བོད་མིའི་སྒྲིག་འཛུགས་ནང་སྲིད་ལས་ཁུངས་ནས་རྗེས་འབྱོར་བོད་མིའི་སྡོད་ཁང་གི་དཀའ་ངལ་སེལ་སླད་རྒྱ་གར་ལྷོ་ཕྱོགས་ཀྱི་གཞིས་ཆགས་ཆེ་ཁག་ཚུད་པའི་གཞིས་ཆགས་ ༩ ཙམ་གྱི་ནང་གཞིས་ས་དང་སྡོད་ཁང་གསར་རྒྱག་གི་འགེངས་ཤོག་སྐོང་དུ་འཇུག་བཞིན་འདུག
![](https://tibettimes.net/wp-content/uploads/2023/07/IMG20230719102241-scaled.jpg)
དེ་རིང་ཞོགས་པར་དྷ་ས་ས་གནས་མགོ་འཛིན་ལས་ཁུངས་ཀྱི་ཕུན་ཚོགས་ཁང་གསར་ཚོགས་ཁང་དུ། དྷ་ས་ས་གནས་མགོ་འཛིན་ལས་ཁུངས་ཀྱི་གོ་སྒྲིག་འོག རྗེས་འབྱོར་བོད་མིའི་ས་ཁང་བགོ་འགྲེམས་སྐོར་གྱི་ཚོགས་འདུ་བསྡུས་ཏེ། དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས་བོད་མིའི་སྒྲིག་འཛུགས་ཀྱི་རྗེས་འབྱོར་བོད་མིའི་ས་ཁང་བགོ་འགྲེམས་ཀྱི་ཐོ་འགོད་བྱེད་ཕྱོགས་སྐོར་ལ་ངོ་སྤྲོད་གནང་སྟེ་འགེངས་ཤོག་བཀྲམ་འདུག་ལ། དེ་རིང་དང་སང་ཉིན་གྱི་དུས་ཡུན་ནང་ཚུད་ས་ཁང་དགོས་མཁན་རྣམས་ཀྱིས་ཨོ་རི་ས་ཕུན་ཚོགས་གླིང་དང་། མན་སྤར་ཕན་བདེ་གླིང་། མོན་གྷོ་འདོད་རྒུ་གླིང་། སྤེལ་ཀོབ་ཅོ་ཀུར། ཧོན་སུར་རབ་རྒྱས་གླིང་། ཀོ་ལེ་གྷལ་དོན་ལྡན་གླིང་། སྦེལ་ཀོབ་ལུགས་བསམ། བདེ་སྐྱིད་སླར་གསོ། སྡེ་ར་རྡུན་བཅས་ཀྱི་གཞིས་ཁོངས་སུ་གཞིས་ས་དང་ཁང་པ་མཁོ་སྤྲོད་ཀྱི་རིམ་པ་མི་འདྲ་བ་ལྔ་ཡི་ཐོག་ནས་ས་ཆ་དང་ལོ་དུས་ཀྱི་འགེངས་ཤོག་སྐོང་དགོས་ཀྱི་འདུག
ས་གནས་དང་ལོ་དུས་ཀྱི་གདམ་ཀའི་ནང་དུ། དང་པོ་ཨོ་རི་ས་ཕུན་ཚོགས་གླིང་ལ་ལོ་དུས་རྩིས་ལོ་ ༢༠༢༤ ནས་ ༢༠༢༥ བར་དང་། གཉིས་པ་མན་སྤར་ཕན་བདེ་གླིང་ལ་རྩིས་ལོ་ ༢༠༢༥ ནས་ ༢༠༢༦ བར། གསུམ་པ་མོན་གྷོ་ལ་རྩིས་ལོ་ ༢༠༢༦ ནས་ ༢༠༢༧ བར། དེ་ནས་སྦེལ་ཀོབ་ཅོ་ཀུར་དང་ཧོན་སུར། ཀོ་ལེ་གྷལ། སྦེལ་ཀོབ་ལུགས་བསམ་དང་བདེ་སླར། སྡེ་ར་རྡུན་བཅས་གསལ་འདུག་ལ། འགེངས་ཤོག་སྐོང་མཁན་གྱིས་སོ་སོའི་རེ་འདོད་ལྟར་དང་པོ་དང་གཉིས་པ། གསུམ་པ་བཅས་ས་གནས་མི་འདྲ་བ་གསུམ་ལ་རྟགས་རྒྱག་ཆོག་གི་འདུག
གོང་བཀོད་ས་གནས་ཁག་ལས་ཨོ་ཌི་ཤ་ཕུན་ཚོགས་གླིང་དང་། མན་སྤར་ཕན་བདེ་གླིང་དུ་འགྲོ་འདོད་ཡོད་མཁན་ཚོར་ནང་སྲིད་ལས་ཁུངས་ནས་གཞིས་ས་དང་སྡོེད་ཁང་གཉིས་ཀ་མཁོ་སྤྲོད་གནང་རྒྱུ་དང་། ལྷོ་ཕྱོགས་མོན་གྷོ་དང་བདེ་སྐྱིད་སླར་གསོའི་ཁྱབ་ཁོངས་ཅོ་ཀུར་གྲོང་སྡེར་གཞུང་ནས་གཞིས་ས་མཁོ་སྤྲོད་དང་སྡོད་ཁང་གསར་རྒྱག་ཆེད་ཧིན་སྒོར་འབུམ་ ༥། ལྷོ་ཕྱོགས་ཀོ་ལི་གྷལ་དང་ཧོན་སུར་གཞིས་ཆགས་སུ་གཞིས་ས་དང་ཧིན་སྒོར་འབུམ་ ༧་༥། སྦེལ་ཀོབ་ལུགས་བསམ་དང་བདེ་སྐྱིད་སླར་གསོའི་གཞིས་ཆགས་སུ་གཞིས་ས་དང་ཧིན་སྒོར་འབུམ་ ༢་༥། སྡེ་ར་རྡུན་དུ་སྡོད་ཁང་རྒྱག་ཡུལ་གཏན་འཁེལ་བྱུང་མི་འདུག་ལ། དོ་བདག་སོ་སོ་ནས་འགྲོ་གྲོན་ཆ་ཚང་གཏོང་དགོས་ཀྱི་ཡོད་འདུག
འདི་གའི་གསར་འགོད་པས་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་སུ་དེའི་སྐོར་དྲིས་པར་ཁོང་གིས། བོད་མིའི་སྒྲིག་འཛུགས་བཀའ་ཤག་གིས་སྡོད་ཁང་མེད་པའི་མི་མང་གི་དཀའ་ངལ་ཐད་ལ་བཀོད་ཁྱབ་ཕེབས་པ་གཞིར་བཟུང་ཐོག མི་མང་ལ་ས་ཁང་བགོ་འགྲེམས་སྐོར་ལ་འགྲེལ་བཤད་བརྒྱབ་ཡོད་ལ། མི་མང་གིས་སོ་སོའི་འདོད་མོས་ཐོག་འགེངས་ཤོག་བསྐང་རྒྱུ་ཡིན་ལ། དོ་བདག་སོ་སོའི་ལག་ཏུ་འགེངས་ཤོག་སྤྲད་ཡོད་སྐོར་འགྲེལ་བརྗོད་གནང་བྱུང་།
དྷ་ས་ས་གནས་མགོ་འཛིན་གྱི་ཁྱབ་ཁོངས་སུ་སྡོད་ཁང་མེད་པའི་རྗེས་འབྱོར་བ་ག་ཚོད་ཡོད་མེད་དྲིས་པར་ཁོང་གིས། ད་ལྟའི་ཆར་དྷ་ས་ས་གནས་མགོ་འཛིན་གྱི་ཁྱབ་ཁོངས་སུ་ནང་མི་ ༢༠༠ ལྷག་དང་། ནོར་བུ་གླིང་གར་མི་མང་ ༡༠༠ ལྷག་ཡོད་སྐོར་བརྗོད་བྱུང་།
དྷ་ས་ཁུལ་དུ་ཡོད་པའི་མི་མང་ཕལ་ཆེ་བས་དྷ་སའི་ཉེ་འཁོར་ནས་ས་ཆ་དང་ཁང་པ་འཐོབ་པར་རེ་བ་ཆེན་པོ་རྒྱག་གི་འདུག་སྟབས་དེའི་སྐོར་ཁོང་གིས། དྷ་རམ་ས་ལའི་ས་ཆའི་གནས་སྟངས་ལ་མཚོན་པ་ཡིན་ན། ས་ཆ་མང་པོ་ཞིག་ཤིང་ནགས་ཀྱི་ས་ཆ་ཆགས་བསྡད་ཡོད་པ་དེ་དངོས་ཡོད་གནས་སྟངས་རེད། ཤིང་ནགས་ཀྱི་ས་ཆ་ཆགས་བསྡད་ཡོད་དུས། ང་ཚོས་ལག་པ་འཆང་ཆོག་ཆོག་ཡོད་པ་མ་རེད། དེ་ཡང་རྒྱ་གར་དབུས་གཞུང་དང་མངའ་སྡེ་གཞུང་གི་ཆོག་མཆན་ཐག་གཅོད་དགོས་པ་རེད། དམིགས་བསལ་དྷ་རམ་ས་ལ་མཚོན་ན། ཤིང་ནགས་ས་ཆ་གཞི་རྒྱ་ཆེན་པོ་ཡིན་དུས། ང་རང་ངོས་ནས་ལས་ཀ་བྱེད་འདོད་ཀྱང་བྱེད་མི་ཐུབ་པ་ཞིག་ཏུ་མཐོང་གི་འདུག ཡིན་ནའང་། ང་ཚོས་སྔོན་མ་ནས་ས་ཆའི་དཀའ་ངལ་ཐད་འབད་བརྩོན་བྱས་ཡོད་ལ། ད་དུང་མུ་མཐུད་འབད་བརྩོན་བྱ་ངེས་ཡིན། ཞེས་བརྗོད་བྱུང་།
འཛིན་སྐྱོང་བཀའ་ཤག་ནས་རྗེས་འབྱོར་བོད་མི་བགྲེས་ཤག་དང་རང་བདག་ཁང་པ་མེད་མཁན་ཚོར་དམིགས་ཏེ་ཐོག་མར་མི་གྲངས་བསྡུ་རུབ་བྱས་ཏེ་མི་གྲངས་ ༢༠༠༠ བརྒལ་ཟིན་ཡོད་ལ། དེ་དག་ལ་ཞིབ་འཇུག་གི་ལས་རིམ་གྲུབ་སྟེ་ད་ལྟའི་ཆར་ས་གནས་ཁག་ཏུ་དེ་སྔའི་ཐོ་གཞུང་ནང་དུ་ཚུད་པའི་མི་མང་རྣམས་ཀྱིས་ས་གནས་བགོ་འགྲེམས་ཀྱི་ཐོ་གཞུང་སྐོང་བའི་ལས་རིམ་དེར་བསླེབས་འདུག
གསར་འགོད་པ། བྱམས་པ་ཚེ་རིང་།
སྣེ་ལེན་ཁང་གསར་རྙིང་གཉིས་དང་། གསོག་སྒར་ཤེས་རབ་དགའ་ཚལ། དྷ་རྟིང་བོད་ཁྱིམ་རྣམས་དྷ་སའི་བོད་མི་ཁ་ཐོར་ཚོ་ལ་མི་སྤྲོད་ན་ཅི་བྱེད་ཡ་རེད། ང་ཚོས་ལག་པ་འཆང་ཆོག་ཆོག་ཡོད་མ་རེད་ཟེར་ན། འོ་ན་ཕྱིར་རྒྱ་གར་གཞུང་ལ་རྩིས་སྤྲོད་འཆར་ཡིན་ནམ།
ད་ཡིན་ན་གསར་འབྱོར་ཚོས་རང་གི་མི་གཞི་མངོན་བཅུགས་སོང་། བཀའ་ཤག་སྐབས་བཅོ་ལྔ་དང་ད་ལྟའི་བཀའ་ཤག་སྐབས་བཅུ་དྲུག་པ་གཉིས་ཀྱིས་དྷ་ས་ནས་ཁང་ས་མི་རག་པ་གཅིག་མཚུངས་སུ་གསུངས་ཀྱང་། ད་དུང་ཨུ་ཚུགས་རྒྱག་གི་འདུག ས་གནས་བརྒྱད་གནས་རིམ་བཞིན་འདེམས་བཅུགས་ནའང་མི་དགོས་ཟེར། དོན་ངོ་མ་དྷ་སར་ཁང་པ་བརྒྱབ་ཀྱང་ཡུན་རིང་པོ་མི་འགོར་བར་སྟོང་པ་བཞག་ཏེ་རྐུབ་ཀྱི་ཐལ་རྡུལ་སྤྲུགས་ཏེ་འགྲོ་རྒྱུ་ཐག་ཆོད་པ་ཞིག་རེད།