་ལ་བདེ་སྲུང་ཚད་ལྡན་བྱ་རྒྱུའི་ཁས་ལེན་བརྟན་པོ་བྱས་ཡོད་པ་མ་ཟད། ང་ཚོའི་རྒྱལ་སྲུང་མཉམ་བསྡུས་བཅའ་ཁྲིམས་དོན་ཚན་ལྔ་པའི་དགོངས་དོན་བཞིན། ང་ཚོས་དེ་རིང་ནས་ཧྥིན་ལེན་ཌི་རུ་ “གཅིག་དེ་ཚང་མའི་ཆེད་དང་། ཚང་མ་གཅིག་གི་ཆེད། “ ཅེས་པའི་སྲིད་ཇུས་ལག་བསྟར་བྱ་རྒྱུ་ཡིན། ཞེས་བརྗོད་འདུག

ཨུ་རུ་སུའི་སྲིད་འཛིན་པུ་ཊིན་གྱི་མགྲིན་ཚབ་པ་པེ་སི་ཁཱོ་ཝེ་ (Dmitry Peskov) ཡིས། ནུབ་ཆིངས་སྒྲིག་འཛུགས་ཀྱིས་ང་ཚོའི་མཐའ་མཚམས་ཀྱི་ཧྥིན་ལེན་ཌི་ས་ཁུལ་ཁག་ཏུ་མཚོན་ཆ་དང་། འཛིན་སྐྱོང་། དེ་བཞིན་ཕྱིའི་འཛུགས་སྐྲུན་སོགས་ག་ཚོད་ཙམ་ཡར་རྒྱས་གཏོང་མིན་བལྟ་རྒྱུ་ཡིན། ཞེས་དང་། ཨུ་རུ་སུ་རྒྱལ་ཁབ་ཀྱི་བདེ་འཇགས་སྲུང་སྐྱོབ་སོགས་ཀྱི་སླད་མུ་མཐུད་ནུབ་ཆིངས་སྒྲིག་འཛུགས་ཀྱི་བྱ་སྤྱོད་ལ་ལྟ་ཞིབ་དང་། ཐབས་ཇུས་གཉིས་ལྡན་གྱི་ཐོག་ནས་རྒོལ་ལན་བསློག་རྒྱུ་ཡིན་སྐོར་སོགས་བཤད་འདུག

ཕྱི་ལོ་ ༡༩༤༥ ལོར་འཛམ་གླིང་དམག་ཆེན་གཉིས་པ་མཇུག་སྒྲིལ་རྗེས། ཕྱི་ལོ་ ༡༩༤༩ ལོར་ནེ་ཊོའམ་ནུབ་ཨེ་ཊི་ལན་ཊིག་རྒྱ་མཚོའི་ཆིངས་ཡིག་སྒྲིག་འཛུགས་དེ་ཡུ་རོབ་དབུས་མ་དང་ཤར་ཕྱོགས་སུ་ཡོད་པའི་ཨུ་རུ་སུ་མཉམ་འབྲེལ་གྱི་དམག་ཤུགས་ལ་ཁ་གཏད་གཅོག་ཆེད་དུ་ཐོག་མར་གསར་འཛུགས་བྱས་ཡོད་ཅིང་། ཐོག་མ་གསར་འཛུགས་བྱེད་སྐབས་བྷེལ་ཇམ་དང་། ཁེ་ན་ཌ། ཌེན་མག ཧྥ་རན་སི། ཨའེ་སི་ལེན་ཌི། ཨི་ཊ་ལི། ལུ་ཛེམ་བྷག(Luzembourg) ནི་ཐར་ལེན་ཌི། ནོར་ཝེ། པོར་ཇུ་གྷལ། དབྱིན་ཡུལ། ཨ་རི་བཅས་རྒྱལ་ཁབ་ ༡༣ ལས་མེད་ཀྱང་། ཕྱི་ལོ་ ༡༩༥༢ ལོར་གྷི་རི་སི་དང་། ཊིར་ཀི་གཉིས་དང་། ཕྱི་ལོ་ ༡༩༥༥ ལོར་ནུབ་འཇར་མ་ནི། ཕྱི་ལོ་ ༡༩༨༢ ལོར་སི་པན། ཕྱི་ལོ་ ༡༩༩༩ ལོར་ཅེག་སྤྱི་མཐུན་རྒྱལ་ཁབ་དང་། ཧང་གྷེ་རི། པོ་ལེན་ཌི་བཅས་མཉམ་ཞུགས་བྱས། དེའི་རྗེས་རིམ་པས་བྷལ་གྷེ་རི་ཡ་(Bulgaria) དང་། ཨེ་སི་ཊོ་ནི་ཡ། ལི་ཐུ་ནི་ཡ། བྱང་མེ་སེ་ཌོ་ནི་ཡ་རྒྱལ་ཁབ་དེ་ (North Macedonia) བཅས་མཉམ་ཞུགས་བྱས་ཡོད་ཅིང་། ཧྥིན་ལེན་ཌི་ནི་ནུབ་ཆིངས་སྒྲིག་འཛུགས་ཀྱི་ཚོགས་མི་ཆེས་གསར་ཤོས་དེ་ཡིན་འདུག

Finnish military personnel raise the Finnish national flag in Brussels after the country formally joined NATO on Tuesday.

གཞན་ཡང་། འདས་ལོར་ཨུ་རུ་སུའི་ནུབ་ཕྱོགས་ཁྱིམ་མཚེས་རྒྱལ་ཁབ་ཧྥིན་ལེན་ཌི་ (Finland) དང་སུ་ཝེ་ཌན་ (Sweden) གཉིས་ནུབ་ཆིངས་ནང་ཞུགས་རྒྱུའི་ཐག་གཅོད་བྱས་པའི་ཡོངས་ཁྱབ་གསལ་བསྒྲགས་སྤེལ་ཏེ། འཛུལ་ཞུགས་བྱ་རྒྱུར་འབད་འབུངས་བྱས་ཡོད་ཀྱང་། ད་ལྟའི་ཆར་ཊིར་ཀི་( Turkey) རྒྱལ་ཁབ་ཀྱིས་སུ་ཝེ་ཌན་ནུབ་ཆིངས་སུ་ཞུགས་པར་རྒྱབ་སྐྱོར་བྱས་མེད་པའི་ཁར། ཧང་གྷེ་རི་ (Hungary) རྒྱལ་ཁབ་ཀྱི་གྲོས་ཚོགས་སུའང་སུ་ཝ་ཌན་ནུབ་ཆིངས་སུ་ཞུགས་པར་རྒྱབ་སྐྱོར་ཡོད་མེད་ཀྱི་འོས་ཤོག་བླུགས་ཚར་མེད་པས། སུ་ཝ་ཌན་ད་ལྟའང་ནུབ་ཆིངས་སྒྲིག་འཛུགས་ཁོངས་སུ་ཞུགས་ཐུབ་མེད་ཀྱང་། ཟླ་འདིའི་ཕྱི་ཚེས ༤ ཉིན་ཨ་རིའི་རྒྱལ་སྲིད་དྲུང་ཆེ་ཨེན་ཐོ་ནི་བྷེལ་ཀེན་( Antony Blinken) མཆོག་གིས། སུ་ཝེ་ཌན་རྒྱལ་ཁབ་དེ་གང་མགྱོགས་ནུབ་ཆིངས་སྒྲིག་འཛུགས་སུ་ཞུགས་ཐུབ་པའི་རེ་བ་ཡོད་སྐོར་གསུངས་འདུག

འདས་ལོའི་ཕྱི་ཟླ་ ༢ ཚེས་ ༢༤ ཉིན་ཨུ་རུ་སུས་དངོས་སུ་ཡུ་ཀེ་རེན་ལ་དྲག་པོའི་བཙན་འཛུལ་བྱས་པ་ནས་བཟུང་། ཧྥིན་ལན་ཌིའི་མང་ཚོགས་ཁྲོད་ཨུ་རུ་སུར་ལྟ་ཕྱོགས་ལ་འགྱུར་བ་ཕྱིན་ཏེ། ཧྥིན་ལན་ཌིའི་མང་ཚོགས་ནང་བསམ་ཤོག་བསྡུ་རུབ་བྱས་པའི་ཁྲོད། མི་འབོར་གྱི་བརྒྱ་ཆ་ ༧༦ གྱིས་ནེ་ཊོར་ཞུགས་དགོས་པའི་བསམ་ཚུལ་བཏོན་པར་བརྟེན། འདས་པའི་ལོ་གཅིག་ལ་འབད་འབུངས་བྱས་མཐར། ད་ལྟ་གཞི་ནས་ནུབ་ཆིངས་ཀྱི་ཁོངས་སུ་ཞུགས་ཐུབ་པ་བྱུང་ཡོད་ཅིང་། སྤྱིར་ཧྥིན་ལན་ཌི་དེ་ཉིད་ཨུ་རུ་སུས་ལོ་ངོ་ ༡༠༠ ལྷག་གི་རིང་དབང་བསྒྱུར་བྱས་ཏེ། ཕྱི་ལོ་ ༡༩༡༧ ལོར་རང་བཙན་དུ་ཁྱབ་བསྒྲགས་བྱས་ཡོད་ནའང་། འཛམ་གླིང་དམག་ཆེན་གཉིས་པའི་སྐབས་ཏེ། ཕྱི་ལོ་ ༡༩༣༩ དང་ ༡༩༤༡ ལོར་ཨུ་རུ་སུ་མཉམ་འབྲེལ་གྱིས་ཧྥིན་ལན་ཌི་ལ་དམག་ཐེངས་གཉིས་བརྒྱབ་སྟེ་ཡུལ་དེའི་སྤྱིའི་ས་ཁྱོན་གྱི་བརྒྱ་ཆ་ ༡༠ ལྷག་ཨུ་རུ་སུར་སྤྲོད་དགོས་བྱུང་ཡོད་པ་རེད། དེ་ནས་བཟུང་ཧྥིན་ལན་ཌིས་བར་གནས་ཀྱི་སྲིད་ཇུས་མཁྲེགས་པོ་བཟུང་སྟེ། དུས་རབས་ ༢༠ སྨད་ཀྱི་གྲང་དམག་ལའང་མཉམ་ཞུགས་བྱས་མེད་པ་རེད།

སྤྱིར་ནུབ་ཆིངས་སྒྲིག་འཛུགས་མཉམ་བསྡུས་བཅའ་ཁྲིམས་དོན་ཚན་བཅུ་པའི་དགོངས་དོན་བཞིན་རྒྱལ་ཁབ་སུ་འདྲ་ཞིག་ཡིན་རུང་སྒྲིག་འཛུགས་དེའི་ཚོགས་ཁོངས་སུ་ཞུགས་ཆོག་ཀྱང་། སྒྲིག་འཛུགས་དེའི་ཚོགས་ཁོངས་རྒྱལ་ཁབ་ཚང་མས་རྒྱབ་སྐྱོར་དང་མོས་མཐུན་འཐོབ་དགོས་ཀྱི་ཡོད་འདུག ད་ལྟའི་ཆར་ཡུ་རོབ་ཀྱི་ཡུ་ཁེ་རིན་དང་། བྷ་སི་ནི་ཡ་ཧ་ཌི་གྷོ་ཝི་ཡ(Bosnia and Herzegovina) ། དེ་བཞིན་ཇོར་ཇི་ཡ (Georgia) རྒྱལ་ཁབ་བཅས་ཀྱིས་ཚོགས་ཁོངས་སུ་ཞུགས་པར་རེ་སྒུག་བྱེད་མུས་ཡིན་འདུག

གསར་འགོད་པ། དཔལ་ལྡན།