དེ་རིང་འཕགས་ཡུལ་ཀིརྟིའི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་དགེ་རྒན་གསུམ་དང་སློབ་ཐོན་པ་ ༨། རྒྱུགས་འབྲས་རྩེར་སོན་གྱི་དགེ་འདུན་པ་ ༦ བཅས་ལ་བཀའ་ཤོག་ལག་འཁྱེར་འབུལ་བཞེས་ཀྱི་མཛད་སྒོ་འཚོགས་སོང་།
དེ་རིང་བཀའ་བློན་ཁྲི་ཟུར་༧སྐྱབས་རྗེ་ཟམ་གདོང་རིན་པོ་ཆེ་མཆོག་དབུ་བཞུགས་ཐོག འཕགས་ཡུལ་ཀིརྟིའི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་རིག་གནས་འཛིན་རིམ་ ༡༠ པའི་སློབ་ཐོན་པ་ ༨ དང་། ཕྱི་ལོ་ ༢༠༢༢ ལོའི་རིགས་ལམ་དང་རིག་གནས་འཛིན་གྲྭའི་རྒྱུགས་འབྲས་རྩེར་སོན་གསུམ་རེ་བཅས་དགེ་འདུན་པ་ ༦། དགེ་རྒན་ལས་ཡུན་ལོ་ ༡༥ དང་ ༢༠ ལྷག་ལོན་པ་གསུམ་བཅས་ལ་བཀའ་ཤོག་ལག་འཁྱེར་འབུལ་བཞེས་ཀྱི་མཛད་སྒོ་འཚོགས་སོང་།
ཀིརྟིའི་བྱེས་པ་གྲྭ་ཚང་གི་སློབ་སྤྱི་དང་དགེ་རྒན་གཅིག་ལྕོགས་སོ་རུ་དར་རྒྱས་ལགས་ཀྱིས་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་བསླབ་པ་སློབ་གཉེར་དང་འབྲེལ་བའི་ལས་བསྡོམས་སྙིང་བསྡུས་སྙན་སྒྲོན་གནང་བའི་ནང་། ༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བླ་ན་མེད་པའི་ཐུགས་རྗེའི་ལམ་སྟོན་ལྟར། ༧རོང་ཆེན་བསྟན་པའི་སྒྲོན་མེ་༧སྐྱབས་མགོན་ཀིརྟི་རིན་པོ་ཆེ་མཆོག་ནས་འདི་གའི་སློབ་གཉེར་པ་རྣམས་དགེ་འདུན་པ་ཤ་སྟག་ཡིན་དུས་ནང་ཆོས་ཀྱི་གོ་རྟོགས་ལེགས་པོ་ཞིག་དགོས་པ་ལྷག་ཏུ་གལ་ཆེ་བར་གཟིགས་ཏེ། ཕྱི་ལོ་ ༡༩༩༣ ལོར་གྲྭ་ཚང་འདིར་མཚན་ཉིད་དམ་རིགས་ལམ་འཛིན་གྲྭ་གསར་འཛུགས་ཀྱི་དབུ་བཟུང་བ་དང་། ཕྱི་ལོ་ ༢༠༠༡ ཟླ་ ༤ ཚེས་ ༡༦ ཉིན་རིག་གནས་སྡེ་ཚན་ལས་ལོགས་སུ་རིགས་ལམ་འཛིན་གྲྭ་ཞིག་གསར་འཛུགས་གནང་བ་དང་འབྲེལ། བསྡུས་གྲྭ་དང་། བློ་རིག རྟགས་རིགས། གྲུབ་མཐའ་དང་ས་ལམ་སོགས་ལོ་ཡུན་བཞི་དང་། ཕར་ཕྱིན་ལོ་ཡུན་བདུན། དབུ་མ་ལོ་ཡུན་བཞི། མཛོད་ལོ་ཡུན་གསུམ། འདུལ་བ་ལོ་ཡུན་གསུམ། དགེ་བཤེས་རྒྱུགས་སྤྲོད་ལོ་ཡུན་ལྔ། སྔགས་ལ་ལོ་ཡུན་གསུམ་བཅས་མདོ་སྔགས་གཉིས་ཀར་སློབ་གཉེར་གྱི་ལོ་ཡུན་ཉེར་དགུ་ཅན་རིམ་གྱིས་གཏན་འབེབས་གནང་བ་ནས་བཟུང་། ད་བར་དུ་ཕར་ཕྱིན་སློབ་ཐོན་པ་བསྡོམས་གྲངས་ ༤༢ དང་། དབུ་མ་སློབ་ཐོན་པ་ ༢༦། མཛོད་སློབ་ཐོན་པ་ ༢༣། འདུལ་བ་སློབ་ཐོན་པ་ ༡༦ བཅས་གཞུང་ཆེན་རབ་འབྱམས་པ་ཁག་གི་ཕྱག་འཁྱེར་བཞེས་མཁན་མི་གྲངས་ ༡༩༧ བྱུང་ཡོད། ཅེས་དང་། ཕྱི་ལོ་ ༡༩༩༠ ནས་ད་ལྟའི་བར་གྲྭ་ཚང་འདིར་སློབ་གཉེར་བ་གྲྭ་གྲངས་ ༦༨༨ འབྱོར་ཡོད་པ་དང་། ད་ལྟའི་ཆར་སློབ་གཉེར་ཁང་འདིར་དགེ་སློབ་ལས་བྱེད་གྲངས་ ༡༨༩ ཡོད་པ་དེའི་ནང་ནས་སློབ་གཉེར་གནང་མཁན་གྲྭ་ ༡༡༠ དང་དགེ་རྒན་ ༡༨ཡོད་པ་སོགས་ངོ་སྤྲོད་གནང་སོང་།
དེ་ནས་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས། སྤྱིར་བཏང་སློབ་སྦྱོང་བྱས་པའི་དགོས་པ་སྙིང་པོ་ནི་གནས་སྐབས་དང་མཐར་ཐུག་གི་མངོན་འདོད་གང་ཡང་རུང་བ་ཞིག་བསྒྲུབ་རྒྱུའི་དོན་དུ་རེད། དེར་བརྟེན་དེའི་ནང་ནས་མཐར་ཐུག་གི་མངོན་འདོད་བསྒྲུབ་པའི་ཡན་ལག་ལ་རང་གིས་སློབ་སྦྱོང་བྱས་ཏེ་ལག་ལེན་བསྟར་ཐུབ་པ་ཡིན་ན། དེའི་དོན་དག་ཆེ་བ་ཡོད་རེད། སློབ་སྦྱོང་བྱས་ཏེ་ཚེ་འདི་རང་གི་བྱ་གཞག་ཙམ་གྱི་ཆེད་དུ་བེད་སྤྱོད་བཏང་བ་ཡིན་ན། འདི་རིག་པའི་གཞུང་ལུགས་ལ་སློབ་སྦྱོང་བྱེད་པ་དང་ལག་ཤེས་བཟོ་ལས་ལ་སློབ་སྦྱོང་བྱེད་པ་གཉིས་ཁྱད་པར་མེད་པ་ལྟ་བུ་ཞིག་རེད། སློབ་སྦྱོང་བྱེད་པའི་གྲུབ་འབྲས་འདི་ཚེ་འདིའི་ལྟོ་གོས་ཙམ་གྱི་དོན་དག་ལ་ཕྱིན་པ་ཡིན་ན་ཕན་ཐོགས་མེད་པ་ཞིག་རེད། ཅེས་དང་། སློབ་སྦྱོང་བྱེད་པ་དེ་བསྟན་པའི་དོན་དུ་འཛིན་སྐྱོང་སྤེལ་གསུམ་བྱ་རྒྱུ་དང་། རྗེས་འཇུག་གི་སློབ་མ་རྣམས་ཀྱི་དོན་དུ་འཆད་རྩོད་རྩོམ་གསུམ་བྱ་དགོས། ཐོས་བསམ་བྱེད་པའི་སྐབས་ལ་རྩོད་པའི་ལམ་ནས་འགྲོ་རྒྱུ་དང་། འཆད་ཉན་བྱེད་པའི་སྐབས་སུ་འཆད་དང་རྩོམ་གྱི་ལམ་ནས་འགྲོ་དགོས་པས། བསྟན་པ་འཛིན་སྐྱོང་སྤེལ་བའི་བྱ་བ་ལ་འཆད་རྩོད་རྩོམ་གསུམ་གྱི་རིམ་པ་དེ་མེད་དུ་མི་རུང་བ་ཞིག་ཆགས་ཀྱི་ཡོད་དུས། རིག་པའི་གནས་ཡོངས་སུ་རྫོགས་པ་ལ་སློབ་སྦྱོང་བྱ་དགོས། རང་ཉིད་ཀྱི་ཐོས་བསམ་མཐར་ཕྱིན་པ་ཞིག་ཡོང་རྒྱུར་རིག་གནས་ཡོངས་སུ་རྫོགས་པ་མེད་ན་འགྲིག་གི་མེད་སྐོར་དང་། བྱང་ཆུབ་སེམས་པའི་སྤྱོད་པ་མཐར་ཕྱིན་པ་སྤྱད་པར་རིག་པའི་གནས་ལ་སྦྱང་དགོས་ཀྱི་ཡོད་སྐོར་སོགས་གསུངས་སོང་།
ཡང་སློབ་དཔོན་ཟམ་གདོང་རིན་པོ་ཆེ་མཆོག་གིས། སྤྱིར་བཏང་ང་ཚོ་ནང་པའི་སློབ་སྦྱོང་བྱེད་སྟངས་ཀྱི་ངོས་ནས་བསམ་བློ་གཏོང་བ་ཡིན་ན། སངས་རྒྱས་ཀྱི་གོ་འཕང་མ་ཐོབ་བར་དུ་བསླབ་པ་མཐར་སོན་རྒྱུ་དང་སློབ་སྦྱོང་ཚར་རྒྱུ་ཡོད་མ་རེད། དེང་རབས་ཀྱི་སློབ་སྦྱོང་བྱེད་སྟངས་ནང་ཤེས་ནས་འགྲོ་རྒྱུ་དང་ཆ་བཞག་ནས་འགྲོ་རྒྱུ་གཉིས་རྩིས་པ་ཡིན་ན། ཆ་བཞག་ནས་འགྲོ་མཁན་བརྒྱ་ཆ་ ༨༠ ལྷག་ཡོད་པ་རེད། ཤེས་ནས་འགྲོ་མཁན་བརྒྱ་ཆ་ ༢༠ དང་དེ་ལས་ཉུང་བ་མ་གཏོགས་ཡོད་མ་རེད། ང་ཚོ་ནང་པའི་སློབ་སྦྱོང་བྱེད་སྟངས་ལ་སློབ་སྦྱོང་ཐོན་ཟེར་བ་དེ། དོན་དག་དེ་རང་གིས་ཤེས་པར་བྱས་ནས་ཐོན་པ་ཞིག་རེད་མ་གཏོགས། རྒན་ལགས་ཀྱིས་གསུང་གི་འདུག དེབ་ནང་བྲིས་འདུག དེ་ག་རང་ཡིན་ས་རེད་བསམ་ནས་ཆ་བཞག་ནས་འགྲོ་ཡི་ཡོད་མ་རེད། ཆ་བཞག་ནས་ཕྱིན་པ་དེ་ཤེས་པ་མ་རེད། གོ་བ་རེད། ཐོས་བྱུང་གི་ཤེས་རབ་དེ་གོ་བ་ཙམ་ཞིག་རེད། དེ་ལ་རང་གིས་བརྟག་དཔྱད་བྱས་ནས་གཏན་ལ་ཕབ་དགོས་སྐོར་དང་། སངས་རྒྱས་ཀྱི་གོ་འཕང་མ་ཐོབ་བར་དུ་མུ་མཐུད་ནས་སློབ་སྦྱོང་བྱ་རྒྱུའི་ཡིད་ཆེས་དམ་བཅའ་བརྟན་པོ་དགོས་སྐོར་དང་། ཁྱེད་རང་ཚོ་ཐུན་མོང་བའི་རིག་པའི་སློབ་ཚན་གྱི་ཐོག་ནས་བསླབ་པ་མཐར་སོན་པ་དེ་ཚོ་རིག་གནས་དེ་ཐུན་མོང་བའི་རིག་གནས་ཡིན་ནའང་། རང་གིས་ལག་ལེན་བསྟར་བ་དང་མི་ཚེའི་ནང་བེད་སྤྱོད་གཏོང་བའི་སྐབས། ནང་པའི་ཐུན་མོང་མ་ཡིན་པའི་རིག་གནས་ཀྱི་ངོ་བོ་ལ་འགྱུར་ཐུབ་རྒྱུ་ཞིག་དང་། དེ་ལ་བརྟེན་ནས་ཚེ་འདི་རང་གི་བྱ་གཞག་ཙམ་གྱི་ཆེད་དུ་བཀོལ་སྤྱོད་བྱེད་པ་མ་ཡིན་པར་བྱང་ཆུབ་སེམས་པའི་སྤྱོད་པ་ལ་སྤྱད་པའི་ཡན་ལག་ཅིག་གི་ངོ་བོ་ལ་བེད་སྤྱོད་གཏོང་ཐུབ་པ་ཡིན་ན། ཏན་ཏན་སློབ་སྦྱོང་གནང་བ་དེ་དོན་དང་ལྡན་པ་ཞིག་དང་བྱང་ཆུབ་སེམས་པའི་སྤྱོད་པ་ལ་བསླབ་པའམ། ཐེག་པ་ཆེན་པོའི་ཆོས་ལ་ཉམས་ལེན་བྱེད་པའི་ངོ་བོ་ལ་འགྲོ་ཐུབ་པ་ཞིག་ཡོང་གི་རེད་བསམ་གྱི་འདུག སངས་རྒྱས་ཀྱི་གོ་འཕང་མ་ཐོབ་བར་དུ་ཐོས་བསམ་སྒོམ་གསུམ་གྱི་ལམ་ནས་སློབ་སྦྱོང་བྱ་རྒྱུའི་དམ་བཅའ་བརྟན་པོ་དགོས་རྒྱུ་གལ་ཆེན་པོ་རེད་དགོངས་ཀྱི་ཡོད་སྐོར་སོགས་ལེགས་ཉེས་བླང་དོོར་གྱི་བཀའ་སློབ་གནང་སོང་།
གསར་འགོད་པ། བསྟན་འཛིན་ཕུར་བུ།
