རྒྱ་ནག་གི་གསོལ་མགྲོན་ཁང་ཞིག་ཏུ་འགས་ཐོར་བྱུང་ནས་ཉུང་མཐར་མི་གྲངས་ ༣༡ རྐྱེན་འདས་བྱུང་ཡོད་པ་དང་། མི་གྲངས་ ༧ རྨས་སྐྱོན་ཕོག་ཡོད་འདུག
ཟླ་འདིའི་ཕྱི་ཚེས་ ༢༡ ཉིན་གྱི་དགོང་མོའི་ཆུ་ཚོད་ ༨།༤༠ ཐོག་རྒྱ་ནག་ཉིང་ཞ་ཡན་ཁྲོང་(银川) གྲོང་ཁྱེར་གྱི་ཧྥུ་ཡཱང་(富洋烧烤店) གསོལ་མགྲོན་ཁང་དུ་རླངས་རྫས་འགས་ཐོར་བྱུང་སྟེ། ཉུང་མཐར་མི་གྲངས་ ༣༡ རྐྱེན་འདས་དང་། མི་གྲངས་ ༧ ལ་རྨས་སྐྱོན་ཕོག་ནས་མྱུར་སྐྱོབ་བྱེད་མུས་ཡིན་པའི་ཁྲོད། མི་གཅིག་ཛ་དྲག་གི་གནས་སྟངས་འོག་ཏུ་ལྷག་ཡོད་འདུག
འགས་ཐོར་དོན་རྐྱེན་དེའི་ཐད་རྒྱ་ནག་གི་མགོ་ཁྲིད་ཞི་ཅིན་ཕིང་གིས། ཐེངས་འདིའི་འགས་ཐོར་དོན་རྐྱེན་ཁྲོད་རྨས་སྐྱོན་ཐོབ་པའི་མི་ཚང་མ་མྱུར་སྐྱོབ་བྱ་དགོས་ཚུལ་དང་། དོན་རྐྱེན་བྱུང་སའི་ཡུལ་དངོས་སུ་བརྟག་དཔྱད་ནན་མོ་བྱས་ཏེ། དོན་རྐྱེན་དེ་དང་འབྲེལ་བའི་མི་སྣ་རྣམས་ཉེས་ཆད་གཅད་རྒྱུ་ཡིན་ལུགས་སོགས་བཤད་ཡོད་འདུག
རྒྱ་གཞུང་གིས་རླངས་རྫས་འགས་ཐོར་དོན་རྐྱེན་དེ་ནི་གསོལ་མགྲོན་ཁང་དེའི་མ་བྱིན་གྱིས་རླངས་རྫས་བརྗེ་བོ་བརྒྱབ་པའི་ཆུ་ཚོད་གཅིག་ཙམ་གྱི་རྗེས་སུ་རླངས་རྫས་ཕྱི་རུ་ཐོན་པའི་གནས་ཚུལ་བྱུང་སྟེ། ཟ་ཁང་དེ་འགས་ཐོར་བྱུང་བ་ཡིན་ཞིང་། དོན་རྐྱེན་བྱུང་རྗེས་ཉེ་འགྲམ་གྱི་ཚོང་ཁང་དང་ལམ་ཡོངས་རྫོགས་བཀག་འགོག་བྱས་ཏེ། མི་མང་གི་བདེ་འཇགས་སོགས་ཀྱི་ཐད་ལ་ལྟ་སྲུང་དང་སྲུང་སྐྱོབ་བྱས་ཡོད་ལུགས་དང་། དེ་རིང་ཞོགས་པ་བར་རྒྱ་ནག་གི་མེ་གསོད་རུ་ཁག་གི་མི་གྲངས་ ༡༠༠ ལྷག་གིས་མེ་གསོད་འཕྲུལ་འཁོར་ ༢༠ བེད་སྤྱོད་བྱས་ཏེ། གནོད་འཚེ་ཐེབས་པའི་མི་མང་མྱུར་སྐྱོབ་དང་མེ་གསོད་ཐབས་བྱས་ཡོད་སྐོར་སོགས་བསྒྲགས་འདུག
ལོ་ལྟར་རྒྱ་ནག་ནང་འགས་ཐོར་གྱི་དོན་རྐྱེན་མང་པོ་འབྱུང་བཞིན་ཡོད་པ་ལྟར། ཕྱི་ལོ་ ༢༠༢༡ ཟླ་བདུན་པའི་ནང་རྒྱ་ནག་ཧུའུ་པའེ་ཞིང་ཆེན་ཧྲི་ཡཱན་གྲོང་ཁྱེར་གྱི་སྔོ་ཚལ་ཁྲོམ་ར་ཞིག་ཏུ་རླངས་རྫས་འགས་ཐོར་བྱུང་བའི་དོན་རྐྱེན་ཁྲོད་མི་གྲངས་ ༢༦ རྐྱེན་འདས་སུ་ཕྱིན་ཡོད་པ་དང་། ཕྱི་ལོ་ ༢༠༡༩ ཟླ་གསུམ་པའི་ནང་དུ་རྒྱ་ནག་ཅང་སུའུ་ཞིང་ཆེན་གྱི་རྫས་འགྱུར་ཚོད་ལྟ་ཁང་ཞིག་ཏུ་འབར་གས་དོན་རྐྱེན་གྱིས་མི་གྲངས་ ༧༨ རྐྱེན་འདས་བྱུང་ཡོད་འདུག
གཞན་ཡང་། ཕྱི་ལོ་ ༢༠༡༥ ལོར་རྒྱ་ནག་ཐིན་ཅིན་གྲོང་ཁྱེར་གྱི་རྫས་འགྱུར་ཚོང་ཟོག་ཁང་ཞིག་འགས་ཐོར་བྱུང་ནས་མི་གྲངས་ ༡༧༣ རྐྱེན་འདས་ཕྱིན་པ་དང་། དེའི་ཁྲོད་ཀྱི་མི་མང་ཤོས་ནི་མེ་གསོད་མྱུར་སྐྱོབ་པ་དང་ཉེན་རྟོག་པ་བཅས་ཡིན་འདུག
གསར་འགོད་པ། བྱམས་པ་ཚེ་རིང་།
