སྒྲིག་གཏོར་སྒྲིག་བཟོའི་ལས་འགུལ།

སྤྱི་ཟུར་ཆབ་བྲག་ལྷ་མོ་སྐྱབས།

དམངས་གཙོའི་གཞུང་གི་བདག་པོ་ནི་མི་དམངས་ཉིད་ཡིན་ལ། མི་དམངས་ཀྱི་རེ་འདུན་བཞིན་བཅས་པའི་ཁྲིམས་ལུགས་ནི་ཆེས་བླ་ན་མེད་པའི་དམངས་གཙོའི་རྒྱལ་པོ་དེ་ཡིན། དེ་བས་ཁྲིམས་ལུགས་ཀྱི་མདུན་ས་ནས་མི་ཚང་མ་འདྲ་མཉམ་ཡིན། ཁྲིམས་ལུགས་དང་འགལ་ན་ཁྲིམས་ལྟར་གྱི་ཆད་པ་ངེས་པར་འཁུར་དགོས། དེ་བས་ཁྲིམས་ལུགས་ཚང་མ་འཐུས་ཚང་སྤུས་དག་སྤྱི་སྙོམ་ཀུན་ཕན་ཞིག་ངེས་པར་ཡིན་དགོས།

དེ་བས་ཐེངས་འདིར་ཁྲིམས་སྒྲིག་བསྐྱར་བཅོས་འཆར་ཟིན་ཚོགས་ཆུང་གིས་ཡོངས་ཁྱབ་གསལ་བསྒྲགས་ཤིག་སྤེལ་ནས་བཅའ་ཁྲིམས་གཙོས་ཁྲིམས་ལུགས་བསྐྱར་བཅོས་ཐད་ལ་མི་མང་གི་བསམ་འཆར་དང་རེ་བ་སྡུད་ལེན་བྱེད་པ་འདི་རྗེས་སུ་ཡི་རང་ཞུ་འོས་པ་ཞིག་རེད། འོན་ཀྱང་འདིར་ཚང་མས་གསལ་བོར་ཤེས་དགོས་པ་ཞིག་ནི། ད་ལྟའི་བོད་མིའི་སྒྲིག་འཛུགས་ལ་བྱུང་བའི་དཀའ་རྙོག་འདི་བཅའ་ཁྲིམས་འཐུས་ཚང་དང་ཁ་གསལ་མེད་པ་ལ་བརྟེན་ནས་བྱུང་བའི་གནད་དོན་ཞིག་མ་ཡིན་པར་ཐོག་མར་སྤྱི་འཐུས་རྒྱུན་ལས་དང་། དེ་ནས་ཁྲིམས་བཟོ་ལྷན་ཚོགས་ཀྱིས་བཅའ་ཁྲིམས་ཀྱི་དགོངས་དོན་ཇི་བཞིན་ལག་བསྟར་མ་ཐུབ་པ་ལ་བརྟེན་ནས་བྱུང་བ་ཞིག་ཆགས་ཡོད། འདིའི་སྐོར་ནས་ད་སྔ་མང་ཙམ་བྲིས་ཡོད་པས་བསྐྱར་ཟློས་མི་བྱེད། ད་དཀའ་ངལ་འདི་སེལ་ཆེད་བཅའ་ཁྲིམས་ཀྱི་དོན་ཚན་འགའ་རེར་བསྐྱར་བཅོས་ཅུང་ཙམ་རེ་མི་གཏོང་ཀ་མེད་ཆགས་པ་རེད། འདི་ནི་ཁྲིམས་སྒྲིག་གཏོར་ནས་ཁྲིམས་སྒྲིག་བཟོ་སྟངས་ཤིག་རེད།

ད་ལྟ་མི་མང་གི་རེ་འདུན་གཙོ་བོ་གཅིག་ནི། ཁྲིམས་བཟོ་ལྷན་ཚོགས་ཀྱིས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་གཞན་གཉིས་བཅས་གསར་བསྐོ་བྱ་རྒྱུའི་བཅའ་ཁྲིམས་བསྐྱར་བཅོས་གནང་མ་ཐུབ་པ་ལ་བརྟེན་ནས་ད་ཆ་ཁྲིམས་ཞིབ་པ་ཆེ་བ་མེད་པ་དང་དེ་མེད་པས་དམ་འབུལ་ཞུ་ས་ཡང་མེད་སོང་བའི་དཀའ་ངལ་ཆེན་པོ་འདི་ཡིན་པས། ཟླ་དགུ་བའི་གྲོས་ཚོགས་སྐབས་སུ། བཅའ་ཁྲིམས་དོན་ཚན་རེ་གསུམ་པའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་སྐོར་གྱི་ནང་གསེས་དོན་ཚན་ཁག་ལ་བསྐྱར་བཅོས་གང་འོས་དང་། དམ་འབུལ་སྐོར་གྱི་བཅའ་ཁྲིམས་ཀྱི་དོན་ཚན་ཉེར་ལྔ་པ་དང་ཞེ་བདུན་པ། རེ་གསུམ་པའི་ནང་གསེས་གསུམ་པ་བཅས་ལ་ངེས་པར་ལེགས་བཅོས་ཐུབ་དགོས་པ་དེ་རེད།

བསྐྱར་བཅོས་ཇི་ལྟར་བྱ་འོས་པའི་སྐོར་ལ་ཡང་བསམ་ཚུལ་མི་འདྲ་བ་འགའ་རེ་ཡོད་ན་ཡང་གྲོས་ཚོགས་སྐབས་སྔོན་མའི་ནང་བཀའ་ཤག་གིས་བཏོན་པའི་བཅའ་ཁྲིམས་བསྐྱར་བཅོས་ཁྲིམས་འཆར་ཡིག་ཆ་ཨང་༡༩ པ་དེ་འོས་ཤོས་སུ་མཐོང་། སྤྱི་འཐུས་རྒྱུན་ལས་ནས་བཏོན་པའི་བཅའ་ཁྲིམས་བསྐྱར་བཅོས་ཁྲིམས་འཆར་ཡིག་ཆ་ཨང་༢༠ དེ་ཡང་མ་འོས་པ་ཆེར་མེད་མོད། བཅའ་ཁྲིམས་རིན་པོ་ཆེ་དང་བོད་ཀྱི་རྒྱལ་དར་གྱི་མདུན་དུ་དམ་འབུལ་ཞུས་ན་ལྷག་པར་དགེ་མཚན་ཆེ་བར་མཐོང་སྟེ། དམངས་གཙོའི་ཆེས་བླ་ན་མེད་པ་ནི་ཁྲིམས་ལུགས་ཡིན་པ་དང་བོད་ཀྱི་རྒྱལ་དར་འདི་ནི་ཆོས་སྲིད་ལུགས་གཉིས་ཀྱི་བོད་རྒྱལ་ཁབ་ཆེན་པོའི་འདས་མ་ད་གསུམ་གྱི་མཚོན་བྱེད་ཉག་གཅིག་ཡིན་པས་སོ།།

གནད་དོན་གཞན་ཞིག་ནི། བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆའི་ཐད་ལ་དེ་སྔ་ཞིག་ནས་བསམ་འཆར་མང་པོ་ཞིག་བྱུང་དང་འབྱུང་བཞིན་ཡོད། དེ་ཡང་གཙོ་བོ་སྤྱི་འཐུས་གང་མང་ཞིག་ལ་སྤྱི་སེམས་མེད་པར་ཕྱོགས་ཞེན་རིང་ལུགས་པ་ཆགས་ནས་དམངས་གཙོའི་ཀ་བ་གསུམ་པོར་གས་ཆག་ཤོར་བ་འདི་རེད། འདིས་བོད་དོན་འཐབ་རྩོད་ཀྱི་ཐུན་མོང་ནུས་པ་མཉམ་འདོན་ཐད་ལ་དཀའ་ངལ་དང་འགལ་རྐྱེན་ཆེན་པོ་འབྱུང་ངེས་པས་སྒྱུར་བཅོས་ཆེན་པོ་ཞིག་གཏོང་དགོས་པའི་རེ་བ་འདོན་གྱིན་ཡོད།

༡༽ ཆོས་བརྒྱུད་སྤྱི་འཐུས་ཀྱི་འོས་ཤོག་དེ་ཆོས་བརྒྱུད་གང་ལ་གཏོགས་པའི་སེར་སྐྱ་ཚང་མར་འོས་འཕེན་གྱི་ཐོབ་ཐང་ཡོད་པ་ཞིག་བཟོ་དགོས་ཟེར། དེའི་རྒྱུ་མཚན་ནི་ཆོས་བརྒྱུད་ཁོངས་སོ་སོ་ན་མི་སྐྱ་ཕོ་མོ་ཡང་ཧ་ཅང་མང་བས་འོས་འཕེན་གྱི་ཐོབ་ཐང་ལེན་ཆོག་པ་དེ་རེད།

༢༽ཆོལ་ཁོངས་དང་ཆོས་བརྒྱུད། རྒྱལ་ཁོངས་ས་གནས་བཅས་པའི་སྤྱི་འཐུས་ཚང་མའི་སྔོན་འགྲོའི་འོས་གཞི་ཁྱབ་ཁོངས་སོ་སོ་ནས་གདམ་རྒྱུ་དང་། དངོས་གཞིའི་འོས་བསྡུའི་སྐབས་སུ་འོས་འཕེན་པ་ཡོངས་ནས་འོས་ཤོག་བླུགས་ན་བཟང་ཟེར། རྒྱུ་མཚན་ནི། ཁོངས་སོ་སོའི་མི་མང་གི་འདོད་མོས་གཞི་རྩར་བཞག་པའི་ཐོག་ནས་མི་མང་ཡོངས་ཀྱིས་བདམས་ན་སྤྱི་འཐུས་ཚོའི་འོས་གྲངས་ཚད་མཐོན་པོར་ཡོང་བ། སྤྱི་འཐུས་སོ་སོར་མཚོན་ན་ཡང་རང་ཉིད་བོད་མི་ཡོངས་ཀྱིས་འོས་འདེམས་བྱུང་བའི་བོད་མི་མང་གི་སྤྱི་འཐུས་ངོ་མ་ཞིག་ཡིན་སྙམ་པ། དེ་ལ་བརྟེན་ནས་ཆོལ་ཁའི་ཕྱོགས་ཞེན་ཇེ་ཆུང་ལ་སོང་ནས་སོ་སོའི་འོས་འགན་བོད་སྤྱི་པའི་རྩ་དོན་གཙོ་བོར་འཛིན་ཐུབ་པ་ཞིག་ཡོང་རེ་ཡོད།

༣༽ བཅའ་ཁྲིམས་དོན་ཚན་ང་དྲུག་པའི་དགོངས་དོན་ལྟར་དུ། མང་ཚོགས་ལ་མང་མོས་ཐག་གཅོད་འོས་བསྡུའི་འགན་དབང་སྤྲོད་དགོས། རྒྱུ་མཚན་ནི། གནད་དོན་འདི་གྲོས་ཚོགས་སུ་ཐག་གཅོད་དཀའ་བ་ཞིག་ཡིན་པར་མ་ཟད་ད་ལྟའི་བཙན་བྱོལ་བོད་མིའི་སྤྱི་ཚོགས་སུ་གནད་དོན་ཆེན་པོ་ཞིག་ཏུ་འགྱུར་བཞིན་པས་འབྱུང་འགྱུར་ལ་ཕན་ལས་གནོད་ཆེ་བར་མཐོང་གིན་ཡོད། དེ་བས་དམངས་གཙོའི་དོན་གྱི་བདག་པོ་མི་མང་གི་ཆེས་མཐོའི་དབང་ཚད་ཀྱིས་ཐག་བཅད་ན་་ཤིན་ཏུ་འོས།

མཇུག་ཏུ་ཞུ་དོན། ད་ལྟའི་དཀའ་རྙོག་འདིས་རྐྱེན་བྱས་ཏེ། བོད་མི་མང་པོ་ཞིག་འུ་ཐུག་ནས་བཅའ་ཁྲིམས་ནང་ལ་བསྐྱར་དུ་༧རྒྱལ་དབང་ན་རིམ་གྱི་དབུ་ཁྲིད་མཚན་མཐོང་དང་སྐུ་དབང་དམིགས་བསལ་ཞིག་ཡོད་པ་བཟོ་དགོས་པའི་བསམ་ཚུལ་ཡང་ཡོང་གི་ཡོད་པ་འདི་དག་ནི། ལྷག་བསམ་ཞིག་ཅི་ལ་མིན་ཡང་། མི་མང་གི་ངོས་ནས་དམངས་གཙོའི་འོས་འགན་འཁུར་མ་ཤེས་པ་ཞིག་དང་། ༧རྒྱལ་བ་རིན་པོ་ཆེའི་རིང་ནས་ཡིད་ལ་བརྣགས་པའི་དགོངས་དོན་དང་མི་མཐུན་པ། ད་ལྟའི་དམངས་གཙོའི་མཚན་ཉིད་ཡོངས་སུ་ཚང་བའི་བཅའ་ཁྲིམས་རིན་པོ་ཆེའི་ངོ་བོ་གཞན་དུ་འགྱུར་རྒྱུ་ཞིག་ཡིན་པ་ལ་བསམ་བློ་གཏོང་མ་ཐུབ་པ་ཞིག་ཡིན་པའི་གསལ་འདེབས་དང་བཅས།

སྒྲིག་གཏོར་སྒྲིག་བཟོའི་ལས་འགུལ་འདི་འུ་ཐུག་པའི་བྱ་བ་ཞིག་ཡིན་ན་ཡང། མ་འོངས་པར་ཡང་བསྐྱར་གནད་དོན་འདི་རིགས་མི་འབྱུང་ཆེད་དུ་མི་མང་གི་བསམ་འཆར་དང་རེ་འདུན་གལ་ཆེན་ཁག་ཅིག་ཡི་གེར་བཀོད་པའོ།། །།