སྤྱི་འཐུས་གཅིག་དང་གྲོས་ཚོགས།

སྤྱི་ཟུར་ཆབ་བྲག་ལྷ་མོ་སྐྱབས།

སྤྱིར་ན་སྤྱི་དང་བྱེ་བྲག་པ་ལས་སྤྱི་གཙོ་ན་ཡང་། དེ་ཉིད་གོ་ལྡོག་པའི་སྐབས་ཀྱང་ཡོད་པ་ལྟར། ངས་འདིར་ཡང་གྲོས་ཚོགས་དང་སྤྱི་འཐུས་གཅིག་ཅེས་མ་བརྗོད་པར་སྤྱི་འཐུས་གཅིག་དང་གྲོས་ཚོགས་ཞེས་བརྗོད་པ་ཡིན། དེ་ཡང་ཁ་སང་དེ་རིང་གི་ང་ཚོའི་སྤྱི་ཚོགས་ཁྲོད་དུ་ཉེ་ཆར་གྲོས་ཚོགས་འཚོགས་མཚམས་བཞག་པ་དེ་སྤྱི་འཐུས་གཅིག་ལ་བརྟེན་ནས་བྱུང་ཚུལ་ཤུགས་ཆེར་གླེང་ནས་བློ་ཕམ་གྱི་རྣམ་འགྱུར་སྣ་ཚོགས་སྟོན་མཁན་ཧ་ཅང་མང་པོ་ཡོད་པ་རྒྱུ་མཚན་དུ་བྱས་པ་ཡིན། ངས་འདི་ཐེངས་འདིའི་གནད་དོན་གྱི་བྱུང་རིམ་ཇི་བཞིན་གསལ་བོ་མི་ཤེས་མཁན་དང་ནོར་འཁྲུལ་སུས་བཟོས་ངོས་འཛིན་དཀའ་བའི་མི་མང་དཀྱུས་མ་སེམས་གཙང་རིགས་ཞེན་ཅན་ཚོའི་ཆེད་འབྲི་འདོད་བྱུང་།

འཁོན་འཛིང་རང་བཞིན་གྱི་རྙོག་གྲའི་བརྒྱུད་རིམ།

ཟླ་༩་ཚེས་༡༩ གྲོས་ཚོགས་ཀྱི་ལས་ཉིན་དང་པོའི་ཚོགས་ཐུན་གསུམ་པའི་སྐབས། སྐབས་དོན་བརྗོད་གཞི་བོད་ནང་གི་ཛ་དྲག་གནས་སྟངས་ལ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ལ་བགྲོ་གླེང་སྐབས་སུ། སྤྱི་འཐུས་སྨོན་ལམ་མཐར་ཕྱིན་གྱིས་བཀའ་ཁྲི་ཟུར་པ་མཁས་དབང་ཟམ་གདོང་རིན་པོ་ཆེས་གཙོས་མི་སྣ་ཆེ་དྲག་ཁག་ཅིག་གིས་སྤྱི་ཚོགས་དཀྲུག་གི་ཡོད་ཚུལ་གྱི་སྐྱོན་བརྗོད་མང་ཙམ་བྱས་པའི་མཐའ་སྡོམ་ལ། “བོད་ནང་ལ་གདུང་སེམས་མཉམ་སྐྱེད་ཞུ་བའི་ནུས་པ་ང་ཚོར་ཡོད་མ་རེད” ཅེས་བཤད། 

དེ་ནས་སྤྱི་འཐུས་ཟླ་བ་ཕུན་སྐྱིད་ཡར་བཞེངས་ཏེ། གྲོས་ཚོགས་ནང་དུ་མིའི་མིང་བོས་ནས་སྐྱོན་བརྗོད་བྱེད་མི་ཆོག་ཚུལ་བཤད། དེ་ནས་ཡང་སྤྱི་འཐུས་སྨོན་ལམ་མཐར་ཕྱིན་ཡར་བཞེངས་ཏེ། དེ་ཆོག་ཚུལ་བཤད་པ་ཆབས་ཅིག “གནད་དོན་མང་པོ་ཞིག་ལ་དཀྲུགས་ཤིང་མཐོ་ཤོས་རྒྱག་མཁན་དེ་ཁོང་ཆགས་བསྡད་ཡོད་རེད” ཅེས་སྤྱི་འཐུས་ཟླ་བ་ཕུན་སྐྱིད་ལ་སྐྱོན་བརྗོད་བྱས། ཡང་སྤྱི་འཐུས་ཟླ་བ་ཕུན་སྐྱིད་ཀྱིས། དཀྲུགས་ཤིང་ག་རེ་བརྒྱབ་སོང་ཁུངས་སྐྱེལ་དགོས། རྒྱ་མིའི་སོ་བ་ཁྲིད་ནས་ཀ་རྡོར་སྒང་གསུམ་ལ་འགྲོ་མཁན་དེ་ཁྱོད་ཡིན་པ་ཞེས་ཕྱིར་སྐྱོན་བརྗོད་བྱས། དེ་ནས་སྤྱི་འཐུས་སྨོན་ལམ་མཐར་ཕྱིན་གྱིས། སྐད་ཆ་དེ་ཚབས་ཆེན་ཡིན་པས་ཁུངས་སྐྱེལ་དགོས་ཚུལ་བཤད་པ་བཅས་ཁོང་གཉིས་ཀྱིས་ཕན་ཚུན་ཁ་འཛིང་ཤོར་བ་ནི་རྙོག་གྲ་འདིའི་བརྒྱུད་རིམ་ཐོག་མ་རེད།

ཕན་ནུས་མ་ཐོན་པའི་གསལ་བཤད་དང་བགྲོ་གླེང།

དེ་ནས་ཚེས་༢༡ ཚོགས་དུས་ཉིན་༣ པའི་ཚོགས་ཐུན་དང་པོའི་མཇུག་ལ་བདེ་སྲུང་བཀའ་བློན་གྱིས་གནད་དོན་འདིའི་སྐོར་དང་འབྲེལ་ནས་གསལ་བཤད་མང་པོ་ཞིག་གནང་བའི་མདོ་དོན། སྤྱི་འཐུས་སྨོན་ལམ་མཐར་ཕྱིན་དང་རྒྱ་ནག་གཞུང་ཚབ་ཀྱི་མི་སྣ་ཆེ་གོ་མོ་ཞིག་གཉིས་མཇལ་འཕྲད་བྱུང་ཡོད་པའི་གནས་ཚུལ་ཞིག་རྒྱ་གར་གྱི་འབྲེལ་ཡོད་ལས་ཁུངས་ཤིག་བརྒྱུད་དེ་འབྱོར་ཚུལ་ཙམ་བཤད།

དེ་ནས་ཚོགས་ཐུན་གཉིས་པའི་སྐབས་སུ། བཀའ་ཤག་གི་ནང་སྲིད་ལས་ཁུངས་ཀྱི་ལས་སྡོམ་སྙན་ཞུ་དབུ་བཙུགས་མ་ཐག་ཏུ། སྤྱི་འཐུས་ཆོས་གྲགས་རྒྱ་མཚོས་གནད་དོན་དེ་གཙང་མ་མ་བཟོས་པར་གྲོས་ཚོགས་མུ་མཐུད་འགྲོ་བ་འོས་མིན་གྱི་ལས་རིམ་རྣམ་གཞག་བཏོན་པ་དང་སྤྱི་འཐུས་འཇུ་ཆེན་དཀོན་མཆོག་དང་སྤྱི་འཐུས་ཟླ་བ་ཕུན་སྐྱིད་ཀྱིས་ཀྱང་དེ་ལ་རྒྱབ་སྐྱོར་བྱས་ཏེ། མུ་མཐུད་དུ་ཚོགས་ཐུན་གསུམ་པ་དང་བཞི་བཅས་ལ་ཕན་ནུས་མེད་པའི་བགྲོ་གླེང་བྱས་ཏེ་དུས་ཚོད་བསྐྱལ།

དགྲ་དགའ་གཉེན་སྡུག་གི་གྲོས་ཚོགས་མཚམས་འཇོག

ཚེས་༢༢ ཉིན་གྱི་ཚོགས་ཐུན་དང་པོ་དབུ་འཛུགས་སྐབས། ཚོགས་གཙོས། འབྲེལ་ཡོད་སྤྱི་འཐུས་ཁག་ཅིག་ཚོགས་གཙོ་གཞོན་སར་བཅར་ནས། “བདེ་སྲུང་ལས་ཁུངས་ཀྱིས་གནད་དོན་འདི་གཙང་མར་མ་བཟོས་པའི་བར་དུ་གྲོས་ཚོགས་ནང་ལ་ཆ་ཤས་ལེན་གྱི་མིན” ཞེས་བཤད་བྱུང་། གྲོས་ཚོགས་ཀྱི་རྩ་འབོར་གྱི་གསུམ་ཆ་གཉིས་མ་ལོངས་ན་ལས་དོན་བརྩམ་མི་ཆོག་པས་ནམ་ལོངས་སོང་ན་ཚོགས་བརྡ་ཕུལ་ཆོག་ཅེས་བཤད་ནས་གྲོས་ཚོགས་གྲོལ་དགོས་བྱུང། དེ་ཡང་ཚོགས་ཞུགས་མ་བྱས་པའི་སྤྱི་འཐུས་རྣམས་ནི། ཆོས་བརྒྱུད་ཁོང་ནས་དགུ་དང་མདོ་སྟོད་ཁོངས་ནས་བཅུའོ།།

ཚེས་༢༣ སྔ་དྲོར། གྲོས་ཚོགས་མུ་མཐུད་ཚོགས་ཐུབ་ཐབས་སྐོར་དང་། གཞི་རིམ་མི་མང་རེ་འབོད་ཚོགས་པའི་ལས་འགུལ་དང་འབྲེལ་བའི་སྐོར་ནས་ ཉིན་རྒྱབ་ཆུ་ཚོད་༣ པའི་ཐོག་བཞུགས་མོལ་ཚོགས་འདུ་ཞིག་འཚོག་རྒྱུའི་ཚོགས་བརྡ་སྤྱི་འཐུས་སོ་སོར་བཏང་བ་ལ། དབུས་གཙང་དང་མདོ་སྨད་ཁོངས་ཀྱི་སྤྱི་འཐུས་ཕལ་མོ་ཆེ་ཚོགས་བཅར་མ་བྱས་པས་བཞུགས་མོལ་ཚོགས་འདུ་འཚོགས་ཐུབ་མེད། ཚེས་༢༥ ལ་མི་འགྱུར་རྡོ་རྗེ་སོགས་བཞུགས་མོལ་ཚོགས་བཅར་མ་བྱས་པའི་སྤྱི་འཐུས་ཐུན་མོང་ནས་གསར་འགོད་གསལ་བསྒྲགས་ཤིག་སྤེལ་ནས། གྲོས་ཚོགས་ཀྱི་ལས་རིམ་སྒོ་བརྒྱབ་ནས་ཟུར་དུ་བཞུགས་མོལ་ཚོགས་འདུ་སྐོང་བརདོན་ཕན་གང་ཡང་མེད་ཚུལ་གསལ་བཤད་བྱས།

རྒྱ་ཆེའི་མི་མང་གི་བློ་ཕམ་ཆེན་པོ།

སྤྱི་འཐུས སྒེར་བ་ཞིག་གི་རྐྱེན་བྱས་ཏེ་གྲོས་ཚོགས་མཇུག་སྐྱོང་མ་ཐུབ་པའི་བློ་ཕམ། དེའི་མཚུངས་གཞི་རིམ་མི་མང་རེ་འབོད་ཚོགས་པའི་མི་གྲངས་ལྔ་དྲུག་བརྒྱ་ཡས་མས་འཛོམས་ནས། ཐེངས་འདིའི་གྲོས་ཚོགས་སྐབས་སུ་བཅའ་ཁྲིམས་ཀྱི་ཁྲིམས་ཞིབ་པའི་ཆ་རྐྱེན་སྐོར་བསྐྱར་བཅོས་ཀྱིས་གང་མྱུར་ཁྲིམས་ཞིབ་ཁང་བསྐྱར་གསོ་ཡོང་བའི་དགོས་འདུན་སྟོང་བར་གྱུར་པའི་བློ་ཕམ།  སྤྱི་འཐུས་ཁག་ཅིག་གིས་མི་མང་གི་རེ་འབོད་ཞུ་སྐུལ་ཚོགས་འདུ་ལ་ཡང་སྣང་ཆུང་དང་སྐྱོན་བརྗོད་བྱས་པར་བློ་ཕམ།  ལྷག་པར་གྲོས་ཚོགས་ནང་སྤྱི་འཐུས་སྨོན་ལམ་མཐར་ཕྱིན་གྱིས་བདག་ཅག་ལ་དྲིན་དུ་ཆེ་བའི་ཟམ་གདོང་རིན་པོ་ཆེ་མཆོག་ལ་ཉེས་འཛུགས་སྐྱོན་བརྗོད་བྱས་པར་བློ་ཕམ་དང་མ་དགའ་བ་ཆེན་པོ་བྱེད་ཀྱིན་འདུག

མཐའ་དཔྱོད་ནོར་འཁྲུལ་དགུ་རྩེགས།

ཐོག་མར་སྤྱི་འཐུས་སྨོན་ལམ་མཐར་ཕྱིན་གྱིས། བོད་ནང་ལ་གདུང་སེམས་མཉམ་སྐྱེད་ཀྱི་གཞུང་འབྲེལ་གྲོས་ཆོད་ལ་བགྲོ་གླེང་གི་སྐབས་སུ། བསམ་བཞིན་དུ་བཀའ་ཁྲི་ཟུར་བ་ཟམ་གདོང་རིན་པོ་ཆེ་ལ་ནག་ཉེས་བཀལ་ནས་མི་སྣ་གཙོ་གྲས་ཁག་ཅིག་ལ་ཟུར་ས་བྱས་པ་དེ་ནི་རྟེན་འབྲེལ་འགོ་ནས་འཆུགས་པའི་ནོར་འཁྲུལ་དང་པོ།

དེ་ནས་སྤྱི་འཐུས་ཟླ་བ་ཕུན་སྐྱིད་རླུང་ལངས་ཏེ། སྨོན་ལམ་མཐར་ཕྱིན་ལ། རྒྱ་མིའི་སོ་བ་ཁྲིད་ནས་འགྲོ་མཁན་ཞེས་སྐྱོན་བརྗོད་པ་ནི་རྩི་ཤིང་ལ་མེ་སྦར་བའི་ནོར་འཁྲུལ་གཉིས་པ། དེ་རྗེས་བདེ་སྲུང་བཀའ་བློན་གྱིས་གྲོས་ཚོགས་ནང་ལ་གསང་བའི་གནད་དོན་དང་འབྲེལ་བ་དེར་གསལ་བཤད་རགས་བཤད་ཅིག་བྱས་ཏེ་གནད་དོན་ཚབས་ཇེ་ཆེར་སོང་བ་ནོར་འཁྲུལ་གསུམ་པ།

དེའི་ཕྱིན་གྲོས་ཚོགས་ཀྱི་ལས་རིམ་འགོ་བཙུགས་མ་ཐག་སྤྱི་འཐུས་ཆོས་གྲགས་རྒྱ་མཚོ་དང་འཇུ་ཆེན་ཆོས་སྒྲོན་སོགས་སྤྱི་འཐུས་འགའ་གཅིག་རྒྱབ་གཉིས་ལངས་ཀྱིས་གནད་དོན་དེ་གཙང་མ་མ་བཟོས་ན་གྲོས་ཚོགས་ཀྱི་ལས་རིམ་མཇུག་སྐྱོང་མི་འོས་ཚུལ་གྱི་ཉོག་བཤད་ལུང་བ་གང་བརྒྱབ་པ་ནི་ནོར་འཁྲུལ་བཞི་བ།

དེའི་ཕྱི་ཉིན་གྲོས་ཚོགས་ཀྱི་ཚོགས་འདུའི་ལས་རིམ་འགྲོ་སྟངས་དང་མི་མཐུན་པར་སྤྱི་འཐུས་སྒེར་བ་འགའ་ཚོགས་གཙོ་གཞོན་སར་བཅར་ནས་གནད་དོན་དེ་གཙང་སེལ་མ་བྱས་བར་དུ་ཚོགས་འདུར་ཞུགས་ཀྱི་མིན་ཞེས་གྲོས་ཚོགས་ཀྱི་གྲངས་ཚད་མ་ལོངས་པ་དེ་ནོར་འཁྲུལ་ལྔ་བ།

དེ་ནས་ཚོགས་གཙོ་གཞོན་གཉི་གས་དེ་དག་ལ་དེ་ལྟར་བྱས་ན་མི་འོས་ཚུལ་གྱི་ལམ་སྟོན་གང་ཡང་མ་གནང་བར་ཚོགས་འདུ་ཚོགས་མ་ཐུབ་པ་ནི་ནོར་འཁྲུལ་དྲུག་པ།

དེའི་ཕྱི་ཉིན། བཞུགས་མོལ་ཚོགས་འདུ་ཞིག་བསྐང་རྒྱུའི་ཚོགས་བརྡ་བཏང་བར་སྤྱི་འཐུས་གང་མང་ཞིག་མ་བཅར་བ་དེ་ཡང་བཀའ་བརྡ་མ་བརྩིས་པ་དང་ཕན་མིན་ཅི་འགྱུར་ལ་ཚོད་ལྟ་མ་བྱས་པའི་ནོར་འཁྲུལ་ཏེ་བདུན་པ།

མ་གཞི་ནས། བདེ་སྲུང་ལས་ཁུངས་ནས་སྔོན་ཚུད་ནས་དོགས་གཞི་ཅན་གྱི་གནད་དོན་དེ་ཤེས་ཡོད་པས། གྲོས་ཚོགས་མ་འཚོགས་གོང་ལ་གནས་ཚུལ་གསལ་བཟོའམ་ཡང་ན་འབྲེལ་ཡོད་ཚོགས་གཙོ་གཞོན་རྣམ་པར་གནས་ཚུལ་མ་ཞུས་པ་ནི་གནད་དོན་འདི་རིགས་ལ་སྣང་ཆུང་བྱས་པའི་ནོར་འཁྲུལ་ཏེ་བརྒྱད་པ།

སྤྱིར་ན་སྤྱི་འཐུས་བྱེ་བྲག་པ་ནག་ཉེས་རང་བཞིན་གྱི་གནད་དོན་ནམ་དོགས་པ་ཞིག་བྱུང་ན་སྤྱི་འཐུས་དེ་རང་ཉིད་གྲོས་ཚོགས་ལས་ཕྱིར་བཤོལ་བྱ་བའམ། ཁོ་རང་ཟུར་བཀག་བརྟག་དཔྱད་བྱེད་དགོས་པ་ལས་དོགས་གཞི་ཅན་དེ་གྲོས་ཚོགས་ནང་ལ་བཞག་ནས་མུ་མཐུད་རྩོད་གླེང་བྱེད་པ་དང་། དེའི་ཆེད་དུ་གྲོས་ཚོགས་མཚམས་འཇོག་བྱས་པ་ནི་བླུན་རྟགས་ཚབས་ཆེན་གྱི་ནོར་འཁྲུལ་ཏེ་དགུ་བའོ།།

སུ་ལ་མ་དགའི་བསམ་པ་མེད་ན་ཡང། །

སུ་དང་གང་ལ་ཕོག་པར་ངེས་པས་ན།།

གཟུར་གནས་མཁས་པ་ཁོ་ནར་རེ་བ་ལས། །

ཕྱོགས་ལྷུང་རྨོངས་པའི་གྲོགས་ཚོར་འཁང་ར་མེད།།

མཆན། རྩོམ་ཡིག་འདི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་ཚུལ་ཡིན་པའི་ངེས་པ་མེད།