༸གོང་ས་མཆོག་དགུང་གྲངས་ ༨༨ ལ་ཕེབས་པའི་གཞུང་འབྲེལ་འཁྲུངས་སྲུང་གཙི་ཞུས་སོང་།

སྲིད་སྐྱོང་མཆོག་གིས་བོད་མི་ཡོངས་ནས་༸གོང་ས་མཆོག་གི་བཀའ་དགོངས་ཚུལ་བཞིན་སྒྲུབ་པ་སྐལ་བའི་མཆོག་ཏུ་བརྩིས་ཏེ། བླ་སློབ་དམ་ཚིག་འོ་ཆུ་གཅིག་ཏུ་འདྲེས་པའི་རྟེན་འབྱུང་ལྟོས་གྲུབ་ལ་བརྟེན་ནས། བླ་མའི་སྐུ་ཚེ་བསྐལ་བརྒྱར་བརྟན་ཅིང་མཛད་འཕྲིན་ནམ་མཁའི་མཐས་གཏུགས་པར་རྒྱས་པའི་རྟེན་འབྲེལ་མ་འཆུགས་པ་དགོས་གལ་ཆེ་སྐོར་གསུངས་སོང་།

དེ་རིང་སྔ་དྲོ་ཆུ་ཚོད་ ༩ སྟེང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༨༨ ལ་ཕེབས་པའི་གཞུང་འབྲེལ་འཁྲུངས་སྐར་མཛད་སྒོ་སྲུང་གཙི་ཞུས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སུག་ཝིན་ཏར་སིང་ (Sukhvinder Singh Sukhu) མཆོག་དང་དམིགས་བསལ་སྐུ་མགྲོན་ཐེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་ཧུན་ཧྲིན་ཧན་མཆོག བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོ་བྱས་པའི་སྲི་ཞུའི་ལས་བྱེད་རྣམས་དང་། ཕྱོགས་མཐའ་ཁག་ནས་ཕེབས་པའི་བོད་མི་སེར་སྐྱ་མང་ཚོགས་བཅས་འཛོམས་འདུག

ཐོག་མར་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་བཤད་སྒྲོག་སྦྱངས་གནང་བའི་ནང་། དེ་རིང་གི་དུས་ཚེས་ཁྱད་པར་ཅན་འདིར། ང་ཚོས་དགའ་སྟོན་གྱི་རྩེད་འཇོར་རོལ་བ་དང་ཆབས་ཅིག ༸མགོན་པོ་མཆོག་གིས་འཛམ་གླིང་ཞི་བདེ་དང་མི་ཚེ་དགའ་སྐྱིད་ལྡན་པ་ཞིག་བསྐྲུན་ཐབས་སུ་སུས་ཀྱང་བསྒྲུན་དུ་མེད་པའི་ལེགས་སྐྱེས་བསྩལ་དང་སྩོལ་བཞིན་པའི་བཀའ་དྲིན་ལ་དྲན་ཤེས་བསྟེན་པའི་དུས་ཚེས་ཤིག་ཀྱང་ཡིན། བོད་གངས་ལྗོངས་མདོ་སྨད་སྐུ་འབུམ་ཚོ་དྲུག་གི་ཁོངས་སུ་སྐུའི་མཚན་དཔེ་མངོན་པར་བཞད་ཅིང་། ལྷ་ལྡན་རྒྱལ་ཁབ་ཏུ་ཕྱག་ན་པདྨོ་སྐུ་ཕྲེང་རིམ་བྱོན་གྱི་གསེར་ཁྲིར་འཁོད་དེ། མཁས་མང་འདུས་པ་རྒྱ་མཚོའི་དབུས་སུ་གཞུང་ལུགས་རབ་འབྱམས་ལ་སྦྱངས་པ་མཐར་སོན་པའི་དམ་འཇོག་མཛད་ཅིང་། དགུང་ལོ་བཅུ་དྲུག་ནས་བཟུང་གངས་ལྗོངས་ཆོས་སྲིད་ཀྱི་མཛད་ཁུར་བདག་གིར་བཞེས་ཏེ་སྤྱི་ཚོགས་ལེགས་བཅོས་ཀྱི་དགོངས་བཞེད་རྒྱ་ཆེར་བསྐྱངས་ནའང་། རྒྱ་གཞུང་གིས་བཙན་འཛུལ་བའི་གདོང་རིས་མངོན་རྗེན་དུ་བསྟན་ཏེ་བོད་ཀྱི་སྣོད་བཅུད་ཆགས་འཇིག་གི་སོ་མཚམས་སུ་སླེབས་སྐབས། བཙན་བྱོལ་གྱི་ལམ་བུ་སྙེགས་ཤིང་། རྒྱ་གར་དུ་བཙན་བྱོལ་བོད་གཞུང་བཙུགས་ཏེ་བོད་དོན་བདེན་མཐའ་གསལ་ཐབས་དང་། བོད་མིའི་སྤྱི་ཚོགས་བདེ་དོན་བཅས་ལ་བསམ་བརྗོད་ལས་འདས་པའི་བཀའ་དྲིན་བསྐྱངས་ཡོད་པ་རེད། ཅེས་གསུངས།

སྲིད་སྐྱོང་མཆོག་གིས། ༸གོང་ས་རྒྱལ་བ་རིན་པོ་ཆེ་མཆོག་ནི། ཡངས་པའི་འཇིག་རྟེན་སྤྱི་དང་བྱེ་བྲག་གངས་རིའི་ལྗོངས་ཀྱི་མེ་ཏོག་གང་ལ་ཕོག་པའི་ལྷ་སྐལ་འདི་ཕྱི་ཚེ་རབས་གཏན་གྱི་སྐྱབས་གནས་ཙམ་དུ་མ་ཟད། འཕྲལ་ཕུགས་བདེ་དགེ་ལེགས་ཚོགས་ཀུན་གྱི་རྩ་བ་ཉག་ཅིག་ཏུ་གྱུར་པས། བླ་ལྷའི་ཚད་མའི་ལུང་བསྟན་དང་། ༸མགོན་པོ་གང་ཉིད་ནས་ཡང་ཡང་ཞལ་བཞེས་མཛད་ཟིན་ལྟར། བོད་མི་སྤྱི་བོ་གནམ་བསྟན་ཡོངས་ནས་ཀྱང་༸མགོན་པོ་མཆོག་གི་བཀའ་དགོངས་ཚུལ་བཞིན་སྒྲུབ་པ་སྐལ་བའི་མཆོག་ཏུ་བརྩིས་ཏེ། བླ་སློབ་དམ་ཚིག་འོ་ཆུ་གཅིག་ཏུ་འདྲེས་པའི་རྟེན་འབྱུང་ལྟོས་གྲུབ་ལ་བརྟེན་ནས། བླ་མའི་སྐུ་ཚེ་བསྐལ་བརྒྱར་བརྟན་ཅིང་མཛད་འཕྲིན་ནམ་མཁའི་མཐས་གཏུགས་པར་རྒྱས་པའི་རྟེན་འབྲེལ་མ་འཆུགས་པ་དགོས་གལ་ཆེ་བ་དང་། དོན་མེད་ཕྱོགས་རིས་འཐེན་འཁྱེར་མི་བྱེད་པར། ནུས་པ་མཉམ་སྤུངས་ཀྱི་སྒོ་ནས་ད་ལྟའི་རྒྱལ་སྤྱི་ཁྱོན་ཡོངས་ཀྱི་ཆབ་སྲིད་གནས་བབ་འོག །བོད་ཀྱི་བདེན་དོན་འཐབ་རྩོད་ཆེད་གོ་སྐབས་དམ་འཛིན་གྱིས་ཆོལ་གསུམ་ཆོས་བརྒྱུད་ཡོངས་ནས་སྔར་ལྷག་མཐུན་སྒྲིལ་ཟོང་ཁ་གཅིག་ཏུ་བསྒྲིལ་ཏེ། བོད་བསྟན་སྲིད་མི་རིགས་ཀྱི་བདེན་དོན་འཐབ་རྩོད་ཆེད་འབད་བརྩོན་བྱ་རྒྱུ་ནི། སྐུའི་འཁྲུངས་སྐར་སྲུང་བརྩིའི་སྐབས་༸རྒྱལ་བ་དགྱེས་པའི་མཆོད་སྤྲིན་དང། སྐྱེ་ཀུན་རྗེས་སུ་འཛིན་པའི་རྒྱུ་ཚོགས་དངོས་གནས་དེ་ཡིན་པས། རང་ཅག་གངས་ཅན་པ་ཚང་མས་རང་དོན་རང་གཅེས་ཐོག་ཁེ་ཉེན་འཇུག་ལྡོག་སྤང་བླང་ཚུལ་བཞིན་གནང་སྐྱོང་ཡོང་བའི་འབོད་བསྐུལ་ཞུ་རྒྱུ་ཡིན། དུས་སྟོན་གྱི་གོ་སྐབས་འདི་བརྒྱུད། ༸མགོན་པོ་མཆོག་གི་སྐུ་ཕྱྭའི་སྲུང་སྐྱོབ་ལ་ད་བར་ཐུགས་འགན་ལྷོད་མེད་བཞེས་མཁན་རྒྱ་གར་དབུས་སའི་གཞུང་དང་། ཉིན་མཚན་དབྱེར་མེད་དུ་ལུས་དང་གྲིབ་མ་བཞིན་སྡོང་གྲོགས་ཞུ་མཁན་བཀའ་སྡོད་ལྷ་སྲུང་མཐུ་ཆེན་རྣམས་དང། དད་དམ་གཡོ་བ་མེད་པར་བཀའ་གསུང་སྤྱི་བོར་ལེན་པའི་སྐལ་ལྡན་སྐྱེ་བོ་མཐའ་དག་ལ་ལེགས་སོའི་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། མཐའ་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང། ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་གྱིས་གྲུབ་སྟེ། གྲུ་འཛིན་ནོར་བུའི་ཕོ་བྲང་པོ་ཏ་ལར་ཞབས་སོར་བདེ་འཁོད་ཐུབ་ཅིང་། བོད་མི་གཞིས་བྱེས་མཉམ་འཛོམས་ཀྱི་ཉི་མ་མགྱོགས་ནས་མྱུར་དུ་ཤར་བ་དང་། བོད་དོན་བདེན་མཐའ་མྱུར་དུ་གསལ་བ། ས་ཆེན་ཧྲིལ་པོར་ཞི་བདེའི་སྣང་བས་ཁེངས་པའི་སྨོན་འདུན་ཤུགས་དྲག་ཞུ་རྒྱུ་ཡིན། ཞེས་གསུངས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ༸གོང་ས་རྒྱལ་བ་རིན་པོ་ཆེ་མཆོག་ནི་རྒྱལ་བློན་པཎ་གྲུབ་སོགས་ཀྱི་སྤྲུལ་སྒྱུར་བསམ་གྱིས་མི་ཁྱབ་པས་མཐའ་ཡས་པའི་གདུལ་བྱ་རྣམས་མངོན་མཐོ་དང་ངེས་ལེགས་ཀྱི་ལམ་བཟང་པོར་བཀྲི་བར་མཛད་པའི་འཕྲིན་ལས་ཀྱི་འཇུག་པ་ས་གསུམ་ཀུན་ཏུ་ཁྱབ་ཅིང་བརྗོད་ཀྱིས་མི་ལངས་ཤིང་། ༸རྒྱལ་མཆོག་ལྔ་པ་ཆེན་པོས་བོད་ལྗོངས་ལུགས་ཟུང་གསེར་གྱི་འཁོར་ལོ་བདག་གིར་བཞེས་ཏེ་གངས་ལྗོངས་ཆབ་སྲིད་ཀྱི་གདུགས་དཀར་ཡུག་གཅིག་གི་གྲིབ་བསིལ་འོག་སྐྱེ་འགྲོ་མཐའ་དག་བདེ་བར་བཀོད། ལྷག་པར་༸རྒྱལ་མཆོག་བཅུ་བཞི་པ་ཆེན་པོ་གང་ཉིད་སྙིགས་དུས་སྐྱེ་འགྲོ་སྤྱི་དང་། བྱེ་བྲག་གངས་ཅན་ཆོས་ལྡན་ཞིང་དུ་དུས་ཚོད་གཉན་འཕྲང་ཆེ་བའི་སྐབས་འདིར་སྐུ་ཡི་བཀོད་པ་བཟུང་སྟེ། མཚན་དཔེའི་དཀྱིལ་འཁོར་ཡོངས་སུ་རྫོགས་ཤིང་ཐོས་བསམ་སྒོམ་གསུམ་དང་། འཆད་རྩོད་རྩོམ་གསུམ་སོགས་ཐུན་མོང་དང་ཐུན་མོང་མ་ཡིན་པའི་ཤེས་བྱའི་གནས་མཐའ་དག་ལ་མངའ་དབང་འབྱོར་ཞིང་ངེས་པ་དོན་གྱི་མཁས་པའི་ཁྱུ་མཆོག་ཏུ་གྱུར་ཅིང་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་རྒྱུད་ལ་སྐྱེས་ཤིང་གདུལ་བྱ་རྣམས་ལ་ཟབ་ཆོས་གསུང་གི་བདུད་རྩི་ཟད་མེད་དུ་སྟེར་བ་ནི་དེང་གི་རང་རེའི་སྤྱི་ཚོགས་ཙམ་མ་ཟད་གླིང་ཆེན་མང་པོའི་སྐྱེ་འགྲོ་རྣམས་ཀྱི་བསོད་ནམས་ཀྱི་བགོ་སྐལ་ཏུ་གྱུར་ཡོད། ཅེས་གསུངས།

ཡང་ཁོང་གིས། ཉེ་བའི་ཆར་འཛམ་གླིང་ཞི་བདེའི་མཚོན་རྟགས་བོད་མིའི་བླ་ན་མེད་པའི་དབུ་ཁྲིད། འཛམ་གླིང་ནང་པ་ཡོངས་ཀྱི་དད་གུས་ཞུ་ཡུལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་བརྙན་ཐུང་དུམ་བུ་ཞིག་རྒྱ་གཞུང་གིས་རྣམ་པ་འདྲ་མིན་བེད་སྤྱད་ནས་སྤྱི་ཚོགས་དྲ་ལམ་ཁག་ལ་བརྒྱུད་སྤེལ་གྱིས་མཚན་ཤས་ཞུ་ཐབས་བྱས་ཀྱང་། ༸གོང་ས་མཆོག་གི་མཛད་འཕྲིན་ནི་འཁོར་བའི་སྐྱོན་གྱིས་མ་གོས་པའི་མཛད་སྤྱོད་དྲི་མ་མེད་པ་ཡིན་པས་སྐུའི་གཟི་བརྗིད་དང་མཛད་པ་འཕྲིན་ལས་ཀྱི་འོད་ཟེར་དེ་བས་ཀྱང་ཕྱོགས་བཅུར་ཇེ་ཆེར་འཕྲོ་ཞིང་འཕེལ་བར་གྱུར་ཅིང་། སྐབས་དེར་རང་རིགས་བོད་མི་རྣམས་དང་། གཞན་གནད་ཡོད་མི་སྣ། ལྷག་པར་དུ་ཧི་མ་ལ་ཡའི་རི་རྒྱུད་ཀྱི་མི་མང་རྣམས་ཀྱིས་༸གོང་ས་མཆོག་གི་མཛད་འཕྲིན་ལ་དད་གུས་འགྱུར་བ་མེད་པ་གསལ་སྟོན་བྱེད་ཐུབ་པ་ནི་དེ་རིང་གི་གོ་སྐབས་འདི་བརྒྱུད་ནས་དམིགས་བསལ་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་དང་། བོད་ཀྱི་བདེན་པའི་འཐབ་རྩོད་ལ་བཀའ་དྲིན་ཆེ་བ་རྒྱ་གར་གཞུང་དང་མི་མང་རྣམས་དང་། དེ་བཞིན་ཨ་རི་དང་། ཡུ་རོབ་རྒྱལ་ཁབ་ཁག་གིས་གཙོས་བོད་དོན་ཐད་དངོས་ཤུགས་བརྒྱུད་གསུམ་ནས་རྒྱབ་སྐྱོར་གནང་མཁན་གྱི་རྒྱལ་སྤྱིའི་སྲིད་གཞུང་ཁག་དང་། མི་སྣ་ཡོངས་ལ་བོད་མི་མང་སྤྱི་འཐུས་ལྷན་ཚོགས་ནས་ཐུགས་རྗེ་ཆེ་ཞུ་རྒྱུ་དང་། མུ་མཐུད་བོད་དོན་ཐོག་སྔར་ལྷག་རྒྱབ་སྐྱོར་ཡོང་བའི་འབོད་བསྐུལ་ཞུ་རྒྱུ་ཡིན། ཞེས་གསུངས།

རྒྱ་གར་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སུག་ཝིན་ཏར་སིང་ (Sukhvinder Singh Sukhu) ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༨༨ ལ་ཕེབས་པར་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ཁྱེད་རང་བྱམས་སྙིང་རྗེ་དང་འཚེ་བ་མེད་པའི་ངོ་བོ་རེད། ཁྱེད་ཉིད་ཀྱིས་བརྩེ་བ་དང་། ཞི་བདེ་ཁྱབ་སྤེལ་བྱེད་མཁན་ཞིག་ལ་ངོས་འཛིན་བྱེད་ཀྱི་ཡོད་པ་རེད། ཁྱེད་ཉིད་ཀྱིས་རྟག་ཏུ་ང་ཚོར་བརྩེ་བ་དང་བྱིན་རླབས་གནང་ཡོད་པར་བརྟེན། ཧི་མ་ཅལ་གྱི་མི་མང་གི་ཆེད་དུ་སེམས་དགའ་དགོས་པ་ཞིག་རེད། ཁྱེད་རང་གིས་དུས་ཡུན་མང་པོའི་རིང་བོད་དང་བོད་མིའི་ཐོབ་ཐང་གི་དོན་དུ་འཐབ་རྩོད་ཐེངས་མང་གནང་བ་རེད། འོན་ཀྱང་ཁྱེད་ཉིད་ཀྱིས་བྱམས་དང་འཚེ་བ་མེད་པའི་ལྟ་བ་དེ་ནམ་ཡང་དོར་མེད། འཛམ་གླིང་འདིར་ཞི་བདེ་ཡོང་བའི་དོན་དུ་སྐུ་ལས་མང་པོ་བསྐྱོན་པ་རྣམས་ནམ་ཡང་ཆུད་ཟོས་སུ་འགྲོ་ཡི་མ་རེད། དེར་བརྟེན་ཁྱེད་ཉིད་ལ་ནོ་སྦེལ་ཞི་བདེའི་གཟེངས་རྟགས་ཀྱང་ཕུལ་ཡོད་པ་རེད། ༧གོང་ས་མཆོག་ཁྱེད་ཉིད་ཀྱིས་རྒྱ་གར་གྱི་གནའ་རབས་ལུགས་སྲོལ་དང་མི་ཚེའི་བསླབ་བྱ་སྐོར་ལ་གོ་རྟོགས་མང་པོ་སྤེལ་ཡོད་པ་རེད། འཛམ་གླིང་གི་མི་མང་ཡོངས་ཀྱིས་ཁྱེད་ཉིད་ལ་མཉེས་པོ་གནང་གི་ཡོད་རེད། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་ཉིན། ཁོང་ཉིད་ཀྱི་བསླབ་བྱ་རྣམས་ཉམས་ལེན་བྱ་དགོས་པའི་འབོད་སྐུལ་ཞུ་ཡི་ཡིན། སློབ་ཕྲུག་རྣམས་ཀྱིས་བྱམས་སྙིང་རྗེ་དང་ཞི་བདེ་ཁྱབ་སྤེལ་གཏང་རྒྱུའི་རེ་སྐུལ་ཞུ་ཡི་ཡོད། ཧི་མ་ཅལ་ནང་ཡོད་པའི་བོད་མི་རྣམས་ལ་ཞུ་རྒྱུར། ཧི་མ་ཅལ་ནི་ཁྱེད་ཚོའི་ནང་རེད། ཧི་མ་ཅལ་ནང་སྡོད་མཁན་ཚང་མ་ལ་བརྩེ་བ་ཡོད་ལ། མུ་མཐུད་དུ་བརྩེ་བ་སྤྲད་ཀྱི་ཡིན། ཧི་མ་ཅལ་གཞུང་གིས་ཁྱེད་ཚོའི་བདེ་སྡུག་གི་དོན་དུ་ལྟ་སྐྱོང་ལེགས་པོ་བྱེད་ཀྱི་ཡིན་སྐོར་གསུངས་སོང་།

གསར་འགོད་པ། བསྟན་འཛིན་ཕུར་བུ།