༧གོང་ས་མཆོག་གིས་ཀར་ན་ཊ་ཀ་གཞུང་མང་གཉིས་ནས་ལྷག་བསམ་རྣམ་དག་གིས་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། སྤྱི་ཁྱབ་བློན་ཆེན་གསར་བའི་ལས་དོན་ལམ་ལྷོངས་ཡོང་བའི་ཐུགས་སྨོན་བསྩལ་འདུག
དེ་རིང་ཉིན་རྒྱབ་༧གོང་ས་རྒྱལ་བ་རིན་པོ་ཆེ་མཆོག་གིས། རྒྱ་གར་ལྷོ་ཕྱོགས་མངའ་སྡེ་ཀར་ན་ཊ་ཀའི་སྤྱི་ཁྱབ་བློན་ཆེན་གསར་པ་སྐུ་ཞབས་སི་དྷ་རཱ་མི་ཡ་ལགས་སུ་འོས་བསྡུའི་ཁྲོད་རྒྱལ་ཁ་ཐོབ་པར་འཚམས་འདྲིའི་གསུང་འཕྲིན་བསྩལ་གནང་འདུག་པ་དང་། འཚམས་འཕྲིན་གྱི་ནང་། འདི་ལོའི་ཕྱི་ཟླ་བཞི་བ་ནི་ང་ཚོ་བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་དྲུག་ཅུ་ཕྱིན་པའི་དུས་དྲན་ཡིན་པ་དྲན་གསོ་གནང་བ་དང་སྦྲགས། ཕྱི་ལོ་ ༡༩༥༩ ལོར་བོད་མི་རྣམས་ལ་རྒྱ་གར་ནང་གནས་སྡོད་བྱེད་ཡུལ་ཞིག་འཚོལ་བཞིན་པའི་སྐབས་དེར། སྲིད་བློན་ནེ་རུ་མཆོག་གིས་རྒྱ་གར་གྱི་མངའ་སྡེ་འདྲ་མིན་གྱི་བློན་ཆེན་རྣམས་ནས་བོད་མི་རྣམས་ལ་སྡོད་གནས་མཁོ་སྤྲོད་གནང་བའི་འབོད་སྐུལ་ཞུས་སྐབས། ཀར་ན་ཊ་ཀའི་མངའ་སྡེའི་སྤྱི་ཁྱབ་བློན་ཆེན་ (S. Nijalingappa) གྱིས་སྦྱིན་སྤོབས་ཆེ་ཤོས་ཀྱི་བརྡ་ལན་བཏང་ཡོད་པ་རེད་ལ། དོན་དངོས་ཐོག་ཕྱི་ལོ་ ༡༩༥༦ ལོར་ངོས་རང་རྒྱ་གར་ནང་ཡོང་སྐབས། ཁོང་དང་ཐུག་འཕྲད་བྱ་རྒྱུ་བྱུང་བ་མ་ཟད། སྐབས་དེའི་ཐུག་འཕྲད་ཀྱི་དྲན་པ་གསལ་བོ་ཞེ་དྲགས་ཡོད།
ཁྱེད་ཀྱིས་མཁྱེན་གསལ་ལྟར། ཕྱི་ལོ་ ༡༩༦༠ ནང་ཀར་ན་ཊ་ཀའི་ནང་བོད་མི་ཁྱོན་སུམ་ཁྲི་ལྷག་གིས་གནས་སྡོད་བཅས་ཏེ་རྒྱ་གར་ནང་གི་བོད་མིའི་མི་འབོར་མང་ཤོས་ཆགས་པ་རེད། ངོས་ལ་མཚོན་ན་ཀར་ན་ཊ་ཀའི་མངའ་སྡེ་བཀའ་དྲིན་ཆེན་པོ་ཡིན། ཕྱི་ལོ་ ༢༠༡༨ ལོར་བྷན་གྷ་ལོའུ་རུ་དམིགས་བསལ་ཚོགས་ཆེན་ཞིག་གི་སྟེང་ངོས་ལ་ཀར་ན་ཊ་ཀའི་གཞུང་མང་གཉིས་ནས་བོད་མི་རྣམས་ལ་གྲོགས་འདྲིས་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་བྱུང་།
ཀར་ན་ཊ་ཀ་མངའ་གཞུང་གིས་བོད་མིའི་གཞིས་ཆགས་ལྔ་གསར་སྐྲུན་བྱེད་དུ་བཅུག་པའི་ཐོག ང་ཚོའི་ནང་པའི་དགོན་སྡེ་ཆེ་ཤོས་ཀྱི་གྲལ་མང་པོ་ཞིག་བསྐྱར་གསོ་བྱེད་དུ་བཅུག་པར་དགའ་སྤོབས་བྱུང་། དགོན་སྡེ་དེ་དག་ནང་དཔལ་ནཱ་ལནྡཱའི་རིག་གཞུང་གཞིར་བཞག་སྟེ་ནང་སེམས་ཀྱི་ཞི་བདེ་བསྐྲུན་ཐབས་སོགས་རྒྱ་གར་གྱི་གནའ་བོའི་ཤེས་རིག་ད་ལྟའང་སློབ་གཉེར་བྱས་དང་བྱེད་མུས་ཡིན། དེར་བརྟེན། ཀར་ན་ཊ་ཀའི་གཞུང་མང་གིས་བོད་མི་རྣམས་ལ་དཀའ་ཁག་ཆེ་བའི་དུས་སྐབས་འདིར་རྒྱབ་སྐྱོར་ལྷད་མེད་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། མཇུག་ཏུ། སྤྱི་ཁྱབ་བློན་ཆེན་གསར་པ་མཆོག་གི་འབྱུང་འགྱུར་ལས་དོན་ལམ་ལྷོངས་དང་ཀར་ན་ཊ་ཀའི་མི་མང་གི་རེ་འདོད་སྐོང་ཐུབ་པའི་ཐུགས་སྨོན་བཅས་བསྩལ་འདུག
དེ་རིང་སྐུ་ཞབས་སི་དྷ་རཱ་མི་ཡ་ལགས་ཀྱིས་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་གསར་བའི་ལས་འཁུར་གྱི་དམ་འབུལ་ཞུས་ཡོད་པ་དང་། ཟླ་འདིའི་ཕྱི་ཚེས་ ༡༤ ཉིན་ཀར་ན་ཊ་ཀའི་ནང་ཁ་གཏད་སྲིད་དོན་ཚོགས་པ་བྷི་ཇི་པི་དང་རྒྱལ་ཡོངས་མང་གཙོ་ཚོགས་པ་གཉིས་ཀྱི་གཙོས་སྲིད་དོན་ཚོགས་པ་ཁག་ཅིག་གི་བར་འོས་བསྡུ་བྱས་ཏེ། རྒྱལ་ཡོངས་མང་གཙོ་ཚོགས་པར་འོས་བསྡུའི་རྒྱལ་ཁ་ཐོབ་པར་བརྟེན། ད་རེས་ཁོང་ཀར་ན་ཊ་ཀའི་མངའ་སྡེ་སྤྱི་ཁྱབ་བློན་ཆེན་དུ་བདམས་ཐོན་བྱུང་བ་ཐེངས་གཉིས་པ་ཆགས་ཀྱི་ཡོད་ཅིང་། ཕྱི་ལོ་ ༢༠༡༣ ནས་ ༢༠༡༨ བར་ཀར་ན་ཊ་ཀའི་སྤྱི་ཁྱབ་བློན་ཆེན་དུ་ཐོག་མར་བསྡད། སྐུ་ཞབས་སི་དྷ་རཱ་མི་ཡ་ལགས་ནི་སྤྱི་ཚོགས་རིང་ལུགས་དང་ཆོས་ལུགས་རིས་མེད་ཀྱི་རིང་ལུགས་གཙོ་འཛིན་བྱེད་མཁན་ཞིག་ཡིན་པའི་ཁར། ཁོང་ལ་འོས་བསྡུའི་རྒྱལ་ཁ་ཐོབ་པ་དེས་རྒྱ་གར་ནང་བྷི་ཇི་པི་སྲིད་དོན་ཚོགས་པའི་དབང་སྒྱུར་འོག སྒོ་བརྒྱབ་ཟིན་པ་ལྟ་བུའི་རྒྱ་གར་གྱི་ཆབ་སྲིད་ལམ་ལུགས་ལ་སྒོ་མོ་གསར་པ་ཞིག་ཕྱེ་རྒྱུ་ཡིན་པའི་ཚོད་དཔག་བྱེད་བཞིན་འདུག
གསར་འགོད་པ། སྐལ་བཟང་སྦྱིན་པ།
