ཧྥི་ལི་པིན་གྱི་རཱ་མོན་མཱག་སའེ་སའེ་གཟེངས་རྟགས་ཐེབས་རྩ་ཚོགས་པས་བྱམས་བརྩེ་དང་ཞི་བདེ་ནི་དེང་གི་དུས་འདིར་འཛམ་གླིང་དུ་གལ་ཆེན་དང་དཀོན་པོར་གྱུར་ཡོད་པས་༧གོང་ས་མཆོག་ལ་དངོས་སུ་མཇལ་རྗེས་ཁོང་ཚོའི་སེམས་ནང་ཞི་བདེའི་ཚོར་བ་ཆེན་པོ་བྱུང་ཡོད་སྐོར་འགྲེལ་བརྗོད་གནང་བྱུང་།
ཁ་སང་ཕྱི་ཚེས་ ༢༦ ཉིན་གྱི་སྔ་དྲོར་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་ཧྥི་ལི་པིན་རཱ་མོན་མཱག་སའེ་སའེ་གཟེངས་རྟགས་ཐེབས་རྩའི་ཚོགས་གཙོ་ལྕམ་སྐུ་སུ་སན་ནཱ་བྷེ་ཨ་ཧྥེན་(Susanna B.Afan) ལགས་དང་། ཚོགས་མི་ཨེ་མི་ལི་ཨ་ཨ་བྷི་རེ་རཱ (Emily A.Abrera)་ལགས་བཅས་ཚོགས་མི་ཁག་ཅིག་ལ་མཇལ་འཕྲད་གནང་ཡོད་པ་དང་། སྐབས་དེར་༧གོང་ས་མཆོག་ལ་རཱ་མོན་མཱག་སའེ་སའེ་གཟེངས་རྟགས་ཕུལ་ཏེ་ལོ་ངོ ༦༤ འཁོར་བའི་དུས་དྲན་སྲུང་བརྩི་དང་བསྟུན་གཟེངས་རྟགས་དེ་དངོས་སུ་འབུལ་བཞེས་གནང་འདུག
སྐབས་དེར་༸གོང་ས་རྒྱལ་བ་རིན་པོ་ཆེ་མཆོག་ནས་དུས་རབས་འདིའི་མགོ་སྟོད་དུ་མི་ཚང་མས་དམག་འཁྲུག་དང་གོ་མཚོན་ལ་དོ་སྣང་བྱས་ཡོད་ཀྱང་། ད་ལྟའི་ཆར་དེའི་སྐོར་གྱི་བསམ་བློའི་འཁྱེར་སྟངས་ལ་འགྱུར་བ་ཆེན་པོ་ཐེབས་ཡོད་པ་རེད། ང་དང་ཁྱེད་ཀྱི་ལྟ་ཚུལ་ཉུང་དུ་སོང་ཡོད་པ་དང། ང་ཚོ་འགྲོ་བ་མི་གཅིག་པ་ཡིན་པའི་འདུ་ཤེས་ཐོག་མཉམ་དུ་འཚོ་སྡོད་བྱེད་ཀྱི་ཡོད། ཕན་ཚུན་ནང་ཁུལ་དུ་འཚེ་བ་མེད་པ་ཡིན་ཚེ། མི་ཚེ་དོན་དང་ལྡན་པ་ཞིག་རེད། དེང་སྐབས་ངོས་ལ་འཛམ་གླིང་གང་སར་དགའ་བོ་བྱེད་མཁན་མང་དུ་འགྲོ་བཞིན་འདུག་ལ། ངོས་ཀྱིས་ཆོས་ཀྱི་སྐོར་ལ་གང་ཡང་བཤད་མེད། ཆོས་ཁས་ལེན་གྱི་ཡོད་མེད་མི་སྒེར་བ་ཞིག་གི་གནད་དོན་རེད། བརྩི་བཀུར་དང་ཡིད་ཆེས་ཡོད་མེད་གང་ལྟར་ཡང་ང་ཚོ་འགྲོ་བ་མི་གཅིག་པ་ཡིན། ང་ཚོ་ཚང་མ་འགྲོ་བ་མི་གཅིག་པ་ཡིན་པས་ང་ཚོ་མཉམ་དུ་འཚོ་སྡོད་བྱེད་དགོས། ཚན་རིག་པས་ལོ་ངོ་བཅུ་ཕྲག་འགའི་རྗེས་སུ་འཛམ་གླིང་ཚ་དྲོད་རྒྱས་ཏེ་འཇིགས་པར་བཤད་ཀྱི་ཡོད། ང་ཚོས་མཉམ་དུ་མི་ཚེ་སྐྱིད་པོའི་ངང་ནས་བསྐྱལ་དགོས་ཀྱི་རེད། ཅེས་དང་། ཡང་༧མགོན་པོ་མཆོག་ནས་འཁྲུག་པ་རྒྱག་པ་ནི་ཞེ་སྡང་། ང་རྒྱལ། ཕྲག་དོག་བཅས་ཀྱི་རྐྱེན་གྱིས་ཡོང་བཞིན་འདུག གལ་སྲིད་ང་ཚོས་གཅེན་གཅུང་གི་འདུ་ཤེས་ཀྱི་སྟེང་ནས་འཚོ་བ་བསྐྱལ་བ་ཡིན་ན། ནང་སེམས་སུ་ལྷོད་པོ་ཆགས་ནས་བྱམས་བརྩེ་དང་ཞི་བདེའི་ངང་གནས་ཐུབ། ཀུན་སྤྱོད་ངན་པས་གཟུགས་པོའི་བདེ་ཐང་ལའང་གནོད་པ་བྱེད་ཀྱི་ཡོད། ཅེས་གསུངས་འདུག
རཱ་མོན་མཱག་སའེ་སའེ་གཟེངས་རྟགས་ཐེབས་རྩའི་ཚོགས་གཙོ་ལྕམ་སུ་སན་ནཱ་བྷེ་ཨ་ཧྥིན་(Susanna B.Afan)་ལགས་ཀྱིས། ༸གོང་ས་རྒྱལ་བ་རིན་པོ་ཆེ་མཆོག་ནི་སྐབས་དེར་གཟེངས་རྟགས་འདི་བཞེས་མཁན་གྱི་ནང་ནས་དགུང་ལོ་ཆེས་གཞོན་ཤོས་དེ་ཡིན་པ་དང་། ད་བར་གཟེངས་རྟགས་བཞེས་མཁན་ ༣༤༤ བྱུང་ཡོད་པ་ནས། གཟེངས་རྟགས་བཞེས་མཁན་ ༣༥༠ བྱུང་མཚམས། རྗེས་དྲན་གྱི་མཛད་སྒོ་ཞིག་འཚོག་འཆར་ཡོད་པ་དང་། སྐབས་དེར་ད་བར་གཟེངས་རྟགས་བཞེས་མཁན་རྣམ་པའི་ལོ་རྒྱུས་དང་། སྐུ་པར། གསུང་འཕྲིན་བཅས་ཡོད་པའི་ཆེད་དེབ་ཅིག་དཔར་བསྐྲུན་ཞུ་འཆར་ཡོད་སྟབས། གཞོན་སྐྱེས་ལ་དམིགས་པའི་གསུང་འཕྲིན་ཞིག་སྩལ་གནང་ཡོང་བའི་གསོལ་འདེབས་ཞུས་ཡོད་འདུག
གསར་འགོད་པས་ཐེབས་རྩའི་ཚོགས་གཙོ་ལྕམ་སུ་སན་ནཱ་བྷེ་ཨ་ཧྥིན་(Susanna B.Afan)་ལགས་སུ་ཐེངས་འདིའི་མཇལ་ཁའི་སྐོར་བཅར་འདྲི་བྱས་པར། ང་ཚོས་རཱ་མོན་མཱག་སའེ་སའེ་གཟེངས་རྟགས་ཐེབས་རྩ་ཁང་གི་སྐུ་ཚབ་བྱས་ནས་འདིར་ཡོང་བ་ཡིན། ད་ལོ་གཟེངས་རྟགས་འདི་དབུ་བརྙེས་ནས་ལོ་ངོ་་༦༥་འཁོར་བའི་དུས་དྲན་ཡིན་ལ། ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་རཱ་མོན་མཱག་སའེ་སའེ་གཟེངས་རྟགས་ཕུལ་ཡོད་བཞེས་སྐབས། ཁོང་ནི་གཟེངས་རྟགས་འདི་བཞེས་མཁན་གྱི་ལོ་རྒྱུས་ནང་ནས་དགུང་ལོ་ཆུང་ཤོས་དེ་ཡིན་ཅིང་། ང་ཚོའི་ངོས་ནས་གཟེངས་རྟགས་བཞེས་མཁན་ཚང་མར་ཡང་བསྐྱར་དུ་འབྲེལ་བ་བྱེད་ཀྱི་ཡོད། གཟེངས་རྟགས་བཞེས་མཁན་གྱི་མི་སྣ་རྣམས་ཀྱི་མི་ཚེའི་ལོ་རྒྱུས་དང་གསུང་རྩོམ། སྙིང་སྟོབས་དང་སྤྱི་ཚོགས་ལ་ཞབས་ཞུ་བསྒྲུབ་པའི་བྱ་བཞག་འཁོད་པའི་དམིགས་བསལ་གྱི་དེབ་ཕྲེང་བདུན་འདོན་འཆར་ཡོད་པས། གཟེངས་རྟགས་བཞེས་མཁན་མི་གྲངས་ ༣༤༤ བྱུང་ཡོད་པའི་ཁྲོད་ནས་ད་ལྟ་མི་གྲངས་གསུམ་ཆའི་གཅིག་ཙམ་སྐུ་འཚོ་བཞུགས་ཡོད་པ་དང་། གཟེངས་རྟགས་བཞེས་མཁན་རྣམས་ཀྱི་མཛད་རྗེས་གཞོན་སྐྱེས་ཚོའི་སེམས་ནང་དུ་ནང་ཡང་མི་བརྗེད་པར་བྱ་འཆར་ཡོད། ཅེས་དང་། ༧གོང་ས་མཆོག་དང་མཇལ་བའི་གོ་སྐབས་བྱུང་བར་དགའ་ཚོར་ཆེན་པོ་བྱུང་ལ། ༧མགོན་པོ་མཆོག་ནས་རྟག་ཏུ་བྱམས་བརྩེ་དང་ཞི་བདེའི་སྐོར་གྱི་སློབ་སྟོན་གནང་གི་ཡོད་པ་དང་། དེ་ནི་དེང་གི་དུས་འདིར་འཛམ་གླིང་དུ་གལ་ཆེན་དང་དཀོན་པོར་གྱུར་ཡོད་པས། ཁོང་དང་དངོས་སུ་མཇལ་རྒྱུ་བྱུང་བས་ང་ཚོའི་སེམས་ནང་ཞི་བདེའི་ཚོར་བ་ཆེན་པོ་བྱུང་ཞེས་འགྲེལ་བརྗོད་གནང་བྱུང་།
ཕྱི་ལོ་ ༡༩༥༩ ཟླ་ ༨ ཚེས་ ༣༡ ཉིན་རཱ་མོན་མཱག་སའེ་སའེ་གཟེངས་རྟགས་ཐེབས་རྩ་ཚོགས་པས་༧གོང་ས་རྒྱལ་བ་རིན་པོ་ཆེ་མཆོག་ལ་གཟེངས་རྟགས་དེ་ཕུལ་ཡོད་ཅིང་། སྐུའི་གཅེན་པོ་རྒྱ་ལོ་དོན་གྲུབ་མཆོག་ནས་༸གོང་ས་མཆོག་གི་སྐུ་ཚབ་གནང་ནས་ཧྥི་ལི་པིན་གྱི་རྒྱལ་ས་མཱ་ནེ་ལཱ་རུ་བཞེས་ཡོད་འདུག རཱ་མོན་མཱག་སའེ་སའེ་གཟེངས་རྟགས་ཐེབས་རྩ་ཁང་ནི་ཕྱི་ལོ་ ༡༩༥༨ ལོར་ཨེ་ཤ་ཡའི་ནང་གི་རླབས་ཆེ་བའི་དབུ་ཁྲིད་ཁག་ཅིག་ལ་གཟེངས་རྟགས་སུ་ཕུལ་བ་ནས་མགོ་བརྩམས་ཏེ། ད་ལྟའི་ཆར་༧གོང་ས་རྒྱལ་བ་རིན་པོ་ཆེ་མཆོག་དང་། ཨ་མ་ཌེ་རེ་སཱ་སོགས་འཛམ་གླིང་དུ་སྙན་གྲགས་ཆེ་བའི་མི་སྣ་ཁག་ཅིག་གི་དབུས་མི་གྲངས་ ༣༤༤ ལ་ཕུལ་ཡོད་འདུག
གསར་འགོད་པ། བྱམས་པ་ཚེ་རིང་།
