༧གོང་ས་མཆོག་ནས་བོད་ཀྱི་སྐད་ཡིག་གཉིས་མ་བརླག་པ་ཞིག་དང་། བོད་ལ་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ཙམ་ཡོད་པ་དེ་ཀློག་ཐུབ་པ་དང་བསམ་བློ་གཏོང་ཐུབ་པ་བྱུང་ན་གལ་ཆེན་པོ་ཡིན་སྐོར་བཀའ་སློབ་བསྩལ་འདུག
ཕྱི་ཚེས་༢༦ ཉིན་ལ་དྭགས་ཞི་བའི་ཚལ་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཚོགས་པའི་འཇམ་དབྱངས་བློ་འཕེལ་སློབ་གྲྭའི་སྐབས་དང་པོའི་མཐར་ཕྱིན་སློབ་མའི་ཤེས་ཡོན་ཉམས་གསོག་གི་དགེ་ལས་སློབ་ཕྲུག་རྣམས་ལ་མཇལ་ཁ་དང་བཀའ་སློབ་བསྩལ་འདུག
དེ་ཡང་མཇལ་ཁའི་སྐབས་སུ་༧གོང་ས་མཆོག་ནས་ངོས་ཀྱིས་མགོ་ཁྲིད་ནས་བོད་པ་ཚོ་སེམས་ཤུགས་ནམ་ཡང་ཆག་གི་ཡོད་པ་མ་རེད། རྒྱ་ནག་གཞུང་གིས་ཐོག་མཐའ་བར་གསུམ་དུ་དྲག་གནོན་བྱེད་པ་དང་། སློབ་གསོ་གཏོང་བ་ཞེ་དྲགས་བྱེད་ཀྱི་ཡོད་པ་རེད། ཡིན་ནའང་། ང་ཚོ་བོད་པའི་བློ་བརྟན་པོ་ཞེ་བོ་ཞིག་བསྡད་ཀྱི་ཡོད་པ་རེད། ད་ཆ་རྒྱ་ནག་ནང་དུ་བོད་ཀྱི་ནང་ཆོས་ལ་དོ་སྣང་བྱེད་མཁན་ཇེ་མང་ནས་ཇེ་མང་དུ་འགྲོ་བཞིན་འདུག ངོས་རང་ལོ་ཁ་ཤས་ཀྱི་སྔོན་ལ་བོད་ནས་ཡོང་བའི་ལོ་ཌོན་གཙུག་སློབ་གླིང་གི་སློབ་ཕྲུག་ལ་ཐུག་སོང་། ཁོང་ཚོས་བོད་ཡུལ་རྒྱ་ཡུལ་དུ་བསྒྱུར་རྒྱུ་ཁག་པོ་ཞེ་དྲགས་རེད། བོད་པའི་བློ་བསྒྱུར་རྒྱུ་ཁག་པོ་ཞེ་དྲགས་རེད། རིམ་བཞིན་རྒྱ་ཡུལ་དེ་བོད་ཀྱི་ཆོས་དང་རིག་གཞུང་གི་ཐོག་ཏུ་འགྲོ་བའི་གོ་སྐབས་འདུག་ཟེར། རྒྱ་ནག་ཏུ་བོད་ཀྱི་ནང་ཆོས་ལ་དོ་སྣང་བྱེད་མཁན་ཇེ་མང་ཇེ་མང་དུ་འགྲོ་བཞིན་འདུག་དེ་འདྲ་ཟེར་གྱི་འདུག དེ་ནི་ང་ཚོ་བོད་པར་བདེན་པ་ཡོད་པའི་རྟགས་རེད། སེམས་ཤུགས་མ་ཆག ཧུར་ཐག་བྱོས། ཞེས་གསུངས་འདུག
ཡང་ཁོང་གིས་ང་ཚོ་ཚང་མ་དད་པ་དང་དམ་ཚིག་གཡོ་བ་མེད་པར་བསྡད་ཀྱི་ཡོད་པ་རེད། དེ་ཡིས་བདེན་པའི་མཐའ་གསལ་ཡོང་གི་རེད། བློ་བདེ་བོ་བྱོས། གཙོ་བོ་ང་ཚོ་བོད་པའི་ཡི་གེ་དང་སྐད་གཉིས་མ་བརླག་པ་བྱས། ཁྱེད་ཚོས་ག་ཚོད་ཐུབ་ཐུབ་ཀྱིས་སློབ་སྦྱོང་བྱོས། ང་ཚོར་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ཙམ་ཡོད་པ་རེད། དེ་ཀློག་ཐུབ་པ་དང་བསམ་བློ་གཏོང་ཐུབ་པ་བྱུང་ན་གལ་ཆེན་པོ་རེད། ཅེས་བཀའ་སློབ་བསྩལ་འདུག
