གཞི་རིམ་མི་མང་གི་ཞི་འབོད་ལས་འགུལ་གྱི་མཇུག་སྡོམ་མཛད་སྒོའི་སྟེང་དབུས་གཙང་དང་མདོ་སྨད། ཡུ་རོབ་སྤྱི་འཐུས་བཅས་དང་བོད་ཀྱི་གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་སྐུ་ཚབ་བཅས་མཉམ་ཞུགས་གནང་སོང་།
དེ་རིང་གཞི་རིམ་མི་མང་ལས་འགུལ་མཚམས་འཇོག་བྱ་རྒྱུའི་གསར་འགོད་གསལ་བསྒྲགས་སྤེལ་བའི་ནང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་མི་ལོ་དྲུག་ཅུ་བརྒལ་བའི་རིང་སྐུ་ངལ་བརྒྱ་ཕྲག་ལྷུར་བཞེས་ཀྱིས་གཅེས་སྐྱོང་གནང་བའི་བོད་མིའི་སྒྲིག་འཛུགས་མང་གཙོའི་ཀ་བ་གསུམ་གྱི་ནང་ནས་ཁྲིམས་ཞིབ་ཁང་དེ་དག་སྐབས་བཅུ་དྲུག་པའི་སྤྱི་འཐུས་རྒྱུན་ལས་ཀྱིས་གཙོས་སྤྱི་འཐུས་རྣམ་པས་རྩ་གཏོར་བཏང་པ་དང་། སྐབས་བཅུ་བདུན་པའི་གྲོས་ཚོགས་སུ་ཁྲིམས་འཆར་ཐེངས་གསུམ་བསླེབས་ཀྱང་གསུམ་ཆ་གཉིས་ཀྱི་གྲངས་ཚད་མ་ལོན་པ་བཅས་ཀྱིས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་ནང་ནས་ཁྲིམས་ཞིབ་ཁང་གི་གནས་སྟངས་ཛ་དྲག་ཉག་ཕྲའི་གནས་སུ་ཡོད་པ་བློས་ཀྱིས་མ་བཟོད་ནས་ཕྱི་རྒྱལ་ཡུལ་གྲུ་ཁག་དང་རྒྱ་བལ་གཉིས་ལ་གནས་པའི་གཞི་རིམ་མི་མང་རེ་འབོད་ལས་འགུལ་བས་ཕྱི་ལོ་ ༢༠༢༢ ཟླ་ ༡༠ ནས་མགོ་འཛུགས་ཀྱིས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་སུ་ཞུ་སྙན་སྔ་རྗེས་ཕུལ་བ་དང་། ཕྱི་ལོ་ ༢༠༢༣ ཟླ་ ༢ ཚེས་ ༢ བཞུགས་སྒར་དྷ་སར་མི་གྲངས་ ༡༥༠ ཙམ་གྱི་ཚོགས་འདུའི་ཐོག་ནས་ཚོགས་དྲུང་ལས་ཁུངས་སུ་འཐུས་མི་ཆེད་བཅར་གྱིས་གྲོས་ཆོད་དང་སྙན་ཞུ་ཕུལ་བ་བཅས་ལ་སྤྱི་འཐུས་རྒྱུན་ལས་ཀྱིས་བདག་སྤྲོད་རྩ་བ་ནས་མ་གནང་བའི་ཐོག་ཡིག་འཁྱམས་རེད་ཅེས་སྣང་ཆུང་ཁྱད་གསོད་གནང་བར་བརྟེན། ད་ལམ་ཕྱི་ལོ་ ༢༠༢༣ ཟླ་ ༩ ཚེས་ ༡༨ ནས་མི་གྲངས་ ༦༠༠ བརྒལ་བ་བཞུགས་སྒར་དྷ་རམ་ས་ལར་འདུ་འཛོམས་ཀྱིས་སྐབས་བཅུ་བདུན་པའི་གྲོས་ཚོགས་ཚོགས་དུས་དྲུག་པའི་ཐོག་ ༼ཁྲིམས་ཞིབ་པ་ཆེ་བ་དང་གཞན་བསྐོ་བཞག་ཐུབ་ཕྱིར་བཅའ་ཁྲིམས་བསྐྱར་བཅོས་ངེས་པར་དུ་གནང་རོགས།༽ ཞེས་ཡིག་ཐོག་དགོས་འདུན་བཏོན་ནས་གངས་སྐྱིད་སིལ་སྤོལ་རྩེད་ཐང་དུ་ཕྱི་ཟླ་ ༩ ཚེས་ ༡༩ ནས་ལས་འགུལ་སྤེལ་མགོ་བཙུགས་པ་དང་། སྤྱི་འཐུས་ཚོགས་གཙོ་ཚོགས་གཞོན་རྣམ་གཉིས་ལ་སྙན་ཞུ་འབུལ་བར་བཅར་ཆོག་པ་ཞེས་བདེ་སྲུང་ལས་ཁུངས་བརྒྱུད་དུས་ཚོད་སྔ་རྗེས་ཞུས་པ་ཡིན། མཐའ་མ་ཕྱི་ཟླ་ ༩ ཚེས་ ༢༡ ཉིན་ཚོགས་གཙོ་ཚོགས་གཞོན་སྐུ་མདུན་བཅར་ཆོག་པའི་དུས་ཚོད་གནང་བྱུང་ཡང་། འཐུས་མི་གཉིས་ལ་མ་གཏོགས་བཀའ་འཁྲོལ་གནང་མེད་པ་དང་། ཆེད་བཅར་འཐུས་མི་གཉིས་ལ་བཀའ་ཕེབས་དོན་དུ། ཁྲིམས་སྒྲིག་བསྐྱར་བཅོས་ཚོགས་ཆུང་གི་སྙན་ཐོ་དང་བསྐྱར་བཅོས་འཆར་ཟིན་ཕྱི་ལོ་ ༢༠༢༤ ཟླ་ ༢ པའི་ཟླ་མཇུག་ཏུ་འབུལ་དགོས་པ་ཚོགས་དུས་ལྔ་པའི་གྲོས་ཆོད་ཡིན་པ་དེ་ལས་བརྒལ་བའི་ལས་ཀ་བྱེད་ཐུབ་པ་མེད་སོགས་གསུངས་ནས་མདོ་དོན་སྐབས་འདིར་ཁྲིམས་ཞིབ་པ་བསྐོ་བཞག་གི་བཅའ་ཁྲིམས་བསྐྱར་བཅོས་ཡོང་ཐབས་མེད་པ་མ་ཟད། ཡང་བསྐྱར་ཚོགས་གཙོ་སྦྲེལ་པོ་ཐུག་སར་ཡོང་མི་དགོས་ཞེས་བཀའ་ནན་ཕེབས་འདུག
ཕྱི་ཟླ་ ༩ ཚེས་ ༢༢ ནས་བཟུང་ཉིན་བསྟུད་མར་གྲོས་ཚོགས་ཚོགས་མ་ཐུབ་པར་གནས་ཡོད་སྟབས་གཏན་འབེབས་ཟིན་པའི་ལས་རིམ་མང་པོ་ཞིག་འགག་བསྡད་ཡོད་པ་དང་། དེ་འདྲའི་གནས་སྟངས་འོག་ནས་ལས་དོན་གང་ཡང་འགྲུབ་རེ་མེད་པར་མངོན་ཏེ་ཕྱི་ཟླ་ ༩ ཚེས་ ༢༦ ཉིན་བོད་མི་མང་སྤྱི་འཐུས་རྣམ་པ་ ༢༠ ལས་འགུལ་ས་གནས་སུ་ཆེད་ཕེབས་ཀྱིས་ད་ལྟའི་གྲོས་ཚོགས་གནས་སྟངས་འདི་ནས་ཁྱེད་ཚོས་ཞུས་དོན་འགྲུབ་རེ་མེད་པ་དང་། དེ་ལས་ལྡོག་སྟེ་མང་ཚོགས་ཀྱི་འཕྲོད་བསྟེན་ལ་དཀའ་ངལ་དང་། སེམས་ཁམས་ལ་འགྱུར་བ་ཐེབས་ནས་དཀའ་རྙོག་གཞན་ཡང་འཕྲད་ཉེན་ཆེ་སྟབས་ལས་འགུལ་མཚམས་འཇོག་ཡོང་བའི་རེ་སྐུལ་སློབ་གསོ་གནང་བ་དང་། ཕྱི་ལོ་ ༢༠༢༤ ཟླ་ ༣ པའི་གྲོས་ཚོགས་སྐབས་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་གྲོས་ཚོགས་ནང་བསླེབ་རྒྱུར་ཡིད་ཆེས་བྱེད་ཆོག་ཅེས་གསུངས་པ་དང་། ཕྱི་ཟླ་ ༩ ཚེས་ ༢༧ ཉིན་གྱི་སྔ་དྲོའི་ཆུ་ཚོད་ ༡༠ པའི་ཐོག་བོད་མི་མང་སྤྱི་འཐུས་ཚོགས་གཞོན་མཆོག་སྐུ་སྒེར་གྱི་ངོ་བོའི་ཐོག་ནས་ཕེབས་ཏེ། མང་ཚོགས་ལ་ལས་འགུལ་མཚམས་བཞག་དགོས་པའི་སློབ་གསོ་གནང་། དེ་རྗེས་གཞུང་འབྲེལ་མ་ཡིན་པའི་ཚོགས་པ་ཁག་བདུན་གྱི་ཚོགས་གཙོ་དང་སྐུ་ཚབ་མི་བདུན་ཕེབས་ཏེ། མང་ཚོགས་ལ་ལས་འགུལ་མཚམས་འཇོག་ཡོང་བའི་རེ་འདུན་སློབ་གསོ་གནང་བ་བཅས་ལ་ལས་འགུལ་བ་རྣམས་ནས་བརྩི་བཀུར་གྱིས་ད་ལམ་གཞི་རིམ་མི་མང་རེ་འབོད་ཀྱི་ཞུ་འབོད་ལས་འགུལ་ཆེན་མོ་དེ་གནས་སྐབས་མཚམས་འཇོག་བྱེད་དགོས་བྱུང་། ཞེས་བཀོད་འདུག
ད་དུང་མུ་མཐུད་དུ། སྤྱི་འཐུས་ཚོགས་གཙོ་ཚོགས་གཞོན་རྣམ་གཉིས་དང་སྤྱི་འཐུས་རྣམ་པར་ཞུ་འབོད་གསལ་པོ་ཞུ་དགོས་པ་ཞིག་ལ། ༡༽ ཁྲིམས་སྒྲིག་བསྐྱར་བཅོས་ཚོགས་ཆུང་ནས་ལས་བསྡོམས་དང་ཟིན་བྲིས་ཆ་ཚང་སྤྱི་མོས་ཐོག་ནས་ལེགས་གྲུབ་ཟིན་འདུག་པ་མ་ཟད། སྤྱི་འཐུས་ཚོགས་གཙོ་སྦྲེལ་པོའི་སྐུ་མདུན་དུ་ཐེངས་བཞི་ཙམ་བཅར་འདུག་ཀྱང་། དང་པོ་ཟིན་བྲིས་ཆ་ཚང་དགོས་སྐོར་དང་། དེ་རྗེས་སྐབས་ལྔ་པའི་གྲོས་ཆོད་དང་མཐུན་མིན། ལྷག་པར་དུ་ཁོར་ཡུག་མི་འདུག་ཅེས་ཁག་དཀྲི་སྣ་ཚོགས་ཀྱིས་ངོ་བཞེས་གནང་མེད་པར་སོང་། ད་ལམ་གྲོས་ཚོགས་ཐོག་ཁྲིམས་སྒྲིག་བསྐྱར་བཅོས་བཀག་གནང་མཁན་དེ་སྤྱི་འཐུས་ཚོགས་གཙོ་སྦྲེལ་པོ་ཡིན་པ་ར་སྤྲོད་གསལ་པོ་བྱུང་། ༢༽ གྲོས་ཚོགས་སྐབས་རྗེས་མའི་ཚོགས་དུས་བདུན་པའི་ཐོག་གང་ལའང་ཁག་དཀྲི་མེད་པའི་ཐོག་ནས་ཁྲིམས་སྒྲིག་བསྐྱར་ཞིབ་འཆར་ཟིན་ཚོགས་ཆུང་གིས་སྤྱི་མོས་ཟིན་པའི་ཁྲིམས་ཡིག་འཆར་ཟིན་ཆ་ཚང་སྤྱི་འཐུས་ལྷན་ཚོགས་ནས་གཏན་འབེབས་གནང་ཐུབ་པའི་ཐུགས་འགན་ཚོགས་གཙོ་སྦྲེལ་པོ་ནས་བཞེས་གནང་དགོས། ༣༽ ད་ལྟའི་བོད་མིའི་སྒྲིག་འཛུགས་འདི་དགྲ་དགའ་གཉེན་སྡུག་གི་གནས་སུ་གྱར་བའི་གནས་སྟངས་འདིར་བོད་མི་མང་སྤྱི་འཐུས་རྣམ་པར་ཁ་ཞེ་མེད་པའི་ཤ་ཚ་དང་ལར་ཞེན་ཞིག་ཡོད་ན། མང་གཙོའི་ཀ་བ་གསུམ་དེ་སྲ་ཐག་ཐག་གཅིག་བཟོ་དགོས་པ་ནི་སྤྱི་འཐུས་ལྷན་ཚོགས་ཀྱི་ལས་འགན་ཆེ་ཤོས་དེ་ཡིན་པར་སོང་། ཉིན་གཅིག་ཡིན་ཡང་སྔ་དགོས་པ་ཞིག་མཐོང་གི་འདུག་ན། ཕྱི་ལོ་ ༢༠༢༤ ཟླ་ ༣ པའི་གྲོས་ཚོགས་སྐབས་ཁྲིམས་སྒྲིག་བསྐྱར་ཞིབ་ཚོགས་ཆུང་གི་འཆར་ཟིན་ཆ་ཚང་གཏན་འབེབས་གནང་ཐུབ་པའི་ཐུགས་འགན་ཆེ་བཞེས་ཡོང་བ་ཞུ་རྒྱུ། སྐབས་དེར་ཡང་ཁྲིམས་སྒྲིག་བསྐྱར་བཅོས་ཇི་བཞིན་མ་གནང་བ་ཡིན་ན། བོད་མི་མང་སྤྱི་འཐུས་ཀྱི་ལས་འགན་མ་གྲུབ་པར་ངོས་འཛིན་ཞུ་རྒྱུ་ཡིན། ཞེས་བཀོད་འདུག
མཇུག་སྡོམ་མཛད་སྒོ་དེའི་སྟེང་དུ་དབུས་གཙང་དང་མདོ་སྨད། ཡུ་རོབ་སྤྱི་འཐུས་བཅས་དང་གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་སྐུ་ཚབ་བཅས་མཉམ་ཞུགས་བྱས་འདུག སྐབས་དེར་ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས། ཉེ་བའི་ལོ་འདི་དག་གི་རིང་བོད་སྤྱི་བའི་ལས་དོན་ཐད་བར་ཆད་ཆེན་པོ་ཞིག་བྱུང་སྟེ། དམངས་གཙོའི་སྒྲིག་འཛུགས་ལ་དཀའ་ངལ་མང་པོ་བྱུང་ཡོད་པ་དངོས་ཡོད་གནས་ཚུལ་དུ་གྱུར་པས། བཞུགས་སྒར་དུ་མི་མང་གི་གོ་སྒྲིག་འོག་ཉིན་མང་པོའི་རིང་སྐུ་ལས་བསྐྱོན་ཡོད་པ་མ་ཟད། ཐེངས་འདིའི་མི་མང་གི་ལས་འགུལ་སྤེལ་སྟངས་དང་ཆ་ཤས་ལེན་སྟངས་ཀྱིས་དམངས་གཙོའི་མིག་དཔེ་ཡག་པོ་ཞིག་བསྟན་ཡོད་ཅིང་། མ་འོངས་པའང་བོད་མི་རིགས་ཀྱི་སྤྱི་བའི་ལས་དོན་ཆེད་དུ་ནང་ཁུལ་འཐེན་འཁྱེར་སོགས་ཀྱི་ཕྱོགས་རིས་སྤངས་ཏེ། དམངས་གཙོ་དང་དྲང་བདེན་གྱི་ལམ་ནས་བསྐྱོད་དགོས་སྐོར་སོགས་བརྗོད་སོང་།
མདོ་སྨད་སྤྱི་འཐུས་པདྨ་མཚོ་ལགས་ཀྱིས། ང་ཚོའི་འབོད་སྐུལ་ལ་གསན་འཇོག་གནང་བའི་ཐོག་ནས་དེ་རིང་ལས་འགུལ་མཚམས་འཇོག་བྱས་པར་ཐུགས་རྗེ་ཆེ་ཞུ་རྒྱུ་དང་། ཁྱེད་རྣམ་པས་གནས་སྟངས་ལ་དཔག་པའི་ཐོག་ནས་གུས་ཞབས་དང་ལྡན་པ་དང་། དམངས་གཙོའི་འགྲོ་ལུགས་དང་མཐུན་པ། ཡུལ་ཁྲིམས་དང་མཐུན་པའི་ཐོག་ནས་ཞུ་འབོད་ཀྱི་ལས་འགུལ་ཚགས་ཚུད་པོ་གནང་བ་དེ། དངོས་གནས་དམངས་གཙོའི་ལམ་ལུགས་གསར་པ་ཞིག་ལ་འགྲོ་བཞིན་པའི་བོད་མི་རིགས་རྣམས་ཀྱིས་དམངས་གཙོའི་གོ་རྟོགས་ཡོད་པ་དེ་བཞིན་གྱིས་འགན་འཁུར་གྱི་ཡོད་པའི་རྣམ་པ་གསལ་པོ་མཐོང་ཡོད་སྐོར་དང་། བཙན་བྱོལ་བོད་མིའི་སྒྲིག་འཛུགས་དང་དམངས་གཙོ་སྲ་བརྟན་ཡོང་སླད་འགན་ཞིག་འཁུར་བར་ཐུགས་རྗེ་ཆེ་ཞུ་རྒྱུ་དང་། མ་འོངས་པར་བོད་གཞིས་བྱེས་མཉམ་འཛོམས་ཡོང་བའི་སྐབས་༧གོང་ས་རྒྱལ་བ་རིན་པོ་ཆེ་མཆོག་གིས་ཐུགས་རེ་ཆེན་པོའི་སྒོ་ནས་སྐུ་དགུང་ལོ་ ༡༦ ནས་ད་ལྟ་བར་དུ་སྐུ་ལས་འཛེམས་མེད་བསྐྱོན་པའི་ཐོག་ནས་བཙུགས་པའི་སྒྲིག་འཛུགས་དེ་དམངས་གཙོའི་ཆ་ལག་ཡོངས་སུ་ཚང་བའི་ཐོག་ནས་བོད་གངས་རི་ལྗོངས་ལ་སྤོ་ཐུབ་རྒྱུའི་གནས་སྟངས་མ་བསླེབས་བར་དུ། བཙན་བྱོལ་ནང་ཡོད་པའི་བོད་མི་རྣམས་ཀྱི་འགན་ཆགས་ཀྱི་ཡོད་ལ། མ་འོངས་པར་དེ་ལྟ་བུའི་འགན་བཞེས་ནས་༧གོང་ས་རྒྱལ་བ་རིན་པོ་ཆེ་མཆོག་ཐུགས་ཕམ་མ་ཡོང་བ་ཞིག་དང་། བོད་མིའི་སྒྲིག་འཛུགས་སྲ་བརྟན་ཡོང་རྒྱུའི་ཆེད་དུ་རྡོག་རྩ་གཅིག་ཏུ་སྒྲིལ་དགོས་སྐོར་སོགས་བརྗོད་སོང་།
གསར་འགོད་པ། དོན་གྲུབ་བཀྲ་ཤིས། བྱམས་པ་ཚེ་རིང་། བསྟན་འཛིན་ཕུར་བུ།
