སྲིད་སྐྱོང་མཆོག་གིས་ཨོ་གླིང་གི་གྲོས་ཚོགས་འཐུས་མིར་མཇལ་འཕྲད་གནང་།

སྲིད་སྐྱོང་མཆོག་གིས་ཨོ་གླིང་གྲོས་ཚོགས་འཐུས་མི་དང་གནད་ཡོད་མི་སྣ། བོད་དོན་རྒྱབ་སྐྱོར་བ་ཁག་ཅིག་ལ་མཇལ་འཕྲད་ཀྱིས་བོད་རྒྱའི་དཀའ་རྙོག་སེལ་རྒྱུ་འཛམ་གླིང་ཞི་བདེར་གལ་ཆེན་ཆགས་ཡོད་སྐོར་གསུངས་འདུག

ཟླ་འདིའི་ཕྱི་ཚེས་ ༡༧ ཉིན་ནས་བཟུང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨོ་གླིང་ནང་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར།  དེ་རིང་ཚེས་ ༡༩ ཉིན་རྒྱབ་ཨོ་གླིང་ནེའུ་སོ་ཐི་ཝེ་ལི་སི་(New South Wales) མངའ་སྡེའི་གྲོས་ཚོགས་ཚོགས་ཁང་དུ།ཨོ་གླིང་བོད་དོན་ལྷན་ཚོགས་ (Australia Tibet Council) དང་ཨོ་གླིང་སྐུ་ཚབ་དོན་གཅོད་ཁང་གཉིས་ཀྱི་གོ་སྒྲིག་འོག  སྲིད་སྐྱོང་མཆོག་གིས་བཙན་བྱོལ་ནང་གི་དམངས་གཙོ་དང་འབྲེལ་བའི་བརྗོད་གཞིའི་ཐོག་གསུང་བཤད་གནང་ཡོད་ཅིང་།  སྐབས་དེར་མངའ་སྡེའི་གྲོས་ཚོགས་འཐུས་མི་མེ་ཁེལ་རེ་གྷན་ (Micheal Regan) ལགས་དང། མངའ་སྡེའི་གྲོས་ཚོགས་འཐུས་མི་ཇཱེ་མེ་སི་གྷི་རི་ཧྥིན་(James Griffin) ལགས། ཨོ་གླིང་ཨེ་སི་བྷི་ཨེ་སི་གསར་ཁང་ (SBS News) གི་གསར་འགོད་པ་ཀར་ལ་ (Karla Grant) ལགས་ཀྱིས་ལས་རིམ་མདོ་འཛིན་གནང་ཡོད་འདུག དེ་རིང་སྔ་དྲོ་ཨོ་གླིང་ཉིན་རེའི་གསར་ཤོག་ (Sydney Morning Herald) གི་གསར་འགོད་པ་ (Mathew Knott) ལགས་ཀྱི་བཅར་འདྲིར་ལན་འདེབས་གནང་ཡོད་འདུག  

ཁ་སང་ཕྱི་ཚེས་ ༡༨ ཉིན་སྲིད་སྐྱོང་མཆོག་གིས་སི་ཌི་ནི་འཕྲུལ་རིག་གཙུག་ལག་སློབ་གཉེར་ཁང་དུ། ཨེ་ཤ་ཡའི་ཞི་བདེ་རྒྱ་མཚོའི་ཞིབ་འཇུག་ཚོགས་ཆུང་ (Asia Pacific Research Group)དང་། སྤྱི་ཚོགས་དང་ཆབ་སྲིད་ཚན་རིག་སྡེ་ཚན་གཉིས་ཀྱི་གོ་སྒྲིག་འོག   བོད་རྒྱའི་དཀའ་རྙོག་སེལ་རྒྱུ་ནི་འཛམ་གླིང་ཞི་བདེར་གལ་ཆེན་ཆགས་ཡོད་ཅེས་པའི་བརྗོད་གཞིའི་ཐོག་གསུང་བཤད་གནང་ཡོད་ཅིང་། སྐབས་འདིའི་འདུ་འཛོམས་ཐོག་རྒྱ་ནག་དམངས་གཙོ་དོན་གཉེར་བ་དང་། མཁས་དབང་། རྩོམ་པ་པོ། བོད་རྒྱ་མཛའ་འབྲེལ་ཚོགས་པའི་ཚོགས་མི་བཅས་མཉམ་ཞུགས་གནང་ཡོད་འདུག སྐབས་དེར་སྲིད་སྐྱོང་མཆོག་ནས་བོད་ནི་ལོ་རྒྱུས་ཐོག་རང་བཙན་གྱི་རྒྱལ་ཁབ་ཅིག་ཡིན་པ་དང་། ད་ལྟའི་ཆར་བོད་རྒྱའི་དཀའ་རྙོག་དེ་དབུ་མའི་ལམ་གྱི་སྲིད་ཇུས་འོག་སེལ་ཐབས་གནང་བཞིན་ཡོད་པའི་སྐོར་གསུང་བཤད་གནང་འདུག

ཉིན་གུང་སི་ཌི་ནི་གྲོང་ཁྱེར་གྱི་གྲུ་ཁ་གསར་པ་རུ། གྲོས་ཚོགས་འཐུས་མི་ལྕམ་སོ་ཧྥེས་སི་ཁཱམ་ཕི་སི་(Dr Sophie Scamps)་ལགས་ཀྱིས་སྲིད་སྐྱོང་མཆོག་ཨོ་གླིང་དུ་འཚམས་གཟིགས་སུ་ཕེབས་པར་གསོལ་སྟོན་ཞིག་གོ་སྒྲིག་གནང་ཡོད་ཅིང་། སྐབས་དེར་ས་གནས་ཀྱི་གནད་ཡོད་མི་སྣ་དང་། བོད་དོན་རྒྱབ་སྐྱོར་བ་ཁག་ཅིག་མཉམ་ཞུགས་གནང་འདུག

དེ་བཞིན་ཁ་སང་སྔ་དྲོར་སྲིད་སྐྱོང་མཆོག་གིས་སི་ཌི་ནི་གྲོང་ཁྱེར་གྱི་ས་གནས་བོད་རིགས་གཞོན་སྐྱེས་དང་། དྭང་བླངས་བོད་དོན་ཞུ་གཏུགས་ལས་འགུལ་བ་བཅས་མི་གྲངས་བརྒྱ་ལྷག་ལ་ཐུག་འཕྲད་གནང་ཡོད་ཅིང་། སྐབས་དེར་བོད་ཀྱི་ལོ་རྒྱུས་དང་། ས་བབ་ཆགས་སྟངས། ཁོར་ཡུག་གི་གནས་བབ། བོད་ནང་གི་ཛ་དྲག་གི་གནས་སྟངས་སོགས་ཀྱི་སྐོར་ལ་གསུང་བཤད་གནང་ཡོད་པ་མ་ཟད། གཞོན་སྐྱེས་རྣམས་ཀྱིས་བོད་ཀྱི་ལོ་རྒྱུས་ལ་དོ་སྣང་བྱས་ནས་དེབ་ཀློག་དགོས་པ་གལ་ཆེ་བའི་སྐོར་གསུངས་ཏེ་མི་མང་གི་དྲི་བར་ལན་འདེབས་གནང་ཡོད་འདུག

ཕྱི་ཚེས་ ༡༧ ཉིན་གྱི་སྔ་དྲོར་སི་ཌི་ནི་གྲོང་ཁྱེར་དུ་སྲིད་སྐྱོང་མཆོག་ནས་གཟའ་མཇུག་བོད་ཡིག་སློབ་གྲྭར་འཚམས་གཟིགས་དང་། དེ་གའི་དགེ་ལས་དང་། ཕ་མ་སློབ་ཕྲུག་རྣམས་ལ་མཇལ་འཕྲད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་བྱེད་པར་ཕ་མ་རྣམས་ཀྱིས་འོས་འགན་དྭང་དུ་བླངས་ནས་སོ་སོའི་བུ་ཕྲུག་གི་རྒྱུད་དུ་རང་ཉིད་ཀྱི་རིག་གཞུང་སྦྱང་བརྩོན་དགོས་པའི་བག་ཆགས་བཟང་པོ་འཇོག་དགོས་སྐོར་གསུང་བཤད་གནང་ཡོད་འདུག

ཉིན་རྒྱབ་ཏུ་སྲིད་སྐྱོང་མཆོག་གིས་ཨོ་གླིང་ཁུལ་གྱི་བོད་རིགས་མི་མང་ལ་ཐུག་འཕྲད་དང་གསུང་བཤད་གནང་ཡོད་སྐབས། སྲིད་སྐྱོང་མཆོག་གིས་ད་ལྟའི་བཀའ་ཤག་གི་ཆབ་སྲིད་ལངས་ཕྱོགས་དང་། བོད་མིའི་སྒྲིག་འཛུགས་ཀྱི་སྒྲོམ་གཞི་བརྟན་བཟོ་བྱེད་ཐབས། བཙན་བྱོལ་བོད་མིའི་གཞིས་ཆགས་ཁག་རྒྱུན་གནས་བྱེད་ཐབས། རྗེས་འབྱོར་བོད་མིའི་སྡོད་ཁང་དཀའ་ངལ་སེལ་ཐབས། ཨ་རིའི་གྲོས་ཚོགས་ཀྱི་བོད་དོན་ཁྲིམས་འཆར་གསར་པའི་སྐོར། རྒྱལ་སྤྱིའི་ཐོག་བོད་དོན་ཞུ་གཏུགས་ཤུགས་ཆེ་གནང་དགོས་སྐོར་སོགས་གསུངས་འདུག

སྲིད་སྐྱོང་མཆོག་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༡ ཉིན་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་གོ་སྒྲིག་འོག བོད་རྒྱའི་དཀའ་རྙོག་སེལ་ཐབས་དང་ཞི་བདེ་ཡོང་ཐབས་ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུ་ཡིན་པ་དང་། ཨེ་བྷི་སི་གསར་ཁང་གི་ཐད་གཏོང་བྱ་རྒྱུ་ཡིན་འདུག ཕྱི་ཚེས་ ༢༢ ཉིན་ཨོ་གླིང་ཨིན་ཌི་ཡ་སློབ་གཉེར་ཁང་གིས་གདན་ཞུས་ལྟར། རྒྱ་གར་དང་བོད་ཀྱི་གནའ་དེང་གི་འབྲེལ་བའི་སྐོར་གསུང་བཤད་གནང་རྒྱུ་དང་། ཕྱི་ཚེས་ ༢༣ ཉིན་སྲིད་སྐྱོང་མཆོག་བོད་ཀྱི་རོལ་དབྱངས་དུས་སྟོན་ཐོག་ཕེབས་རྒྱུ་ཡིན་པ་མ་ཟད། མདོ་འཛིན་པ་སཱ་རཱ་ཧ་ཀཱ་ནོ་སི་ཁི་(Sarah Kanowski)་དང་མཉམ་དུ་ཨེ་བྷི་སི་རླུང་འཕྲིན་ཁང་དུ་བོད་ཀྱི་རིག་གཞུང་དང་གནམ་གཤིས་གནས་སྟངས་སྐོར་བགྲོ་གླེང་གནང་རྒྱུ་ཡིན་འདུག

གསར་འགོད་པ། བྱམས་པ་ཚེ་རིང་།