ཚོགས་གཙོ་སྦྲེལ་པོས་བཅར་འདྲི་དང་ལེན་མ་གནང་སྟབས་གྲོས་ཚོགས་ག་དུས་འཚོགས་ཐུབ་མིན་གསལ་ཁ་གང་ཡང་མི་འདུག
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ པའི་ལས་ཉིན་བཞི་པའི་ཚོགས་དུས་དང་པོའི་སྟེང་། སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་རྒྱ་ནག་གཞུང་གི་ལས་བྱེད་ཅིག་དང་ཐུག་ཡོད་མེད་ཀྱི་གནད་དོན་དེ་བདེ་སྲུང་ལས་ཁུངས་ནས་གཙང་བཟོ་མ་བྱས་པར་དུ་ཆོས་བརྒྱུད་དང་མདོ་སྟོད་སྤྱི་འཐུས་རྣམས་གྲོས་ཚོགས་ཀྱི་ལས་རིམ་ནང་མཉམ་ཞུགས་བྱེད་ཀྱི་མེད་པར་བརྟེན། བཅའ་ཁྲིམས་དོན་ཚན་ཞེ་དགུ་བའི་ནང་གསེས་དང་པོའི་དགོངས་དོན་ལྟར། སྤྱི་འཐུས་རྩ་འབོར་གྱི་གསུམ་ཆ་གཉིས་མ་ལོན་པས་གྲོས་ཚོགས་འཚོགས་ཐུབ་མ་སོང་།
དེའི་ཐད་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ཁ་སང་བཀའ་ཤག་གི་ངོས་ནས་མཐའ་མའི་འབབ་ས་ཨོ་ཙམ་བབ་ཚར་སོང་བསམ་བསམ་ཞིག་དང་། དེ་རིང་ལས་རིམ་ཡོད་ཤག་བྱས་ནས་བཀའ་བློན་ཚང་མ་འདིར་ཚུར་བཅར་བ་རེད། འདི་ཡང་རྒྱ་ཆེ་མི་མང་དང་འབྲེལ་བ་ཆེ་བའི་གནད་དོན་ཆགས་ཀྱི་ཡོད་པ་དང་། ཁྱེད་རང་ཚོས་བཅར་འདྲི་ཞུས་སྟབས་མ་ཞུ་རང་ཞུ་ཅིག་ཆགས་འགྲོ་ཡི་འདུག དེ་མིན་ཞུ་རྒྱུའི་འདོད་པ་ཞིག་མེད། དེ་རིང་ཞོགས་པར་བཀུར་འོས་སྤྱི་འཐུས་བཞི་དཔལ་ལྡན་ཚོགས་གཙོ་ཚོགས་གཞོན་སར་བཅར་འདུག ད་གི་དཔལ་ལྡན་ཚོགས་གཙོ་མཆོག་གིས་གྲོས་ཚོགས་ནང་གསལ་བསྒྲགས་གནང་བ་དང་གཅིག་པ་རེད། གང་ལྟར་བདེ་སྲུང་ལས་ཁུངས་ཀྱི་གནས་ཚུལ་དེ་གསལ་པོ་མ་བཟོས་པར་དུ། གྲོས་ཚོགས་ནང་བཅར་ཐུབ་ས་མེད་ཅེས་ནས་གསུངས་ཡ་དེ་རེད། ང་ཚོས་ཀྱང་ཁ་སང་གྲོས་ཚོགས་ནང་ལ་ཁས་ལེན་བྱས་པ་དེ་དེ་ག་རང་རེད། བདེ་སྲུང་ལས་ཁུངས་ཀྱི་ངོས་ནས་གནས་ཚུལ་གཙང་མ་བཟོ་ཆེད་གནས་ཚུལ་ཚང་མ་རྩད་ཞིབ་བྱེད་ཀྱི་ཡིན། ཡིན་ན་ཡང་། དེའི་ཁུངས་དེ་གཞན་པ་ཞིག་ནས་ཡོང་གི་ཡོད་ཙང་གཞན་དབང་སྟབས་བསྟུན་གྱི་གནས་སྟངས་ཤིག་ཆགས་ཀྱི་ཡོད་རེད། ཁུངས་དེ་ག་རང་ནས་དཔང་རྟགས་ཡོད་ན་ཡོད་དང་མེད་ན་མེད་པའི་གནས་སྟངས་གསལ་པོ་མ་ཆགས་ཀྱི་བར་དུ་དུས་ཚོད་འགོར་སྲིད་པ་རེད་དེ། གྲོས་ཚོགས་དེ་མུ་མཐུད་ནས་འགྲོ་ཐུབ་ན་ཟེར་ནས་ཞུ་རྒྱུའི་གནས་སྟངས་ཤིག་ཆགས་པ་རེད། དེ་རིང་ཞོགས་པ་གྲོས་ཚོགས་ནང་འཛོམས་སྐབས་གྲུབ་ཆ་མ་ཚང་བ་སོང་ཙང་གྲོས་ཚོགས་འཚོགས་མ་ཐུབ་པ་རེད། དེ་ནས་ང་ཚོ་བཀའ་ཤག་གིས་གྲོས་བསྡུར་བྱས་པ་ཡིན། དེ་ནས་ཚོགས་གཙོ་ཚོགས་གཞོན་གཉིས་ཀྱིས་བདེ་སྲུང་བཀའ་བློན་དང་དྲུང་ཆེ་བཀའ་འགུག་བྱས་ཏེ་མར་བཅར་བ་རེད། ང་ཚོས་འགྲོ་ལུགས་འགྲོ་སྟངས་ཀྱི་ཐོག་ནས་འཛིན་སྐྱོང་གི་འགན་ཞིག་འཁུར་དགོས་ཀྱི་ཡོད། གྲོས་ཚོགས་ཀྱི་བཀའ་དང་ཚོགས་གཙོ་ཚོགས་གཞོན་གྱི་ལམ་སྟོན་ག་རེ་ཡིན་པ་ང་ཚོས་གསལ་བོ་བཟོས་ཏེ། ཚོགས་གཙོ་ཚོགས་གཞོན་གྱི་ལམ་སྟོན་གྱི་ངོ་བོའི་ཐོག་ནས་འཛིན་སྐྱོང་བཀའ་ཤག་གིས་གནས་ཚུལ་དེ་ག་ཚོད་ཐུབ་ཐུབ་ཅིག་དང་གང་མགྱོགས་མགྱོགས་གཙང་མ་བཟོ་དགོས་པའི་ལམ་སྟོན་ཕེབས་ཀྱི་འདུག དེར་བརྟེན། ང་ཚོའི་ངོས་ནས་ཚོགས་གཙོ་ཚོགས་གཞོན་གྱི་བཀའ་ལ་རྩིས་ཏེ་གང་མགྱོགས་མགྱོགས་བྱེད་ཀྱི་ཡོད། ཅེས་དང་། གྲོས་ཚོགས་ཚོགས་མ་ཐུབ་པའི་འགན་དེ་བཀའ་ཤག་ལ་མེད་སྐོར་བཅས་གསུངས་སོང་།
ཡང་འདི་གའི་གསར་འགོད་པས་གྲོས་ཚོགས་འཚོགས་མ་ཐུབ་པ་བརྟེན་ནས་ལྷན་ཁང་ཁག་གི་ལས་བསྡོམས་འགྲོ་མ་ཐུབ་པ་དེས། འཛིན་སྐྱོང་གི་ལས་དོན་ལ་དོ་ཕོག་འགྲོ་ཡི་ཡོད་མེད་ཀྱི་ཐད་དྲིས་པར་སྲིད་སྐྱོང་མཆོག་གིས། སྤྱིར་ད་ལན་གྱི་གྲོས་ཚོགས་དེ་ལས་བསྡོམས་ཀྱི་སྐོར་རེད། ཕྱི་ལོ་ ༢༠༢༢ དང་ ༢༣ གྱི་ལས་བསྡོམས་སྐོར་རེད། འདས་པའི་ལས་ཀ་བྱས་ཟིན་པའི་སྐོར་མང་ཚོགས་ཀྱིས་མཁྱེན་དགོས་པ་དང་། བཀུར་འོས་སྤྱི་འཐུས་རྣམས་ཀྱིས་མཁྱེན་པའི་ཐོག་ནས་སྤྱི་ཚོགས་བདེ་དོན་དང་ཆབ་སྲིད་ཀྱི་ལས་དོན་གང་འདྲ་སྒྲུབ་ཀྱི་ཡོད་མེད་གྲོས་ཚོགས་ལ་འགན་ཁུར་བའི་ཐོག་ནས། མང་ཚོགས་ལ་འགན་ཁུར་བའི་གནས་སྟངས་ཤིག་ཆགས་པ་དེ་ད་མེད་པ་ཆགས་འགྲོ་ཡི་ཡོད་རེད། ཉིན་མ་གཉིས་གསུམ་རིང་འཚོགས་མ་ཐུབ་པའི་དབང་དུ་བཏང་བ་ཞིག་ཡིན་ན། དེའི་སྒང་ལ་ཚེས ༢༧ ཉིན་མོ་དེ་ས་གནས་གཞན་པ་ཞིག་ཏུ་བཅར་དགོས་དུས། གྲོས་ཚོགས་འཚོག་རྒྱུའི་ཉིན་མ་ཐུང་དུ་འགྲོ་ཡི་འདུག་ག སྤྱིར་བཏང་འཛིན་སྐྱོང་གི་ལས་ཀ་བྱེད་སྟངས་ཀྱི་ཐོག་ལ་འཐུས་ཤོར་འགྲོ་ཡ་ཡོད་མ་རེད། ཡིན་ནའང་། འདི་ངས་ཕྱོགས་གཅིག་གཉིས་ཀྱི་སྐད་ཆ་མ་ཡིན་པར་སྤྱི་ཡོངས་ཀྱི་སྐད་ཆ་བཤད་ཀྱི་ཡོད། གྲོས་ཚོགས་ཀྱི་འཐུས་མི་མང་པོ་ཞིག་ལ་ང་ཚོའི་སྤྱི་པས་འགྲོ་སོང་བཏང་ནས་དྷ་སར་ཕེབས། སྤྱི་པའི་དོན་དུ་སྐད་ཆ་བཤད་པའི་ཚབ་ཏུ་ང་ཚོའི་གནས་སྟངས་འདི་འདྲ་ཞིག་ཆགས་ཡོང་བའི་སྐབས་ལ། བོད་ནང་གི་བོད་མི་རྣམས་ལ་ང་ཚོས་སེམས་ཤུགས་སྤར་དགོས་ཡོད་རེད་དེ། སེམས་ཤུགས་སྤར་བའི་ཚབ་ཏུ་གནས་སྟངས་ག་འདྲ་ཆགས་ཀྱི་ཡོད་ན། དེ་བཀུར་འོས་སྤྱི་འཐུས་རེ་རེས་དགོངས་པ་བཞེས་དགོས་པའི་གནས་སྟངས་ཤིག་ཆགས་བསྡད་འདུག ཅེས་གསུངས་སོང་།
དེ་རིང་སྔ་དྲོ་མདོ་སྨད་སྤྱི་འཐུས་གྲངས་དགུ་དང་དབུས་གཙང་སྤྱི་འཐུས་དགུ། དེ་བཞིན་ཡུ་རོབ་སྤྱི་འཐུས་གཉིས། ཨོ་གླིང་སྤྱི་འཐུས་གཅིག་བཅས་ཁྱོན་སྤྱི་འཐུས་གྲངས་ ༢༡ ཙམ་གངས་སྐྱིད་སིལ་སྤོལ་ཐང་དུ་ལས་འགུལ་སྤེལ་མུས་ཡིན་པའི་གཞི་རིམ་མི་མང་རྣམས་ལ་གཟིགས་སྐོར་དུ་ཕེབས་ནས་ལས་འགུལ་བ་རྣམས་ཀྱི་གནས་སྟངས་ལ་ལྟ་ཞིབ་དང་། ལྷག་པར་རྒན་འཁོགས་རྣམས་ཀྱི་སྐུ་གཟུགས་དང་སེམས་ཁམས་འཕྲོད་བསྟེན་ཡག་པོ་གནང་དགོས་པ་སོགས་ཀྱི་རེ་སྐུལ་ཞུས་སོང་།
དེ་བཞིན་དེ་རིང་འདི་གའི་གསར་འགོད་པས་དུས་ཚོད་རིང་པོར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོར་ངང་སྒུག་བྱས་ཀྱང་། ཚོགས་གཙོ་སྦྲེལ་པོས་བཅར་འདྲི་དང་ལེན་མ་གནང་བའི་དབང་གིས་གྲོས་ཚོགས་ག་དུས་འཚོགས་ཐུབ་མིན་ཐད་གསལ་ཁ་གང་ཡང་མེད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། སྐལ་བཟང་སྦྱིན་པ།
ཚོགས་འདུའི་གྲོས་གཞི་ལ་བརྩིས་མེད་ཀྱིས་ནང་ཁུལ་གཅིག་གིས་གཅིག་ལ་འདོགས་གཞི་བསླངས་པར་ཉིན་མང་པོ་ཕན་ཚུན་རྙོན་རྩོད་གནང་གིན་བཞུགས་པར་བློ་ཕམ་ཡོད། སྤྱི་འཐུས་རྣམ་པ་ཚོགས་སྐབས་དེང་སང་ཐབས་ལམ་མང་དག་ནས་མི་མང་པོས་གཟིགས་ཐུབ་ཀྱི་ཡོད་པ་དང་ཕྱི་ནང་མི་མང་པོས་རེ་འདུན་ཆེན་པོས་གཟིགས་ཀྱི་ཡོད་ན་དེ་ལ་སྟངས་འཛིན་གནང་ཐུབ་ན་སེམས་ཀྱི་འདུག ། དེ་ཡང་སྤྱི་འཐུས་ཚོགས་ཞུགས་སྐབས་སུ་བཏོན་པའི་བཀའ་མོལ་ཡིན་ཙ་ན་སྤྱི་འཐུས་རང་ནས་ནང་ཁུལ་བཀའ་མོལ་གནང་ནས་ཕན་ཚུན་ར་སྤྲོད་གསལ་པོ་གནང་དགོས་པ་དོ་དག་སོ་སོ་ནས་ཁ་གསལ་ར་སྤྲོད་ཀྱིས་དུས་ཡུན་ཉུང་ཐུང་ཙམ་ནང་ཐག་གཅོད་གནང་ནས་ལས་དོན་ཐོག་མའི་གྲོས་གཞི་གནང་བ་མ་གཏོགས་སྤྱི་འཐུས་རྣམ་པ་ཚང་མས་གསུང་བཤད་གནང་བ་དང་བརྗོད་གཞི་དང་བརྗོད་ཚིག་ཚང་མ་གོང་མ་དེས་གསུངས་ཟིན་པ་ལ་གཞན་ཚང་མས་དེ་ག་རང་སྐྱར་ཟློས་རྗེས་ཟློས་གནང་དགོས་དོན་གང་ཡིན་ནམ། དེ་ནི་ཉི་མ་ཁྱོལ་མི་ཐུབ་པའི་བཀའ་མོལ་ཡིན་པ་ལས་དོན་ཕན་ཡོད་པའི་བཀའ་མོལ་མིན་འདུག ། འདོགས་གཞི་སློང་སའི་ག་ལ་པ་དང་འདོགས་གཞི་སློང་མཁན་ཁོང་རང་གཉིས་ཀ་ད་ལྟའི་ཚོགས་འདུར་ཡོད་་ཙ་ན་གང་ཡིན་ཕན་ཚུན་ཁུངས་སྐྱེལ་གནང་ནས་གཙང་མ་བཟོ་རྒྱུ་སྤྱི་འཐུས་ཚོགས་ཞུགས་དེ་ག་རང་ནས་གཙང་མ་བཟོས་ན་མི་འགྲིག་པ་མེད་ཅིང་ད་ག་རང་གནང་ན་ཡག་ཤོས་རེད།
གཞི་ནས་སྤྱི་འཐུས་རྣམ་པ་ང་ཚོ་མི་མང་ཚོའི་མིག་དཔེ་ལྟ་ས་དང་རེ་མོས་ཞུ་ས་ཡིན་པས་དེ་དང་མཐུན་པའི་བཀའ་མོལ་གནང་སྟངས་དང་ནང་ཁུལ་ཡ་རབས་སྤྱོད་བཟང་གི་ཐོག་ནས་ཞི་དུལ་ཞི་མོལ་དང་རྡོག་རྩ་གཅིག་དྲིལ་གྱིས་ལས་དོན་ཚགས་ཚུད་གནང་བ་ལས་སྒེར་ངོས་ཕན་ཚུན་དགའ་མིན་ཐོག་ལ་མགོ་བོ་འཁོར་བའི་བཀའ་མོལ་ཤ་སྟགས་གནང་ན་བོད་ནང་གི་བོད་མི་ཚོ་ཡི་ཐང་ཆད་ནས་ཐུགས་ཕམ་ཡོང་བ་དང་། དེ་བཞིན་ང་ཚོ་ཚང་མ་ལ་སེམས་ཕམ་ཆེན་པོ་ཡོང་གཞི་ཡིན་འདུག་པས་ཐོག་མཐའ་བར་གསུམ་མམ་མཐོ་དམན་བར་གསུམ་ཡོངས་ལ་ཐུགས བསམ ཡང དག པ བཞེས་རོགས་གནང་ཞེས་རེ་བསྐུལ་ཞུ་རྒྱུ་ཡིན། སྤྱི་འཐུས་རྣམ་པས་གནང་སྟངས་ལ་བརྟེན་ནས་ད་བར་ཁྲིམས་ཞིབ་རྣམ་པ་ལྷན་རྒྱས་དང་བཀའ་བློན་རྣམ་པ་བཞི་བསྐོ་བཞག་གནང་མ་ཐུབ་པ་མ་རེད་དམ།
བོད་ཆོལ་ཁ་གསུམ་ཀ་དང་ཆོས་ལུགས་ཡོངས་ནས་སྤྱི་འཐུས་ཕེབས་པའི་དགོངས་དོན་དེ་བཞིན་ཚང་མ་མཉམ་རུབ་ཀྱིས་སྤྱི་དོན་ཕྱར་བ་གྲུ་འདེགས་ཡོང་བའི་ཆེད་དུ་ཡིན་པ་ལས་ང་དང་ཁྱོད་ཟེར་ནས་ཕན་ཚུན་དབྱེ་འབྱེད་གནང་བ་སོགས་ཡོང་བའི་དོན་དུ་རྩ་བ་ཉིད་ནས་མིན་པ་དེ་དོན་དགོངས་པ་བཞེས་ནས་སོ་སོ་ས་སོར་སྟངས་འཛིན་དགོས་ཀྱི་འདུག ། ད་ལྟའི་སྤྱི་འཐུས་རྣམ་པའི་གནང་སྟངས་ལ་ང་ཚོ་མི་མང་ལ་སེམས་ཕམ་དང་མ་སྐྱིད་པ་ཡོང་གི་འདུག ། གནང་སྟངས་དེ་ལ་དགའ་མཁན་ནི་རྒྱ་དམར་ཡིན་པ་ཐག་ཆོད་རེད། དོན་དག་ག་ལ་པ་ཞིག་ལ་ཁག་བཀལ་ནས་ཚོགས་འདུ་མུ་མཐུད་ནས་གནང་གི་མིན་ཟེར་བ་ང་ཚོའི་ད་ལྟའི་སྤྱི་འཐུས་ཀྱི་སྐབས་ལ་མ་གཏོགས་གོ་མ་མྱོང་། ང་ཚོའི་གནས་སྟངས་རང་བཙན་ཡིན་རྒྱལ་ཁབ་་ལུང་པའི་སྲིད་དོན་ཚོགས་པ་ཁག་ཚོ་དང་རྩ་བ་ཉིད་ནས་གཅིག་པ་མ་རེད། ང་ཚོའི་དགྲ་བོའམ་
ལྡོག་ཕྱོགས་དེ་རྒྱ་དམར་གཅིག་པོ་རེད་མ་གཏོགས་ང་ཚོ་ནང་ཁུལ་རྩ་བ་ཉིད་ནས་མརེད་དོ་ཞུ།། །།