ཟླ་འདིའི་ཕྱི་ཚེས་ ༡༦ ཉིན་བོད་ཀྱི་ཆབ་སྲིད་བཙོན་ཟུར་བསོད་ནམས་རྒྱལ་པོ་ལགས་ནད་གཞིའི་རྐྱེན་གྱིས་བོད་ཀྱི་རྒྱལ་ས་ལྷ་སར་འདས་གྲོངས་སུ་ཕྱིན་ཡོད་འདུག
འདི་གའི་གསར་འགོད་པས་དབུས་གཙང་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གི་འབྲེལ་ཡོད་ལས་བྱེད་ཅིག་ལ་བཀའ་འདྲི་ཞུས་པར་ཁོང་གིས། དམ་པ་ཁོང་ནད་མནར་རྐྱེན་གྱིས་འདས་གྲོངས་སུ་ཕྱིན་འདུག ཅེས་བརྗོད་བྱུང་བ་དང་། དབུས་གཙང་ཆོལ་ཁའི་ངོས་ནས་དམ་པ་ཁོང་ལ་གདུང་ཤུགས་དྲག་པོས་མྱ་ངན་ཞུས་པ་དང་སྦྲགས་ནས། དཔལ་ལྡན་དགའ་ལྡན་ཕོ་བྲང་དང་རྣམ་རྒྱལ་གྲྭ་ཚང། ཀིརྟི་བྱེས་པ་གྲྭ་ཚང། གདན་ས་གསུམ། སྒྲོལ་མ་གླིང་། བྱང་རྩེ་གྲྭ་ཚང། ཤར་རྩེ་གྲྭ་ཚང་བཅས་ལ་བསྔོ་རྟེན་ཕུལ་བ་སོགས་བྱས་ཏེ། འདས་པོ་གང་ཉིད་ཚེ་རབས་ནས་ཚེ་རབས་བར་འཕགས་མཆོག་སྤྱན་རས་གཟིགས་ཀྱིས་རྗེས་སུ་བཟུང་བའི་སྨོན་ལམ་ཤུགས་དྲག་ཞུ་བཞིན་ཡོད་པ་དབུས་གཙང་ཆོལ་ཁའི་དྲ་ཐོག་ཏུ་སྤེལ་འདུག
བོད་ཀྱི་ཆབ་སྲིད་བཙོན་ཟུར་བསོད་ནམས་རྒྱལ་པོ་ལགས། ཐོག་མར་ཕྱི་ལོ་ ༡༩༨༧ ལོའི་ཟླ་ ༩ ཚེས་ ༢༧ ཉིན་བོད་ཀྱི་རྒྱལ་ས་ལྷ་སར་འབྲས་སྤུངས་དགོན་པའི་དགེ་འདུན་པ་ ༢༡ གིས་སྣེ་ཁྲིད་པའི་ཞི་རྒོལ་ལས་འགུལ་ནང་མཉམ་ཞུགས་བྱས་སྟབས། རྒྱ་ནག་གཞུང་གིས་དགེ་འདུན་དེ་དག་ལ་གསར་བརྗེ་ངོ་ལོག་པའི་ནག་ཉེས་སོགས་གཡོགས་ཏེ། བསོད་ནམས་རྒྱལ་པོ་ལགས་སུ་ལོ་གསུམ་གྱི་བཙོན་འཇུག་ཁྲིམས་ཐག་བཅད་པ་དང་། དེ་རྗེས་བཙོན་གྲོལ་ཐོབ་པ་དང་རྒྱ་གར་དུ་ནང་པའི་གནས་ཆེན་ཁག་དང་༧གོང་ས་མཆོག་ལ་མཇལ་ཁ་ཞུ་བའི་གོ་སྐབས་ཐོབ་པ་སོགས་གནས་སྐོར་ཕེབས་རྗེས། ཕྱིར་བོད་དུ་ལོག་སྐབས་བོད་དང་བལ་ཡུལ་གྱི་ས་མཚམས་འགྲམ་གྱི་མགྲོན་ཁང་ཞིག་ནས་རྒྱ་ནག་གཞུང་གིས་ཁོང་འཛིན་བཟུང་བྱས་ཏེ། ཁྲིམས་འགལ་གྱི་ཐོག་ནས་རྒྱལ་མཚམས་བརྒལ་བའི་ཉེས་མིང་འོག་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་ཡོད།
ཡང་ཕྱི་ལོ་ ༢༠༠༥ ལོར་རྒྱ་གཞུང་ཉེན་རྟོག་པས་དམ་པ་ཁོང་གི་སྡོད་ཤག་གི་ཕྱི་ནང་གསང་གསུམ་ལ་སྔོག་བཤེར་བྱེད་སྐབས། ༧གོང་ས་མཆོག་གི་སྐུ་པར་དང་གསུང་ཆོས་ཀྱི་བརྙན་སྡེར་སོགས་ལག་སོན་བྱུང་སྟབས། རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བའི་ཉེས་མིང་འོག་ནས་ལོ་ ༡༢ ཀྱི་བཙོན་འཇུག་ཁྲིམས་ཐག་བཅད་ཡོད་པ་བཅས་ཁྱོན་མི་ལོ་ཧྲིལ་བོ་ ༡༧ གྱི་རིང་རྒྱ་ནག་གི་བཙོན་ཁང་དུ་བཙོན་འཇུག་བྱས་མྱོང་ཡོད་པ་རེད།
