རྒྱ་གར་བོད་དོན་རྒྱབ་སྐྱོར་ཚོགས་པའི་སྐུ་ཚབ་ཚོགས་ཆུང་ཞིག་བཞུགས་སྒར་ཁུལ་དུ་འཚམས་གཟིགས་ཕེབས་སྐབས་བོད་དོན་རྒྱབ་སྐྱོར་མུ་མཐུད་དུ་གནང་རྒྱུ་དང་མ་འོངས་པར་མཉམ་རུབ་གནང་གལ་ཆེ་སྐོར་བརྗོད་འདུག
ཟླ་འདིའི་ཕྱི་ཚེས་ ༢༡ ནས་བཟུང་རྒྱ་གར་རྒྱལ་ཡོངས་སྤྱི་ཚོགས་ཞབས་ཞུ་ཚོགས་པ་ (Rashtriya Swayamsewak Sangh)་དང་། རྒྱ་གར་བོད་དོན་རྒྱབ་སྐྱོར་ཚོགས་པ་ (Bharat Tibbat Sangh) གཉིས་ཀྱི་ཚོགས་མི་ཁག་ཅིག་ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་སར་གཟིགས་སྐོར་གནང་བཞིན་ཡོད་པ་ལྟར། དེ་རིང་ཕྱི་ཚེས་ ༢༢ ཉིན་གྱི་སྔ་དྲོ་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་བོད་དོན་རྒྱབ་སྐྱོར་ཚོགས་པའི་སྐུ་ཚབ་ཚོགས་ཆུང་ལ་ཐུག་འཕྲད་གནང་འདུག་ཅིང་། ཉིན་རྒྱབ་གངས་སྐྱིད་ལྷག་པ་ཚེ་རིང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། ཟུང་དྲུང་རྣམ་རྒྱལ་ཚེ་དབང་ལགས་བཅས་ཀྱིས་རྒྱ་གར་བོད་དོན་རྒྱབ་སྐྱོར་ཚོགས་མི་རྣམས་དང་མཇལ་འཕྲད་གནང་སྐབས། འཕགས་བོད་གཉིས་བར་གྱི་མཛའ་འབྲེལ་དང་བོད་དོན་ཐོག་རྒྱ་གར་དང་རྒྱལ་སྤྱིའི་རྒྱབ་སྐྱོར་གནང་དགོས་པའི་འབོད་སྐུལ་གནང་འདུག
དེ་བཞིན་ཁ་སང་ཕྱི་ཚེས་ ༢༡ ཉིན་བོད་མི་མང་སྤྱི་འཐུས་རྒྱུན་ལས་ཚོགས་ཁང་དུ། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་རྒྱ་གར་བོད་དོན་རྒྱབ་སྐྱོར་ཚོགས་པའི་སྐུ་ཚབ་ཚོགས་ཆུང་དང་མཇལ་འཕྲད་གནང་ཡོད་ཅིང་། སྐབས་དེར་ཚོགས་གཞོན་མཆོག་གིས་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང་། རྒྱ་གཞུང་གིས་བོད་ནང་གི་བོད་མི་རྣམས་ཀྱི་ཆོས་དད་རང་དབང་དང་། སྐད་ཡིག་བཀོལ་སྤྱོད་སོགས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱིས་མནར་གཅོད་ཚད་མེད་གཏོང་བཞིན་ཡོད་པ་དང་། བོད་ཕྲུག་ས་ཡ་གཅིག་ལྷག་བཅའ་སྡོད་སློབ་གྲྭར་བཙན་གྱིས་བཅུག་སྟེ་རྒྱ་སྒྱུར་སློབ་གསོ་ལག་བསྟར་བྱེད་བཞིན་པའི་ཛ་དྲག་གནས་སྟངས་སྐོར། དེ་བཞིན་བོད་དོན་དེ་རྒྱ་གར་རྒྱལ་ཁབ་ཀྱི་བདེ་འཇགས་ལ་གལ་གནད་ཆེ་སྐོར་དང་། ཉེ་ཆར་རྒྱ་གར་ལྡི་ལི་ནས་འཚོགས་པའི་སྟོབས་ཆེན་རྒྱལ་ཁབ་ ༢༠ ཚོགས་ཆེན་ལ་བོད་མི་མང་སྤྱི་འཐུས་ཚོགས་གཙོ་མཆོག་གི་མཚན་ཐོག་ནས་བོད་དོན་ཞུ་སྐུལ་ཡི་གེ་བཏང་བའི་སྐོར་སོགས་གསུངས་འདུག
སྐབས་དེར་རྒྱ་གར་བོད་དོན་རྒྱབ་སྐྱོར་ཚོགས་པའི་སྐུ་ཚབ་ཚོགས་ཆུང་གིས་བོད་དོན་ཆེད་མུ་མཐུད་དུ་རྒྱབ་སྐྱོར་གནང་རྒྱུ་དང་། མ་འོངས་པར་མཉམ་རུབ་ཐོག་ཕྱག་ལས་གནང་རྒྱུ་གལ་ཆེན་ཡིན་སྐོར་གསུངས་ཡོད་པ་མ་ཟད། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ་རྒྱ་གར་སྐུ་ཚབ་ཚོགས་ཆུང་ཟུར་ཉན་དུ་ཕེབས་ཤིང་གྲོས་ཚོགས་སུ་དགའ་བསུ་ཞུས་ཡོད་འདུག
དེ་བཞིན་དེ་རིང་ཧི་མ་ཅཱལ་མངའ་སྡེའི་རྒྱལ་ས་སིམ་ལར་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས་མངའ་སྡེའི་སྤྱི་ཁྱབ་བློན་ཆེན་སུཁ་བིནྡར་སིངྷ་སུཀ་ཁུ་མཆོག་དང་མཇལ་འཕྲད་གནང་ཡོད་ཅིང་། སྐབས་དེར་ས་གནས་མགོ་འཛིན་ལགས་ནས་ཧི་མ་ཅཱལ་མངའ་སྡེ་དང་། དྷ་ས་ཁུལ་གྱི་བོད་མི་རྣམས་ཀྱི་བདེ་དོན་དང་འབྲེལ་བའི་ཞུ་སྙན་ཞིག་ཕུལ་ཡོད་པ་ལྟར། སྤྱི་ཁྱབ་བློན་ཆེན་མཆོག་ནས་ཐུགས་ཞིབ་གྲོས་མོལ་གནང་རྒྱུ་ཡིན་པའི་ཞལ་བཞེས་གནང་ཡོད་འདུག
གསར་འགོད་པ། བྱམས་པ་ཚེ་རིང་།
གསར་འགོད་པ། སྐལ་བཟང་སྦྱིན་པ།
