ཁང་པ་སྟོང་པ་ཞིག་ལ་འབོད་སྐུལ་ཞུས་ནས་བསྡད་ཚེ་ཏག་ཏག་བསྡད་མི་འདུག

སྤྱི་འཐུས་གྲོས་ཚོགས་མུ་མཐུད་འཚོགས་ཐུབ་ཀྱི་མེད་སྟབས་ལས་འགུལ་སྤེལ་མཚམས་བཞག་སྟེ་ཕྱི་ཟླ་གསུམ་པར་གང་འདྲ་བྱེད་དགོས་མིན་ཐད་མི་མང་ལས་འགུལ་གྱི་རྒྱུན་ལས་རྣམས་ཀྱིས་ཐག་གཅོད་དང་གོ་བསྡུར་བྱ་རྒྱུ་ཡིན་འདུག 

དེ་རིང་དབུས་གཙང་སྤྱི་འཐུས་དགུ་དང་མདོ་སྨད་སྤྱི་འཐུས་དགུ། དེ་བཞིན་ཡུ་རོབ་སྤྱི་འཐུས་གཉིས་བཅས་ཁྱོན་སྤྱི་འཐུས་གྲངས་ཉི་ཤུས་དབུས་བོད་མིའི་སྒྲིག་འཛུགས་ཀྱི་ཉེ་འདབས་སུ་ལས་འགུལ་སྤེལ་མུས་ཡིན་པའི་གཞི་རིམ་མི་མང་གི་ལས་འགུལ་བ་རྣམས་ལ་མཇལ་འཕྲད་བྱས་ཏེ། མི་མང་གིས་ལས་འགུལ་མཚམས་འཇོག་བྱ་དགོས་པ་སོགས་ཀྱི་རེ་སྐུལ་ཞུས་པ་བཞིན། ཟླ་འདིའི་ཕྱི་ཚེས ༢༨ ཀྱི་རྗེས་ནས་གྲོས་ཚོགས་འཚོགས་ཀྱི་མེད་སྟབས། གཞི་རིམ་མི་མང་གི་ལས་འགུལ་དེའང་མཚམས་འཇོག་བྱ་རྒྱུ་ཡིན་འདུག 

གཞི་རིམ་མི་མང་ལས་འགུལ་ཚོགས་པའི་རྒྱུན་ལས་ཚེ་བརྟན་ཕུན་ཚོགས་ལགས་ཀྱིས། རྣམ་པ་ཚང་མས་མཁྱེན་གྱི་རེད། དེ་རིང་ང་ཚོས་ལས་འགུལ་སྤེལ་ནས་ཉིན་བདུན་པ་ཆགས་བསྡད་ཡོད། གཟའ་སྤེན་པ་ནས་གྲོས་ཚོགས་འཚོགས་མ་ཐུབ་པར་ཉིན་གསུམ་འགྲོ་བཞིན་འདུག གནས་སྟངས་འདི་འདྲ་བྱས་ཏེ་ཕྱིན་པ་ཡིན་ཚེ་གྲོས་ཚོགས་ཀྱི་ཉིན་གཉིས་མ་གཏོགས་ལྷག་མི་འདུག  མི་མང་གིས་ཁང་པ་སྟོང་པ་ཞིག་ལ་འབོད་སྐུལ་ཞུས་ནས་བསྡད་ཚེ་ཏག་ཏག་བསྡད་མི་འདུག་པས། ང་ཚོ་ལས་འགུལ་ཚོགས་ཆུང་གི་རྒྱུན་ལས་ཀྱིས་ཟླ་འདིའི་ཕྱི་ཚེས་ ༢༨ ཉིན་གྱི་ཉིན་གུང་ཆུ་ཚོད་ ༢ བའི་ཐོག་ལས་འགུལ་མཇུག་སྡོམ་བྱེད་པའི་ཐག་གཅོད་བྱུང་བ་ཡིན། ང་ཚོས་སྤྱི་འཐུས་ཚོགས་གཙོ་ཚོགས་གཞོན་དང་སྤྱི་འཐུས་རྣམ་པར་ཞུ་དགོས་ཚང་མར་ཞུས་ཟིན། བློ་ཕམ་པ་ཞིག་ལ་མི་མང་གིས་ལས་འགུལ་སྤེལ་ཡོད་ཀྱང་། གྲོས་ཚོགས་མུ་མཐུད་དུ་འཚོགས་མ་ཐུབ་པར་བློ་ཕམ་བྱུང་གི་འདུག ཟླ་འདིའི་ཕྱི་ཚེས་ ༢༨ བར་གྲོས་ཚོགས་ཀྱི་ཉིན་མཐའ་མར་ཆགས་ཀྱི་ཡོད་པས་མི་མང་གིས་ལས་འགུལ་མུ་མཐུད་སྤེལ་རྒྱུ་རེད། དེའི་བར་དུ་ང་ཚོས་ལས་འགུལ་ག་འདྲ་སྤེལ་དགོས་མིན་རྒྱུས་ལོན་བྱས་ཏེ་སྤེལ་རྒྱུ་ཡིན། ཞེས་འགྲེལ་བརྗོད་གནང་སོང་། 

ོ ཡང་ཁོང་གིས། ཐེངས་འདིའི་ལས་འགུལ་ནང་ལོ་རྒན་པའི་ལས་འགུལ་བ་མང་པོ་ཞིག་ཡོད་པས། དཀའ་ངལ་མང་པོ་ཞིག་འཕྲད་ཡོང་གི་འདུག ཁ་སང་བདེ་ལེགས་སྨན་ཁང་དུ་དགུང་ལོ་བགྲེས་པོ་གསུམ་ལ་སྨན་བཅོས་བྱེད་དགོས་པའི་གནས་སྟངས་ཆགས་སོང་། ལས་འགུལ་བ་གཅིག་ཛ་དྲག་ཆགས་ཏེ་ཀང་རའི་ཌན་ཌ་སྨན་ཁང་དུ་བསྐྱལ་དགོས་ཁེལ་ཡོད་པ་དང་། དེ་ནས་ཧྥོར་ཌི་སི་སྨན་ཁང་དུ་ཛ་དྲག་ངང་བརྗེ་བོ་རྒྱག་དགོས་ཁེལ་བ་རེད། འདིར་ལས་འགུལ་ནང་དུ་ལོ་རྒན་པ་མང་པོ་ཡོད་དུས་འཕྲོད་བསྟེན་གྱི་ཐོག་ནས་དཀའ་ངལ་འཕྲད་བཞིན་འདུག སྤྱི་འཐུས་གྲོས་ཚོགས་ཀྱང་མུ་མཐུད་འཚོགས་ཐུབ་ཀྱི་མི་འདུག་པས། ད་ཐེངས་འདིར་ལས་འགུལ་སྤེལ་མཚམས་བཞག་སྟེ། ཕྱི་ཟླ་གསུམ་པར་གང་འདྲ་བྱེད་དགོས་མིན་ཐད་མི་མང་ལས་འགུལ་གྱི་རྒྱུན་ལས་རྣམས་ཀྱིས་ཐག་གཅོད་བཀའ་བསྡུར་བྱ་རྒྱུ་ཡིན། ཐེངས་འདིའི་ལས་འགུལ་ནང་ཕྱོགས་མཐའ་ནས་ཡོང་བའི་ལས་འགུལ་བ་བཞི་བརྒྱ་ཙམ་དང་། དྷ་སའི་ཉེ་ཁུལ་གྱི་མི་མང་མང་པོ་མཉམ་ཞུགས་གནང་སོང་པས། དེ་ནི་ཞེ་དྲགས་དགའ་འོས་པ་ཞིག་དང་། གཟི་བརྗིད་ལྡན་པ་ཞིག་རེད་བསམ་གྱི་འདུག ཧི་མ་ཅལ་གྱི་ས་གནས་མང་པོ་ཞིག་ནས་ཐད་གཏོང་ལ་གཟིགས་མཁན་མང་པོ་ཡོང་གི་འདུག དེའི་གྲངས་ཀ་ཉིན་རེར་བདུན་བརྒྱ་ནས་ཆིག་སྟོང་བར་དུ་ཆགས་སོང་། དེ་བཞིན་ཕྱི་རྒྱལ་ཡུལ་གྲུ་ཁག་དང་། ཕྱོགས་མཐའ་ཁག དྲ་ལམ་ཁག་ནས་ཞལ་འདེབས་གནང་མཁན་མང་པོ་བྱུང་སོང་། སྤྱིར་ཐེངས་འདིའི་ལས་འགུལ་ལ་མི་མང་གི་རྒྱབ་སྐྱོར་ཚད་མཐོ་བོ་རེད། ལོ་རྒྱུས་ནང་དུ་མིག་དཔེ་སྟོན་ཡག་ཞིག་ཆགས་སོང་། ཞེས་འགྲེལ་བརྗོད་གནང་སོང་།

བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། གྲོས་ཚོགས་འཚོགས་དང་མ་འཚོགས་དེ་སྤྱི་འཐུས་རྣམ་པའི་ཐུགས་འགན་རེད་མ་གཏོགས། བདེ་སྲུང་ལས་ཁུངས་ཀྱི་འགན་མ་རེད་བསམ་གྱི་འདུག དཔལ་ལྡན་སྲིད་སྐྱོང་མཆོག་གིས་གྲོས་ཚོགས་སུ་བཀའ་མོལ་གནང་བ་དེ། རྣམ་པ་ཚོ་ཚང་མས་གསན་ཡོད་རེད། གནད་དོན་དེའི་སྒང་ནས་བདེ་སྲུང་ལས་ཁུངས་དྲུད་རྒྱུ་དེ། སྟབས་མ་བདེ་བ་ཟེར་ན་མི་འདུག སྟབས་མ་ལེགས་པ་ཟེར་ན་མི་འདུག གང་ལྟར་བཀུར་འོས་སྤྱི་འཐུས་ཚོའི་བཀའ་བསྡུར་ནང་ལ་བདེ་སྲུང་ལས་ཁུངས་དྲུད་སླེབས་པ་རེད་མ་གཏོགས། འདི་བདེ་སྲུང་ལས་ཀྱིས་ཡར་བསླངས་བཞག་པའི་གནད་དོན་ཞིག་མ་རེད། དེའི་ཐོག་ལ་གྲོས་ཚོགས་འཚོགས་དང་མ་འཚོགས་འདི། བཀུར་འོས་སྤྱི་འཐུས་རྣམས་ལ་རག་ལས་པ་རེད་མ་གཏོགས། བདེ་སྲུང་ལས་ཁུངས་དང་འཛིན་སྐྱོང་གི་འགན་ཁུར་ཐུབ་ཡ་ཞིག་མ་རེད། དཔལ་ལྡན་སྲིད་སྐྱོང་གིས་གྲོས་ཚོགས་ནང་ལ་བཀའ་གནང་བ་ནང་བཞིན་རེད། ང་ཚོས་དུས་རྒྱུན་དུ་འབྲེལ་བ་ཡོད་སའི་གནས་ཚུལ་ཡོང་ཁུངས་དེ་དག་ལ་འབྲེལ་བ་བྱ་དགོས་ཀྱི་ཡོད་པ་དང་། ང་ཚོས་ཐོག་ནས་འབད་བརྩོན་ཞུ་ཡི་ཡིན་ཟེར་ནས། ཕྱི་ཚེས་ ༢༡ ལ་གྲོས་ཚོགས་སུ་ཞུས་པ་རེད། དེ་དེ་ག་རང་བྱས་ནས་འགྲོ་བསྡད་ཀྱི་ཡོད། ཚོགས་གཙོ་རྣམ་པ་གཉིས་ཀྱིས་ཀྱང་ལམ་སྟོན་ཕེབས་སོང་། ང་རང་གིས་བསམ་ན་སྤྱི་འཐུས་རྣམ་པ་ཚོས་གྲོས་ཚོགས་འཚོགས་ཐུབ་ཐབས་གནང་རྒྱུའི་ཐོག་ལ་དགོངས་པ་བཞེས་ཐུབ་ན་ཡག་པོ་རེད་བསམ་གྱི་འདུག ང་ཚོས་གཞན་ལ་བསྟུན་དགོས་པའི་གནད་དོན་ཞིག་ཆགས་ཀྱི་ཡོད་དུས། ཉིན་མ་གཅིག་འགོར་གྱི་རེད། ཉིན་མ་གཉིས་འགོར་གྱི་རེད། ཉིན་མ་གསུམ་འགོར་གྱི་རེད་ཟེར་ནས། བརྒྱ་ཆ་བརྒྱ་དུས་ཚོད་དེ་འདྲ་ཞིག་གི་ནང་ལ་ཚར་ས་རེད་ཅེས་ནས་ཞུ་ཐུབ་ཡ་དེ་དཔེ་ཁག་པོ་རེད་འདུག སྙིང་དོན་དེ་ག་རེ་རེད་ལབ་ན། གྲོས་ཚོགས་ཀྱི་བརྒྱུད་རིམ་འགྲོ་རྒྱུ་འདི་བཀུར་འོས་སྤྱི་འཐུས་རྣམ་པ་ཚོས་རང་གིས་ཐུགས་འགན་བཞེས་དགོས་ཡ། ལྷག་པར་དུ་ཁ་སང་སྲིད་སྐྱོང་གིས་བཀའ་གནང་བ་ནང་བཞིན་རེད། གང་ལྟར་གྲོས་ཚོགས་འཚོགས་ཐུབ་དང་མ་ཐུབ་ཀྱི་གནས་སྟངས་དེ་ང་ཚོའི་སྒང་ལ་རྩ་བ་ཉིད་ནས་བབ་མེད། གང་ཡིན་ཟེར་ན། གྲོས་ཚོགས་འཚོགས་གནང་ཐུབ་པའི་གནས་སྟངས་མེད་པ་ཞིག་མ་རེད་བསམ་གྱི་འདུག ཅེས་གསུངས་སོང་།  

ཡང་བདེ་སྲུང་བཀའ་བློན་མཆོག་གིས། བདེ་སྲུང་ལས་ཁུངས་ཀྱི་ཐོག་ནས་གྲོས་ཚོགས་ཀྱི་ནང་ལ་དགེ་བཤེས་སྨོན་ལམ་མཐར་ཕྱིན་ལགས་སོ་བ་རེད་ལབ་རྒྱུ་མ་བྱུང་། བཀུར་འོས་སྤྱི་འཐུས་ཁོ་རང་རང་གིས་ཐོག་ནས་ད་འཆར་གཞི་ངན་པ་ཞིག་བཏིང་གི་ཡོད་ས་རེད་ཟེར་ནས་མར་བྲུས་ནས་གསུངས་པ་རེད། ང་ཚོའི་ཐོག་ནས་འཆར་གཞི་ངན་པ་གང་ཡང་མེད། མཇལ་འཕྲད་གནང་འདུག་ཟེར་ནས་གནས་ཚུལ་ཞིག་ང་ཚོ་ལ་ཐོན་པ་རེད། གནས་ཚུལ་དེ་རེད་དང་མ་རེད་ཟེར་བ་དེ་རྒྱུན་དུ་ནས་འགྲོ་སྟངས་ཤིག་རེད། འདི་དོ་བདག་ལ་བཀའ་འདྲི་ཞུ་རྒྱུའི་བང་ནང་བཞག་པ་རེད། དེ་བང་ནང་བཞག་ཡོད་ནའང་ཐུག་པ་ཙམ་གྱིས་སོ་བ་རེད་ཟེར་ནས་ང་ཚོས་ལབ་ཀྱི་ཡོད་མ་རེད། ཡིན་ཡང་། དེ་བཟོས་ཡ་དེ་གྲོས་ཚོགས་རང་གི་གྲོས་གླེང་ནང་ནས་ཆེད་དུ་མངགས་ནས་ཆེན་པོ་ཞེ་དྲགས་ཆགས་འགྲོ་ཡི་འདུག་མ་གཏོགས། ང་ཚོས་ཐོག་ནས་ཐོག་མ་བསམ་པ་དེ་འདྲ་ཞིག་གང་ཡང་མིན། བཀའ་འདྲི་ཞུ་སྐབས་ཐུག་མེད་གསུངས་ན་ནི། ཐུག་མེད་གསུངས་ཀྱི་འདུག་ལབ་ནས་འབྲེལ་ཡོད་སུ་ལ་ཞུ་དགོས་ཀྱི་འདུག་ནའང་། འདི་གསུངས་ཀྱི་འདུག་ལབ་ནས་ཞུ་ཡ་ང་ཚོའི་ལས་འགན་རེད་མ་གཏོགས། འདི་ལས་འཕར་མ་ཞིག་ང་ཚོས་མཐོང་མ་བྱུང་། ཡིན་ན་ཡང་། ད་འདི་འདྲའི་གནས་སྟངས་ཤིག་ཆགས་འགྲོ་ཡི་འདུག འདིས་ང་རང་ཚོ་ལ་བརྡབ་གསིག་དང་ག་ཚོད་ཀྱིས་ཕན་གྱི་ཡོད་དང་མེད་རིམ་པ་བྱས་ནས་ཚང་མས་འགན་ཁུར་བའི་ཐོག་ནས་ཕེབས་དགོས་ཡ་གལ་ཆེན་པོ་མིན་འགྲོ་བསམ་གྱི་འདུག ཅེས་གསུངས་སོང་། 

གསར་འགོད་པ། བྱམས་པ་ཚེ་རིང་། དཔལ་ལྡན། 

རྩོམ་སྒྲིག་པ། སྐལ་བཟང་སྦྱིན་པ།