ཤེས་རིག་བཀའ་བློན་ཐར་ལམ་སྒྲོལ་མ་མཆོག་ནས་ལེགས་ཉེས་བླང་དོར་འབྱེད་ཐུབ་པའི་སྙིང་སྟོབས་ལྡན་པའི་ཁར་ཕྱོགས་ལྷུང་མེད་ཚེ་དངོས་ཡོད་ཀྱི་ཐོག་ནས་ཤེས་ཡོན་ལྡན་པ་ཞིག་ཆགས་ཡོད་སྐོར་གསུངས་སོང་།
དེ་རིང་ཕྱི་ཚེས་ ༦ ནས་ཉིན་བརྒྱད་རིང་གོ་སྦེལ་པུར་བོད་ཕྲུག་ཁྱིམ་སྡེའི་ཤེས་རབ་འོད་སྣང་ཚོགས་ཁང་དུ། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག རྒྱ་གར་རྒྱལ་ཡོངས་ཀྱི་བོད་པའི་སློབ་གྲྭ་ཁག་གི་བར་རྩོམ་རིག་དང་རིག་གཞུང་འདུ་འཛོམས་འཚོགས་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ནོར་འཛིན་སྒྲོལ་མ་མཆོག་དང་། ཁེ་ན་ཌ་རོགས་ཚོགས་ཀྱི་སྐུ་ཚབ་སྐལ་བཟང་དབང་འདུས་ལགས། ཉེ་འཁོར་སློབ་གྲྭ་ཁག་གི་ངེས་སྟོན་པ་དང་།སློབ་སྤྱི། དགེ་རྒན་བཅས་དྷ་ས་ཁུལ་གྱི་སློབ་གྲྭ་ ༨ ཀྱི་སློབ་ཕྲུག་གྲངས་ ༡༩༧ དང་། རྡེ་ར་རྡེན་ཁུལ་གྱི་སློབ་ཕྲུག་ ༡༤༢ དང་། ལྷོ་ཕྱོགས་ཁུལ་གྱི་སློབ་གྲྭ་ ༦ གི་སློབ་ཕྲུག་གྲངས ༡༣༤ ། དེ་བཞིན་བྱང་ཤར་ཁུལ་སློབ་གྲྭ་ ༦ གི་སློབ་ཕྲུག་གྲགས་ ༡༣༨ བཅས་ཁྱོན་བསྡོམས་སློབ་ཕྲུག་གྲངས་ ༦༠༥ མཉམ་ཞུགས་གནང་བཞིན་ཡོད་འདུག
སྐབས་དེར་ཤེས་རིག་བཀའ་བློན་ཐར་ལམ་སྒྲོལ་མ་མཆོག་གིས། འདུ་འཛོམས་འདི་ནི་ཤེས་ཡོན་སྲིད་ཇུས་བཞིན་འགྲན་བསྡུར་གྱི་རྣམ་པ་མེད་པ་རེད། དེའི་ཐོག་ནས་སློབ་གྲྭ་ནང་ཁུལ་གྱི་ཤེས་ཡོན་གྱི་ལྡིང་ཆ་བསྐྲུན་པར་གལ་གནད་དུ་འཛིན་གྱི་ཡོད། ༧གོང་ས་མཆོག་གི་བཀའ་དྲིན་ལ་བརྟེན་ནས་བཙན་བྱོལ་དུ་བོད་པའི་སློབ་གྲྭ་མང་པོ་བཙུགས་ཐུབ་ཡོད་ཅིང་། དེང་སང་བོད་ནང་དུ་རྒྱ་གཞུང་གིས་བོད་ཀྱི་བྱིས་པ་ལོ་བཞི་ནས་གཏན་འཇགས་སློབ་གྲྭར་བཙན་འཁྲིད་བྱས་ཏེ། བོད་ཀྱི་སྐད་ཡིག་རྩ་བ་ཉིད་ནས་སྦྱངས་ས་མེད་པའི་རྒྱ་སྒྱུར་སློབ་གསོ་ལག་བསྟར་བྱེད་བཞིན་ཡོད་པས། རྒྱ་གར་གཙོས་ཕྱི་རྒྱལ་གྱི་རང་དབང་ལུང་པའི་ནང་ཡོད་པའི་བོད་པའི་སློབ་ཕྲུག་རྣམས་ཀྱིས་བོད་ཀྱི་སྐད་ཡིག་རྒྱུད་འཛིན་བྱེད་རྒྱུ་འོས་འགན་ཆགས་བསྡད་ཡོད། ད་ལྟ་ཁྱེད་ཚོའི་མདུན་དུ་སློབ་གསོའི་མདུན་ལམ་སྟོན་གནང་མཁན་རྣམས་སྔོན་མ་ཁྱེད་ཚོ་ནང་བཞིན་སློབ་གྲྭ་འདི་འདྲའི་ནང་དུ་སློབ་སྦྱོང་བྱེད་པའི་གོ་སྐབས་རག་པའི་བཀའ་དྲིན་ལས་འབྲས་བུ་ཞིག་རེད། མི་རབས་རྒན་པ་རྣམས་རྒས་འགྲོ་བཞིན་ཡོད་པས་ཁྱེད་རྣམས་ཀྱི་འོས་འགན་གལ་ཆེན་ཞིག་ཏུ་གྱུར་ཡོད།
ང་ཚོའི་ཤེས་ཡོན་སྲིད་ཇུས་ཀྱི་ནང་དུ་འགྲན་བསྡུར་གྱི་རྣམ་པ་མེད་པ་རེད། ཤེས་ཡོན་ཡར་རྒྱས་གཏོང་བར་ཡིན་གཅིག་འགྲན་བསྡུར་བྱེད་དགོས་པའི་བསམ་བློ་དེ་ནོར་འཁྲུལ་རེད། ངས་སློབ་གྲྭ་ཁ་ཤས་ནང་དུ་རང་ཉིད་ཀྱིས་རང་ཉིད་ལ་འགྲན་བསྡུར་བྱས་ཟེར་གྱི་ཡོད། རང་ཉིད་ཀྱིས་རང་ཉིད་ལ་ཇི་ལྟར་འགྲན་བསྡུར་བྱེད་དགོས་ཟེར་ན་ཞོགས་པ་ནས་དགོང་མོ་བར་དུ་་རང་ཉིད་ཀྱིས་གང་ཤེས་པའི་རྟོགས་ཞིབ་དེ་དགོས་ཀྱི་ཡོད། གཞན་པར་འགྲན་བསྡུར་བྱེད་དགོས་ཀྱི་མེད་པ་དང་། ཉིན་རྒྱུན་ཁྲོད་རང་ཉིད་ཡར་རྒྱས་གཏོང་བའི་སྤོབས་པ་དགོས། སློབ་སྦྱོང་བྱ་རྒྱུའང་ཡིག་ཚད་གྲུབ་འབྲས་ཐོན་རྒྱུ་ཙམ་མ་རེད། མ་འོངས་བར་སོ་སོའི་སྤྱི་ཚོགས་ཀྱི་ཞབས་འདེགས་བསྒྲུབ་ཐུབ་པ་བྱ་དགོས་པའི་ཀུན་སློང་འཁུར་དགོས།
ཡང་བཀའ་བློན་མཆོག་ནས། སྤྱིར་སློབ་གྲྭའི་ནང་དུ་སྒྲིག་ལམ་ཡོད་ཀྱང་། སློབ་ཕྲུག་རང་ཉིད་ལ་རང་ཉིད་ཀྱི་སྒྲིག་ལམ་དགོས་པ་ཧ་ཅང་གལ་ཆེན་རེད། སྒྲིག་ལམ་ཟེར་བ་སློབ་གྲྭའི་ནང་དུ་འཁུར་དགོས་པ་ཙམ་མ་རེད། མི་ཚེ་གང་བོའི་ནང་དུ་འཁྱེར་དགོས་པ་ཞིག་རེད། མི་ཚེ་ནང་དུ་དོན་དང་ལྡན་པའི་ལས་ཀ་བྱེད་ཐུབ་པའི་ནུས་པ་དེ་རང་ངོས་ནས་སྒྲིག་ལམ་འཁྱེར་རྒྱུ་གལ་ཆེན་རེད། ང་རང་སློབ་གྲྭ་ཁག་ཏུ་ཕྱིན་པའི་སྐབས་འཛིན་རིམ་དྲུག་པའི་ཡན་ཆད་ལ་ཤེས་ཡོན་སྲིད་ཇུས་མེད་པའི་ཚོར་བ་སླེབས་བྱུང་། བོད་ཀྱི་སྐད་ཡིག་ཐོག་ནས་ཤེས་ཡོན་བསླབ་པ་གཅིག་པོ་ཤེས་ཡོན་སྲིད་ཇུས་མ་རེད། སློབ་སྦྱོང་ག་འདྲ་བྱས་ཀྱང་དམིགས་ཡུལ་ལེགས་ཉེས་འབྱེད་ཐུབ་པ་དེ་རེད། ཡག་སྡུག་གི་བླང་དོར་འབྱེད་མ་ཤེས་ཚེ་ཡིག་ཚད་ཨང་དང་པོ་བླངས་ཀྱང་ཡ་མཚར་སྐྱེ་རྒྱུ་གང་ཡང་མེད། ལེགས་ཉེས་བླང་དོར་འབྱེད་ཐུབ་པའི་ཐོག་ཏུ་སྙིང་སྟོབས་ཀྱང་དགོས་པ་རེད། ཕ་མ་སྤུན་མཆེད་ཡིན་ཡང་ཕྱོགས་ལྷུང་མེད་པར་ལེགས་ཉེས་འབྱེད་ཐུབ་ཚེ། དངོས་ཡོད་ཀྱི་ཐོག་ནས་ཤེས་ཡོན་ལྡན་པ་ཞིག་ཆགས་ཡོད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
