རྒྱ་གར་བོད་དོན་རྒྱབ་སྐྱོར་ཚོགས་པ་བཙུགས་ནས་མི་ལོ་ཉེར་ལྔ་འཁོར་བའི་མཛད་སྒོ་བཞུགས་སྒར་དྷ་རམ་ས་ལར་བསྡུས།

རྒྱ་གར་བོད་དོན་རྒྱབ་སྐྱོར་ཚོགས་པ་བཙུགས་ནས་མི་ལོ་ཉེར་ལྔ་འཁོར་བའི་དུས་དྲན་དང་བསྟུན་རྒྱ་གར་རྒྱལ་ཡོངས་སུ་གཞི་རྒྱ་ཆེ་བའི་ཚོགས་འདུ་བཅུ་འཚོགས་ནས་བོད་དོན་གླེང་སློང་དང་གོ་རྟོགས་སྤེལ་ཐབས་གནང་རྒྱུ་ཡིན་སྐོར་གསུངས་སོང་།

དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཆོས་རའི་ནང་དུ། ༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག རྒྱ་གར་བོད་དོན་རྒྱབ་སྐྱོར་ཚོགས་པ་ (Bharat Tibbat Sahyog Manch) བཙུགས་ནས་མི་ལོ་ ༢༥ འཁོར་བའི་དུས་དྲན་མཛད་སྒོ་འཚོགས་སོང་བ་དང་། མཛད་སྒོའི་ཐོག་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་དང་། སྲིད་ཚབ་ལྕང་ར་ཐར་ལམ་སྒྲོལ་མ་མཆོག དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པ་འཛུགས་མཁན་གྱི་གྲས་སྐུ་ཞབས་ཨིན་ཌེ་ཤི་ཀུ་མར་ (Indresh Kumar)ལགས་ཀྱི་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི། དྷ་ས་ཁུལ་གྱི་སེར་སྐྱ་མི་མང་དང་སློབ་ཕྲུག་བཅས་མི་གྲངས་སྟོང་ཕྲག་འགའ་འཛོམས་འདུག

རྒྱ་གར་བོད་དོན་རྒྱབ་སྐྱོར་ཚོགས་པ་འཛུགས་མཁན་གྲས་སྐུ་ཞབས་ཨིན་ཌེ་ཤི་ཀུ་མར་ (Indresh Kumar)  ལགས་ཀྱིས། དེང་གི་འཛམ་གླིང་འདིར་དམག་འཁྲུག་སོགས་ཀྱི་རྐྱེན་གྱིས་མི་རྣམས་ཀྱི་འགྲོ་འདུག་སྤྱོད་གསུམ་གྱི་ཐད་ལ་དཀའ་ངལ་ཆེན་པོ་འཕྲད་ཀྱིན་ཡོད་པས། འཚེ་མེད་ཞི་བའི་ལམ་ནས་འཛམ་གླིང་ཞི་བདེ་བསྐྲུན་རྒྱུ་གལ་ཆེན་ཡིན་སྟབས། ང་ཚོས་བྱིན་རླབས་ལྡན་པའི་ས་ཆ་འདི་ནས་འཛམ་གླིང་ཞི་བདེ་བསྐྲུན་པར་ལས་དོན་གཉེར་རྒྱུའི་དམ་བཅའ་བཞག་དགོས། དེ་བཞིན་མཉམ་འབྲེལ་རྒྱལ་ཚོགས་དང་། སྟོབས་ཆེན་རྒྱལ་ཁབ་ཁག་གི་གཞུང་སྒེར་ཚོགས་པ་ཁག་གིས་རྒྱ་ནག་གཞུང་ལ་གནོན་ཤུགས་སྤྲད་དེ། བོད་མི་ཚོར་རང་སྐྱོང་ངམ་རང་བཙན་གང་མགྱོགས་སྤྲད་རྒྱུ་གླེང་སློང་གནང་དགོས། རྒྱ་ནག་གཞུང་གིས་དམག་གི་སྟོབས་ཤུགས་བཀོལ་ནས་བོད་རྒྱ་ཞི་མོལ་ཡོང་ཐབས་གཏན་ནས་མེད་པས། རྒྱ་ནག་གཞུང་གིས་འཚེ་མེད་ཞི་བའི་ལམ་ནས་བཙན་བྱོལ་བོད་མིའི་སྒྲིག་འཛུགས་དང་ལྷན་དུ་འབྲེལ་མོལ་བྱ་དགོས། ང་ཚོས་དེ་རིང་སྡིངས་ཆ་འདིའི་སྒང་ནས་བོད་མི་རྣམས་གང་མགྱོགས་བོད་ལ་ལོག་ཐུབ་པའི་རེ་བ་བྱེད་ཀྱི་ཡོད་ཅིང་། རྒྱ་གར་བོད་དོན་རྒྱབ་སྐྱོར་ཚོགས་པ་བཙུགས་ནས་མི་ལོ་ཉེར་ལྔ་འཁོར་བ་དང་བསྟུན། རྒྱ་གར་རྒྱལ་ཡོངས་སུ་གཞི་རྒྱ་ཆེ་བའི་ཚོགས་འདུ་བཅུ་འཚོགས་ནས་བོད་དོན་གླེང་སློང་དང་གོ་རྟོགས་སྤེལ་ཐབས་བྱ་རྒྱུ་ཡིན་སྐོར་སོགས་གསུངས་སོང་།

དེ་རིང་གི་མཛད་སྒོ་དང་བསྟུན་༧གོང་ས་རྒྱལ་བ་རིན་པོ་ཆེ་མཆོག་ནས། ཚོགས་པ་འདི་(རྒྱ་གར་བོད་དོན་རྒྱབ་སྐྱོར་ཚོགས་པ།)བཙུགས་ནས་ལོ་ཉི་ཤུ་རྩ་ལྔ་ཕྱིན་འདུག ཚོགས་པ་འདིས་དངོས་ནས་དྲང་གནས་ཁ་ཡོད་ལག་ཡོད་ཀྱིས་བྱས་རྗེས་བཞག་ཡོད་པས། ལོ་ཉི་ཤུ་རྩ་ལྔ་འཁོར་བའི་དུས་ཆེན་སྲུང་གཙི་ཞུ་བཞིན་ཡོད་ལ། རྒྱ་གར་རྒྱལ་ཡོངས་ནས་ཚོགས་མི་རྣམས་མཉམ་ཞུགས་གནང་འདུག ཚང་མས་ཁ་ཡོད་ལག་ཡོད་ཀྱི་ཐོག་ནས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་ཆེད་དངོས་གནས་དྲང་གནས་ཕྱོགས་མང་པོར་རྒྱབ་སྐྱོར་དང་རོགས་འདེགས་གནང་བར་ཐུགས་རྗེ་ཆེ་ཞུ་ཡི་ཡིན། བཀྲིས་བདེ་ལེགས་ཡོད་ཅེས་གསུངས་སོང་།

ཡང་༧གོང་ས་རྒྱལ་བ་རིན་པོ་ཆེ་མཆོག་ནས། དྷ་རམ་ས་ལ་འདི་ངོས་རང་བཙན་བྱོལ་བ་བྱས་ནས་བསྡད་སའི་བསྟི་གནས་ཆགས་ཡོད་པ་རེད། ས་ཆ་འདི་ནེ་རུ་རང་གིས་ཏཱ་ལའི་བླ་མ་བཞུགས་ས་དེ་ཀང་ར་རྫོང་ཁོངས་སུ་བྱ་རྒྱུ་ཡིན་ཞེས་ཐག་གཅད་པ་ཞིག་རེད། ལོ་དེའི་རིང་ལ་ས་ཆ་འདིའི་སྒང་ལ་ང་རང་ཚོ་རྒྱ་གར་མི་མང་གཅིག་མཚུངས་བཞིན་རང་དབང་ཐོབ་ཐང་ཆ་ཚང་ཡོད་པ་ཞིག་དང་། ཆོས་ལུགས་རིས་མེད་བྱས་ནས་དུས་ད་ལྟ་བར་དུ་བསྡད་པ་རེད། བོད་ཀྱི་རིག་གཞུང་གི་ཁུངས་བཅོལ་ས་ནི་ནང་པ་སངས་རྒྱས་པའི་གཞུང་དེ་རེད། བཀའ་འགྱུར་བསྟན་འགྱུར་པོ་ཏི་སུམ་བརྒྱ་དེ་དག་ཚང་མའི་མགོ་ལ་རྒྱ་གར་སྐད་དུ་ཞེས་ཡོད་པ་རེད། བྱས་ཙང་འཕགས་བོད་གཉིས་སུ་ཐུན་མོང་མ་ཡིན་པའི་འབྲེལ་བ་ཞིག་ཡོད་པ་རེད་ལ། བོད་ཀྱི་རིག་གཞུང་ཐུན་མོང་མ་ཡིན་པ་དེ་དག་རྒྱ་གར་ནས་ཡོང་བ་ཞིག་ཆགས་བསྡད་ཡོད་པ་རེད་ལ།  ཆོས་རྒྱལ་སྲོང་བཙན་སྒམ་པོ་དང་རྒྱ་བཟའ་འཁྲུངས་ས་བསྐྱོན་ནས་རྒྱ་བོད་གཉིས་འབྲེལ་བ་ཤུགས་ཆེན་པོ་ཆགས་བསྡད་ཡོད་རེད་དེ། རྒྱ་གར་གྱི་དབྱངས་དང་གསལ་བྱེད་གཉིས་ནས་དཔེ་བླངས་ཏེ་བོད་ཡིག་བཟོས་པ་རེད། ཅེས་སོགས་བོད་འཕགས་གཉིས་ཀྱི་ཆོས་དང་རིག་གཞུང་གི་འབྲེལ་བའི་སྐོར་གསུངས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། འཕགས་བོད་གཉིས་ཀྱི་བར་ལོ་ངོ་སྟོང་ཕྲག་གི་ལོ་རྒྱུས་འབྲེལ་བ་ཡོད་ཅིང་། དེ་ཡང་ཆོས་དང་རིག་གཞུང་ཐོག་ནས་ཕན་ཚུན་བློས་འཁེལ་བའི་འབྲེལ་བ་བྱུང་ཡོད་པ་དངོས་ཡོད་གནས་ཚུལ་ཡིན།  རྒྱ་ནག་གཞུང་གིས་བོད་ནང་དུ་བཙན་འཛུལ་བྱས་པའི་རྐྱེན་གྱིས། ༧གོང་ས་མཆོག་གིས་དབུས་བོད་མི་ཁྲི་བརྒྱད་ལྷག་རྒྱ་གར་དུ་བཙན་བྱོལ་ལ་ཡོང་སྐབས་ཀྱང་། རྒྱ་གར་གཞུང་དང་མི་མང་གིས་རོགས་རམ་དང་མཐུན་སྦྱོར་བྱས་པ་ཧ་ཅང་བཀའ་དྲིན་ཆེན་པོ་རེད། རྒྱ་གར་བོད་དོན་རྒྱབ་སྐྱོར་ཚོགས་པ་གཙོས་བོད་དོན་འཐབ་རྩོད་ལ་ཕན་ཐོགས་ཆེན་པོ་བྱུང་ཡོད་པ་དང་། རྒྱ་གར་གཞུང་མང་གཉིས་ཀྱིས་བཀའ་དྲིན་ལ་བརྟེན་ནས་བཙན་བྱོལ་དུ་བོད་ཀྱི་ཆོས་དང་རིག་གཞུང་གསོན་པོ་གནས་ཐུབ་ཡོད་པ་བཅས་བརྒྱུད་ལམ་འདི་བརྒྱུད་ནས་ཐུགས་རྗེ་ཆེ་ཞུ་ཡོད་སྐོར་སོགས་གསུངས་སོང་།

ཤེས་རིག་བཀའ་བློན་ཐར་ལམ་སྒྲོལ་མ་མཆོག་གིས། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་སྐུ་ཚབ་བྱས་ནས་རྒྱ་གར་བོད་དོན་རྒྱབ་སྐྱོར་ཚོགས་པ་དབུ་བརྙེས་ནས་ལོ་ངོ་ ༢༥ འཁོར་བར་རྟེན་འབྲེལ་ཞུས་པ་དང་། རྒྱ་གར་དང་བོད་གཉིས་མཛའ་འབྲེལ་གྱི་ཐོག་ནས་ཆོས་ལུགས་དང་། རིག་གཞུང་། སྐད་ཡིག་སོགས་ཀྱི་ཐད་ལ་མཉམ་ལས་བྱེད་པའི་ལོ་རྒྱུས་རིང་པོ་ཡིན་ཞིང་། ༧གོང་ས་མཆོག་གིས་རྟག་ཏུ་རྒྱ་གར་ནི་བོད་ཀྱི་སློབ་དཔོན་ཡིན་གསུངས་པ་བཞིན། མཁན་ཆེན་ཞི་བ་འཚོ་དང་སློབ་དཔོན་པདྨ་འབྱུང་གནས་སོགས་ཀྱིས་ནང་པའི་བསྟན་པ་བོད་དུ་གོང་སྤེལ་བཏང་ཡོད་པ་མ་ཟད། རྒྱ་གར་གནའ་བོའི་རིག་གཞུང་གིས་ཕྱིའི་དངོས་པོ་དང་ནང་བསམ་པའི་དཔལ་ཡོན་ལ་ཤུགས་རྐྱེན་ཆེས་ཆེར་ཐེབས་ནས་འཛམ་གླིང་ཞི་བདེ་ཡོང་བར་ཕན་ཐོགས་བྱུང་ཡོད་ལ། རྒྱ་ནག་དམར་པོའི་གཞུང་གིས་བོད་དུ་བཙན་འཛུལ་བྱས་ཏེ། བོད་མི་རྣམས་རྒྱ་གར་དུ་བཙན་བྱོལ་ཡོང་དགོས་འཁེལ་ཡང་། བཙན་བྱོལ་དུ་རང་དབང་ཆ་ཚང་ཡོད་པའི་ཐོག་ནས་སྐད་དང་རིག་གཞུང་བཅས་བོད་པའི་ངོ་བོ་སྲུང་སྐྱོབ་བྱེད་པའི་མཐུན་རྐྱེན་གང་ལེགས་སྦྱར་ཡོད་སྐོར་སོགས་གསུངས་སོང་།

གསར་འགོད་པ། དོན་གྲུབ་བཀྲ་ཤིས། དཔལ་ལྡན།