༧གོང་ས་མཆོག་གིས་གྲྭ་ཆས་གྱོན་པ་ཙམ་གྱིས་ངོ་མཚར་བྱེད་རྒྱུ་ཡོད་པ་མ་རེད་ཅེས་གསུངས་སོང་།

༧གོང་ས་མཆོག་གིས་རྒྱལ་བ་རིན་པོ་ཆེའི་མིང་ཡོད་པ་ཙམ་གྱིས་ལྷོད་ལྷོད་སྡོད་ཀྱི་མེད་ལ། ཁྱེད་ཚོས་ཀྱང་གྲྭ་ཆས་གྱོན་པ་ཙམ་གྱིས་ངོ་མཚར་བྱེད་རྒྱུ་ཡོད་པ་མ་རེད་ཅེས་བཀའ་སློབ་བསྩལ།

ཁ་སང་ཕྱི་ཟླ་ ༦ ཚེས་ ༣༠ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་ཝི་ཏི་ནམ་གྱི་དད་ལྡན་མཇལ་བཅར་བ་ཁག་ཅིག་ལ་བཀའ་སློབ་བསྩལ། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། ནང་པ་སངས་རྒྱས་པའི་གཞུང་ནས་ཉན་ཐོས་ཀྱི་བྱང་ཆུབ་དང་། རང་སངས་རྒྱས་ཀྱི་བྱང་ཆུབ། ཐམས་ཅད་མཁྱེན་པའི་གོ་འཕང་གསུམ་བཤད་ཀྱི་ཡོད། ཐམས་ཅད་མཁྱེན་པའི་གོ་འཕང་སྒྲུབ་པའི་རྒྱུ་བྱང་ཆུབ་ཀྱི་སེམས་གཅིག་པོ་རེད། བྱང་ཆུབ་ཀྱི་སེམས་ལ་བསམ་བློ་བཏང་བ་ཡིན་ན་ཁ་ཐུག་སེམས་ལྷོད་ལྷོད་ཆགས་ཀྱི་འདུག ངོས་རང་ཞོགས་པར་ཡར་ལངས་པ་དང་བྱང་ཆུབ་ཀྱི་སེམས་ལ་བསམ་བློ་གཏོང་བཞིན་ཡོད། དངོས་གནས་དྲང་གནས་སེམས་ལྷོད་ཤིག་ཤིག་ཆགས་ཀྱི་འདུག སེམས་ཅན་སྤྱི་དང་། ལྷག་པར་དུ་འཛམ་བུ་གླིང་འདིའི་སྟེང་གི་འགྲོ་བ་མིར་དཀའ་ངལ་འཕྲད་པར་བསམ་བློ་འཁོར་དུས་མིག་ཆུ་ཐོན་ཡོང་གི་འདུག བྱང་ཆུབ་ཀྱི་སེམས་ཟེར་བ་དེ་སེམས་ཀྱི་ཞི་བདེ་ཡག་པོ་ཞེ་བོ་ཡོང་ཐུབ་པ་ཞིག་དང་། དེ་ལ་བརྟེན་ནས་ལུས་པོའི་འཕྲོད་བསྟེན་ལའང་ཞེ་དྲགས་ཕན་ཐོགས་འདུག ངོས་ཀྱིས་རྒྱ་མི་གུང་ཁྲན་ལ་སྙིང་རྗེ་སྒོམ་རྒྱུ་མ་གཏོགས། ཁོང་ཁྲོ་ཁྱོན་ནས་ཟ་རྒྱུ་མ་བྱུང་། བྱང་ཆུབ་ཀྱི་སེམས་ཟེར་བ་དེ་ཞེ་བོ་ཕན་ཐོགས་ཆེན་པོ་རེད། ངོས་ཀྱི་ངོ་ཤེས་པ་དང་མོས་པ་ཡོད་པའི་ཆོས་གྲོགས་ཚོས་ཀྱང་གཞན་ཕན་གྱི་བློ་ཡག་པོ་སྒོམ་རོགས། སོ་སོར་སྡུག་པོ་གཏོང་མཁན་གྱི་དགྲ་བོའང་ལྷག་པར་དུ་བརྩེ་བའི་བློ་སྒོམ་དགོས། ངོས་ཀྱི་མི་ཚེ་འདིའི་ནང་དཀའ་ངལ་མང་པོ་ཞིག་བྱུང་ཡང་། གཞན་ཕན་བྱང་ཆུབ་སེམས་ཀྱིས་ཞི་བདེ་ཁྱོན་ནས་བརླག་གི་མི་འདུག ཁྱེད་ཚོས་ང་རང་ངོ་ཤེས་པ་ཆགས་ཡོད། ངོས་ཀྱི་ཉམས་མྱོང་གི་ཐོག་ནས་སེམས་བཟང་པོ་བྱས་ནས་བསྡད་ན་ལུས་བདེ་བོ་དང་། སེམས་སྐྱིད་པོ་ཡག་པོ་འབྱུང་ཐུབ་པ་སེམས་ལ་བཞག་ནས་སེམས་བཟང་པོ་བྱས། བྱང་ཆུབ་ཀྱི་སེམས་ཟེར་བ་དེ་ཡག་པོ་སྐྱེས་པ་ཡིན་ན། ཆོས་ཕྱོགས་ཀྱི་ཐོག་ནས་བཤད་ན་དངོས་གནས་དྲང་གནས་བསོད་ནམས་ཀྱི་ཚོགས་བསགས་ཐུབ་པ་དང་། བྱང་ཆུབ་ཀྱི་སེམས་ལ་བསམ་བློ་ཡག་པོ་ཞིག་བཏང་ཡོང་དུས་སྟོང་ཉིད་ཀྱི་ལྟ་བ་འཁོར་ཡོང་གི་འདུག སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་གཉིས་བསམ་བློ་འཁོར་ནས་ཉམས་ལེན་ཡག་པོ་བྱས་ཡོང་སྐབས། དངོས་གནས་དྲང་གནས་སེམས་ལ་སྙིང་སྟོབས་དང་ཞི་བདེ་ཡོད་བསྡད་པ་དང་། དཀའ་ངལ་ག་ཚད་འཕྲད་ཀྱང་གདོང་ལེན་བྱེད་པར་ཕན་ཐོགས་ཞེ་བོ་འདུག བྱང་ཆུབ་སེམས་སྒོམ་ནས་སེམས་ལྷོད་ལྷོད་ཡོད་དུས་གཉིད་ཀྱང་སྐྱིད་པོ་ཞེ་བོ་ཁུག་གི་འདུག སེམས་ནང་དུ་གཡང་དུ་ཟགས་པ་སོགས་གང་ཡང་ཡོང་གི་མི་འདུག སེམས་ཅན་ཐམས་ཅད་ལ་བྱང་ཆུབ་སེམས་ཀྱིས་བསམ་བློ་གཏོང་བ་དང་སྟོང་ཉིད་ཀྱི་ལྟ་བ་དྲན་དུས། རྙོག་དྲ་བཟོ་མཁན་ལའང་ལྷག་པར་དུ་བརྩེ་བའི་བློ་སྐྱེས་པས་སེམས་ཀྱི་ཞི་བདེ་དཀྲུག་མཁན་མི་འདུག དེ་ངོས་ཀྱིས་ཉམས་མྱོང་སྟེང་ནས་བཤད་ཀྱི་ཡོད་ལ། ཁྱེད་ཚོས་སེམས་ལ་ངེས་པར་གྱིས། ཞེས་གསུངས་སོང་།

ཡང་༧མགོན་པོ་གང་ཉིད་ཀྱིས། སྤྱན་རས་གཟིགས་ནི་སྙིང་རྗེའི་ལྷ་གཙོ་བོ་རེད། ཁྱེད་ཚོས་གཙོ་བོ་སྤྱན་རས་གཟིགས་སྒོམ་ནས་སེམས་བཟང་པོ་སྡོད་དང་། མི་ཚེ་དོན་དང་ལྡན་པ་ཡོང་གི་རེད། ངོས་ཀྱིས་དུས་རྒྱུན་དུ་འཕགས་པ་སྤྱན་རས་གཟིགས་སྒོམ་གྱི་ཡོད། སྤྱིར་འཕགས་པ་སྤྱན་རས་གཟིགས་ནི་སྙིང་རྗེའི་ལྷ་གཙོ་བོ་ཡིན་པ་དང་། ཡང་སྒོས་བོད་གངས་ཅན་གྱི་ལྷག་པའི་ལྷ་སྐལ་ཡིན་པས། ངོས་ཀྱིས་འཕགས་པ་སྤྱན་རས་གཟིགས་ལ་གསོལ་བ་འདེབས་པ་གཙོ་བོ་བྱེད་བཞིན་ཡོད། འཕགས་པ་སྤྱན་རས་གཟིགས་ངོས་ཀྱི་འཁྲིས་ན་ཡོད་པ་སེམས་ལ་འཁོར་བཞིན་འདུག སྤྱན་རས་གཟིགས་ཡི་དམ་དུ་འཛིན་མཁན་ང་ཚོ་ཧི་མ་ལ་ཡའི་རི་རྒྱུད་དང་བཅས་པའི་འཕགས་པ་ཡོངས་ཀྱིས་སྤྱན་རས་གཟིགས་ཀྱི་གཟུངས་སྔགས་མ་ཎི་རྒྱུན་བགྲངས་བཞིན་ཡོད་པ་རེད། དེ་རིང་ཁྱེད་ཚོར་ཡང་མ་ཎི་ལུང་འདོན་གྱི་ཡིན། ཕྱག་སྟོང་འཁོར་ལོའི་བསྒྱུར་བའི་རྒྱལ་བོ་སྟོང་།། སྤྱན་སྟོང་བསྐལ་བ་བཟང་པོའི་སངས་རྒྱས་སྟོང་།།གང་ལ་གང་འདུལ་དེ་ལ་དེ་སྟོན་པ།། བཙུན་པ་སྤྱན་རས་གཟིགས་ལ་ཕྱག་འཚལ་ལོ།། སྐྱོན་གྱི་མ་གོས་སྐུ་མདོག་དཀར།། རྫོགས་སངས་རྒྱས་དབུ་ལ་རྒྱན།། ཐུགས་རྗེའི་སྤྱན་གྱིས་འགྲོ་ལ་གཟིགས།། སྤྱན་རས་གཟིགས་ལ་ཕྱག་འཚལ་ལོ།། ཨོཾ་མ་ཎི་པདྨེ་ཧཱུྃ། དགེ་བ་འདི་ཡི་མྱུར་དུ་བདག། སྤྱན་རས་གཟིགས་དབང་འགྲུབ་གྱུར་ནས།། འགྲོ་བ་གཅིག་ཀྱང་མ་ལུས་པ།། དེ་ཡི་ས་ལ་འགོད་པར་ཤོག། ཅེས་བཀའ་སློབ་བསྩལ་སོང་།

དེ་བཞིན་ཕྱི་ཟླ་ ༦ ཚེས་ ༢༩ ཉིན་བཞུགས་སྒར་དགའ་ལྡན་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་ཀམ་རའོ་སྐྱེ་དགུ་ས་སྐྱ་བརྩེ་ཆེན་བསམ་སྒྲུབ་གླིང་གི་དགེ་འདུན་གཙོས་མཇལ་བ་རྣམས་བཀའ་སློབ་བསྩལ་ཡོད་ཅིང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། དཔེ་ཆ་ལྟ་བ་དང་ཐོས་དོན་སྒྲུབ་པར་གཞོལ་བར་ཐོས་བསམ་ཡ་མ་བྲལ་བའི་ཐོག་ནས་བྱས་ན་ཡག་པོ་རེད་མ་གཏོགས། གྲྭ་ཆས་གྱོན་པ་ཙམ་གྱིས་ངོ་མཚར་བྱེད་རྒྱུ་ཡོད་པ་མ་རེད། བསམ་གཏན་ཀློག་པའི་ལས་དག་གིས།། ལུས་ལ་སྙིང་པོ་བླང་བར་བྱ།། ངུར་སྨྲིག་གྱོན་ཙམ་གྱིས་ཆོག་པའི།། བསམ་པ་ནམ་ཡང་མི་བྱའོ།། ངོས་ལ་ཆ་བཞག་པ་ཡིན་ན་རྒྱལ་བ་རིན་པོ་ཆེའི་མིང་ཡོད་པས་ལྷོད་ལྷོད་བསྡད་ཆོག་པ་རེད། ཡིན་ནའང་ངོས་ཀྱིས་ཞོགས་པ་བྱང་ཆུབ་སེམས་དང་སྟོང་ཉིད་སྒོམ་པ་དང་། ཉིན་གུང་དཔེ་ཆ་ཀློག་ནས་བསམ་བློ་གཏོང་བཞིན་ཡོད། ངོས་རང་དགེ་སློང་རེད་ལ། རྒྱལ་བ་རིན་པོ་ཆེའི་མིང་ཐོག་ཡོད་པ་ཙམ་གྱིས་ལྷོད་ལྷོད་སྡོད་ཀྱི་མེད། ག་ཚོད་ཐུབ་ཐུབ་ཀྱིས་བསམ་བློ་གཏོང་བཞིན་ཡོད། ངུར་སྨྲིག་གྱོན་ཙམ་གྱིས་ཆོག་པའི།། བསམ་པ་ནམ་ཡང་མི་བྱའོ།། ཟེར་བ་དེ་ཁྱེད་ཚོས་སེམས་སུ་ཞོག གང་ལྟར་དཔེ་ཆ་ལྟ་རྒྱུ་གལ་ཆེན་པོ་རེད། དཔེ་ཆ་བལྟས་ནས་དོན་དག་ལག་ལེན་དུ་བསྐྱལ་རྒྱུ་དེ་རེད། མདོར་ན་ལུང་སྡེ་སྣོད་གསུམ་གྱི་འཆད་ཉན་དང་། བསླབ་པ་གསུམ་གྱི་ཉམས་ལེན་དེ་དག་ང་ཚོའི་གྲྭ་བའི་ལས་འགན་ཡིན་བསམ་ནས་བྱེད་དགོས། ང་ཚོས་གྲྭ་ཆས་གྱོན་ཏེ་གྲོང་ཆོག་ཏུ་རྒྱུག་རྒྱུ་ལས་འགན་མིན་པར་བསམ་དགོས།དཔེ་ཆ་ཡག་པོ་བལྟས་ནས་ཐོས་དོན་སྒྲུབ་པར་གཞོལ་བར་སེམས་སུ་ངེས་པར་བགྱིས། ངོས་ཀྱིས་ག་ཚད་ཐུབ་ཐུབ་ཀྱིས་དཔེ་ཆ་བལྟས་ནས་བསམ་བློ་བཏང་གི་ཡོད། ཞོགས་པ་དང་དགོང་མོར་སྒོམ་རྒྱག་བཞིན་ཡོད་པ་རེད། ཁྱེད་ཚོས་གྲྭ་ཆས་གྱོན་པ་ཙམ་གྱིས་ངོ་མཚར་བྱེད་རྒྱུ་ཡོད་པ་མ་རེད། ཅེས་བཀའ་སློབ་བསྩལ་སོང་།

གསར་འགོད་པ། བྱམས་པ་ཚེ་རིང་།