བོད་ཀྱི་ལོ་རྒྱུས་འཁྱོག་བཤད་བྱེད་བཞིན་པ་དེ་དངོས་ཡོད་ཅན་དུ་འགྱུར་ཉེན་ཡོད།

དྲང་བདེན་མིན་པའི་ལོ་རྒྱུས་དེ་དག་ཆབ་སྲིད་ཀྱི་དགོས་མཁོའི་དབང་གིས་བཀོལ་སྤྱོད་བྱས་ཚེ་དེ་ནི་དངོས་ཡོད་ཀྱི་ལོ་རྒྱུས་བཞིན་གལ་ཆེན་ཞིག་ཏུ་འགྱུར་ཉེན་ཡོད་སྐོར་བརྗོད་སོང་།

དེ་རིང་དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་གོ་སྒྲིག་འོག ཕྱི་དྲིལ་ལྷག་པ་ཚེ་རིང་ཚོགས་ཁང་དུ་རྒྱ་གར་གྱི་འབུམ་རམས་པ་སྐུ་ཞབས་ཇཱ་བྷིན་ཐོ་མ་སི་ (Dr Jabin thomas Jacob) ལགས་ཀྱིས་རྒྱ་ནག་གཞུང་གི་རྒྱལ་སྤྱི་དང་རྒྱལ་ནང་གི་བྱེད་སྒོ་ ( China’s  International Domestic affairs) ཞེས་པའི་བརྗོད་གཞིའི་ཐོག་གཏམ་བཤད་གནང་ཡོད་ཅིང་། ཚོགས་འདུ་དེའི་ཐོག་དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། དེ་བཞིན་བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་སོགས་ཀྱིས་ཀྱང་མཉམ་ཞུགས་གནང་འདུག

སྐབས་དེར་འབུམ་རམས་པ་སྐུ་ཞབས་ཇཱ་བྷིན་ཐོ་མ་སི་ལགས་ཀྱིས།  ཕྱི་ལོ་ ༡༩༦༢ ལོའི་རྒྱ་དཀར་ནག་གི་དམག་འཁྲུག་རྐྱེན་གྱིས་རྒྱ་དཀར་ནག་གཉིས་གཙོས་ཨེ་ཤ་ཡའི་རྒྱལ་སྤྱིའི་ཆབ་སྲིད་སྣེ་འཁྲིད་ཀྱིན་པའི་ལེའུ་དེ་མཇུག་བསྒྲིལ་ཡོད་ཅིང་། རྒྱ་གར་ལ་ཆ་མཚོན་ན། དུས་དེ་ནས་བཟུང་རྒྱ་ནག་ཕྱི་གསལ་ནང་གསལ་གྱིས་རྟོགས་ཐུབ་ཡོད། དེང་གི་ཆར་རྒྱ་ནག་གཞུང་དེ་རྒྱལ་ཁབ་རང་ག་བ་ཞིག་མིན་ལ། རྒྱ་ནག་གིས་རྒྱལ་ཁབ་གཞན་ལ་བཟུང་བའི་ཚོང་འབྲེལ་ལའང་དམིགས་འབེན་ངེས་ཅན་ཞིག་ཡོད་པའི་ཁར། རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་ཁག་ལ་རྩིས་སྲུང་བྱེད་ཀྱི་མེད་སྐོར་དང་། སྤྱིར་མི་མང་པོ་ཞིག་གིས་རྒྱ་ནག་ནི་མགོ་ཁྲིད་སོགས་ཡོད་པའི་རྒྱལ་ཁབ་རང་ག་བ་ཞིག་ཏུ་ངོས་འཛིན་བྱེད་ཀྱིན་ཡོད་ཀྱང་། རྒྱ་ནག་ནི་ཆབ་སྲིད་ཚོགས་པ་གཅིག་གིས་དབང་བསྒྱུར་འོག་གི་རྒྱལ་ཁབ་ཅིག་ཡིན་པས། རྒྱ་ནག་དེ་རྒྱལ་ཁབ་རང་ག་བ་ཞིག་ཡིན་པའི་འདུ་ཤེས་དེ་དོར་ཐབས་བྱ་དགོས་པ་མ་ཟད། རྒྱལ་ཁབ་མང་པོ་ཞིག་གི་ཆབ་སྲིད་ཚོགས་པ་མང་དག་ཅིག་ལོ་ནས་ལོ་རེར་བརྗེས་དང་བརྗེ་མུས་ཡིན་ཡང་། རྒྱ་ནག་དམར་ཤོག་གཞུང་གིས་ཆབ་སྲིད་ཀྱི་དབང་ཆ་གཅིག་སྡུད་བྱེད་ཀྱི་ཡོད་པ་ལས།   རྒྱ་ནག་གཞུང་དམངས་གཉིས་སུ་དམིགས་བསལ་གྱི་སེམས་ཁུར་དང་གཞོགས་འདེགས་གང་ཡང་བྱེད་ཀྱི་མེད་པར། དམར་ཤོག་ཚོགས་པའི་དབང་ཆ་དང་གོ་གནས་སྲ་བརྟན་གཙོ་བོར་འཛིན་གྱི་ཡོད་པས། རྒྱལ་ཁབ་གཞན་གྱི་ལམ་ལུགས་དང་། ལངས་ཕྱོགས། དམིགས་འབེན་སོགས་དང་མི་འདྲ་སྐོར་སོགས་བརྗོད་སོང་།

ཁོང་གིས། རྒྱ་ནག་གཞུང་གིས་རྒྱུད་གཅིག་ལམ་གཅིག་དང་དཔལ་འབྱོར་སོགས་ཀྱི་ཐད་ནས་རྒྱལ་ཁ་ཤུགས་ཆེན་བླངས་ཡོད་པས། རྒྱ་ནག་གིས་འཛམ་གླིང་འཕེལ་རྒྱས་ཀྱི་གནད་དོན་དེ་དག་སྣང་མེད་ལ་འཇོག་གི་ཡོད་ཀྱང་། རྒྱ་གར་གཙོས་རྒྱ་ནག་གི་ཁ་གཏད་དུ་ལང་མུས་ཡིན་པའི་རྒྱལ་ཁབ་དག་གིས་རྒྱ་ནག་གི་དར་རྒུད་ཀྱི་གནད་དོན་དེ་དག་ཤེས་རྒྱུ་ཧ་ཅང་གལ་ཆེན་ཡིན་སྐོར་དང་། ཉེ་ལམ་རྒྱལ་ཁབ་གཞན་དུ་ཡོད་པའི་རྒྱ་ནག་དམར་ཤོག་འཐུས་མི་ཁག་གིས་ཀྱང་། རྒྱ་ནག་གི་ལྟ་བ་དང་ལངས་ཕྱོགས་ལ་ངོ་རྒོལ་བྱེད་མཁན་གྱི་རྒྱལ་ཁབ་དག་གི་མི་མང་དང་སྒྲིག་འཛུགས་ཁག་ལ་འཇིགས་སྐུལ་དང་ཉེན་བརྡ་གཏོང་གིན་ཡོད་ཅིང་། དེ་ནི་མགོ་ཁྲིད་དང་འཐུས་མི་དེ་དག་གིས་རྒྱ་ནག་དམར་ཤོག་རིང་ལུགས་ཀྱི་ཁ་ཕྱོགས་དང་བསྟུན་ནས་ལས་དོན་གཉེར་གྱིན་ཡོད་པ་ལས། རྒྱ་ནག་གི་མི་མང་དང་རྒྱལ་ཁབ་ཀྱི་ཆེད་དུ་གཉེར་བའི་ལས་དོན་ཞིག་གཏན་ནས་མིན་སྐོར། དེ་བཞིན་རྒྱ་ནག་དམར་ཤོག་རིང་ལུགས་ཀྱིས་རྒྱ་ནག་ནང་དུ་རིག་གནས་གསར་བརྗེ་ཡི་ལས་འགུལ་སྤེལ་སྐབས། རྒྱ་ནག་གཞུང་གིས་རྒྱ་ནག་གི་གནའ་བོའི་ཤེས་རིག་དང་རིག་གནས་མང་དག་ཅིག་རྩ་མེད་དུ་བཏང་ཡོད་ཀྱང་། དེང་སྐབས་རྒྱ་ནག་གཞུང་གིས་གྲངས་ཉུང་མི་རིགས་ཚུད་པའི་མི་རིགས་མང་པོ་ཞིག་རྒྱ་ནག་གི་མངའ་ཁོངས་ཡིན་པའི་དྲང་བདེན་མེད་པའི་ལོ་རྒྱུས་མང་དག་ཅིག་བྲིས་ཡོད་སྐོར་སོགས་བརྗོད་སོང་།

ཡང་ཁོང་གིས། བོད་ལ་རིག་གཞུང་དང་ལོ་རྒྱུས་སོགས་ཡོད་ཀྱང་། རྒྱ་ནག་གཞུང་གིས་བོད་དེ་རྒྱ་ནག་གཞུང་གི་ཁྱབ་ཁོངས་ཡིན་པའི་དྲང་ཚུགས་མེད་པའི་ལོ་རྒྱུས་མང་དག་བྲིས་ཡོད་ཅིང་། དྲང་བདེན་མེད་པའི་ལོ་རྒྱུས་དེ་དག་གི་ཁྲོད་ནས་རྒྱ་ནག་གཞུང་གིས་བོད་མིའི་མཆེད་ཁུངས་སོགས་ཀྱི་ཐད་འཁྱོག་བཤད་མང་དག་ཅིག་བྱེད་ཀྱི་ཡོད་པས། བོད་མི་ཚོས་རྒྱ་ནག་གཞུང་གིས་འཁྱོག་བཤད་བྱེད་མུས་ཡིན་པའི་ལོ་རྒྱུས་དེ་དག་སྣང་མེད་དུ་མི་འཇོག་པར། དེའི་ཐད་གླེང་སློང་དང་དོ་སྣང་བྱ་དགོས་ཏེ། དྲང་བདེན་མིན་པའི་ལོ་རྒྱུས་དེ་དག་ཆབ་སྲིད་ཀྱི་དགོས་མཁོའི་དབང་གིས་བཀོལ་སྤྱོད་བྱས་ཚེ། དེ་ནི་དངོས་ཡོད་ཀྱི་ལོ་རྒྱུས་བཞིན་གལ་ཆེན་ཞིག་ཏུ་གྱུར་ཡོད་ལ། མཚམས་རེར་སྤྱི་ཚོགས་ཀྱིས་དྲང་བདེན་མིན་པའི་ལོ་རྒྱུས་ལ་ངོས་འཛིན་དང་དང་ལེན་བྱེད་ཀྱི་ཡོད། དཔེར་ན། ད་ལྟ་མི་མང་དག་ཅིག་གིས་བོད་དེ་རྒྱ་ནག་གི་ཆ་ཤས་ཡིན་པར་ངོས་འཛིན་བྱེད་ཀྱི་ཡོད་པ་དང་། རྒྱ་ནག་གཞུང་གིས་རྒྱལ་ཁབ་མང་དག་ཅིག་གི་གཞུང་སྒེར་ཚོགས་པ་ཁག་ལ་བོད་དེ་རྒྱ་ནག་གཞུང་གི་ཆ་ཤས་ཡིན་པ་སྐུལ་མ་བྱེད་ཀྱི་ཡོད་སྐོར་སོགས་བརྗོད་སོང་།

གསར་འགོད་པ། དཔལ་ལྡན།