བོད་ཀྱི་ཆབ་སྲིད་བཙོན་ཟུར་དང་བོད་གནས་ཉམས་ཞིབ་པ་རྣམས་ཀྱིས་རྒྱ་དམར་གཞུང་གིས་རྒྱལ་སྤྱིའི་ཁྲིམས་ལུགས་དང་རྒྱ་ནག་རང་གི་རྩ་ཁྲིམས་རྩིས་མེད་རྡོག་རོལ་བཏང་སྟེ་ཁྲིམས་མེད་ལུགས་མེད་ཀྱིས་མི་མང་ལ་བཙན་གནོན་དམ་དྲག་བྱེད་བཞིན་ཡོད་སྐོར་བརྗོད་སོང་།
དེ་རིང་ཞོགས་པ་ཆུ་ཚོད་ ༡༠ ཐོག་དྷ་ས་ནོར་བུ་གསོལ་མགྲོན་ཁང་གི་ཚོགས་ཁང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་གོ་སྒྲིག་འོག བཙན་དབང་འོག་གར་སོང་ཆ་མེད་དུ་གྱུར་བའི་མི་རྣམས་ཀྱི་རྒྱལ་སྤྱིའི་ཉིན་མོ་གཙི་སྲུང་ཞུས་སོང་། སྐབས་དེར་ཆབ་སྲིད་བཙོན་ཟུར་དགེ་འདུན་རིན་ཆེན་ལགས་དང་། ཆབ་སྲིད་བཙོན་ཟུར་ངག་དབང་འོད་འབར་ལགས། ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས། བོད་གནས་ཉམས་ཞིབ་ཁང་གི་འགན་འཛིན་དབང་ལྡན་སྐྱབས་ལགས་བཅས་ཀྱིས་ཉིན་མོ་དང་འབྲེལ་བའི་གཏམ་བཤད་གནང་ཡོད་ཅིང་། ཚོགས་ཐོག་ཏུ་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་དང་སློབ་ཕྲུག་མང་པོས་མཉམ་ཞུགས་བྱས་འདུག
གསར་འགོད་པས་དེ་རིང་གི་ཉིན་མོའི་སྐོར་ལ་བོད་ཀྱི་འགྲོ་བ་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཉི་མ་འོད་ཟེར་ལགས་སུ་བཅར་འདྲི་བྱས་པར་ཁོང་གིས། དེ་རིང་ནི་བཙན་དབང་འོག་གར་སོང་ཆ་མེད་དུ་གྱུར་བའི་མི་རྣམས་ཀྱི་ཉིན་མོ་རེད། འགྲོ་བ་མིའི་ཐོབ་ཐང་གི་ངོས་ནས་བཤད་ན་གར་སོང་ཆ་མེད་དུ་གྱུར་བ་དེ་གནད་འགག་ཆེན་པོ་ཞིག་ཆགས་བསྡད་ཡོད། རྒྱལ་སྤྱིའི་ཁྲིམས་ཐོག་ནས་བཤད་ན་ནག་ཉེས་ཚབས་ཆེན་ཞིག་ལ་ངོས་འཛིན་བྱེད་ཀྱི་ཡོད་པ་རེད། ལྷག་པར་དུ་རྒྱ་ནག་གཞུང་གིས་བོད་ནང་དུ་བཙན་དབང་འོག་བོད་མི་མང་པོ་གར་སོང་ཆ་མེད་དུ་གྱུར་ཡོད་པ་དང་། ཁྲིམས་ཀྱི་བརྒྱུད་རིམ་གང་ཡང་བརྒྱུད་མི་དགོས་པར་འཛིན་བཟུང་བཙན་འཁྲིད་བྱས་ཏེ་གསང་བའི་ཐོག་བཀག་གཉེར་བྱས་ཡོད་པ་མ་ཟད། ཁོང་ཚོའི་གནས་སྟངས་ཐད་ཁྱིམ་མི་ལ་གསལ་ཁ་ཅི་ཡང་མ་བཟོས་པར་མནར་གཅོད་མང་པོ་གཏོང་བཞིན་ཡོད། དེ་ནི་ཁོང་ཚོར་ཁྲིམས་ཀྱི་སྲུང་སྐྱོབ་འོག་ཏུ་མེད་པས་རེད་ལ། རྒྱལ་སྤྱིའི་ཁྲིམས་ཐོག་ནས་རྒྱ་གཞུང་གིས་འཆར་གཞི་ཆེན་པོ་ཡོད་པའི་སྟེང་མིའི་རིགས་ལ་བཟོས་པའི་ནག་ཉེས་ཚབས་ཆེན་རྩི་ཡི་ཡོད་པ་རེད། ང་ཚོས་དེ་རིང་གི་ཉིན་མོར་འདི་དང་བསྟུན་ནས་རྒྱ་གཞུང་འོག་གདུག་རྩུབ་མནར་གཅོད་མྱོང་བཞིན་པའི་མི་ཚང་མར་གདུང་སེམས་མཉམ་བསྐྱེད་ཞུ་རྒྱུ་དང་། ཁོང་རྣམ་པ་རྒྱལ་སྤྱིའི་ཁྲིམས་གཞིར་བཟུང་བྱས་ནས་ཆ་རྐྱེན་གང་ཡང་མེད་པའི་ཐོག་ནས་གང་མགྱོགས་ཀློད་གྲོལ་གཏོང་བ་དགོས་འདུན་གཙོ་བོ་ཡིན་ཞེས་འགྲེལ་བརྗོད་བྱས་བྱུང་།
ཆབ་སྲིད་བཙོན་ཟུར་དགེ་འདུན་རིན་ཆེན་ལགས་ཀྱིས། ཕྱི་ལོ་ ༡༩༨༦ ལོར་བོད་ཀྱི་རྒྱལ་ས་ལྷ་ས་ཁུལ་དུ་ཡུལ་སྐོར་སྤྲོ་འཆམ་པའི་སྣེ་ཤན་གྱི་ལས་ཀ་བྱས་ཡོད་པ་དང་། ཕྱི་རྒྱལ་བར་བོད་མི་མང་གི་གནས་སྟངས་སྐོར་འགྲེལ་བཤད་བྱས་པའི་གནས་ཚུལ་གྱིས་རྐྱེན་བྱས་ཏེ། ཕྱི་ལོ་ ༡༩༩༣ ལོར་རྒྱ་གཞུང་གིས་ཟླ་བརྒྱད་རིང་འཛིན་བཟུང་བཙོན་བཅུག་བྱས། ངས་རྒྱ་གར་དུ་ལོ་བརྒྱད་རིང་རྒྱ་གར་བ་དང་མཉམ་དུ་ལས་ཀ་བྱས་པ་ཡིན། རྒྱ་གར་དུ་ཁྲིམས་ཡོད་ལ་ཁྲིམས་གཏུགས་བྱེད་སའང་ཡོད་པ་རེད། བོད་ནང་དུ་རྒྱ་ནག་གཞུང་གི་ཁྲིམས་རེད་ཟེར་བ་མ་གཏོགས་ཁོང་ཚོས་ག་རེ་བྱེད་བཞིན་ཡོད་པ་དེ་ཁྲིམས་རེད། རྒྱ་གཞུང་གི་ཁྲིམས་ཟེར་བ་ཐ་སྙད་ཙམ་ཡོད་པ་ལས་ཁྲིམས་གཏུགས་བྱེད་མཁན་སོགས་ལ་ཡ་ལན་སྤྲོད་མཁན་གང་ཡང་མི་འདུག ཡིག་ཐོག་ཏུ་ཁྲིམས་ཡིན་ཟེར་བ་ཞིག་འཁོད་པ་ལས་ཁྲིམས་གཏུགས་སོགས་ཀྱི་འགྲོ་ལུགས་བསྒྲུབ་ཚེ། དེ་ལས་ལྡོག་ཏེ་ཉེས་ཆད་གཅོད་ངེས་ཡིན་སྐོར་བརྗོད་སོང་།
ཆབ་སྲིད་བཙོན་ཟུར་ངག་དབང་འོད་འབར་ལགས་ཀྱིས། བོད་ནང་གི་མཐོ་སློབ་འགྲིམས་བཞིན་པའི་སློབ་གཉེར་བ་རྣམས་ཀྱིས་རྒྱ་ནག་ནང་སློབ་སྦྱོང་བྱེད་བཞིན་ཡོད་ཀྱང་། ང་ཚོས་མི་རིགས་ཀྱི་ངོ་བོ་བརླག་གི་མེད་པར་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་ཀྱི་ཡོད་པའི་བརྡ་ལན་འབྱོར་ཡོད་པར་བཙན་བྱོལ་སྤྱི་ཚོགས་སུ་བཤད་འདོད་བྱུང་། དེ་བཞིན་བོད་མི་རིགས་ཀྱི་འཐབ་རྩོད་ཀྱི་བརྒྱུད་རིམ་ཕྱི་ལོ་ ༡༩༥༨ ནས་བཙན་རྒོལ་རྒྱལ་སྐྱོབ་འཐབ་རྩོད་དང་། ཕྱི་ལོ་ ༡༩༨༧ མི་རབས་གསར་པའི་འཐབ་རྩོད། ཕྱི་ལོ་ ༢༠༠༨ ས་བྱི་ཞི་རྒོལ་གྱི་འཐབ་རྩོད་དུ་བགོ་བྱ་བརྒྱབ་ནས་འགྲེལ་བཤད་བརྒྱབ་ན་བོད་ཀྱི་འཐབ་རྩོད་ནི་རྒྱུན་མཐུད་པའི་འཐབ་རྩོད་ཅིག་ཡིན་པ་གསལ་བོ་ཆགས་པར་ཕན་ངེས་ཡིན་སྐོར་བརྗོད་སོང་།
ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་ཀྱིས། ཉག་ཆུ་རྫོང་དུ་སྨན་ཁང་ནང་སྡོད་པའི་སྐབས་ཡིག་ཆ་ཞིག་ལ་བཙན་གྱིས་ས་ཡིག་བརྒྱབ་བཅུག་རྗེས་མགོ་རས་ནག་པོ་གཡོགས་ཏེ་དཀར་མཛེས་ཁུལ་བཙོན་ཁང་དུ་བཙན་འཁྲིད་བྱས་སོང་། བཙོན་ཁང་ནས་འདྲི་གཅོད་བྱེད་བཞིན་གློག་ཆས་ཀྱིས་གདུག་རྩུབ་མནར་གཅོད་བྱས་ཏེ། ལུས་ཀྱི་ཁྲག་གི་འཁོར་བསྐྱོད་འདམ་བག་བཞིན་ཆགས་ཏེ་དབང་བོས་ལས་ཀ་བྱེད་མི་ཐུབ་པར་གྱུར་པ་མ་ཟད། ཀློད་གྲོལ་གཏོང་བར་ཁྱིམ་ནས་རྒྱ་སྒོར་ཆིག་ཁྲི་བདུན་སྟོང་སྤྲད་བཅུག་ཡོད་ཅིང་། བཙོན་ཁང་ནས་ཀློད་གྲོལ་བྱས་ཀྱང་མནར་གཅོད་ཀྱི་བརྒྱུད་རིམ་བཤད་མི་ཆོག་པ་དང་། ཁྲིམས་ཁང་དུ་གཏུགས་བཤེར་བྱེད་མི་ཆོག་ལ། ཕྱི་རྒྱལ་ཏུ་འགྲོ་མི་ཆོག་པའི་བཙན་བཀའ་བཏང་སོང་ཞེས་བརྗོད་སོང་།
བོད་གནས་ཉམས་ཞིབ་ཁང་གི་འགན་འཛི
གསར་འགོད་པ། བྱམས་པ་ཚེ་རིང་།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
