སྲིད་སྐྱོང་མཆོག་ནེའུ་ཛི་ལན་ཌི་དང་ཨོ་གླིང་དུ་གཞུང་འབྲེལ་ཕྱོགས་སྐྱོད་ཐོག་མར་ཕེབས།

སྲིད་སྐྱོང་མཆོག་གིས་ཨོ་གླིང་དང་ནེའུ་ཛི་ལན་ཌི་རྒྱལ་ཁབ་གཉིས་ཀྱི་གྲོས་ཚོགས་འཐུས་མི་དང་། བོད་དོན་རྒྱབ་སྐྱོར་ཚོགས་པ་ཁག་དང་མཇལ་འཕྲད་གནང་སྟེ་བོད་དོན་གླེང་སློང་གནང་རྒྱུ་ཡིན་འདུག

ཟླ་འདིའི་ཕྱི་ཚེས་ ༡༣ ནས་ཉིན་བཅུ་གསུམ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནེའུ་ཛི་ལན་ཌི་དང་ཨོ་གླིང་རྒྱལ་ཁབ་ནང་གཞུང་འབྲེལ་ཕྱོགས་སྐྱོད་དུ་ཕེབས་བཞིན་ཡོད་པ་ལྟར། དེ་རིང་སྔ་དྲོ་སྲིད་སྐྱོང་མཆོག་གིས་ནེའུ་ཛི་ལན་ཌིའི་གཞུང་འབྲེལ་རླུང་འཕྲིན་ཁང་དང་། ཉིན་རེའི་གསར་ཤོག་གཉིས་ཀྱི་བཅར་འདྲིའི་ལམ་རིམ་དུ་ཆ་ཤས་བཞེས་གནང་ཡོད་པ་དང་ཉིན་གུང་ནེའུ་ཛི་ལན་ཌི་གྲོང་ཁྱེར་ཨོ་ཁི་ལན་ཌི་རུ་རྟེན་གཞི་བྱས་པའི་དཔལ་སྤུངས་ཆོས་ཚོགས་སུ་ཕེབས་ཏེ། ཁུལ་དེར་གནས་སྡོད་བོད་མི་རྣམས་ལ་ཐུག་འཕྲད་དང་མང་ཚོགས་ལ་བཀའ་སློབ་གསུང་བཤད་བཅས་གནང་ཡོད་པ་རེད།

ཁ་སང་ཕྱི་ཚེས་ ༡༤ ཉིན་སྲིད་སྐྱོང་མཆོག་ནེའུ་ཛི་ལན་ཌིའི་ཨོ་ཁི་ལན་ཌི་ནང་ཕེབས་འབྱོར་བྱུང་ཡོད་ཅིང་། སྐབས་དེར་གནམ་ཐང་དུ་ཨོ་གླིང་དུ་སྐུ་ཚབ་དོན་གཅོད་ཀརྨ་སེང་གེ་ལགས་དང་ཨོ་ཁི་ལན་ཌི་བོད་རིགས་ཚོགས་པ་དང་། བོད་རྒྱ་མཛའ་འབྲེལ་ཚོགས་པ། ས་གནས་བོད་རིགས་མང་ཚོགས་བཅས་ནས་དགའ་བསུའི་སྣེ་ལེན་བྱས་ཡོད་འདུག་ལ། ཉིན་གཉིས་རིང་སྲིད་སྐྱོང་མཆོག་གིས་ཨོ་ཁི་ལན་ཌི་ཁུལ་གྱི་ས་གནས་བོད་རིགས་མང་ཚོགས་ལ་འཚམས་གཟིགས་གནང་རྒྱུ་ཡིན་པ་དང་། རྒྱ་རིགས་བོད་དོན་རྒྱབ་སྐྱོར་བ་ཁག་ཅིག་དང་མཇལ་འཕྲད་གནང་གྲུབ་མཚམས། ཕྱི་ཚེས་ ༡༦ ཉིན་ནེའུ་ཛི་ལན་ཌིའི་རྒྱལ་ས་ཝིལ་ལིན་ཌོན་(Wellington)དུ་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་ཁག་ཅིག་དང་མཇལ་འཕྲད་ཀྱིས་བོད་དོན་གླེང་སློང་གནང་རྒྱུ་ཡིན་འདུག

དེ་བཞིན་ཕྱི་ཚེས་ ༡༧ ཉིན་ཨོ་གླིང་སིན་ཌི་ནེ་ཁུལ་གྱི་ས་གནས་བོད་རིགས་མང་ཚོགས་དང་གཞོན་སྐྱེས་རྣམས་ལ་གཏམ་བཤད་དང་། ལྷོ་ཝེ་ལི་གསར་བའི་ཁུལ་གྱི་ཁྲིམས་བཟོ་ལྷན་ཚོགས་ཀྱི་ཚོགས་མི་དང་།  རྒྱ་རིགས་བོད་དོན་རྒྱབ་སྐྱོར་ཚོགས་པ་བཅས་མཇལ་འཕྲད་གནང་རྒྱུ་ཡིན་པ་མ་ཟད། སན་ཌི་ནེ་ཞོགས་པའི་གསར་ཁང་གི་བཅར་འདྲི་དང་། ཕྱི་ཚེས་ ༢༡ ཉིན་ཨོ་གླིང་གསར་འགོད་མཐུན་ཚོགས་ཀྱི་གོ་སྒྲིག་འོག སྲིད་སྐྱོང་མཆོག་ནས་བོད་རྒྱའི་དཀའ་རྙོག་སེལ་ཐབས་དང་ཞི་བདེ་ཡོང་ཐབས་ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུ་ཡིན་འདུག

ཉེ་ཆར་རྒྱ་གཞུང་གིས་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་ལས་རིམ་ཞིག་ཕྱིར་བསྡུ་བྱ་དགོས་པ་མ་ཟད། ཨོ་གླིང་ནང་ཁ་བྲལ་བའི་ལས་འགུལ་སྤེལ་མི་ཆོག་ཅེས་སྲིད་སྐྱོང་མཆོག་གི་གསུང་བཤད་མཛད་འཆར་དང་། ཨོ་གླིང་དུ་གནས་བཞུགས་བོད་མི་ཆབ་སྲིད་བཙོན་པ་རྣམས་དང་ཐུག་འཕྲད་བྱ་རྒྱུ་སོགས་མཚམས་འཇོག་དགོས་སྐོར་ལ་གནོན་ཤུགས་སྤྲོད་ཐབས་བྱས་ཡོད་ཀྱང་། ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་ཚོགས་གཙོ་མོའུ་རི་སི་རི་ལེ་ལགས་ཀྱིས། སྲིད་སྐྱོང་མཆོག་གི་ལས་རིམ་ཕྱིར་འཐེན་མི་བྱེད་པ་མ་ཟད། ཨོ་གླིང་རྒྱལ་ཡོངས་གསར་འགོད་མཐུན་ཚོགས་ནི་རང་དབང་གི་ཐོག་ནས་སྤྱི་དམངས་ཀྱི་བགྲོ་གླེང་དང་གསར་འགོད་རང་དབང་། སྨྲ་བརྗོད་རང་དབང་བཅས་ཀྱི་ལྟེ་གནས་ཤིག་ཡིན་ཞེས་རྒྱ་ནག་གཞུང་ཚབ་པར་འགྲེལ་བརྗོད་གནང་འདུག

གསར་འགོད་པ། བྱམས་པ་ཚེ་རིང་།