རྒྱ་ནག་རྒྱ་མཚོའི་ཁུལ་གྱི་མཚོ་གླིང་རྒྱལ་ཁབ་ཧྥི་ལི་པིན་སི (Philippines) དང་ཨ་རི་གཉིས་ཀྱིས་དུས་ཡུན་ཟླ་ཕྱེད་ལྷག་རིང་དྲག་པོའི་དམག་སྦྱོང་གཞི་རྒྱ་ཆེ་ཤོས་ཤིག་མགོ་འཛུགས་བྱས་ཡོད་པར་བརྟེན་རྒྱ་ནག་གཞུང་གིས་མཚོ་གླིང་ཁུལ་དུ་ཐེ་གཏོགས་བྱེད་མི་ཆོག་པའི་རྒོལ་གཏམ་བསྒྲགས།
General view during the opening ceremony of the annual Philippines-U.S. joint military exercises.Photo:Reuters
རྒྱ་ནག་གཞུང་གིས་ཉིན་གསུམ་བསྟུད་མར་ཐའེ་ཝན་གྱི་མཚོ་འགག་ཏུ་མཁའ་དམག་གནམ་གྲུ་སོགས་མངག་གཏོང་བྱས་ཏེ་དྲག་པོའི་རྒོལ་ལན་གྲུབ་མ་ཐག དེ་རིང་ཕྱི་ཚེས་ ༡༡ ནས་ ༢༨ ཉིན་བར་རྒྱ་ནག་རྒྱ་མཚོའི་ཁུལ་གྱི་གླིང་ཕྲན་རྒྱལ་ཁབ་ཧྥི་ལི་པིན་སི (Philippines) དང་ཨ་རི་གཉིས་ཀྱིས། ཧྥི་ལི་པིན་སི་ནང་ཡོད་པའི་ལུ་རྫོན་ (Luzon) མཚོ་གླིང་གི་བྱང་ཕྱོགས་སུ་དམག་མི་ ༡༧,༦༠༠ ཙམ་ཡོད་པའི་ཆེས་གཞི་རྒྱ་ཆེ་བའི་མཉམ་འབྲེལ་དམག་སྦྱོང་ཞིག་སྤེལ་མགོ་བཙུགས་ཡོད་ཅིང་། ཧྥི་ལི་པིན་སི་ཡི་མི་ལོ་ ༣༠ རྗེས་ཀྱི་མཉམ་འབྲེལ་དམག་སྦྱོང་ཆེས་ཆེ་ཤོས་ཤིག་ཡིན་འདུག
དེའི་ཐད་ཧྥི་ལི་པིན་སི་ཡི་སྲིད་འཛིན་མར་ཁོ་སི་ (Ferdinand Marcos Jr) ལགས་ཀྱིས། ཨ་རིའི་གཞུང་གིས་ཧྥི་ལི་པིན་སིའི་དམག་སྒར་ནས་ཁྲིམས་འགལ་གྱི་བྱ་སྤྱོད་སྤེལ་བར་ངོས་ལེན་མེད་པ་དང་། དམག་སྒར་དེ་ནི་ཧྥི་ལི་པིན་སི་ཡི་མི་མང་རྣམས་ལ་རོགས་རམ་ཞུ་ཆེད་དུ་དམིགས་པ་ཞིག་ཡིན་སྐོར་སོགས་ནན་བརྗོད་བྱས་ཡོད་འདུག་ལ། དེ་བཞིན་ཧྥི་ལི་པིན་སི་དང་ཨ་རིའི་གཞུང་འབྲེལ་མི་སྣ་ཁག་གིས། དམག་སྦྱོང་དེས་རང་དབང་དང་གུ་ཡངས་ལྡན་པའི་རྒྱ་གར་ཞི་བདེ་རྒྱ་མཚོའི་ཁུལ་དུ་ཞི་བདེ་དང་བརྟན་བརླིང་ཡོང་བའི་ཆེད་དུ་ཡིན། ཞེས་བརྗོད་ཡོད་འདུག
ཁ་སང་ཕྱི་ཚེས་ ༡༠ ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝིན་པིན་(Wang Wenbin)གྱིས། ཨ་རི་དང་ཧྥི་ལི་པིན་སི་གཉིས་ཀྱིས་དམག་གི་བརྗེ་ལེན་དང་མཉམ་འབྲེལ་ནི་རྒྱལ་ཁབ་གཞན་ཞིག་ལ་དམིགས་པ་མིན་ཡང་། དམག་སྦྱོང་འདིས་ལྷོ་རྒྱ་ནག་རྒྱ་མཚོ་སོགས་ཀྱི་ཁེ་ཕན་དང་། བདེ་འཇགས་སོགས་ལ་ཐེ་ཇུས་བྱ་རྒྱུའི་དབང་ཚད་མེད་ལུགས་བརྗོད་ཡོད་འདུག
རྒྱ་ནག་གཞུང་གིས་ཐའེ་ཝན་གྱི་མཚོ་འགག་ཁུལ་དུ་ཉིན་གྲངས་གསུམ་རིང་གནམ་མཚོ་གཉིས་ནས་དམག་དོན་ལས་འགུལ་སྤེལ་ཚར་མ་ཐག ཨ་རི་དང་ཧྥི་ལི་པིན་སི་གཉིས་ཀྱིས་མཉམ་འབྲེལ་དམག་སྦྱོང་སྤེལ་མགོ་བཙུགས་ཡོད་ཅིང་། གནད་དོན་དབྱེ་ཞིབ་པ་མང་པོ་ཞིག་གིས། ཨ་རིས་ཨེ་ཤ་ཡའི་མཚོ་འགག་ཁུལ་དུ་རྒྱ་ནག་གི་དབང་ཤུགས་སྐྱེད་པར་འགོག་རྒོལ་ཤུགས་ཆེན་བྱེད་ཀྱི་ཡོད་པ་མ་ཟད། རྒྱ་ནག་གི་དབང་ཤུགས་དང་དྲག་གནོན་འགོག་ཐབས་བྱེད་ཀྱི་ཡོད་པར་ངོས་འཛིན་བྱས་འདུག དེ་བཞིན་ཧྥི་ལི་པིན་སི་ཡི་སྲིད་འཛིན་ཧྥི་ཌན་ཌི་མཱར་ཁོ་སི་ཆུང་བ་(Ferdinand Marcos Jr) ལགས་ཀྱི་མགོ་ཁྲིད་འོག མི་གྲངས་ཐེར་འབུམ་ ༡༡ ལྷག་ཡོད་པའི་ལྷོ་ཤར་ཨེ་ཤ་ཡའི་རྒྱལ་ཁབ་དེས་ཨ་རི་དང་མཉམ་འབྲེལ་གྱི་ཐོག་ནས། རྒྱ་ནག་གི་དབང་ཤུགས་ལ་མདུན་རྒོལ་བྱ་རྒྱུའི་གྲ་སྒྲིག་བྱེད་ཀྱི་ཡོད་པའི་ངོས་འཛིན་བྱས་འདུག
17 thousand soldiers of US-Philippines Joint Military Drills At South China Sea. Photo:Reuters
ཟླ་འདིའི་ཕྱི་ཚེས་ ༥ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་ཐའེ་ཝན་གྱི་སྲིད་འཛིན་ཚའེ་ཡེན་ཝིན་མཆོག་དང་ཨ་རིའི་གྲོས་ཚོགས་འོག་མའི་ཚོགས་གཙོ་སྐུ་ཞབས་ཀེ་ཝིན་མཱག་ཁ་ཐེ་ (Kevin McCarthy) མཆོག་རྣམ་གཉིས་མཇལ་འཕྲད་གནང་ཡོད་སྟབས། ཟླ་འདིའི་ཕྱི་ཚེས་ ༨ ནས་ཉིན་གྲངས་གསུམ་རིང་རྒྱ་ནག་བཅིངས་གྲོལ་དམག་མི་ཟེར་བས། Su-30 རྟགས་ཅན་དང་། J- 16 ཐད་འཕུར་གནམ་གྲུ། YY-20། KJ-500། H-6 རྟགས་ཅན་གྱི་དྲག་རྒོལ་གནམ་གྲུ་ཚུད་པའི་དྲག་རྒོལ་གནམ་གྲུ་གྲངས ༩༡ ཙམ་དང་། དམག་དོན་མཚོ་གྲུ་མང་དག་ཅིག་ཐའེ་ཝན་གྱི་མཚོ་འགག་ཁུལ་དུ་མངག་གཏོང་བྱས་ཏེ། ཐའེ་ཝན་གྱི་གཞུང་མང་གཉིས་ལ་འཇིགས་སྐུལ་བྱས་ཡོད་པ་མ་ཟད། ཞི་བདེ་རྒྱ་མཚོའི་ཁུལ་དུ་གནམ་མཚོ་གཉིས་ནས་ལྟ་སྲུང་ནན་མོ་བྱས་ཏེ། ཐའེ་ཝན་གཙོས་ཨེ་ཤ་ཡའི་མཚོ་གླིང་རྒྱལ་ཁབ་ཁག་ལ་ལྟ་ཞིབ་བྱེད་མུས་ཡིན་འདུག་ལ། ད་ལན་གྱི་ཨ་རི་དང་ཧྥི་ལི་པིན་སི་གཉིས་ཀྱི་མཉམ་འབྲེལ་དམག་སྦྱོང་ལའང་མི་འདོད་པའི་རྣམ་འགྱུར་བསྟན་ཏེ། ཨ་རིས་ལྷོ་རྒྱ་ནག་རྒྱ་མཚོ་གཙོས་ཨེ་ཤ་ཡའི་མཚོ་གླིང་རྒྱལ་ཁབ་ཁག་ལ་ཐེ་ཇུས་བྱེད་ཀྱི་ཡོད་པའི་སྐྱོན་བརྗོད་ཀྱང་བྱས་ཡོད་འདུག
གཞན་ཡང་། འདས་པའི་ལོ་ཤས་རིང་ཨ་རིའི་མཐུན་ཕྱོགས་རྒྱལ་ཁབ་རྒྱ་གར་དང་། ཉི་ཧོང་། ཨོ་གླིང་བཅས་རྒྱ་ནག་གཞུང་གི་ལངས་ཕྱོགས་ལ་ཁ་གཏད་གཅོག་མཁན་ཞིག་ཏུ་གྱུར་ཡོད་ཅིང་། རྒྱ་གར་ཞི་བདེ་རྒྱ་མཚོའི་མངའ་ཁུལ་དུ་ཨ་རི་དང་ཉི་ཧོང། རྒྱ་གར་བཅས་ནས་མཉམ་འབྲེལ་དམག་སྦྱོང་བྱས་ཏེ། ཕྱོགས་ཁག་རྒྱལ་ཁབ་བཞིས་ཨེ་ཤ་ཡའི་ཁུལ་དུ་རྒྱ་ནག་གཞུང་གི་དབང་ཤུགས་སྐྱེད་པར་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་བརླིང་ཡོང་ཆེད་མཉམ་ལས་བྱེད་ཀྱི་ཡོད་སྟབས། རིམ་གྱིས་ཨེ་ཤ་ཡའི་ནུབ་ཆིངས་སྒྲིག་འཛུགས་(ASIAN NATO) ཞིག་ཏུ་འགྱུར་སྲིད་པའི་ཚོད་དཔག་ཀྱང་བྱེད་ཀྱི་འདུག
གསར་འགོད་པ། དཔལ་ལྡན། བསྟན་འཛིན་ཕུར་བུ།
