འཇམ་དབྱངས་ཕུན་ཚོགས།
ལོ་ཤས་སྔོན་ངས་ཨ་མ་བགྲེས་པོ་ཞིག་ལ་དངོས་བྱུང་གློག་བརྙན་ཞིག་གི་ཆེད་དུ་བཅར་འདྲི་བྱས། དང་ཐོག་ཁོ་མོས་སོ་སོ་སྒེར་གྱི་དཀའ་སྡུག་ཚབ་ལ་བོད་སྤྱིའི་སྡུག་པོ་མྱོང་རབས་སྐོར་མང་པོ་ཞིག་བཤད་སོང་ནའང་། ཁོ་བོས་ཨ་མ་ལགས་ཁོང་སྒེར་གྱི་ལོ་རྒྱུས་སྐོར་ནན་འདྲི་བྱེད་དུས། མགྱོགས་མྱུར་ངང་འགུལ་བཞིན་པའི་མཆུ་འདབ་དེ། དམ་དུ་སོང་བ་དང་ཁོ་མོ་གློ་བུར་བའི་ཚོར་བ་ཁྱད་མཚར་ཞིག་གིས། སོམ་ཉི་ཡི་དྲ་བའི་ནང་ཚུད་སོང་། འདི་ནི་ངས་ཨ་མ་ལགས་ཁོང་ལྟ་བུ་ཞིག་ལ་ཕྲད་པའི་དཀའ་ངལ་དམིགས་བསལ་བ་ཞིག་རེད་བསམ་གྱིན་མི་འདུག སྤྱི་དོན་གོང་དུ་བཀུར་ནས་སྒེར་དོན་རིང་དུ་དོར་བ་ནི། བོད་པ་སྤྱིའི་གཤིས་ཀ་དང་ཡ་རབས་བཟང་སྤྱོད་ལ་བརྩི་བཞིན་པ་ཡོང་གྲགས་ཡིན་ནའང་། སྒྱུ་རྩལ་གྱི་མ་རྩ་ནི་ཡོངས་གྲགས་ཀྱི་བདེན་པ་ག་གེ་མོ་ཞིག་ལས་མི་བུ་སྒེར་གྱི་བདེན་པ་རྣོན་པོ་དེ་རེད། གློག་བརྙན་བཟོ་མཁན་ཞིག་གི་ཆ་ནས་བཤད་ན། ང་ལ་དགོས་རྒྱུ་འདི་ནི། སྔ་མ་དེ་མ་ཡིན་པར་ཕྱི་མ་དེར་ཐུག་ཡོད། ངས་གཏན་ཚིགས་འདི་གཞིར་བཟུང་ནས་པདྨ་ཚེ་བརྟན་གྱི་གློག་བརྙན་གླེང་སྙིང་འདོད།
སྤྱིར་ང་ཚོ་བོད་པ་ཚང་ནི་ལོ་རྒྱུས་ཀྱི་ཉེས་པ་འཁུར་བའི་མི་རིགས་ཤིག་རེད་ལ། བདེན་པ་མཐའ་གསལ་གྱི་འགན་ལྕི་མོ་འཁུར་མཁན་ཞིག་ཀྱང་རེད་ལབ་ཆོག ང་ཚོས་དུས་རྒྱུན་ནས་བདེན་པ་ར་སྤྲོད་བྱེད་དགོས་པའི་འོས་འགན་དེ། བོད་པ་ཡོད་དོ་ཅོག་ལ་བབས་ཡོད་པར་བརྩི་གིན་ཡོད་ནའང་། ད་ལན་ངས་རླབས་ཆེན་གྱི་བསམ་བློ་དེར། མཚང་ཞིག་བྲུ་ན་འདོད་ཀི། རྒྱ་ནག་གིས་ལོ་རྒྱུས་ལ་འཁྱོག་བཤད་དང་རྫུན་བཟོ། དེ་བཞིན་མི་སེར་སྤེལ་ཡུལ་གྱི་ལྟ་གྲུབ་རྣམ་བཤད་ཀྱི་ཁ་གཏད་ལ། ང་ཚོས་ལོ་རྒྱུས་ཀྱི་བདེན་དཔང་སྒྲུབ་ཐབས་ལོས་བྱེད། དེའི་ཆེད་དུ་ང་ཚོས་བོད་དོན་དྲིལ་བསྒྲགས་ཞེས་ལོ་ངོ་མང་པོའི་རིང་ལ་བྱས་དང་བྱེད་མུས་ཡིན། འོན་ཀྱང་སྒྱུ་རྩལ་ནི་དྲིལ་བསྒྲགས་ག་ལ་ཡིན། དེ་བཞིན་སྒྱུ་རྩལ་ནི། སྒྱུ་རྩལ་གྱི་ཆས་གོས་བཀླུབས་པའི་དྲིལ་བསྒྲགས་ཤིག་དེ་བས་ཀྱང་མིན། གཅིག་བྱས་ན་རྒྱ་ནག་གིས་འཁྱོག་བཤད་བྱས་པའི་དྲིལ་བསྒྲགས་དང་ལོག་སྨྲ་ཚར་གཅོད་བྱེད་པའི་བོད་དོན་དྲིལ་བསྒྲགས་གཉིས་ཀྱི་དབར་ན། ང་ཚོས་བོར་སོང་བའམ་ཡང་ན་རྣམ་གཡེང་དུ་ལུས་པ་ནི། སྒྱུ་རྩལ་གྱི་བདེན་པ་དེ་ཉིད་དོ། ངས་དྭ་ཕྲུག་ཏུ་ལུས་པའི་བོད་ཀྱི་སྒྱུ་རྩལ་འདི་གཅེས་པར་འཛིན་ནས་པདྨ་ཚེ་བརྟན་གྱི་གློག་བརྙན་གླེང་སྙིང་འདོད།
བོད་ཀྱི་གློག་བརྙན་ཞེས་པ་དུས་ཕྱིས་སུ་དར་བ་ཞིག་ཡིན་ནའང་། རྒྱལ་སྤྱིའི་གློག་བརྙན་གླིང་དུ་བོད་དང་བོད་པ་ཅེས་པ་དེ་སྔ་ས་ནས་ཡོད་པ་ཞིག་ཡིན། སྟབས་བདེ་བོར་བཤད་ན། ནུབ་ཕྱོགས་པའི་འཆར་ཡན་གྱིས་བསྐྲུན་པའི་ “མི་ཡུལ་སྟེང་གི་ལྷ་ཡུལ་ལྟ་བུའི་བོད་”དང་རྒྱ་ནག་གི་དྲིལ་བསྒྲགས་བྱེད་པའི་ “ཆེས་རྗེས་ལུས་དང་མུན་ནག་ཅན་གྱི་བོད་”བཅས་གཉིས་སུ་ཕྱེ་ཡོད། སྔ་མའི་དཔེ་མཚོན་ལ་ ༡༩༣༧ ལོར་ཐོན་པའི་༼བོར་ཟིན་པའི་མཐའ་མཚམས།༽(Lost Horizon) དང་ ༡༩༩༧ ལོོའི་༼བོད་ནང་ལོ་བདུན།༽(Seven Years in Tibet) ཡང་ཕྱི་མའི་དཔེ་མཚོན་ལ་ ༡༩༦༣ ལོར་༼ཞིང་བྲན་༽(农奴) དང་༢༠༠༤ ལོའི་༼ཨ་ཆེན་གངས་རྒྱབ་༽(可可西里) སོགས་ཡོད། གློག་བརྙན་འདི་དག་གི་ནང་དུ། བོད་ཀྱི་སྣོད་བཅུད་ཕྲ་རགས་གང་ཞིག་བཀོད་ཡོད་ནའང་། ཞིབ་ཏུ་དཔྱད་ན་བོད་དེ་ནི། མི་རིགས་གཞན་དག་ཅིག་གི་མངོན་འདོད་མཚོན་བྱེད་ཀྱི་ཅ་ལག་ལྟ་བུ་ཞིག་དང་ཡང་ན་ལོ་རྒྱུས་ཀྱི་ནག་ཉེས་དཀར་འདོན་བྱེད་ཐབས་ཀྱི་འཁྲབ་སྟོན་དང་མི་སེར་སྤེལ་ཡུལ་ལྟ་གྲུབ་ཀྱི་འབེན་ལྟ་བུ་ཞིག་ཆགས་བསྡད་ཡོད།
མཐའ་གཉིས་སུ་ལྷུང་བའི་སྣང་བརྙན་དེ་དག་གི་སྐྱོན་དེ་ཚོ་སྡོམ་ནས་ཞུས་ན། མི་ལ་མིའི་འདུ་ཤེས་སྦྱིན་མ་ཐུབ་པ་དེ་རེད། སྣང་བརྙན་དེ་གཉིས་ལས། ལྷག་པར་དུ་ནུབ་ཕྱོགས་པའི་ལྟ་ཚུལ་དེ་ཁྱབ་ཆེ་བའི་དབང་གིས། དེའི་ཤུགས་རྐྱེན་བོད་པ་རང་ལའང་ཐེབས་ཡོད་པ་མ་ཟད། བོད་པས་བཟོས་པའི་གློག་བརྙན་མང་དག་ཅིག་ལ། དེའི་ཤན་ཞུགས་ཡོད་པའང་ཡོད། གནད་དོན་འདི་དག་སེམས་ལ་བཞག་ནས། ང་ཚོས་བོད་ཀྱི་གློག་བརྙན་དག་ལ་སྒྱུ་རྩལ་གྱི་ཚད་གཞི་གང་འདྲ་ཞིག་ཡོད་མེད་སྐོར་དཔྱད་ཞིབ་བྱ་ཐུབ། སྤྱིར་ངས་བསམ་ན་སྒྱུ་རྩལ་བ་ཞིག་གི་དམ་བཅའ་གཙོ་བོ་ནི། སྲིད་གཞུང་ངམ་མི་ཚོགས་བྱེ་བྲག་པ་ཞིག་གི་མགྲིན་ཚབ་བྱ་རྒྱུ་དེ་མ་རེད་ལ། གནས་ཚུལ་དྲིལ་བསྒྲགས་བྱ་རྒྱུ་དང་ལེགས་ཉེས་བླང་དོར་གྱི་སློབ་གསོ་བསྐྱོན་རྒྱུ་དེ་ཡང་མ་ཡིན། དེར་བརྟེན་སྒྱུ་རྩལ་བ་ཞིག་ལ་མེད་དུ་མི་རུང་བའི་རྒྱུ་ཆ་དེ་ནི། རང་ཚུགས་ཀྱི་བདེན་པ་ཞིག་དང་བདེན་པ་དེར་སོ་སོའི་སྒྱུ་རྩལ་གྱི་ལམ་ནས་གསལ་འདེབས་བྱ་རྒྱུ་དེ་རེད།
པདྨ་ཚེ་བརྟན་གྱི་གློག་བརྙན་ཐོག་མ་༼ལྷིང་འཇགས་ཀྱི་མ་ནི་རྡོ་འབུམ།༽ལ་ངས་ལན་མང་ལྟ་མྱོང་། ལྟད་མོ་འདིར་དབྱིན་ཡིག་གི་འགྲེལ་བརྗོད་ (subtitles) མེད་པ་དང་ཨམ་སྐད་དེ་ཙམ་མ་གོ་ནའང་། ལྟད་མོ་དེས་ངའི་ཡིད་དབང་འཕྲོག རྒྱུ་མཚན་ནི་གློག་བརྙན་དེའི་ནང་གི་འཇིག་རྟེན་དཀྱུས་མ་དང་མི་སྣ་དེ་ཚོའི་འཚོ་བའི་གར་སྟབས་དལ་མོ་ལ། རྩོམ་པ་པོ་ཁོ་རང་གི་དྲན་ཤེས་ཀྱི་བརྩེ་དུང་དྲོན་མོ་ཞིག་འགོས་ཡོད་པའི་ཕྱིར། ད་དུང་ལྟད་མོ་དེར་བྲོ་བ་མྱོང་རྒྱུ་གཞན་ཞིག་ཡོད་པ་ནི། གློག་བརྙན་སྒྱུ་རྩལ་གྱི་ཐུན་མོང་མ་ཡིན་པའི་ཁྱད་ཆོས་ཏེ། “དུས་ཚོད་འགྲོ་བཞུད་”ཀྱི་ཚོར་བ་དེ་རེད།
དེ་ནས་ང་ཚོ་༼ཁྱི་རྒན།༽ལ་ཡོང་། འདི་ནི་ངས་ཁོང་གི་བརྩམས་ཆོས་རྩེ་ཕུད་ཅིག་ལ་ངོས་འཛིན་བྱེད་ཀྱི་ཡོད། ལྟད་མོ་དེའི་ཁྱད་ཆོས་ནི། ཁ་གསལ་ལ་གོ་བདེ་བའི་རྩོམ་གཞི་དང་མཚོན་དོན་གྱི་གཏིང་ཞིག་ཡོད་པའི་ནང་དོན་ལ་ཐུག་ཡོད་སེམས། བརྩམས་ཆོས་དེའི་ནང་གི་འགལ་ཟླ་གཙོ་བོ་དེ་སྔ་ས་ནས་གཏན་ལ་ཕབ་སྟེ། རིམ་གྱིས་འགལ་ཟླའི་ཤུགས་ཇེ་ཆེར་སོང་བ་དང་། མཐའ་མའི་འཇུག་སྡོམ་དེ་ནི་གློ་སྙིང་འགུལ་བར་བྱེད་པའི་སྐྱོ་གར་དང་ཡ་ང་བའི་ཉམས་ཤིག་སྦྱིན་པ། ཆེས་འུ་ཐུག་པའི་བྱ་སྤྱོད་དེ་ལ་རྒྱ་ཆེ་ས་ནས་བོད་མིའི་ལས་དབང་གི་ཐོག་ནས་འགྲེལ་བརྗོད་བྱེད་ས་ཞིག་ཀྱང་ཡོད་པ་ལོས་ཡིན།
༼ཐར་ལོ།༽ དང་༼ལག་དམར།༽ ༼དབུགས་སྒང་།༽ སོགས་ནི་པད་ཚེའི་གློག་བརྙན་ཕྱི་མ་དག་རེད། དེ་དག་གི་གཏམ་རྒྱུད་དང་ལྟ་གྲུབ། འཇིག་རྟེན་དང་མི་སྣ་སོགས་ནི། ཁོང་གི་ཐོག་མའི་གློག་བརྙན་གཉིས་ལས་ཧེ་བག་ཤིན་ཏུ་ནས་ཆེ། ཐར་ལོ་དང་དབུགས་སྒང་གཉིས་ལ་མཐུན་པའི་ཆ་ཞིག་ཡོད་པ་ནི། ལྟད་མོ་དེ་གཉིས་ཀའི་ནང་དུ་ཐད་ཀར་མངོན་རྒྱུ་མེད་པའི་ཤུགས་ནས་གྲུབ་པའི་དགྲ་ཡ་ཞིག་ཡོད་པ་དེ་ནི་སྲིད་གཞུང་གི་གནོན་ཤུགས་རེད། སྤྱིར་པད་ཚེའི་ལྟད་མོའི་ནང་གི་མི་སྣ་ཕལ་ཆེ་བ་བོད་པ་རྐྱང་ལས་རྒྱ་མི་ཧ་ལམ་མེད་པ་འདྲ། འོན་ཀྱང་རྒྱ་ཡི་དབང་བསྒྱུར་དང་སྲིད་བྱུས། དེས་འཁྱེར་ཡོང་བའི་འཛུགས་བསྐྲུན་དང་ཁྱབ་བསྒྲགས། དེང་རབས་དང་ཚོང་རྭ་སོགས་ནི་པད་ཚེའི་ལྟད་མོ་དག་གི་ནང་དུ་ལྗོན་ཤིང་གི་རྩ་བ་ས་འོག་ཏུ་གང་སར་ཁྱབ་པ་བཞིན་དུ་མཆིས། ལུག་རྫི་ཐར་ལོ་དང་དབུགས་སྒང་གི་སྒྲོལ་དཀར་ནི་བཙན་ལྕག་གིས་བསྐུལ་བའི་དུས་ཀྱི་འཕོ་འགྱུར་དང་སྲོལ་རྒྱུན་གཉིས་ཀྱི་བར་མཚམས་ན་ལུས་པའི་ཉམ་ཐག་པའི་སྐྱེ་བོ་གཉིས་རེད།
ད་དུང་པད་ཚེའི་གློག་བརྙན་རྗེས་མ་དེ་ཚོའི་ནང་། ཐུན་མོང་གི་གསལ་ཡོང་བའི་སྙིང་དོན་ཞིག་ནི། དེང་རབས་དང་སྲོལ་རྒྱུན་གཉིས་ཀྱི་བར་དོར་གནས་པའི་ཡ་ང་བའི་འཇིག་རྟེན་དེ་རེད། དེའི་ནང་གི་མི་སྣ་དག་གི་བྱ་སྤྱོད་དང་ཁོ་ཚོ་མཐའ་མ་སྡུག་ལ་ལྷུང་བ་སོགས་ནི་པད་ཚེའི་ཡིད་མུག་གི་མཐོང་ཚུལ་ཞིག་རེད། དེ་ནི་ཁོང་སྒེར་གྱི་བདེན་པ་རེད་ལ། དེས་དངོས་ཡོད་བོད་མི་སྤྱིའི་འཚོ་བའམ། བསམ་བློ་ཡང་ན་མངོན་འདོད་མཚོན་ཐུབ་ཀྱི་ཡོད་མེད་སོགས་ནི་སྐབས་བབ་ཀྱི་དོན་གནད་ལས་བྱོལ་བའི་དྲི་བ་འགའ་ཞིག་ལས་མ་འདས། འོན་ཀྱང་ཁོང་གི་གློག་བརྙན་མཐའ་མ་དབུགས་སྒང་གི་མཐའ་མའི་བརྙན་ཚན་ལ་ཞིབ་ལྟ་ཐེངས་ཤིག་བྱེད་ན། དབུགས་སྒང་དམར་པོ་གཉིས་དགུང་ཨ་སྔོན་དུ་ཡར་སོང་བ་དེ་ཡིས། མུན་ནག་གི་སྒྲུང་གཏམ་དེར་ངོ་མཚར་ཅན་གྱི་འོད་ཟེར་ཞིག་འཚེར། དེ་ནི་སྒྱུ་འཕྲུལ་དངོས་ཡོད་རིང་ལུགས་ (magical realism) ཀྱི་ཆ་ཞིག་ཡིན་སྲིད་པས། ཁོང་གི་ལྟད་མོའི་བརྒྱུད་རིམ་ནང་གི་དཀྱོགས་མཚམས་གསར་པ་ཞིག་རེད་ཅེས་ཚིག་གི་བརྡར་ཤ་གཅོད་ཐུབ་པའི་ཐབས་ནི་བྲལ།
ད་ནི་ཁོང་གི་གློག་བརྙན་དག་གི་རྣམ་པའི་ཐོག་ནས་དཔྱད་ན། གསལ་བོར་མངོན་ཐུབ་པ་ནི་བརྙན་ལེན་གི་རྒྱང་ཚད་(camera distance) དང་སྒྲིག་སྦྱོར་ (editing) གྱི་མྱུར་ཚད་གཉིས་རེད། ཁོང་གི་བརྙན་ལེན་སྟངས་ནས་བརྙན་མིག་དང་མི་སྣ་དག་གི་དབར་ལ་རྒྱུན་དུ་ནས་བར་ཐག་ཅིག་བཞག་ཡོད་པ་དང་དེས་ང་ཚོས་ཁོང་རྣམས་ལ་བར་ཐག་ངེས་ཅན་ཞིག་ནས་ལྟ་ཡི་ཡོད་པའི་ཚོར་བ་ཞིག་སྟེར་བ་མ་ཟད། མི་སྣ་དེ་ཚོའི་སྐད་ཆ་ཉུང་ལ་ཅུང་ཟད་ལྐོག་འགྱུར་ཅན་གྱི་གཤིས་ཀ་དང་མཐུན་པའང་ཡིན། པད་ཚེས་རྒྱུན་དུ་ཁོང་ཚོའི་སེམས་ཁམས་ལ་ཞིབ་ལྟའང་མི་བྱེད། གཅིག་བྱས་ན་དེའི་རྒྱུ་མཚན་ནི་ཁ་ཡོད་ལག་ཡོད་ཀྱི་དཀའ་ངལ་ཞིག་སྟེ། བོད་ལ་གློག་བརྙན་གྱི་ཆེད་ལས་འཁྲབ་སྟོན་པ་དེ་ཙམ་མེད་པའི་རྐྱེན་གྱིས་ཡིན་སྲི། གང་ཡིན་ཞེ་ན། བརྙན་ལེན་ཉེ་བོའམ་ཆེས་ཉེ་བོ་ནས་བྱེད་པ་ཡིན་ན་འཁྲབ་སྟོན་པའི་ངོ་གདོང་གི་རྣམ་འགྱུར་དང་ཚོར་བ་ཕྲ་མོ་ནས་ཕྲ་མོའི་ཉམས་ཞིག་སྟོན་ཐུབ་པ་དགོས།
གཉིས་པ་འཁྲབ་ཚན་སྒྲིག་སྦྱོར་ལ་དལ་པོའི་ཉམས་ཞིག་ཡོད། སྤྱིར་ཚོང་ལས་གློག་བརྙན་ལ་གོམས་ཆ་ཡོད་མཁན་ཞིག་གིས་བལྟས་ན། པད་ཚེའི་ལྟད་མོའི་འགྲོས་དེ་དལ་པོ་ཡོད་པ་དང་དེའི་དབང་གིས་ཉོབ་སྣང་གི་ཚོར་བ་ཞིག་ཀྱང་ཡོང་སྲིད་མོད། འོན་ཀྱང་དེའི་རྒྱབ་ལ་ལྟ་གྲུབ་ངེས་ཅན་ཞིག་ཡོད་པ་ང་ཚོས་ཧ་གོ་དགོས། བཤད་སྲོལ་ལ་ “སྒྲིག་སྦྱོར་གྱི་རིམ་པའི་སྐབས་ལྟད་མོ་དེ་གསར་དུ་རྩོམ་པ་དང་འདྲ་”ཞེས་པ་དོན་གནད་ཡིན། ཚོང་ལས་གློག་བརྙན་དང་འབྲེལ་བའི་སྒྲིག་སྦྱོར་གྱི་མྱུར་ཚད་དང་འགྲོས་ཀྱི་དམིགས་ཡུལ་གཙོ་བོ་ནི་ཨ་མས་བྱིས་པར་ཁ་ནང་ལ་ཁ་ལག་སྤྲད་པའམ་ཡང་ན་ནོར་གཡག་གི་སྣ་ལ་ཨ་ལོང་བརྒྱབ་ནས་འཁྲིད་པ་དང་གཅིག་མཚུངས་ཡིན། དེས་ལྟ་མཁན་ཚོར་སོ་སོའི་ཚོར་བ་དང་རྣམ་དཔྱོད་ཞེ་དྲགས་འགུལ་མ་དགོས་པར་གློག་བརྙན་གྱི་ཡུལ་རང་ནས་ཟ་ཆོག་ཆོག་དང་རོ་མྱོང་བྱེད་ཆོག་ཆོག་ཅིག་བཟོས་པ་དེ་རེད། དེ་ལས་ལྡོག་སྟེ་པད་ཚེའི་ལྟད་མོས་ལྟ་མཁན་པ་རང་ངོས་ནས་དབང་རིག་ཟུང་འབྲེལ་གྱི་ཐོག་ནས་ལྟད་མོ་དེའི་རོ་མྱོང་ལ་འཇུག་དགོས་པའི་མགྲོན་བརྡ་གཏོང་། བརྩམས་ཆོས་རང་ངོས་ནས་བུམ་པ་གང་བྱོའི་ཚུལ་ལྟ་བུའི་འགྲེལ་བཤད་ཆ་ཚང་མ་རྒྱག་པར་དཔེར་ན། ༼ཁྱི་རྒན་༽ནང་ཕ་རྒན་དེས་ཁྱི་རྒན་མི་བཙོང་ཟེར་བའི་ཐག་གཅོད་དང་མཐའ་མར་རང་གི་ལག་པས་ཁྱི་དེའི་སྐེ་བསྡམས་ནས་མ་གསོད་པའི་བར་དུ་བརྙན་གྱི་རིང་ཚད་ནི་སྐར་མ་དྲུག་ཙམ་དང་འཁྲབ་ཚན་གྱི་གྲངས་(number of shots) ནི་དྲུག་རེད། དེའི་རིང་ཕ་རྒན་དེས་དུ་བ་འཐེན་ནས་འདང་ཞིག་བརྒྱབ་པ་མ་གཏོགས་མི་སྣ་གསར་པ་སུ་ཡང་མི་ཡོང་ལ་སྐད་ཆའང་ཚིག་གཅིག་མེད། སྤྱིར་དེང་དུས་རྒྱལ་སྤྱིའི་གློག་བརྙན་ནང་གི་འཁྲབ་ཚན་གཅིག་གི་ཆ་སྙོམ་དུས་ཡུན་ནི་སྐར་ཆ་བཞི་ཙམ་རེད། འོ་ན་པད་ཚེས་གོང་གི་འཁྲབ་ཚན་རེ་ལ་སྐར་ཆ་དྲུག་ཅུ་ཙམ་སྤྲད་དགོས་དོན་ཅི་ཡིན། ངས་བསམ་ན་དེ་ནི་ལྟད་མོ་ལྟ་མཁན་ལ་བརྩམས་ཆོས་ཀྱི་གོ་བ་དང་རོ་མྱོང་ཟབ་བ་ཞིག་དང་ལྟད་མོའི་ནང་གི་འཇིག་རྟེན་དེའི་དུས་ཡུན་གྱི་ཚོར་བ་རྣོ་བར་ཡོང་ཆེད་དུ་ཡིན། གོང་སྨྲོས་ཀྱི་སྐར་མ་དྲུག་རིང་ལ་ཕ་རྒན་དེ་ལ་ལྟ་དུས་གཅིག་བྱས་ན་ཁོང་གི་སེམས་ནང་ལ་ནམ་ཞིག་ཡ་ང་བའི་ཐག་གཅོད་དེ་འཆར་བ་ནང་བཞིན་ང་ཚོའི་སེམས་ལའང་དེ་ལྟར་འཆར་སྲིད། དེ་དུས་ལྟ་མཁན་ང་ཚོ་ལྟད་མོའི་འཇིག་རྟེན་དེའི་ནང་དུ་ཡོངས་སུ་རྫོགས་པ་ཐིམ་ཚར་བ་ཡིན།
སྒྲིག་སྦྱོར་ཉུང་ངུ་དང་འཁྲབ་ཚན་རིང་མོའི་ (long take) ཁྱད་ཆོས་གཞན་ཞིག་ནི། དང་ཐོག་མངོན་གསལ་མེད་པའི་གནད་དོན་དེ་རིམ་གྱིས་གསལ་སྟོན་བྱ་རྒྱུ་དེ་རེད། འདི་ནི་ཁོང་གི་ལྟད་མོའི་བརྙན་ལེན་གྱི་ཁྱད་ཆོས་ཙམ་མ་ཟད་ནང་དོན་ལས་ཀྱང་གྲུབ་ཐུབ། དཔེར་ན་ཁྱི་རྒན་དང་དབུགས་སྒང་ལ་དཔེ་བླངས་ནས་བལྟས་ན། དང་ཐོག་ཁྱི་རྒན་གྱི་མི་སྣ་གཙོ་བོ་མགོན་པོ་དང་དབུགས་སྒང་གི་དར་རྒྱས་གཉིས་ཡིན་པ་འདྲ་ནའང་རྗེས་མར་ཕ་རྒན་དང་མནའ་མ་སྒྲོལ་དཀར་ཡིན་པ་ལྟ་མཁན་ཚོའི་བློ་ངོར་ལ་ག་ལེར་འཆར་ཡོང་།
འདི་ལྟར་པད་ཚེའི་གློག་བརྙན་དག་ལ་རྣམ་པ་དང་ནང་དོན་ཟུང་འབྲེལ་གྱི་ཐོག་ནས་བོད་ནང་གི་བོད་ཀྱི་སྒྱུ་རྩལ་བ་ཞིག་གི་རང་གི་སྒྱུ་སྩལ་དང་མཛེས་རྩལ། མི་ཚེའི་ལྟ་གྲུབ་སོགས་ལྷམ་མེར་གསལ་ཡོད། མདོར་ན་བརྙན་ཡོལ་སྟེང་གི་གཟུགས་བརྙན་དེ་ལ་བོད་པ་ལྟ་མཁན་པ་ཞིག་གིས་རང་ངོ་ཤེས་པའམ་རང་སེམས་གཏིང་གི་དགའ་སྐྱོ་ལ་ངོ་འཕྲོད་ཐུབ་ཚེ། ད་གཟོད་བོད་པའི་གློག་བརྙན་གྱི་སྒྱུ་རྩལ་དོན་གོ་ཚང་ཡོད། དེ་དང་མཉམ་དུ་དེ་འདྲའི་བརྩམས་ཆོས་ཤིག་ལ་སྤྱི་མཚན་གྱི་རིན་ཐང་ངམ་བྲོ་བ་ཞིག་ངང་གིས་སྟེར། དུས་དེ་ནས་འཛམ་གླིང་གློག་བརྙན་གྱི་དོ་ར་ཡངས་མོར་མཚན་སྙན་འབར་བའི་ལྟད་མོ་དེ་དག་གི་ཁྲོད་ན། བོད་ཀྱི་གོམ་པ་དང་པོ་དེ་སྤོས་འགོ་འཛུགས་པ་ཡིན། བློ་འཆར་འདི་འདྲ་ཞིག་གི་གསེང་ནས་ངས་པདྨ་ཚེ་བརྟན་ཁོང་གིས་བཞག་པའི་རིན་ཐང་དྲན་བཞིན་ཡོད།
