༧གོང་ས་རྒྱལ་བ་རིན་པོ་ཆེ་མཆོག་གིས་ཁྲིག་སེ་རིན་པོ་ཆེ་མཆོག་ལ་མཇལ་ཁ་བསྩལ།

དེ་རིང་ཞོགས་པར་༧གོང་ས་རྒྱལ་བ་རིན་པོ་ཆེ་མཆོག་གིས་ལ་དྭགས་ཁྲིག་སེ་རིན་པོ་ཆེ་མཆོག་ལ་མཇལ་ཁ་སྩལ་ནས་མུ་མཐུད་ལ་དྭགས་མི་དམངས་ལ་ཞབས་འདེགས་ཞུ་དགོས་པའི་བཀའ་སློབ་བསྩལ་འདུག

ཟླ་འདིའི་ཕྱི་ཚེས་  ༥ ཉིན་རྒྱ་གར་གྱི་སྲིད་འཛིན་ལྕམ་སྐུ་ཤྲི་མ་ཏི་ཌུའུ་པཱ་ཌི་མུར་མའོ་ (Shrimati Droupadi Murmu) མཆོག་ཀྱིས་ལ་དྭགས་ཁྲིག་སེ་རིན་པོ་ཆེ་མཆོག་ལ་ཆོས་ལུགས་དང་འབྲེལ་བའི་མཛད་འཕྲིན་རྒྱ་ཆེར་སྐྱོང་བཞིན་པར་ཆེ་བསྟོད་དུ་པདྨ་ཤྲི་གཟེངས་རྟགས་དངོས་སུ་ཕུལ་ཡོད་པ་ལྟར། དེ་རིང་ཞོགས་པར་ཁྲི་སེ་རིན་པོ་ཆེ་མཆོག་བཞུགས་སྒར་རྒྱལ་བའི་ཕོ་བྲང་དུ་༧གོང་ས་མཆོག་ལ་མཇལ་བཅར་ཞུས་ཡོད་པ་དང་། ༧གོང་ས་མཆོག་ནས་སེམས་ཀྱི་ཀུན་སློང་བཟང་པོ་ཞིག་གི་ཐོག་ནས་མུ་མཐུད་ལ་དྭགས་མི་དམངས་ལ་ཞབས་འདེགས་དང་ཆོས་འབྲེལ་མཛད་དགོས་པའི་བཀའ་སློབ་ལམ་སྟོན་གནང་ཡོད་འདུག 

དེའི་ཐད་ཁྲིག་སེ་རིན་པོ་ཆེ་མཆོག་གིས། སེམས་བཟང་པོ་དང་ཀུན་སློང་བཟང་པོ་ཞིག་གི་ཐོག་ནས་རང་དོན་མེད་པའི་སྒོ་ནས་ལ་དྭགས་མི་མང་ལ་ཆོས་འབྲེལ་བྱ་དགོས་པ་གཙོས་མི་མང་རྣམས་ལ་ཞབས་ཞུ་གང་ཐུབ་བསྒྲུབ་དགོས་པ་དང་། མི་མང་མཐུན་སྒྲིལ་ཡོང་ཐབས་ཆེད་དུ་ཕྱག་ལས་གནང་དགོས་པའི་བཀའ་སློབ་སྩལ་སོང་ལ། སྤྱིར་རྒྱ་གར་གྱི་པདྨ་ཤྲིའི་གཟེངས་རྟགས་དེའང་ཆོས་ལུགས་མཐུན་འབྲེལ་གྱི་ལས་དོན་བྱེད་ཀྱི་ཡོད་པས་གནང་བ་ཞིག་ཡིན་པ་རེད། ངས་ཀྱང་སྤྱི་ཚོགས་སུ་ཆོས་དང་རིག་གཞུང་གཙོས་སློབ་མ་རྣམས་ཀྱི་ཆེད་དཔེ་མཛོད་གསར་རྒྱག་དང་། སྤྱི་ཚོགས་དང་སློབ་གྲྭ་སོགས་སུ་ཆོས་དང་མ་འབྲེལ་བའི་བཟང་སྤྱོད་སོགས་ཀྱི་ཐད་ལ་སྐད་ཆ་མང་དག་ཅིག་བཤད་ཡོད་སྟབས། རང་ཉིད་ཀྱིས་ཀྱང་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བསྒྲུབས་སོང་བསམ་གྱི་ཡོད། ཅེས་གསུངས་བྱུང་། 

གཞན་ཡང་། ལ་དྭགས་དབུས་གཞུང་མངའ་སྡེ་དབུ་བརྙེས་པའི་དུས་སྟོན་ཉིན་མོ་སྟེ་ཕྱི་ལོ ༢༠༢༡ ཟླ་ ༡༠ ཚེས་ ༣༡ ཉིན། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་གླེ་ཡིས། ལ་དྭགས་ཁྲིག་སེ་ཚུལ་ཁྲིམས་རྣམ་དག་གླིང་གི་མཁན་རིན་པོ་ཆེ་༧སྐྱབས་རྗེ་ཤར་སྤྲུལ་རྗེ་བཙུན་ངག་དབང་བྱམས་པ་བསྟན་འཛིན་དཔལ་བཟང་པོ་མཆོག་གིས། ལོ་མང་རིང་ཆོས་སྲིད་གཉིས་ཀྱི་ཐོག་ནས་ལ་དྭགས་ཀྱི་མི་རིགས་དང་སྤྱི་ཚོགས་ལ་བྱམས་བརྩེ་དང་ལྷག་བསམ་རྣམ་པར་དག་པའི་སྒོ་ནས་ཞབས་འདེགས་ཞུས་ཏེ་ཤུགས་རྐྱེན་ཆེན་པོ་བསླེབས་པའི་ངོས་འཛིན་ཐོག ལ་དྭགས་སུ་སྙན་གྲགས་ཡོད་པའི་ཕྱི་ལོ་ ༢༠༢༡ ལོའི་ལ་དྭགས་དཔལ་རྔམ་གཟེངས་རྟགས་ཕུལ་ཡོད་འདུག

སྐྱབས་རྗེ་ཤར་པ་སྤྲུལ་སྐུ་རྗེ་བཙུན་ངག་དབང་འཇམ་དབྱངས་བྱམས་པ་བསྟན་འཛིན་མཆོག་ཕྱི་ལོ་ ༡༩༤༣ ཟླ་ ༥ ཚེས་ ༢༠ ཉིན་ལ་དྭགས་ཆུ་ཤོད་གྲོང་མིང་འབིས་ལུ་པ་ཞེས་པའི་ཁྱིམ་དུ། ཡབ་ཡེ་ཤེས་དཔལ་འབྱོར་ཕུན་ཚོགས་དང་། ཡུམ་ཚེ་བརྟན་དཔལ་འཛིན་གཉིས་ཀྱི་སྲས་སུ་སྐུ་འཁྲུངས་པ་དང་། ཕྱི་ལོ་ ༡༩༥༣ ལོར་ཐོས་བསམ་སློབ་གཉེར་གནང་ཕྱིར་བོད་དུ་ཕེབས་ཏེ་ཕྱི་ལོ་ ༡༩༥༩ བར་དཔལ་ལྡན་བཀྲ་ཤིས་སྒོ་མང་གྲྭ་ཚང་དུ་གཞུང་ཆེན་ཁག་ལ་སློབ་གཉེར་གནང་། དེ་ནས་ཕྱི་ལོ་ ༡༩༦༨ ནས་ ༢༠༠༦ བར་དུ་ལ་དྭགས་མི་མང་གི་བདེ་སྡུག་སླད་རྒྱ་གར་གྲོས་ཚོགས་གོང་མའི་འཐུས་མི་གནང་མྱོང་བ་སོགས་ཆོས་སྲིད་གཉིས་ཀྱི་མཛད་པ་རླབས་ཆེན་བསྐྱངས་དང་སྐྱོང་བཞིན་ཡོད་འདུག

 པདྨ་ཤྲིའི་གཟེངས་རྟགས་ནི་རྒྱ་གར་མི་མང་གི་གཟེངས་རྟགས་ཆེས་ཆེ་ཤོས་དེ་ཡིན་པ་དང་། གཟེངས་རྟགས་དེར་རིགས་གསུམ་ཡོད་པ་ནི་པདྨ་ཝེ་བྷོ་ཤིན (Vibhushan) །པདྨ་བྷོ་ཤིན་(Padma Bhushan)པདྨ་ཤྲི་བཅས་ཡིན་པ་དང་། གཟེངས་རྟགས་དེ་ལོ་རེའི་རྒྱ་གར་དམངས་གཙོའི་ཉིན་མོ་དང་བསྟུན་སྤྱི་ཚོགས་ལས་རིགས་ཁག་གི་གཟེངས་ཐོན་མི་སྣ་དང་། སྤྱི་དམངས་བདེ་རྩ་ཚོགས་པ། སྤྱི་ཚོགས་ཞབས་ཞུ་བ། སྒྱུ་རྩལ་བ། ཚོང་པ་དང་བཟོ་ལས་མཁན། སྨན་པ། ཤེས་ཡོན་པ། རྩོམ་པ་པོ་སོགས་བྱས་རྗེས་ཅན་གྱི་མི་སྣ་ཚོར་གནང་གི་ཡོད་འདུག

གསར་འགོད་པ། དོན་གྲུབ་བཀྲ་ཤིས། དཔལ་ལྡན།