ཆབ་མདོ་ངག་ཕུན།
དགེ་རྒན་ཤེས་རབ་སྒྲོ་མེ།། སློབ་ཕྲུག་བུང་བའི་ཁྱུ་ཚོགས།།
ལེཌ་བཤད་བདུད་རྩེའི་ཉིང་ཁུའི།། མ་རིག་རྨོངས་གཉིད་སད་པོ།།
ཞེས་སྔོན་བསུས་ཏེ་དེ་རིང་ནི་དགེ་རྒན་གྱི་ཉིན་མོ་རེད་ཟེར་ཞིང་། འཕགས་ཡུལ་གྱི་སློབ་གྲྭ་ཁག་དང་། ཡང་སྒོས་ང་ཚོ་བཙན་བྱོལ་བའི་སློབ་གྲྭ་ཁག་ཏུ་དུས་ཆེན་དེ་ཉིད་གལ་ཆེ་ཞིག་ཏུ་ངོས་འཛིན་གནང་ནས་དུས་ཆེས་སྲུང་བརྩི་གནང་བཞིན་འདུག་ཅིང་། དེ་ཡང་ཕྱི་ཟླ་ ༩ ཚེས་པ་ ༥ ཉིན་མོར་རྒྱ་གར་གྱི་རླབས་ཆེན་གྱི་ལྟ་གྲུབ་མཁས་དབང་པ་དང་། རླབས་ཆེན་གྱི་དགེ་རྒན་ཆེ་མོ་བ། རྒྱ་གར་གྱི་སྲིད་འཛིན་ཟུར་པ་སྐུ་ཞབས་ཌོག་ཊར་རཱ་དྷཱ་ཀྲྀཥྞན (Dr.Radhakrishnan) མཆོག་སྐུ་འཁྲུངས་པའི་ཉིན་མོ་ཞིག་ཡིན་པ་དང་། ཉིན་མོ་དེར་རྒྱ་གར་རྒྱལ་ཡོངས་སུ་དགེ་རྒན་ཉིན་མོར་སྲུང་བརྩི་གནང་གི་ཡོད་པ་རེད། དེར་བརྟེན་རང་རེའི་བཙན་བྱོལ་བོད་མིའི་སློབ་གྲྭ་ཁག་ཏུ་ཉིན་མོ་དེར་དགེ་རྒན་ཉིན་མོ་ཞེས་སྲུང་བརྩི་ཞུས་དང་ཞུ་བཞིན་ཡོད།
ལྷག་དོན་དགེ་རྒན་ནི་ཧ་ཅང་གི་གལ་གནད་ཆེན་པོ་ཡིན་པ་བོད་ཀྱི་གཞུང་ལུགས་ཁག་ཏུ་གསལ་དོན་ལྟར་ཀུན་བཟང་བླ་མའི་ཞལ་ལུང་ལས། ལས་ཉོན་མེ་ཚོགས་འཇོམས་པའི་བདུད་རྩིའི་ཆར།། མ་རིག་མུན་པ་སེལ་བའི་ཉི་ཟླར་མཚུངས། །ཐེག་པ་ཤིན་ཏུ་ཆེ་བས་ས་གཞི་འདྲ།། ཕན་དང་བདེ་བའི་འབྱུང་གནས་དཔག་བསམ་ཤིང་། །ཆོས་ཀྱི་མཛོད་ལྡན་བུམ་པ་བཟང་པོ་སྟེ། །ཀུན་འབྱུང་ཡིན་བཞིན་ནོར་བུ་ལས་ཀྱང་ལྷག །ཀུན་ལ་སྒོམས་པའི་བྱམས་པའི་ཕ་མ་ཡིན། །ཆེ་ཞིང་མྱུར་བའི་སྙིང་རྗེ་ཆུ་ཀླུ་མཚུངས། །འཕོ་འགྱུར་མེད་པའི་དགའ་བ་རི་དབང་འདྲ། །འཁྲུགས་པ་མེད་པའི་བཏང་སྙོམས་ཆར་སྤྲིན་བཞིན། །ཞེས་གསུངས་པ་ཇི་བཞིན་དགེ་རྒན་ནི་མ་རིག་མུན་པ་སེལ་མཁན་གྱི་སྒྲོན་མེ་ལྟ་བུ་ཡིན་པ་དང་། ང་ཚོ་ལ་ཤེས་རིག་ཕྲན་བུ་ཡོད་པ་ནི་དགེ་ལགས་རྣམ་པའི་སྐུ་དྲིན་ལས་བྱུང་བ་ཞིག་ཀྱང་ཡིན། དེ་བཞིན་བོད་ཀྱི་ཆོས་རྒྱལ་སྲོང་བཙན་སྒམ་པོའི་སྐབས་སུ་ཡང་ཆོས་གཙང་མ་བཅུ་དྲུག་གི་ཁྲིམས་ལུགས་གཏན་ལ་ཕབ་དུས་ཀྱང་ཡོན་ཏན་ཅན་ལ་གུས་བཀུར་ཞུ་དགོས་པའི་གཏན་ལ་ཕབ་གནང་མཛད་ནས་བོད་མི་རྒན་དར་གཞོན་གསུམ་གྱིས་དགེ་རྒན་ཞེས་ཆེས་རིན་ཐང་བྲལ་བ་ཞིག་ལ་ངོས་འཛིན་དང་། ཆེ་མཐོང་། གུས་བཀུར་ཞུ་བཞིན་ཡོད་པ་རེད། དེ་ཡང་གོང་དུ་ལུང་འདྲེན་ཞུས་པ་བཞིན་མི་ཆོས་གཙང་མ་བཅུ་དྲུག་ལས། ཡོན་ཏན་ཅན་ལ་མཆོག་ཏུ་མཐོང་ནས་གོང་དུ་བཀུར་བ་ཞེས་གསལ་བར་གཞིག་ན་སྐབས་དེ་དུས་དགེ་རྒན་ཉིན་མོ་ཞེས་གསལ་ཁ་མེད་པ་མ་གཏོགས་ཡོན་ཏན་ཅན་གྱི་དགེ་རྒན་ནི་སྤྱི་ཚོགས་ནང་ནས་གལ་གནད་ཆེ་བའི་མི་སྣ་ཞིག་ཏུ་ངོས་འཛིན་གནང་ནས་ཆེ་མཐོང་དང་གུས་བཀུར་ཞུ་བཞིན་ཡོད་པ་རེད།
ལྷག་པར་རང་རེ་རྣམས་བཙན་བྱོལ་ལ་འབྱོལ་མ་ཐག་ནས་ཤེས་ཡོན་གལ་གནད་ཆེན་པོ་ཞིག་ཏུ་ངོས་འཛིན་གནང་ནས་སྐུ་ངལ་འཛེམས་མེད་ཀྱིས་གཞི་རིམ་གྱི་སློབ་གྲྭ་ཁག་གསར་འཛུགས་རིམ་པ་མཛད་ཡོད། དེ་དག་སྐུ་དྲིན་ལས་ད་སྐབས་མི་ཡུལ་ལུང་པར་གནས་དགོས་བྱུང་རུང་གཞན་ལ་ངོམས་རིན་ཆོག་པའི་ཤེས་ཡོན་གྱི་འགྲུབ་འབྲས་ཀྱང་གང་ལེགས་བྱུང་ཡོད། དེ་དག་རྒྱལ་བ་ཡིད་བཞིན་ནོར་བུ་དབུས་དགེ་ལས་རྣམ་པའི་སྐུ་དྲིན་ཁོ་ནར་ཡིན་རེད་སྙམ།
ད་དུང་ཡར་རྒྱས་ལ་མཐའ་མེད་དུས་ཕྱི་ལོ་ ༢༠༠༤ ཟླ་ ༩ ནང་སྐབས་བཅུ་གསུམ་པའི་སྤྱི་འཐུས་གྲོས་ཚོགས་ཚོགས་དུས་བརྒྱད་པའི་ཐོག་ཤེས་ཡོན་སྲིད་བྱུས་སྤྱི་མོས་ཐོག་གཏན་ལ་ཕབ་ཡོད་པ་དང་། ཤེས་ཡོན་སྲིད་བྱུས་དེ་ཉིད་གཏན་ལ་ཕབ་ནས་སློབ་གྲྭ་འགའ་ཤས་ནང་ལ་ལག་བསྟར་གནང་ནས་མི་ལོ་བཅུ་དགུ་མ་ཟིན་ཙམ་ཕྱིན་ཡོད་པ་རེད། ཤེས་ཡོན་སྲིད་བྱུས་ཀྱི་དོན་ཚན་བཅུ་གཅིག་པ་ནང་དགེ་རྒན་སྐོར་ལས། མི་རིགས་དང་སྤྱི་ཚོགས་ཀྱི་འབྱུང་འགྱུར་གནས་བབས་ཤེས་ཡོན་ལ་རག་ལུས་ཤིང་། ཤེས་ཡོན་བཟང་ཞན་དགེ་རྒན་ལ་རག་ལུས་པས། དགེ་རྒན་ནི་སྤྱི་ཚོགས་ནང་གལ་གནད་ཆེ་ཤོས་ཡིན་སྟབས། མི་གཤིས་དང་སྤྱོད་ལམ་ལེགས་ཤོས། ཤེས་ཡོན་གནས་ཚད་བཟང་ཤོས་རྣམས་དགེ་རྒན་གྱི་ལས་སྒོར་འཇུག་ཐབས་བྱ་རྒྱུ་དང་། དགེ་རྒན་གྱི་ཆེ་མཐོང་དང་མཐུན་རྐྱེན་བཟང་པོ་ཡོང་ཐབས་སུ་ཁྲིམས་ལུགས་ཀྱི་ཆ་རྐྱེན་བསྐྲུན་དགོས། ཞེས་དམིགས་གསལ་ཟུར་སྟོན་མཛད་ནས་ཡོད་པ་རེད། དགེ་རྒན་གྱི་ཆེ་མཐོང་དང་མཐུན་རྐྱེན་བཟང་པོ་ཡོང་ཐབས་སུ་ཁྲིམས་ལུགས་ཀྱི་ཆ་རྐྱེན་བསྐྲུན་དགོས་ཞེས་གསལ་དོན་ལྟར་ད་ནི་ང་ཚོའི་དགེ་རྒན་རྣམ་པའི་ཆེ་མཐོང་ཆེད་དུ་ངེས་པར་ཁྲིམས་ལུགས་ཀྱི་ཐོག་ནས་ཆ་རྐྱེན་བསྐྲུན་དགོས་པའི་དུས་སྐབས་ཤར་འདུག་སྙམ།
མི་རིགས་ཤིག་རྒྱུད་འཛིན་གནང་མཁན་ནི་ན་གཞོན་རྣམས་ཡིན་དུས་དེ་དག་སློབ་སྦྱོང་སྤྲོད་གནང་མཁན་དགེ་རྒན་རྣམ་པ་ལ་ངེས་པར་མཐུན་རྐྱེན་བཟང་ཤོས་བསྐྲུན་དགོས་པ་ཤིག་ཏུ་གལ་ཆེ་སེམས་ཤིང་། གང་ལྟར་ཁོང་རྣམ་པའི་མི་ཚེའི་ཚོར་བ་སྐྱེལ་དགོས་པ་ཡིན་དུས་དགེ་རྒན་རྣམ་པ་ལ་ཚོགས་སྡེ་གཞན་གྱི་ལས་བྱེད་ལས་ལྷག་མཐུན་རྐྱེན་བསྐྲུན་དགོས་པ་ཞིག་རེད་མོད། ད་ལྟ་དེ་ལྟར་ཡོང་གི་མེད་པ་སོང་འཚོ་བའི་མཐུན་རྐྱེན་སོགས་ལ་བརྟེན་དགེ་རྒན་རྣམ་པ་མུ་མཐུད་ནས་གནས་མ་ཐུབ་ནས་རྩ་དགོངས་ཞུ་དགོས་ཐུག་གི་ཡོད།
ལྷག་པར་ང་རང་ཆུང་དུས་གྲོང་གསེབ་ཀྱི་སློབ་གྲྭའི་སྐོར་ལ་གང་དྲན་པ་རྣམས་ཕན་ཐོགས་ཡོད་མེད་མ་བསྟོས་པར་བརྗོད་འདོད་བྱུང་། དེ་ཡང་ང་སྡོད་ས་ནས་ཆུ་ཚོད་གཉིས་མ་ཟིན་ཙམ་སར་ཉིན་ལྟར་སློབ་གྲྭར་འགྲོ་དགོས་པ་དང་། སྐབས་དེ་དུས་ང་ཚོའི་སློབ་གྲྭ་ཚོགས་ས་དེར་སྐྱོ་ཐོག་ཅེས་བརྗོད་ཀྱི་ཡོད་པ་རེད། བོད་ལ་དུས་འགྱུར་མ་འོང་གོང་གནས་དེར་དབྱར་དཀུས་བན་དེ་ཚོགས་ས་རེད་ཟེར། སློབ་གྲྭའི་མཐར་ཟུར་ལྕང་མའི་ར་བ་ཡོངས་སུ་བསྐོར་ནས་དབྱར་དུས་དཀྱིལ་ལ་རྩྭ་སྔོ་ཐིང་ངེར་སྐྱེ་ཡི་ཡོད་པ་རེད། དབྱར་དུས་ཧ་ཅང་སྐྱིད་སྣང་ལྡན་པ་ཡོད། སློབ་གྲྭ་གྲོལ་ནས་ནང་དུ་སླེབས་དུས་ས་རུབ་ཀྱི་ཡོད། དེ་འདྲ་ས་ཐག་རིང་པོར་སློབ་གྲྭ་ཞོགས་ལྟར་འགྲོ་དགོས་ཀྱི་ཡོད།
རིམ་པས་ང་ཚོའི་ལུང་པའི་བོད་ཕྲུག་རྣམས་གནས་དེར་འགྲོ་མི་དགོས་པ་རྒྱ་ར་ཁ་ཟེར་ས་དེར་འགྲོ་དགོས་པ་བཟོས་པ་རེད། སྔོན་ལས་ས་ཐག་ཕྲན་བུ་ཐུང་བ་ཡོད། ས་གནས་དེར་སློབ་གྲྭ་འགྲོ་དུས་སྐབས་རེ་ལམ་དུ་སློབ་ཕྲུག་རྣམས་རྩེད་མོར་མགོ་བོ་འཁོར་ནས་དུས་ཐོག་སློབ་གྲྭར་སླེབས་མ་ཐུབ་སྐབས། དགེ་རྒན་གྱི་མདུན་ནས་ཉེས་དག་ཐེངས་མང་གཟེད་མྱོང་ཡོད། ཁོང་གི་ག་ཚད་ཤེད་ཤེད་དང་ཉེས་དག་བཏང་ནའང་སེམས་ནང་དུ་ཁོང་ལ་འཁོན་སེམས་གཏན་ནས་འཁོར་མྱོང་མེད། ཁོང་གི་དུས་རྒྱུན་སློབ་ཁྲིད་གནང་དུས་ཞལ་རས་འཛུམ་མུལ་ལེ་སློབ་ཁྲིད་གནང་མཁན་ཞིག་ཡིན་དུས་རང་བཞིན་མེད་པའི་སེམས་ཐག་ཉེ་པོ་ཞིག་སླེབས་ཀྱི་ཡོད། དེ་མ་ཡིན་པ་རྒན་ལགས་གཞན་པ་གཅིག་ཡོད་ཅིང་། ཁོང་ནི་དུས་རྒྱུན་ཞལ་རས་ནག་པོ་བསྟན་ནས་སློབ་ཁྲིད་གནང་གི་ཡོད་པས། སེམས་ནང་ཞེ་སྣང་ཞེ་དྲག་སྐྱེ་མྱོང་ལ། ཁོང་གི་སློབ་ཁྲིད་གནང་བ་འཁེལ་ཚེ་ག་དུས་ཚར་ན་བསམ་པའི་དེ་འདྲའི་སེམས་ནང་དུ་སུན་སྣང་སྐྱེ་མྱོང་ཡོད།
སྐབས་དེ་དུས་སློབ་ཕྲུག་འགའ་ཤས་ལམ་དུ་ཡོང་དུས་ཉིན་གུང་ཁ་ལག་ཟས་ཤོར་ནས་ཁ་ལག་བཟའ་རྒྱུ་མེད་པ་ཆགས་ཀྱི་ཡོད། དེའི་སྐབས་སུ་དགེན་བློ་ཉི་ཟེར་བ་ཞིག་ཡོད་ཅིང་། ཁོང་གི་བཞེས་ལག་སློབ་ཕྲུག་ལ་སྦྱིན་ནས་རྒན་ཁོང་གྲོད་ཁོག་སྟོང་པར་བཞུགས་ཀྱི་ཡོད། སྐབས་དེ་དུས་བསམ་བློ་ནང་བཀའ་དྲིན་ཡིན་པ་འཁོར་མྱོང་མེད་མོད། དེང་སྐབས་བསམ་བློ་འཁོར་དུས་རྒན་ལགས་ཁོང་དངོས་གནས་སློབ་ཕྲུག་དེ་འདྲའི་བརྩེ་སེམས་ཡོད་པ་ཞིག་ཡིན་པ་ཚོར་གྱི་འདུག །དེ་འདྲའི་དགེ་རྒན་བཟང་པོ་ཞིག་ཡོད། སློབ་ཕྲུག་རྣམས་ས་ཐག་རིང་པོ་རྐང་ཐང་ཞོགས་ལྟར་ཡོང་དགོས་པ་རེད། ཉིན་གུང་སློབ་གྲྭའི་ངོས་ནས་ཇ་ཐང་འཁོལ་མ་ཞིག་གནང་གི་ཡོད་ཅིང་། དེ་དང་མཉམ་དུ་སོ་སོའི་ནང་ནས་འཁྱེར་ཡོང་བའི་བག་ལེབ་མཉམ་དུ་བཟའ་དགོས། སློབ་གྲྭ་ངོས་ནས་སློབ་དེབ་དང་། བྲིས་དེབ། ཞ་སྨྱུག་བཅས་ལས་གཞན་པའི་མཐུན་རྐྱེན་གང་ཡང་མེད། རྒྱ་གཞུང་གིས་སློབ་གྲྭ་མང་པོ་སྒོ་ཕྱེས་ནས་བོད་ཕྲུག་ལ་སློབ་སྦྱོང་སྤྲོད་ཀྱི་ཚུལ་བརྗོད་ཀྱི་ཡོད་རུང་སྔོན་མ་གྲོང་གསེབ་ཀྱི་སློབ་གྲྭའི་གནས་སྟངས་དེ་འདྲ་རེད།
དང་ཐོག་བྱང་ཤིང་ངམ་སྦྱང་ཤིང་ཐོག་ཏུ་འབྲི་སྦྱོང་བྱས་ཚེ་ཡིག་གཟུགས་ཡག་པོ་ཡོང་གི་རེད་ཟེར། གནའ་དེང་གི་བོད་ཡིག་འབྲི་སྦྱོང་ལ་གཞན་དྲིང་མི་འཇོག་པའི་བྲིས་གཞི་ཐུན་མོང་མ་ཡིན་པ་ཞིག་ཡོད་པ་ནི་སྦྱང་ཤིང་ཐོག་ཏུ་དང་ཐོག་བོད་ཡིག་འབྲི་སྦྱོང་བྱ་རྒྱུ་དེ་ཡིན་པ་རེད་ཟེར། བྱང་ཤིང་ཞེས་པ་ནི་ཤིང་ལེབ་མདུན་ངོས་འཇམ་པོ་དང་། ལག་པ་ཟིན་ས་ཡོད་པ་ཞིག་བཟོས་པའི་ངོས་སུ་གློག་བཞུའི་གློག་རྫས་བཤིག་པའི་ནག་པོ་ཞིག་ཡོད་པ། དེའི་ནང་དུ་ཆུ་བླུགས་ནས་སླ་པོ་བཟོས་རྗེས་བྱང་ཤིང་ངོས་སུ་བྱུགས་དགོས་པ་དང་། བྱང་ཤིང་ཐོག་ནས་སྐམ་སྟེ་ཞག་ཚི་ཕྲན་བུ་བྱུགས་རྗེས་གོ་ཐལ་གཏོར་དགོས་ཀྱི་རེད། དེ་ཡང་རས་སྲབ་སྲབ་ཀྱི་ཁུག་མ་བཟོས་ཏེ་དེའི་ནང་གོ་ཐལ་བླུགས་ཏེ་ཁ་བསྡམ་ནས་བྱང་ཤིང་སྟེང་དུ་བརྡབ་དགོས། དེ་ནས་ཡང་བསྐྱར་རས་སམ་ཀོ་བ་གང་རུང་ཞིག་གི་བཟོས་པའི་ཁུག་མ་ནར་མོ་ཞིག་ཏུ་ས་དམར་པོ་ཞིབ་མོ་བྱས་པ་བླུགས། དེའི་ནང་སྐུད་པ་སྦོམ་ཕྲ་རན་པོ་བརྒྱུས་ཏེ་ཐིག་བརྒྱབ་ས་བཟོ་དགོས་པ་རེད། དེ་དག་ཚར་རྗེས་ཐིག་ཚད་བརྒྱབ་སྟེ་སྨྱུག་ཁ་གསེག་ཆེན་བཟོས་ཏེ་དབུ་མེད་ཡིག་གཟུགས་འབྲི་སྦྱོང་བྱེད་དགོས་པ་རེད། དེ་བཞིན་དབུ་ཅན་དང་། འབྲུ་ཚར་ཡིག་གཟུགས་འབྲི་སྦྱོང་བྱེད་དུས་སྨྱུག་ཁ་གསེག་ལོག་དགོས་པ་རེད། དེང་སྐབས་བཙན་བྱོལ་ནང་དུ་དཔེ་སྟོན་སློབ་གྲྭ་ལས་བྱང་ཤིང་ཐོག་ཏུ་འབྲི་སྦྱོང་གནང་མཁན་ཡོད་པ་མ་མཐོང་།
བྱང་ཤིང་ཐོག་ཏུ་ཡིག་གཟུགས་ཡག་པོ་བྱུང་རྗེས་ད་གཟོད་གཞི་ནས་བྲིས་དེབ་ཐོག་ཏུ་ལྕགས་སྨྱུག་གི་འབྲི་བཅུག་གི་རེད། དེ་མིན་ཤོག་བུའི་ཐོག་ཏུ་འབྲི་བཅུག་གི་མེད། ང་འགྲོ་སའི་སློབ་གྲྭ་དེར་བྱང་ཤིང་སྤུས་དག་དེ་འདྲ་འདུག་ཅིང་། སྦྱང་ཤིང་གི་རྒྱབ་ལོག་ཏུ་རི་མོ་སྙིང་རྗེ་པོ་དང་། སྐུ་འདྲ་དེ་འདྲ་བརྐོས་བཞག་པ་འདུག།།རྗེས་ཕྱོགས་ཧ་གོ་དུས་དེ་དག་རིག་གནས་གསར་བརྗེའི་སྐབས་དགོན་པའི་གསུང་རབ་ཁག་མེར་བསྲེགས་བཏང་སྟེ་དེའི་གླེགས་ཤིང་ཁག་འཁུར་ཡོང་ནས་སློབ་གྲྭའི་སྦྱང་ཤིང་བཟོས་པ་ཞིག་ཡིན་པ་ཤེས་བྱུང་།
དེ་ནས་ལོ་ཤས་རྗེས་གྲོང་གསེབ་རང་ལ་སློབ་གྲྭ་གསར་དུ་བཙུགས་ནས་བུ་ཕྲུག་ཚོ་ས་ཐག་རིང་པོར་ཡར་མར་འགྲོ་མི་དགོས་པ་བྱུང་བ་རེད། ཡིན་ནའང་སློབ་གྲྭ་དེ་དག་ནི་སྤྱིར་བཏང་གི་སློབ་གྲྭའི་མིང་ཙམ་ལས་གཞུང་གི་མཐུན་རྐྱེན་སོགས་ཧ་ཅང་ཞན་པོ་རེད། གྲོང་གསེབ་སློབ་གྲྭ་ནས་སློབ་སྦྱོང་ཡག་པོ་བྱུང་ཚེ་གཞུང་གཙུགས་སློབ་གྲྭ་ཟེར་བ་ཞིག་ཡོད་པས་དེར་འགྲོ་ཆོག་གི་རེད། དེར་གྲོང་གསེབ་སློབ་གྲྭ་ལས་མཐུན་རྐྱེན་བཟང་བ་ཡོད། གཞུང་བཙུགས་སློབ་གྲྭ་ནས་ཡིག་རྒྱུགས་སོགས་ཡག་པོ་བྱུང་ཚེ་རྗེས་ཕྱོགས་ལས་ཀ་རག་གི་ཡོད་པ་རེད། དེ་མིན་གྲོང་གསེབ་ཀྱི་སློབ་གྲ་ནས་འཐོན་རུང་ལས་ཀ་གང་ཡང་མི་རག། །དེར་བརྟེན་བུ་ཕྲུག་མང་ཆེ་བ་ལོ་ངོ་ཁ་ཤས་ཙམ་ལས་སློབ་གྲྭར་ཕ་མ་ཚོའི་བཏང་གི་མེད། ནང་ལ་ལས་ཀ་ཙག་ཙིག་བྱེད་བཅུག་ནས་བཞག་གི་ཡོད། གྲོང་གསེབ་ཀྱི་དགེ་རྒན་དེ་དག་ལ་གླ་ཕོགས་ཉུང་ངུ་ལས་མེད་རུང་། སེམས་ཤུགས་ཞུམ་མེད་ཀྱི་ཐོག་ནས་བོད་པྲུག་རྣམས་ལ་སློབ་ཁྲིད་གནང་གི་ཡོད། ད་སྐབས་དགེ་རྒན་རྣམ་པ་བཀའ་དྲིན་ཆེན་པོ་ཡིན་པ་ཚོར་གྱི་འདུག །དགེ་རྒན་ཁོང་རྣམ་པ་གསོན་པོར་བཞུགས་དུས་ལས་དབང་གིས་བཀའ་དྲིན་ཆེ་ཞེས་ཞུ་ཐུབ་མ་སོང་བའི་བློ་འགྱོད་དང་འབྲེལ་དེ་རིང་དགེ་རྒན་ཉིན་མོའི་གོ་སྐབས་དང་བཟུང་ནས་བདག་ལ་བཀའ་དྲིན་ཆེ་བའི་དགེ་རྒན་འདས་གསོན་ཡོངས་བཀའ་དྲིན་རྗེས་དྲན་ཞུ་འདོད་བྱུང་།
མཐའ་དོན་ཞུ་དོན་སྙིང་པོ། ད་ནི་མི་རིགས་གཞན་ལྟར་ང་ཚོ་བོད་མི་རིགས་ལའང་དགེ་རྒན་ཉིན་མོ་ཞེས་བཀའ་དྲིན་རྗེས་དྲན་ཞུ་ས་ཞིག་དགོས་པ་མཐོང་བ་མ་ཟད། བོད་མི་རིགས་བཀའ་དྲིན་ཆེ་བ་མེས་དབོན་དུ་མ་ཞིག་ཡོད་པའི་ནང་ནས་འཕྲུལ་གྱི་རྒྱལ་པོ་སྲོང་བཙན་སྒམ་པོའི་ཆོས་བློན་སློབ་དཔོན་ཐོན་མི་སཾབྷ་ཊ་ཡིན་པ་དང་། ད་ལྟ་ང་ཚོའི་ལོངས་སྤྱོད་བཞིན་པའི་དབྱངས་གསལ་སོ་བཞི་འདི་ཉིད་སློབ་དཔོན་ཐོན་མི་སཾབྷ་ཊས་མཛད་པ་གྲགས་ཞིང་། ཁོང་གིས་བོད་ཡིག་ཐོག་མར་གསར་བཟོ་མཛད་ཅིང་བོད་ཡུལ་མུན་པའི་གླིང་འདི་རིག་པའི་ཉིན་བྱེད་ཀྱིས་གསལ་བར་བྱས་ཞེས་གྲགས་པ་དང་། དེ་བཞིན་བོད་གངས་ཅན་ལྗོངས་སུ་ལོ་ཙཱ་བ་ཐོག་མ་དང་། བོད་ཀྱི་མཛངས་བློན་མི་བདུན་ནང་གི་བཞི་པ་དེ་ཡང་ཡིན་པ་རེད། རྒྱུ་མཚན་དེ་དག་བརྟེན་ཁོང་ལ་ང་ཚོའི་དགེ་རྒན་གྱི་ཉི་མོར་སྲུང་ཙི་གནང་བ་ཡིན་ན་དགེ་མཚན་ལྡན་པ་ཞིག་ཀྱང་རེད་སྙམ། འོན་ཀྱང་དེ་ནི་བདག་གི་དཔྱད་གཞི་ཙམ་གྱི་ཆེད་དུ་དཔེ་མཚོན་དུ་འབུལ་ལམ་ཞུས་པ་ཡིན་པ་ལས་གཞན་པའི་དམིགས་ཡུལ་གཉིས་པ་ཞིག་གང་ཡང་མེད་དོ།
ལྷག་དོན་གཞུང་འབྲེལ་གྱི་ཡིག་ཆ་ཁག་ཏུ་འཁོད་དོན་ཇི་བཞིན་རང་རེའི་དགེ་ལགས་རྣམ་པར་སྔར་ལྷག་མཐུན་རྐྱེན་གང་ལེགས་འབུལ་ལམ་ཞུ་དགོས་པ་ནི་ཧ་ཅང་གལ་ཆེ་རང་བཞིན་ལྡན་པ་ཞིག་རེད་སྙམ། དགེ་རྒན་ནི་མི་རིགས་ཀྱི་མ་འོངས་པའི་གསོན་རྩ་རྣམས་ལ་ལེགས་སྐྱེ་གང་འདྲ་ཞིག་འབུལ་མིན་སློབ་གྲྭ་ཁག་གི་དགེ་རྒན་རྣམ་པ་རག་ལུས་ཡོད་པ་ཞིག་ཀྱང་ཡིན་དུས་ཁོང་རྣམ་པ་འདོད་བློ་ཁེངས་པ་བྱ་དགོས་པ་ནི་ང་ཚོ་ལས་འགན་རེད་སྙམ། ཡིག་རྙོགས་མང་པོ་ཆགས་སོང་ན་དགོངས་འགལ་མེད་པ་བཅས།
མཐའ་མཇུག་སྨྲས་པ།
གངས་ཅན་བོད་མི་ཡོངས་ལ། །བཀའ་དྲིན་བླ་མེད་ཆེ་བའི།།
༸རྒྱལ་བ་ཡིད་བཞིན་ནོར་བུ། །སྐུ་ཚེ་ཡུན་རིང་བརྟན་སྨོན།།
