བོད་ཀྱི་གསར་འགོད་མཐུན་ཚོགས་ཀྱི་སྐབས་བཅུ་བའི་ལས་བསྡོམས་སྒྲོག་སྦྱངས་དང་སྐབས་ ༡༡ པའི་རྒྱུན་ལས་མང་གཙོའི་འོས་བསྡུའི་ལམ་ནས་བདམས་ཐོན་བྱུང་སོང་།
ཁ་སང་ཕྱི་ཚེས་ ༦ ཉིན་གྱི་ཕྱི་དྲོར་དྷ་རམ་ས་ལའི་མེག་གྷན་དྷ་རམ་ཀོ་ཊི་ལམ་ཟུར་དུ་ཡོད་པའི་ (Lazy Monk) ཇ་ཁང་དུ་མང་གཙོའི་ཀ་བ་བཞི་བ་སྟེ། བོད་ཀྱི་གསར་འགོད་མཐུན་ཚོགས་ཀྱི་ཚོགས་མི་གསར་འགོད་པ་རྣམས་ལྷན་འཛོམས་ཐོག གསར་འགོད་མཐུན་ཚོགས་ཀྱི་རྒྱུན་ལས་སྐབས་བཅུ་པའི་ལས་བསྡོམས་སྒྲོག་སྦྱངས་དང་། མཐུན་ཚོགས་ཀྱི་མ་འོངས་ལས་དོན་བྱེད་ཕྱོགས། གསར་འགོད་ལས་རིགས་དང་འབྲེལ་བའི་བསམ་ཚུལ་བསྡུ་ལེན་དང་གྲོས་བསྡུར་གནང་བ་མ་ཟད། སྐབས་བཅུ་གཅིག་པའི་རྒྱུན་ལས་འོས་བསྡུའི་ལམ་ནས་གསར་འདེམས་གནང་སོང་།
སྐབས་དེར་བོད་ཀྱི་གསར་འགོད་མཐུན་ཚོགས་ཀྱི་སྐབས་ ༡༡ པའི་རྒྱུན་ལས་འོས་བསྡུ་གནང་བའི་ཁྲོད། བོད་ཀྱི་དུས་བབ་གསར་ཁང་གི་རྩོམ་སྒྲིག་པ་གཞོན་པ་དང་གསར་འགོད་པ་སྐལ་བཟང་སྦྱིན་པ་ལགས་ལ་འོས་གྲངས་ ༢༥ དང་། ཨ་རིའི་རླུང་འཕྲིན་ཁང་གི་གསར་འགོད་པ་སྐལ་བཟང་འཇིགས་མེད་ལགས་ལ་འོས་གྲངས་ ༡༧། ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་བློ་བཟང་དགེ་ལེགས་ལགས་ལ་འོས་གྲངས་ ༡༢། ཕ་ཡུལ་གསར་ཁང་གི་གསར་འགོད་པ་བསྟན་འཛིན་ཉི་སྒྲོན་ལགས་ལ་འོས་གྲངས་ ༡༢ ཐོབ་སྟེ། བོད་ཀྱི་གསར་འགོད་མཐུན་ཚོགས་ཀྱི་སྐབས་ ༡༡ པའི་ཚོགས་གཙོ་སྐལ་བཟང་སྦྱིན་པ་ལགས་དང་། ཚོགས་གཞོན་སྐལ་བཟང་འཇིགས་མེད་ལགས། དངུལ་གཉེར་དང་རྩིས་པ་གཅིག་ལྕོགས་བློ་བཟང་དགེ་ལེགས་ལགས། ལས་འཆར་འབྲེལ་མཐུད་པ་བསྟན་འཛིན་ཉི་སྒྲོན་ལགས་བཅས་བསྐོ་བཞག་བྱུང་སོང་།
བོད་ཀྱི་གསར་འགོད་མཐུན་ཚོགས་ནི་ཕྱི་ལོ་ ༡༩༩༧ ལོར་བཞུགས་སྒར་དྷ་རམ་ས་ལར་ཆེད་འཛུགས་གནང་ཡོད་པ་དང་། ཚོགས་པ་འདི་ནི་རྒྱ་གར་གཞུང་ལ་དེབ་སྐྱེལ་བྱས་ཡོད་པའི་ཚོགས་པ་ཞིག་ཡིན་པ་མ་ཟད། ད་ལྟའི་ཆར་མཐུན་ཚོགས་ཀྱི་ཁོངས་གཏོགས་བཙན་བྱོལ་ནང་གི་གསར་ཁང་ཁག་ ༧ ནས་ཁྱོན་བོད་པའི་གསར་འགོད་པ་ ༣༣ ཚོགས་ཁོངས་སུ་ཞུགས་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
དུས་བབ་གསར་ཁང་གི་རྩོམ་སྒྲིག་པ་གཞོན་པ་དང་གསར་འགོད་པ་སྐལ་བཟང་སྦྱིན་པ་ལགས་གཙོས་གསར་འགོད་མཐུན་ཚོགས་ཀྱི་རྒྱུན་ལས་གསར་བ་རྣམ་པར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། གསར་འགོད་ལས་རིགས་ཀྱི་ལམ་བུ་འདི་ནས་རྣམ་པ་ཚོས་བོད་མིའི་སྤྱི་ཚོགས་ཁྲོད་དུ་གནས་ཚུལ་དང་གསར་འགྱུར་ཚང་མ་དྲང་བདེན་དང་དོན་དངོས་ལ་ཁ་ཕྱོགས་པར་གྱུར་ཅིག