ཨ་རིའི་ཕྱི་འབྲེལ་བློན་ཆེན་སྐུ་ཞབས་བྷི་ལིན་ཀན་མཆོག་རྒྱ་ནག་ནང་དུ་ཕེབས་ཏེ་རྒྱ་ནག་གི་མགོ་ཁྲིད་ཞི་ཅིན་ཕིང་དང་ལྷན་དུ་རྒྱ་ནག་གཞུང་གིས་བོད་དང་། ཡུ་གུར། ཧོང་ཀོང་སོགས་ལ་འགྲོ་བ་མིའི་ཐོབ་ཐང་ལ་དྲག་གནོན་བྱེད་བཞིན་ཡོད་པར་ཐུགས་འཚབ་ཆེན་པོས་གླེང་སློང་གནང་ཡོད་སྐོར་བསྒྲགས་འདུག
US Secretary of State Antony Blinken Meets Chinese President Xi Jinping. photo: AFP .19th June 2023
ཉེ་སྔོན་ཨ་རིའི་ཕྱི་སྲིད་ལས་ཁུངས་ཀྱིས་བདུན་ཕྲག་གོང་མའི་གཟའ་མཇུག་ཙམ་ལ་ཕྱི་འབྲེལ་བློན་ཆེན་ཨན་ཐོ་ནེ་བྷི་ལིན་ཀན་ (Antony Blinken) མཆོག་རྒྱ་ནག་ཏུ་ཕེབས་ཏེ། ཨ་རྒྱ་གཉིས་བར་བྱུང་དང་འབྱུང་བཞིན་པའི་དཀའ་རྙོག་སོགས་ཀྱི་ཐོག་གྲོས་མོལ་གནང་རྒྱུ་ཡིན་པའི་ཡོངས་ཁྱབ་གསལ་བསྒྲགས་ཤིག་སྤེལ་ཡོད་པ་ལྟར། ཁ་སང་ཕྱི་ཚེས་ ༡༩ ཉིན་ཕྱི་འབྲེལ་བློན་ཆེན་མཆོག་གིས་རྒྱ་ནག་དམར་ཤོག་གཞུང་གི་མགོ་ཁྲིད་ཞི་ཅིན་ཕིང་དང་ཕྱི་འབྲེལ་བློན་ཆེན་ཆིན་ཀང་གི་གཙོས་གནད་ཡོད་མི་སྣ་ཁག་ཅིག་དང་ཐུག་འཕྲད་གནང་སྟེ། ཨ་རྒྱ་གཉིས་ཀྱི་འབྲེལ་ལམ་བརྟན་པོར་ཚུགས་པར་མཉམ་ལས་མུ་མཐུད་བྱེད་པར་གྲོས་མཐུན་བྱུང་ཡོད་སྐོར་གྱི་གནས་ཚུལ་སྤེལ་འདུག་ལ། ད་ལན་གྱི་གཞུང་འབྲེལ་ཕྱོགས་ཕེབས་དེ་ནི་ཕྱི་ལོ་ ༢༠༡༩ ལོ་སྟེ་མི་ལོ་ ༥ ཡི་རྗེས་སྲིད་འཛིན་བྷའེ་ཌིན་གཞུང་གི་ཆེས་མཐོའི་མགོ་འཁྲིད་ཅིག་རྒྱ་ནག་ཏུ་ཕེབས་པ་ཐེངས་དང་པོ་ཡིན་པ་རེད།
དེའི་ཐད་ཨ་རིའི་ཕྱི་སྲིད་བློན་ཆེན་མཆོག་གི་སྒེར་གྱི་ཊུ་ཝེ་ཊར་དུ། ད་ལན་རྒྱ་ནག་གི་མགོ་ཁྲིད་ཞི་དང་དོན་སྙིང་ལྡན་པའི་ཁ་བརྡ་ཞིག་བྱེད་ཁོམ་བྱུང་ལ། ཐུག་འཕྲད་སྐབས་ཨ་རྒྱ་གཉིས་ཀྱི་མཉམ་རུབ་ཀྱི་འགན་འཁྲི་ཚུད་པའི་གནད་དོན་གལ་ཆེན་གྱི་ཐད་ལ་གྲོས་བསྡུར་གནང་ཡོད་སྐོར་དང་། རྒྱ་ནག་གི་མགོ་ཁྲིད་ཞི་ཅིན་ཕིང་གིས། ཕྱི་སྲིད་བློན་ཆེན་མཆོག་རྒྱ་ནག་ཏུ་ཕེབས་པ་བརྒྱུད། ཨ་རྒྱ་གཉིས་དང་འབྲེལ་བའི་གནད་དོན་མང་པོ་ཞིག་གི་ཐད་ལ་གྲོས་བསྡུར་བྱས་ཡོད་ཅིང་། ཁོང་གི་ཕྱོགས་ཕེབས་བརྒྱུད་དེ་ཨ་རྒྱ་གཉིས་ཀྱི་སྐུ་ཚབ་ཚོགས་མི་ཐུག་འཕྲད་བྱས་ཏེ། ཕྱོགས་གཉིས་ཀྱི་འབྲེལ་ལམ་སྲ་བརྟན་དུ་ཚུགས་ཐུབ་པར་གྲུབ་འབྲས་ཐོན་ཐུབ་པའི་རེ་བ་ཡོད་ལུགས་བརྗོད་འདུག
དེ་རིང་སི་ཨེན་ཨེན་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་སྐུ་ཚབ་ཚོགས་ཆུང་གིས་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་དང་། བྱང་ཀོ་རི་ཡའི་རྡུལ་ཕྲན་མཚོན་ཆ་བཟོ་སྒྲིག་བྱས་པའི་གནད་དོན། དེ་བཞིན་རྒྱ་ནག་གཞུང་གིས་ཐའེ་ཝན་གཙོས་ལྷོ་དང་ཤར་རྒྱ་ནག་རྒྱ་མཚོའི་ཁུལ་གྱི་རྒྱལ་ཁབ་མང་པོ་ཞིག་ལ་གནོན་ཤུགས་སྤྲོད་མུས་ཡིན་པ་དང་། དེ་བཞིན་འགྲོ་བ་མིའི་ཐོབ་ཐང་སོགས་ཀྱི་སྐོར་ལ་གླེང་སློང་གནང་ཡོད་འདུག ཡིན་ནའང་། ཨ་རྒྱ་གཉིས་ཀྱི་དམག་དོན་གདོང་ཐུག་དང་རྙོག་གླེང་ཡང་ཡང་འབྱུང་གི་ཡོད་པ་མ་ཟད། ལྷག་པར་ཐའེ་ཝན་གྱི་གནམ་མཚོ་གཉིས་སུ་རྒྱ་ནག་གཞུང་གིས་དྲག་དམག་ཡང་ཡང་མངག་གཏོང་བྱས་ཏེ་ཨ་རྒྱ་གཉིས་ཀྱི་བར་དུ་རྙོག་གླེང་འབྱུང་གི་ཡོད་ཀྱང་། ད་ལན་གྱི་ཐུག་འཕྲད་སྐབས་ཨ་རྒྱ་གཉིས་ཀྱི་དམག་དོན་ཐད་གླེང་སློང་གནང་ཐུབ་མེད་པ་མ་ཟད། རྒྱ་ནག་ཕྱོགས་ནས་དམག་དོན་དང་འབྲེལ་བའི་གནད་དོན་ཐད་གླེང་སློང་བྱ་འདོད་མེད་པའི་རྣམ་འགྱུར་བསྟན་ཡོད་སྐོར་བཀོད་འདུག དེའི་ཐད་རྒྱ་ནག་ཕྱི་སྲིད་ལས་ཁུངས་ཀྱི་བྱང་ཨ་མེ་རི་ཁ་དང་རྒྱ་མཚོའི་ལས་དོན་འགན་འཛིན་ཡང་ཐའོ་ (Yang Tao) ཡིས། ཨ་རྒྱ་གཉིས་ཀྱི་དམག་དོན་ཐད་གྲོས་བསྡུར་བྱེད་པར་ཨ་རིས་དམག་དོན་གྱི་འགོག་རྐྱེན་དེ་དག་མེད་པར་བཟོ་དགོས། ཞེས་བརྗོད་འདུག
ཁ་སང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་མི་ལིར་(Matthew Miller) མཆོག་གིས། སྐུ་ཞབས་བྷི་ལི་ཀན་མཆོག་གི་རྒྱ་ནག་གི་ཕྱོགས་ཕེབས་འདི་དང་བསྟུན། ཨ་རྒྱ་གཉིས་ཀྱི་སྲིད་འབྱོར་གཉིས་ཀྱི་གནད་དོན་མང་པོ་ཞིག་གི་ཐད་ལ་གླེང་སློང་དང་གྲོས་བསྡུར་གནང་ཡོད་པ་མ་ཟད། རྒྱ་ནག་གཞུང་གིས་བོད་དང་། ཡུ་གུར། ཧོང་ཀོང་། དེ་བཞིན་མི་སྒེར་མང་པོ་ཞིག་ལ་དྲག་གནོན་དང་གནོན་ཤུགས་སྤྲོད་ཀྱིན་ཡོད་པར་སེམས་འཚབ་ཆེན་པོས་གླེང་སློང་དང་། ཨ་རིའི་གཞུང་གིས་འགྲོ་བ་མིའི་ཐོབ་ཐང་དང་བདེ་འཇགས་སོགས་ཀྱི་ཐད་ལ་དོ་ཁུར་ཆེན་པོ་གནང་ཡོད་སྐོར་བརྗོད་འདུག
Antony Blinken Meets China’s Foreign Minister Qin Gang. photo:AFP.18 June 2023
ཟླ་འདིའི་ཕྱི་ཚེས་ ༡༨ ཉིན་ཕྱི་འབྲེལ་བློན་ཆེན་མཆོག་གིས་རྒྱ་ནག་གི་ཕྱི་སྲིད་བློན་ཆེན་ཆིན་ཀང་ (Qin Gang) ལ་ཐུག་འཕྲད་གནང་སྟེ། ཕྱོགས་གཉིས་ཀྱི་ཕྱི་སྲིད་ཀྱི་ལས་དོན་གཙོ་བོར་གྱུར་བའི་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་དང་། ཐའེ་ཝན་གྱི་གནད་དོན། ཨ་རྒྱ་གཉིས་ཀྱི་ཕྱི་འབྲེལ་ལས་དོན་དང་ཚོང་འབྲེལ། དེ་བཞིན་མཉམ་ལས་གོང་མཐོར་གཏང་རྒྱུའི་ཐད་གྲོས་མོལ་གནང་ཡོད་འདུག
སྤྱིར་ཨ་རིའི་ཕྱི་འབྲེལ་བློན་ཆེན་མཆོག་འདི་ལོའི་ཕྱི་ཟླ་ ༢ ཚེས་ ༥ ནས་ ༦ བར་ཉིན་གྲངས་གཉིས་རིང་རྒྱ་ནག་གི་རྒྱལ་ས་པེ་ཅིན་དུ་ཕེབས་ཏེ་རྒྱ་ནག་གི་མགོ་ཁྲིད་ཞི་ཅིན་ཕིང་དང་ཕྱི་འབྲེལ་མི་སྣ་སོགས་སུ་ཐུག་འཕྲད་གནང་འཆར་ཡོད་ཀྱང་། ཟླ་དེའི་ཕྱི་ཚེས་ ༢ ཉིན་ཨ་རིའི་རྒྱལ་སྲུང་ལྷན་ཁང་གིས་རྒྱ་ནག་གཞུང་གིས་ཨ་རིའི་མཁའ་ཁུལ་དུ་མྱུལ་ཞིབ་ལྒང་ཕུག་ (surveillance balloon) ཅིག་ཆེད་གཏོང་གིས་གསང་བའི་ལྟ་ཞིབ་བྱེད་ཀྱི་ཡོད་པའི་གནས་ཚུལ་བསྒྲགས་རྗེས། བློན་ཆེན་མཆོག་རྒྱ་ནག་ཏུ་ཕེབས་རྒྱུའི་གཞུང་འབྲེལ་ཕྱོགས་སྐྱོད་དེ་གློ་བུར་ཕྱིར་འགྱངས་གནང་དགོས་བྱུང་ཡོད་པ་རེད།
འདས་པའི་ལོ་ཤས་རིང་རྒྱ་ནག་གཞུང་གིས་ཐའེ་ཝན་མཚོ་འགག་ཁུལ་དུ་གནམ་མཚོ་གཉིས་ཀྱི་དྲག་རྒོལ་དམག་མི་མངག་གཏོང་བྱས་ཏེ། ཐའེ་ཝན་གཞུང་མང་གཉིས་ལ་སུན་གཙེར་ཡང་ཡང་བཟོས་དང་བཟོ་མུས་ཡིན་སྟབས། ཨ་རིས་ཐའེ་ཝན་གཙོས་ཨེ་ཤ་ཡའི་མཚོ་གླིང་རྒྱལ་ཁབ་ཁག་ཏུ་རྒྱ་ནག་གི་དམག་ཤུགས་སྐྱེད་པར་རྒོལ་ལན་ཡང་ཡང་སློག་གི་ཡོད་པ་མ་ཟད། འདས་ལོར་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ནན་སེ་པེ་ལོ་སི་མཆོག་གིས་རྒྱ་ནག་གཞུང་གི་གནོན་ཤུགས་དང་བཙན་བཀའ་སྣང་མེད་དུ་བཞག་ནས། ཐའེ་ཝན་དུ་གཞུང་འབྲེལ་འཚམས་གཟིགས་སུ་ཕེབས་རྗེས། ཕྱོགས་ཡོངས་ནས་ཨ་རྒྱ་གཉིས་ཀྱི་འབྲེལ་ལམ་ཇེ་ཞན་ཇེ་སྡུག་ཏུ་གྱུར་ཡོད་ཅིང་། རྒྱ་ནག་གཞུང་གིས་ཨ་རིས་ཐའེ་ཝན་གྱི་བདེ་འཇགས་སྲུང་སྐྱོབ་སླད་རོགས་འདེགས་བྱེད་མུས་ཡིན་པ་དེར་སྐྱོན་བརྗོད་ཤུགས་ཆེན་བྱེད་ཀྱིན་ཡོད་པ་རེད།
གསར་འགོད་པ། དཔལ་ལྡན།
