༧གོང་ས་རྒྱལ་བ་རིན་པོ་ཆེ་མཆོག་གིས་སེམས་བཟང་པོ་ནི་འཛམ་གླིང་ཞི་བདེའི་ལྡེ་མིག་ཡིན་ཞེས་གསུངས་འདུག
དེ་རིང་ཕྱི་ཚེས་ ༥ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་གནས་བརྟན་སྡེ་བའི་ལུགས་ཀྱི་སྟོན་པ་ཐུབ་པའི་དབང་པོ་སྐུ་འཁྲུངས་པ་དང་། སངས་རྒྱས་པ། སྐུ་མྱ་ངན་ལས་འདས་པ་བཅས་དུས་ཆེན་གསུམ་འཛོམས་ཀྱི་ཉིན་མོར་གསུང་འཕྲིན་ཞིག་བསྩལ་བའི་ནང་། དེ་རིང་བདག་ཅག་གི་སྟོན་པ་བཅོམ་ལྡན་འདས་སྐུ་འཁྲུངས་པ་དང་། སངས་རྒྱས་པ། སྐུ་མྱ་ངན་འདས་བའི་མཛད་པ་དྲན་པའི་དུས་ཆེན་ཁྱད་པར་ཅན་གྱི་ཉིན་མོར་འདིར། ངོས་ཀྱིས་འཛམ་བུ་གླིང་གི་ནང་པའི་རྗེས་འཇུག་པ་ཡོངས་ལ་འཚམས་འདྲི་ཞུ།
རྡོ་རྗེ་གདན་ནམ་བྷོ་དྷི་གྷ་ཡ་ནི་ནང་པའི་ཆོས་ཀྱི་སྲོལ་གཏོད་པོ་བདག་ཅག་གི་སྟོན་པ་ཤཀྱཱ་མུ་ནེ་ཡི་སྙིང་རྗེ་ཆེན་པོ་ཉམས་ལེན་གནང་སའི་ནང་པའི་གནས་ཆེན་ཁྱད་དུ་འཕགས་པ་ཞིག་ཡིན་ཅིང་། གནས་འདི་རུ་སྟོན་པ་བཅོམ་ལྡན་འདས་མངོན་པར་རྫོགས་པར་སངས་རྒྱས་ཏེ། འཕགས་པའི་བདེན་པ་བཞི་དང་། བྱང་ཆུབ་ཕྱོགས་ཀྱི་ཆོས་སུམ་ཅུ་སོ་བདུན་སོགས་ཀྱི་བསླབ་པ་མཛད་ཅིང་། སེམས་ཅན་ཐམས་ཅད་ཀྱི་དོན་དུ་བསླབ་པའི་སྙིང་པོའི་འདུལ་ཁྲིམས་བསྩལ་ཡོད་པ་རེད།
སངས་རྒྱས་བཅོམ་ལྡན་འདས་ཀྱི་ཆོས་སྙིང་པོ་ནི་ཐབས་དང་ཤེས་རབ་ཟུང་དུ་འཇུག་པ་དང་། བྱང་ཆུབ་སེམས་ཉམས་སུ་བླངས་ནས་མཐར་ཐུག་མངོན་པར་རྫོགས་པར་སངས་རྒྱས་པ་ཡིན།གཞན་གྱི་དཀའ་ངལ་ལ་སེམས་འཁུར་མང་ཙམ་བྱེད་པ་དང་། རང་ཉིད་ལས་གཞན་པར་བྱམས་བརྩེ་མང་ཙམ་སྤྲོད་པ། ང་ཚོས་ཕན་ཚུན་གྱི་རང་དབང་ངོས་འཛིན་ཐོག་ནས། འཛམ་གླིང་གི་མི་འབོར་ཐེར་འབུམ་བརྒྱད་པོ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་པ་ཡིན་པ་དྲན་དགོས། དེ་རིང་གི་དུས་ཆེན་ཁྱད་པར་ཅན་འདི་བརྒྱུད་ནས། ངོས་ཀྱིས་གཅེན་གཅུང་ཡོངས་ལ་སེམས་པ་བཟང་པོའི་ཐོག་ནས་མི་ཚེ་དོན་དང་ལྡན་པ་བསྐྱལ་དགོས་པ་དང་། གཞན་གྱི་དཀའ་ངལ་ལ་སེམས་འཁུར་བྱེད་དགོས་པའི་འབོད་སྐུལ་ཞུ་རྒྱུ་ཡིན། སེམས་པ་བཟང་པོ་ནི་འཛམ་གླིང་ཞི་བདེ་དང་འཆམ་མཐུན་གྱི་ལྡེ་མིག་ཡིན། ཞེས་གསུངས་འདུག
མཛད་འཆར་ལྟར་ན། ཟླ་འདིའི་ཕྱི་ཚེས་ ༢༤ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཐེག་ཆེན་སྲོལ་རྒྱུན་མི་ཉམས་རྒྱུན་འཛིན་ཐེབས་རྩ་ཁང་གིས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག་ལ། དེ་བཞིན་ཟླ་འདིའི་ཕྱི་ཚེས་ ༣༠ ནས་ཉིན་གཉིས་རིང་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་བོད་རིགས་གཞོན་སྐྱེས་ཚོར་སྐྱབས་འགྲོ་ངོ་སྤྲོད་དང་། སེམས་བསྐྱེད་ཀྱི་ཆོས་འབྲེལ། རྗེ་བཙུན་འཇམ་པའི་དབྱངས་ཀྱི་རྗེས་གནང་གི་གསུང་ཆོས་བཀའ་དྲིན་བསྩལ་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
