རྒྱ་ནག་གཞུང་གིས་ཕྱི་ལོ་ ༢༠༢༤ ལོ་ནས་དཀར་མཛེས་ཁུལ་གྱི་བོད་ཡིག་སློབ་འབྲིང་ལྔའི་ནང་བོད་ཡིག་སློབ་མཚམས་འཇོག་དགོས་པའི་བཙན་བཀའ་བཏང་ཡོད་འདུག
བོད་ཁུལ་གྱི་བྱིས་པ་ས་ཡ་གཅིག་ཙམ་རྒྱ་ནག་གི་བཅའ་སྡོད་སློབ་གྲྭར་བཅུག བོད་ཀྱི་དུས་བབ་ཀྱི་པར།
ཉེ་ལམ་རྒྱ་ནག་གཞུང་གིས་བོད་དཀར་མཛེས་ཁུལ་དུ་བོད་ཡིག་སློབ་ཁྲིད་བྱེད་བཞིན་པའི་དར་མདོ་བོད་ཡིག་སློབ་འབྲིང་དང་། ལྕགས་ཟམ་རྫོང་བོད་ཡིག་སློབ་འབྲིང་། དཀར་མཛེས་རྫོང་བོད་ཡིག་སློབ་འབྲིང་། ཉག་ཆུ་རྫོང་བོད་ཡིག་སློབ་འབྲིང་། སྡེ་དགེ་རྫོང་བོད་ཡིག་སློབ་འབྲིང་སོགས་སུ་བརྡ་སྦྱོར་ཞིག་བཏང་བའི་ནང་། ཕྱི་ལོ་ ༢༠༢༤ ལོ་ནས་སློབ་གྲྭ་དེ་དག་གི་ནང་བོད་ཡིག་སློབ་ཁྲིད་བྱས་མི་ཆོག་པའི་ཁར། སང་ལོ་ནས་ཀློག་དེབ་སོགས་ཚང་མ་རྒྱ་ཡིག་ཏུ་བསྒྱུར་ནས། རྩིས་རིག་དང་དངོས་ཁམས། རྫས་འགྱུར་གཙོས་སློབ་ཚན་ཚང་མ་རྒྱ་ཡིག་ཁོ་ནའི་ནང་སྦྱང་དགོས་པའི་བཙན་བཀའ་བཏང་ཡོད་འདུག
འབྲེལ་ཡོད་གནས་ཚུལ་མཁོ་སྤྲོད་པས་འདི་གའི་གསར་འགོད་པར། རྒྱ་ནག་གཞུང་གིས་གནོན་ཤུགས་དང་བཙན་བཀའ་གཞིར་བཟུང་། ད་ལོ་ནི་དཀར་མཛེས་ཁུལ་གྱི་མངའ་ཁོངས་སུ་ཡོད་པའི་སློབ་འབྲིང་དེ་དག་ནང་བོད་ཡིག་སློབ་ཚན་སློབ་པའི་ལོ་མཐའ་མ་དེ་ཆགས་ཡོད་ཅིང་། སང་ལོ་ནས་ད་ལྟ་བོད་ཡིག་སློབ་ཁྲིད་བྱེད་མུས་ཡིན་པའི་སློབ་འབྲིང་དེ་དག་གིས་སློབ་མཚམས་འཇོག་རྒྱུ་ཡིན་པའི་གསལ་བསྒྲགས་བྱས་འདུག་ལ། སྤྱིར་སློབ་གྲྭ་དེ་དག་ནང་རྒྱ་ནག་གཞུང་ཕྱོགས་ཀྱིས་བོད་ཡིག་སློབ་མཚམས་འཇོག་དགོས་པའི་བརྡ་སྦྱོར་ཞིག་འབྱོར་ཡོད་ཀྱང་། བརྡ་སྦྱོར་དེ་མི་མང་ལ་སྟོན་གྱི་མེད་སྐོར་སོགས་བརྗོད་བྱུང་།
ཡང་ཁོང་གིས། སྤྱིར་དཀར་མཛེས་ཁུལ་གྱི་མངའ་ཁོངས་སུ་བོད་པའི་སློབ་འབྲིང་མང་པོ་ཞིག་ཡོད་རེད་དེ། བོད་ཡིག་སློབ་ཁྲིད་བྱེད་མུས་ཡིན་པའི་སློབ་གྲྭ་ལྔ་དྲུག་ཙམ་ལས་མེད་པ་དང་། སང་ལོ་ནས་སློབ་གྲྭ་དེ་དག་གི་ཁྲིད་གཞི་དང་ཀློག་དེབ་ཚང་མ་རྒྱ་ཡིག་ཏུ་བསྒྱུར་ནས། རྒྱ་ཡིག་གཙོས་ཨང་རྩིས་དང་། དངོས་ཁམས། རྫས་རིགས་སོགས་རྒྱ་ཡིག་གི་ལམ་ནས་སློབ་ཁྲིད་བྱ་རྒྱུ་ཡིན་སྐོར་དང་། དེ་བཞིན་རྒྱ་ནག་གཞུང་གིས་ཕྱི་ལོ་ ༢༠༢༥ ནས་རྔ་བ་བོད་རིགས་ཆང་རིགས་རང་སྐྱོང་ཁུལ་ཟེར་བའི་ནང་དུའང་བོད་ཡིག་སློབ་ཁྲིད་བྱེད་མུས་ཡིན་པའི་སློབ་གྲྭ་ཁག་གིས་བོད་ཡིག་སློབ་མཚམས་འཇོག་དགོས་པའི་བརྡ་ཁྱབ་བཏང་ཡོད་སྐོར་སོགས་བརྗོད་བྱུང་།
རྒྱལ་སྤྱིའི་བོད་དོན་ལས་འགུལ་བསྟི་གནས་ཁང་གི་སྙན་ཐོ་ལྟར་ན། རྒྱ་ནག་གཞུང་གིས་བོད་པའི་སློབ་ཕྲུག་བརྒྱ་ཆ་བདུན་ཅུ་ལྷག་དང་། བོད་པའི་སློབ་མ་བཞིའི་ནང་གི་སློབ་མ་གསུམ་བཙན་གྱིས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་འཇུག་གི་ཡོད་ཅིང་། ད་སྔ་བར་ལོ་ ༦ ནས་ ༡༨ བར་ཡིན་པའི་བོད་པའི་སློབ་མ་ཁྱོན་འབུམ་ ༨ ནས་ ༩ བར་དབང་སྒྱུར་ལམ་ལུགས་ཀྱི་བཅའ་སྡོད་སློབ་གྲྭའི་ནང་གཏན་སྡོད་བྱེད་མུས་ཡིན་པ་དང་། བྱིས་པ་ལོ་བཞི་དང་ལྔ་ཅན་ཡང་སློབ་གྲྭ་དེ་དག་གི་ནང་བཙན་གྱིས་འཇུག་གི་ཡོད་སྐོར་སོགས་གསལ་ཡོད་འདུག
གཞན་ཡང་། ཕྱི་ལོ་ ༢༠༢༡ ཟླ་ ༧ ཚེས་ ༨ ཉིན་རྒྱ་ནག་གཞུང་གིས་མགོ་ལོག་དར་ལོག་ནས་སེང་འབྲུག་སྟག་རྩེའི་བཅའ་སྡོད་སློབ་གྲྭ་གཙོས་མགོ་ལོག་རྨ་ཆེན་རྫོང་ནས་སློབ་གྲྭ་གསུམ་དང་། དགའ་བདེ་ནས་སློབ་གྲྭ་གཅིག གཅིག་སྒྲིལ་གྱི་སློབ་གྲྭ་གཉིས་བཅས་ཁྱོན་བོད་མི་རང་གི་སྒེར་གཉེར་སློབ་གྲྭ་ ༧ སྒོ་བརྒྱབ་བཅུག་ཡོད་ཅིང་། འདས་པའི་ལོ་ཤས་རིང་རྒྱ་ནག་གཞུང་གིས་བོད་ཀྱི་སྐད་ཡིག་སློབ་སྦྱོང་བྱེད་སའི་སློབ་གྲྭ་དང་དགོན་སྡེ་ཁག་བཙན་གྱིས་སྒོ་བརྒྱབ་འཇུག་གི་ཡོད་པ་མ་ཟད། བོད་ནང་གི་རྩོམ་པ་པོ་དང་མཁས་དབང་མང་པོ་ཞིག་ལ་ནག་ཉེས་སྣ་ཚོགས་གཡོག་ནས་འབུར་འཇོམས་གཏོང་གིན་ཡོད་འདུག
གསར་འགོད་པ། དཔལ་ལྡན།
